NAARESTO ng mga operatiba ng PDEA 7, katuwang ang PNP Regional Intelligence Unit 7, ang isang drug personality na kabilang sa regional target list ng PDEA-PNP sa pamamagitan ng isinagawang buy-bust operation sa Benedicto Street, Barangay Tejero, Cebu City, noong Setyembre 3, 2025, bandang alas-2:30 ng hapon.

Kinilala ni PDEA 7 Regional Director Joel B. Plaza ang suspek bilang si alyas Jun, 42 taong gulang, drayber sa barangay hall, at residente ng Barangay Carreta, Cebu City.

Nakumpiska sa operasyon ang limang (5) pakete ng hinihinalang shabu na may bigat na humigit-kumulang 250 gramo at tinatayang nagkakahalaga ng ₱1,700,000 sa pamilihan, kasama ang buy-bust money at iba pang ebidensiyang hindi droga.

Isinailalim na sa chemical analysis at wastong disposisyon sa PDEA 7 Regional Office Laboratory ang mga nakumpiskang ebidensya.

Ang pagbebenta ng ipinagbabawal na droga, anuman ang dami at kalidad nito, ay may kaukulang parusang habambuhay na pagkabilanggo at multang mula ₱500,000 hanggang ₱10M. (PAUL JOHN REYES)

BILANG bahagi ng pagdiriwang ng Pambansang Buwan ng Kasaysayan, muling binuhay at itinayo ng Pamahalaang Lungsod ng Navotas ang rebulto ng Datu ng Nayon ng Butas na si Omaghicon. Pinangunahan ni Mayor John Rey Tiangco ang unveiling ng Omaghicon statue sa Navotas Citywalk and Amphitheater sa C4 na kanyang permanenteng tahanan na sinamahan ng pagtatanghal ng buhay at kamatayan ni Omaghicon mula sa Tanghalang Suhay Dance Company ng Tanza National High School. (Richard Mesa)

KULONG ang 24-anyos na kelot matapos i-reklamo ng pananakit, pagbabanta at panunutok ng baril sa kanyang live-in partner sa Malabon City.

Ayon kay Malabon Police Chief P/Col. Allan Umipig, kasong paglabag sa R.A 10591 (Comprehensive Law on Firearms and Ammunition Regulation Act) at paglabag sa Art. 282 of the RPC (Grave Threat) ang isinampa nila laban sa suspek na si alyas “Jeff”, batilyo.

Sa reklamo sa pulisya ng biktimang si alyas “Lona”, 35, dakong alas-3:30 ng madaling araw nang maganap umano ang pananakit sa kanya ng suspek sa loob ng kanilang bahay sa Phase 3, Area 1, Brgy., Longos.

Hindi pa nakuntento, pinagbantaan at tinutukan pa umano siya ng baril ng suspek na dahil sa labis na takot ay humingi na ng tulong ang biktima sa kay P/Capt. Lalaine Almosa, Acting Commander ng Malabon Police Patrol Base 7.

Kaagad namang nagpunta ang mga tauhan ni Capt. Almosa sa bahay ng mag live-in partner subalit, hindi na nila naabutan si alyas Jeff habang kusang pinapasok sila ng biktima at itinuro sa kanila ang kung saan itinago ng suspek ang baril nito.

Nang buksan ang drawer na itinuro ng biktima, tumambad sa mga pulis ang isang kalibre .357 Magnum revolver na kargado ng apat na bala kaya kinumpiska nila ito.

Sa isinagawang follow-up operation ng pulisya, naaresto ang suspek sa paglabag sa R.A 9262 at nang hanapan siya ng kaukulang mga dokumento hinggil sa legalidad ng kanyang baril ay walang naipakita si ‘Jeff’ kaya madagdagan pa ang kanyang kaso ng paglabag sa R.A 10591. (Richard Mesa)

PINURI ni Department of Education (DepEd) Secretary Juan Edgardo “Sonny” Angara ang mga inisyatibo ni Caloocan City District 2 Congressman Egay Erice para sa sektor ng edukasyon sa kanyang distrito.

Sa isinagawang budget briefing ng Kamara ng DepEd, ibinahagi ni Cong. Erice ang ilan sa mga natuklasan mula sa ginanap na Education Summit sa Caloocan, kabilang na ang lumalalang isyu ng mga magulang na tila nawawalan na ng interes sa paggabay sa kanilang mga anak sa pag-aaral.

Ayon sa kay Cong. Erice, ito ay isa sa mga pangunahing problemang kailangang tugunan ng DepEd.

Bilang tugon naman ni Secretary Angara, kinilala niya ang mga pagsisikap ni Rep. Erice at sinabing mahalagang maipagpatuloy ang mga ganitong inisyatibo sa iba pang bahagi ng bansa.

