Peaceful rally, nasamahan ng iilang nais manggulo- Malakanyang  

MANANAGOT ang lahat.

Ito ang nais ni Pangulong Ferdinand R. Marcos Jr. sa lahat ng sinumang gumamit ng karahasan sa naganap na peaceful rally noong Linggo.

Bilang isang public servant, sinabi ni Presidential Communications Office Undersecretary at Palace Press Officer Claire Castro na pinakinggan ni Pangulong Marcos ang sigaw ng taong bayan, ang managot ang lahat ng sangkot.

“Kaisa ng taong bayan si President Marcos Jr. laban sa korapsyon. Ang Pangulo mismo ang nagpasimula para maimbestigahan ang maanomalyang flood control projects. Magpapatuloy din ang Pangulo sa naumpisahan na ito. At sa tulong ng taong bayan na magiging matapang sa pagbunyag ng katotohanan, ang pang-aabuso sa kaban ng bayan ay mailalantad at malalabanan,” ang sinabi ni Castro.

Ang Pangulong Marcos Jr. aniya ay handang tumugon sa hiling ng taong bayan kaya’t nirespeto at patuloy na nirerespeto ng Pangulo ang karapatang pangtao.

Sa katunayan, hindi naging hadlang ang Pangulo sa malaking protesta kahit pa naglahad ng galit ang tao laban sa korapsyon.

Subalit, mariing kinokondena ng administrasyong Marcos at ng Pangulo ang paggamit ng mga kabataan na gawing mga tulisan ng mga grupong itinatago ang mukha sa likod ng itim na maskara.

‘Team Itim,’ kung maituturing. Hindi sila raliyista na may lehitimong adhikain laban sa korapsyon, kundi gumawa lang karahasan, magnakaw, manunog, at manira,” ang binigyang diin ni Castro.

“Hindi kayo makakalagpas sa kamay ng batas at ang mga tao sa inyong likuran na gumamit sa inyo. Mga gahaman sa kapangyarihan. Hindi kayo dapat palagpasin. Hustisya ang uusig sa inyo,” aniya pa rin.

At sa sa iilang gumamit ng foul language, ginagalang aniya ang karapatan ng mga ito na magpahayag.

Ngunit, may responsibilidad din ang mga ito na maging magandang ehemplo lalo na sa kabataan.

“Ipinaglalaban natin ang tama. Idaan natin sa paraang tama,” ang diing pahayag ni Castro.  (Daris Jose)