MARIING kinondena ni Chairman Emeritus Dr. Jose Antonio Goitia ang kaguluhan na sumiklab sa Mendiola na aniya’y malinaw  na nagpapakita ng isang baluktot na agenda ng mga bayarang anarkista.

Ayon kay Goitia na ang  dapat sana’y mapayapang pagtitipon ay sinamantala ng mga nakamaskarang raliyista na naghagis ng bato, bote, at maging ng mga pampasabog laban sa pulis na nagresulta  sa  maraming pulis na lubhang nasugatan, mga pampubliko at pribadong   ari-arian  ang nawasak.

“Hindi sila mga repormista kundi mga bayarang tao na layuning manggulo lamang,” aniya. “Hindi hustisya ang habol nila kundi ang motibo na pabagsakin ang nakaupong Pangulo. Ang kanilang maduming plano ay isang patunay na pagkabigo sa kanilang hanay.  Hindi sila nagtagumpay,” ayon kay Goitia.
Mariing kinondena ni Goitia ang mga karahasang ito, na ayon sa kanya ay hindi na saklaw ng kalayaan sa pamamahayag kundi hayagang paglabag sa batas. Ayon pa sa Revised Penal Code, malinaw na pumapasok ang ginawa nila sa krimeng sedisyon — isang paglabag laban sa kaayusan at mismong Republika.

Pinuri naman ni Goitia ang Philippine National Police sa maagap na pagpigil sa tangkang pag-aaklas bago pa ito lumala. Itinuro niya na kahit maraming sugatan sa hanay ng pulis, pinili pa rin ng mga ito ang magpakita ng pagpipigil o maximum tolerance.
Sinabi rin ni Goitia na maging ang kanyang mga volunteers  at mga  marshall ay nasaktan at ninakawan ng gamit ng mga pinaniniwalaang kabilang sa kabilang kampo. Nangako si Goitia na hindi pababayaan ang mga biktima:

“Nakikipagtulungan kami sa mga awtoridad at sa aming mga katuwang sa intelligence unit upang kilalanin ang mga umatake sa aming hanay. Mananagot sila sa batas — hindi sa pamamagitan ng paghihiganti, kundi sa tamang proseso ng hustisya,” aniya.

Ipinaalala ni Goitia na ang laban kontra korapsyon ay dapat isulong sa legal at demokratikong paraan.

Si Dr. Jose Antonio Goitia ay kinikilala bilang Chairman Emeritus ng apat na makabayan at sibikong organisasyon kabilangang ang ABKD, PADER, LIPI at FDNY. (Gene Adsuara)

KASUNOD ng pagtataas sa Red Alert ng Caloocan City Disaster Risk Reduction and Management Department (CDRRMD) sa posibleng pananalasa ng Habagat na pinalakas ng Super Typhoon Nando, agad iniatas ni Mayor Along Malapitan ang mas pinaigting na paghahanda upang masiguro ang kaligtasan ng lahat ng mga Batang Kankaloo.

Inihanda na rin ng CDRRMD personnel ang mga kinakailangang kagamitan at naka-monitor rin 24/7 ang Alert and Monitoring Center ng lungsod para sa mga update kaugnay sa bagyo habang naglatag na rin ang CSWDD ng mga evacuation center sa lungsod sakaling kailanganin lumikas ng mga residenteng maapektuhan sa posibleng malakas na ulan at pagbabaha. (Richard Mesa)

SINABI ni Interior Secretary Jonvic Remulla na nakatanggap sila ng ulat na plano ng mga rioters na sunugin ang Malakanyang bago pa man ang gulo sa isinagawang anti-corruption protest rally nito lamang Linggo.

Ang rebelasyon na ito ay kasunod ng pagkaka-aresto sa mga nanggulong indibiduwal na nagdulot ng kaguluhan sa paanan ng Ayala bridge at Mendiola area, sa gitna ng protesta na nananawagan na papanagutin ang mga sangkot sa maanomalyang flood-control projects sa bansa.