Nagbiro pa si Angara na inimbitahan niya si Dr. Milwida “Nene” Guevara ng Synergeia Foundation na maging bahagi ng DepEd upang mas mapalawak ang tulong sa mga lokalidad gaya ng Caloocan.

“𝘠𝘰𝘶 𝘮𝘦𝘯𝘵𝘪𝘰𝘯𝘦𝘥 𝘵𝘩𝘦 – 𝘔𝘢’𝘢𝘮 𝘕𝘦𝘯𝘦 𝘎𝘶𝘦𝘷𝘢𝘳𝘳𝘳𝘢 — 𝘸𝘦 𝘢𝘤𝘵𝘶𝘢𝘭𝘭𝘺 𝘢𝘴𝘬 𝘩𝘦𝘳 𝘵𝘰 𝘫𝘰𝘪𝘯 𝘵𝘩𝘦 𝘥𝘦𝘱𝘢𝘳𝘵𝘮𝘦𝘯𝘵 (𝘌𝘥𝘶𝘤𝘢𝘵𝘪𝘰𝘯) 𝘱𝘢𝘳𝘢 𝘮𝘢𝘴 𝘨𝘶𝘴𝘵𝘰 𝘯’𝘺𝘢 𝘵𝘶𝘮𝘶𝘭𝘰𝘯𝘨 𝘴𝘢 𝘊𝘢𝘭𝘰𝘰𝘤𝘢𝘯 𝘢𝘵 𝘴𝘢 𝘪𝘣𝘢𝘯𝘨 𝘭𝘶𝘨𝘢𝘳,” ani Angara. (Richard Mesa)

PINABULAANAN  ng Bureau of Immigration (BI) na nakalabas na ng bansa ang mag-asawang Discaya.

Nilinaw ng Bureau of Immigration (BI) ang ulat na nakalabas na ng bansa ang mag-asawang Sara at Pacifico Discaya.

Ang mag-asawang Discaya ay iniuugnay sa maanomalyang flood control project sa bansa at kabilang sa listahan ng mga nasa ilalim ng Immigration Lookout Bulletin Order (ILBO).

Ito’y kasunod ng mga ulat online na umano’y bumiyahe na ang pamilya discaya patungong Hanoi, Vietnam.

Ayon kay Immigration Spokesperson Dana Sandoval, wala rin silang impormasyon kung nasa ibang bansa na rin ang mga kaanak ng mag-asawa.

Ibinunyag din ni Justice Secretary Jesus Crispin Remulla na may ilang indibidwal nang nasa labas ng bansa kahit nasa ilalim ng ILBO, pero karamihan aniya ay nananatili pa rin sa Pilipinas.

Nilinaw naman ng DOJ na ang ILBO ay para lamang sa monitoring at iba sa Hold Departure Order (HDO) na iniisyu ng korte.

Pero kung lalabas ng bansa ang mga sangkot, tiyak aniya na marami silang kailangang saguting katanungan. (Gene Adsuara)

BINUKSAN na ang President Corazon C. Aquino Hospital o mas kilala sa Baseco Hospital na matatagpuan sa Tondo, Manila.

Nitong Biyernes, September 5, pinasinayaan na ni Manila Mayor Isko Moreno-Domagoso ang inagurasyon ng President Corazon C. Aquino General Hospital .

Ito ang ikapitong pampublikong ospital na pinondohan at pinatatakbo ng Pamahalaang Lungsod ng Maynila. Matatagpuan ito sa loob ng Baseco Compound sa Barangay 649 at may 50-bed capacity, kumpletong departments, emergency room, digital x-ray, at centralized oxygen supply.

Tinatayang aabot sa 80,000 residente ng Baseco at Intramuros ang makikinabang dito. Ayon kay Mayor Isko, simbolo ito ng social justice at “kalayaan sa kahirapan” para sa komunidad.

Ayon kay Manila Health Department (MHD) OIC Dra. Grace Padilla, mayroong 50 bed capacity ang hospital ngunit asahan aniya na madaragdagan pa ito pagsapit ng Disyembre sa tulong na rin ng Department of Health (DOH).

Pinasalamatan din ni Mayor Isko ang dating Pangulong Corazon Aquino na nagsilbing inspirasyon sa pangalan ng ospital bilang simbolo ng demokrasya.

Dagdag pa ng alkalde, pangunahing prayoridad ng lungsod ang minimum basic needs tulad ng pabahay, edukasyon, kalusugan at trabaho—hindi lamang mga proyektong palamuti, kundi mga programang tunay na nakakaangat sa buhay ng tao. (Gene Adsuara)

MAGKAKASAMANG isinelda ang 11 katao, kabilang ang apat drug suspects matapos maaresto ng pulisya sa magkahiwalay na anti-illegal gambling operations sa Valenzuela City.

