MALUNGKOT ang paparating na Pasko para sa may 133 pamilya matapos tupukin ng apoy ang kanilang mga bahay sa naganap na sunog sa Malabon City, Sabado ng gabi.
Batay sa inisyal na imbestigasyon, Sabado ng gabi nang sumiklab ang sunog sa Sto. Niño Barangay Concepcion, na mabilis na kumalat ang apoy sa magkakatabing mga kabahayan.
Mabilis namang rumesponde sa lugar ang mga tauhan ng Bureau of Fire Protection (BFP) at mga fire volunteer na nagtulong-tulong sa pag-apula sa sunog hanggang tuluyang idineklarang fireout.
Wala namang napaulat na nasawi sa insidente habang inaalam pa ng mga Arson investigator ang naging sanhi ng sunog at kung magkanong halaga ng ari-arian ang tinupok ng apoy.
Kaagad namang nagtungo sa lugar ang Malabon City Disaster Response Team at City Social Welfare and Development Department (CSWDD) upang magbigay ng agarang tulong, kabilang ang relief assistance, psychosocial support, at iba pang kinakailangang serbisyo para sa mga apektadong residente.
Pansamantala tumutuloy sa apat na evacuation centers ang mga nasunugan kabilang 59 pamilya sa Concepcion Elem School, 30 pamilya sa Amang Rodriguez Elementary School, 29 pamilya sa Concepcion Technical Vocation School at 15 pamilya sa Sto. Niño Multipurpose Hall.
Personal din na nagtungo sa mga evacuation center si Mayor Jeannie Sandoval upang kamustahin ang mga apektadong pamilya saka namahagi siya ng mga hot meals, banig, pananghalian at nag-set up malinis na inuming tubig.
Aniya, asahan pa ang mga karagdagang serbisyo at tulong mula sa lokal na pamahalaan sa mga susunod na araw. “Hanggat nandito kayo sa evacuation center hindi namin kayo pababayaan” pahayag ni Mayor Sandoval.
Pinasalamatan din ni Mayor Jeannie ang mga first responders mula sa BFP, CSWD, PNP, Malabon Disaster Risk Reduction Management Office at Philippine Red Cross sa maagap at ligtas na pagresponde sa nangyaring sunog. (Richard Mesa)

NAGSASAGAWA ng imbestigasyon ang Land Transportation Office (LTO) tungkol sa viral post sa Facebook na inilathala ng account na “MR Lee”, na nagpapakita ng isang umano’y LTO personnel na nagmamaneho ng isang motorsiklo na hindi nakasuot ng helmet sa Palawan.

Sa inisyal na pagsusuri, natukoy ng LTO ang pagkakakilanlan ng registered owner ng motorsiklo na hindi pa umano natatapos ang aplikasyon para sa driver’s license nito.

Dahil ang insidente ay nasa hurisdiksyon ng LTO Region IV-B, inutusan ni LTO Chief, Assistant Secretary Markus V. Lacanilao ang Intelligence and Investigation Division (IID), na atasan si Atty. Esteban M. Baltazar, Jr., Regional Director ng LTO Region IV-B, na magsumite ng report para sa agarang angkop na aksyon sa naturang insidente.

Hinihiling din kay RD Baltazar, sa pamamagitan ni Ms. Myrna Ocampo, District Head ng LTO Palawan District Office, na ibigay ang ulat tungkol sa mga aksyong ginawa ng kanilang opisina sa loob ng sampung (10) araw mula sa pagkatanggap ng endorsement letter mula sa LTO Central Office.

Nagpaalala si Asec. Lacanilao na mahigpit na ipinatutupad ng LTO ang disiplina sa lansangan hindi lamang sa publiko kundi maging sa mga kawani at tauhan ng ahensya. Ang lahat ng insidente ng paglabag sa mga alituntunin ng LTO ay isasailalim sa seryosong pagsisiyasat at angkop na pagpapatupad ng batas. (PAUL JOHN REYES)