“The first children in conflict with the law interviewed said that they had intended to burn the Palace. They had intended to burn the Palace; however, we cannot take that at face value because these were children in conflict with the law and we still needed the DSWD to process them,” ang snabi ng Kalihim sa press briefing sa Malakanyang.

Nagbabala naman ito na ang mga adult o nasa hustong gulang na mapatutunayang sangkot ay mahaharap sa iba’t ibang parusa.

“There is arson, there are grave physical injuries and we can go as far as sedition—iyong statement lang nila na ‘We intend to burn the Palace. Gusto naming sunugin iyong Palasyo,’ is a seditious act in itself,” ang sinabi pa rin ni Remulla.

Sa kabilang dako, tinanong din si Remulla kung may intelligence reports ukol sa “local terror groups” na may planong isabotahe ang protesta, kung saan ang sagot ng Kalihim ay “Yes, that is why all contingencies were considered, our biggest fear that did not happen was that someone would incite violence during the People Power Monument rally, because the intent of the people there was peaceful. The intent of the people there was to hear their grievances; the President encouraged them to go and heeded their message.”

“The threat of the terrorist was more of a bomb that would go off in Luneta or in the People Power Monument. But with the vigilance of our PNP to look at the situation, we had 400 policemen on the ground dressed in plain clothes to see what was going on and to assess and the vigilance paid off a little bit that transpired,” anito pa rin. (Daris Jose)

KUMPIRMADO na patay ang isa sa mga rallyista sa naganap na kaguluhan sa kilos protesta kahapon, Sept.21 sa C.M Recto sa Maynila.

Ayon ito sa Department of Health (DOH) matapos isugod sa Jose R. Reyes Memorial Medical Center (JRRMMC) ang nasa 48 indibidwal na nasaktan sa nasabing aktibidad.

Inaalam pa ang pagkakilanlan ng biktima na idineklarang dead on arrival dahil sa tinamong saksak.

Dalawang pulis naman ang nagtami ng minor injuries (laceration at pasa sa katawan) at agad ding nakalabas matapos gamutin.

Mayroon ding 6 na iba pang pasyente ang nagtamo ng iba’t ibang sugat kabilang ang hiwa sa paa, eye trauma, head trauma, injury sa ugat ng kaliwang braso, gunshot wound, at matinding sugat sa braso. Apat sa kanila ay nakalabas na matapos gamutin, habang dalawa ang kasalukuyang naka-admit para sa karagdagang gamutan.

Bukod dito, 39 pang raliyista ang sumasailalim ngayon sa physical examination bilang bahagi ng proseso bago sila dalhin sa kulungan. Wala namang agarang panganib sa kanilang kalusugan.

Ayon kay Health secretary Ted Herbosa, sakop pa rin ng Zero Balance Billing ang mga pasyente na nasangkot sa kaguluhan sa marahas na kilos protesta.

“Tinitiyak ng DOH na sakop pa rin ng Zero Balance Billing ang mga pasyenteng ito, alinsunod sa direktiba ni Pangulong Ferdinand R. Marcos, Jr. na tiyakin ang maagap at dekalidad na serbisyong medikal para sa lahat ng Pilipino,” ani Herbosa. (Gene Adsuara)

ITO ang pahayag ni Speaker Faustino “Bojie” Dy sa media, na dumalo sa ginanap na meetings ng subcommittee ng House Appropriations Committee para talakayin ang amendments at revisions sa badyet.

“Ngayon ay meron tayong ginagawang amendments and revisions sa sub committees na kung saan maraming members ng House ang tinatalakay at binubusisi ang budget for next year. Iyan po an dapat nating pagtuunan ng pansin at hinihiling ko sa inyong lahat na sama-sama nating bantayan ang proposed budget na ito nang matiyak na tama ang paglalaanan ng bawat pondo, nang bawat sentino para po sa ating sambayanan,” ani Dy.