Sa report ni PCpl Christopher Quaio kay Valenzuela Police Acting Chief P/Col. Joseph Talento, dakong alas-5:15 ng hapon nang maaktuhan ng mga tauhan ng Patrol Base 2 ang tatlong lalaki na nagsusugal ng ‘cara y cruz’ sa Lower Tibagan Compound, Brgy. Gen T De Leon.

Nasamsam sa kanila ang tatlong peso coins na gamit bilang ‘pangara’, bet money at isang plastic sachet ng hinihinalang shabu na nakumpiska kay alyas “Jayson”, 27.

Alas-8:20 ng gabi nang mahuli naman sa akto ng mga tauhan ng Patrol Base 4 sa Pinagpala Ext., Bukid Pinalagad, Brgy. Malinta ang dalawang kelot na abala sa paglalaro umano ng ‘cara y cruz’. Nakuha sa kanila ang bet money, tatlong peso coins ‘pangara’ at isang plastic sachet ng umano’y shabu na nasamsam kay alyas “Matt”, 24.

Sa Brgy., Ugong, huli rin sa akto ng mga tauhan ng Patrol Base 8 ang tatlong lalaki na nagka-cara y cruz sa Building 16 ng AMVA Homes dakong alas-5:10 ng hapon. Nasamsam sa kanila ang bet money, tatlong peso coins ‘pangara’ at isang plastic sachet ng hinihinalang shabu at nakuha kay alyas “Gil’, 42.

Samantala, tiklo naman sa mga tauhan ng Patrol Base 6 ang tatlong indibidwal nang maabutan na naglalaro ng sugal na ‘cara y cruz’ sa gilid ng basketball court sa I. Marcelo St., Brgy., Malanday. Nakumpiska sa kanila ang tatlong peso coins ‘pangara’ at bet money habang ang isang plastic sachet ng sinasabing shabu ay nakuha kay alyas “Abed”, 42.

Ayon kay PMSg Carlito Nerit Jr., kasong paglabag sa PD 1602 at paglabag sa R.A 9165 o ang Comprehensive Dangerous Drug Act of 2002 ang isinampa nila laban sa mga suspek sa Valenzuela City Prosecutor’s Office. (Richard Mesa)

APAT (4) sa limang (5) problema sa right-of-way (ROW) ang naresolba ng Department of Transportation (DOTr) para sa patuloy na pagtatayo ng Metro Manila Subway Project (MMSP).

     Ayon sa DOTr ay importante na maresolba ang problema ng ROW upang maging madali at mabilis ang pagtatayo ng MMSP. Sa ngayon ay nakuha na ng DOTr ang lote na may apat na segments para sa proyekto ng subway.

     Ang ROW para sa gagawing MMSP ay tuloy na para sa Anonas at White Plains sa lungsod ng Quezon; Valenzuela, at Bonifacio Global City sa lungsod ng Taguig. Ang may problema na lamang na kailangan iresolba ay ang Ortigas property kung saan nakatayo ang dating Payanig sa Pasig.

     “The property, which covers parts of the Metrowalk, remains unresolved due to overlapping claims and legal ownership. It is under the jurisdiction of the Presidential Commission on Good Government,” wika ng DOTr.

     Sinabi naman ng DOTr na sila nakikipag-ugnayan na kay Pasig City Mayor Vico Sotto para sa nasabing lote upang masimulan  na ang construction.

     Ang MMSP ay inaasahang makapagsasakay ng 370,000 na pasahero kada araw sa simula ng operasyon kung saan makakatulong ito upang mabawasan ang pagsisikip ng trapiko sa kalakhang Maynila. Naglalayon din ito na magkaroon ang bansa ng isang modernong transportasyon.

     Sa kabilang dako naman sa North-South Commuter Railway (NSCR), ang DOTr ay nakipag-ugnayan sa lungsod pamahalaan ng Maynila upang maging mabilis ang pagtatayo ng istasyon sa Solis at Bluementritt.

     “The partnership is in response to President Ferdinand Marcos Jr’s order to accelerate the construction of mass transport projects for the benefit of the commuters. We appreciate the help of Mayor Isko Moreno for the partnership to ensure that the construction of the project begins after a two-year delay,” ayon sa DOTr.

     Nagkaroon ng clearing operations sa Old Antipolo Road noong nakaraan buwan upang mapabilis ang pagtatayo ng NSCR sa Blumentritt.

     Sinabi rin ng DOTr na doon mo makikita talaga na kapag nagtulungan ang lokal at national na pamahalaan ay aandar ang proyekto.

     “On behalf of the people of Manila, we are grateful to the President that the project is being implemented, and we are happy with former DOTr Secretary Dizon because he moves fast and so all the projects that benefit the public, our city government will support it 101 percent,” saad ni Mayor Isko Moreno.  LASACMAR