Nang tanungin sa isyu naman ng paglalabas ng Statement of Asset, liabilities and networth (SALN), inihayag ng Speaker na handa siyang ilabas ito sa publiko kung kinakailangan.

Ayon pa sa kanya ay dapat na makita at maging bukas ang SALN ng bawat isa upang makita ng publiko at manumbalik ang pagtitiwala sa kanila,

Muling nabuhay ang panawagan sa mga mambabatas na ilabas ang kanilang slan kaugnay na rin sa kontrobersiya ng flood control projects. (Vina de Guzman)

ITINAAS ang security alert sa Maynila kasunod ng pagkakaaresto ng 113 indibidwal ng ManilaPolice District (MPD) dahil sa marahas na anti-korapsyon rally kahapon sa Mendiola at Ayala Avenue sa Maynila.

Sa ulat ng MPD , 51 ang nahuli sa Ayala Bridge, 21 sa Mendiola at 41 sa CM Recto Avenue.

Karamihan sa kanila ay nahaharap sa kasong malicious mischief at paglabag sa Anti-Barricade Act, habang ang mga menor de edad ay nasa kustodiya ng Manila DSWD.

Samantala, nagsimula na rin ang mapping operation ng MPD sa University upang tiyakin ang seguridad ng mga paaralan, dormitoryo, at negosyo.

Ilan sa mga establisyimento na dinamay at sinira ng mga kabataang ralyista ang SOGO Hotel sa kahabaan ng Recto Avenue .

Nagkalat sa kalsada ang mga basag na bote at bato maging ang mga sinunog na mga motorsiklo at mga plakards.

(Gene Adsuara)

HANDA si Pangulong Ferdinand Marcos Jr. na harapin ang alegasyon na ibinato laban sa kanya .

Iyon lamang, kailangan na ‘substantiated’ o napatunayan ito.

Tugon ito ng Malakanyang sa naging pahayag ni dating Ilocos Sur Gov. Luis “Chavit” Singson na dapat na iprayoridad ng Independent Commission on Infrastructure (ICI) ang pagi-imbestiga sa flood control projects sa balwarte ng Pangulo.

Ipinag-ingay din ni Singson na karamihan sa mga flood control projects sa Ilocos Region ay tadtad na anomalya dahil ang mga ito ay nasungkit ng Discaya-owned firms.

Dahil dito, sinabi ni Presidential Communications Office Undersecretary at Palace Press Officer Claire Castro na handa si Pangulong Marcos na sagutin ang mga alegasyon laban sa kanya, kailangan lamang ay may matibay na ebidensiya.

“Basta ibigay lang nila iyong tamang mga ebidensiya. Kasi ang hirap dito magtuturo ka lang eh, eh ang dami-daming opisyal ng Ilocos Norte,” ang sinabi ni Castro.

Tinukoy ni Castro na si Singson ay identify ngayon sa mga Duterte.

“So hindi tayo agad-agad dapat maniwala sa ganito lalo na kung namedropping tapos creating an intrigue na walang ebidensiya, huwag po kayo agad-agad maniwala sa ganoon,” dagdag na wika nito.

Kamakailan ay isiniwalat ni Singson na apat umano sa mga contractors sa Ilocos Norte ay pag-aari umano ng mag-asawang Curlee at Sarah Discaya, na kasalukuyang iniimbestigahan sa maanomalyang flood control projects.

“Ang mga contractor nila sa Ilocos Norte, Discaya rin, eh paano tayo maniniwala ngayon sa mga pinagsasabi nilang mga iniimbestiga?” saad ni Singson.

“Sa Ilocos Norte lang—St. Matthew General Contractor & Development Corporation, P962 million plus…almost a billion; St. Gerrard Construction Gen. Contractor & Dev’t Corporation P608 billion; Alpha & Omega Gen. Contractor & Dev’t Corporation, St. Timothy Construction Corporation, apat ito sa Ilocos Norte. Paano nila hindi alam ito e probinsya niya ito?” ani Singson.

(Daris Jose)