2023 February Archive - People's Balita

Archive for February, 2023

P5K ayuda sa 4 milyong minimum wage earners, itinulak

Posted on: February 24th, 2023 by @peoplesbalita No Comments

SA GITNA na rin ng mataas na inflation, isinulong sa Kamara na mabigyan ng tig-P5,000 ayuda ang nasa 4 milyong minimum wage earners sa bansa.

Kasabay nito, inirekomenda rin ni House Deputy Speaker at Trade Union Congress of the Philippines Partylist Rep. Raymond Mendoza ang pagbuo ng isang “financial assistance program” na tatawaging “BBM Assistance Para Sa Manggagawang Pilipino” o BAMP para sa pamamahagi ng cash assistance na lubhang kailangan na.

Ayon kay Mendoza, labis na nagdurusa ang mga mamamayan dulot ng inflation o mabilis na pagtaas ng presyo ng mga produkto at serbisyo.

Sa ilalim ng BAMP, bibigyan ng ayuda na “one time big time P5,000” pinansiyal na tulong ang nasa 4 milyong minimum wage earners na ang pondo ay kukunin sa Presidential Social Fund. Binigyang diin pa ni Mendoza na layunin ng BAMP na matulungan ang kapwa mga manggagawa at negosyo sa matinding epekto ng ‘inflation’ .

Target din ng nasabing hakbangin na palakasin rin ang ekonomiya sa pamamagitan ng pagkonsumo o pagbili ng mga manggagawa ng mga pangangailangan ng kanilang mga pamilya habang patuloy na bumabangon mula sa krisis ng COVID-19, giyera ng Russia at Ukraine, global recession at climate change.

Binigyang diin ng Kongresista na hindi biro ang record-high na 8.7% inflation rate, kaya napapanahong magkaroon ng “urgency” o mabilis na aksyon para tulungan ang mga manggagawa sa kahirapan at kagutuman. (BISHOP JESUS “JEMBA” M. BASCO)

Suspek sa pag-ambush sa Lanao del Sur governor ‘nanlaban,’ patay — PNP

Posted on: February 24th, 2023 by @peoplesbalita No Comments

PATAY ang isang suspek sa pananambang kay Lanao del Sur Governor Mamintal “Bombit” Alonto Adiong Jr. na siyang ikinamatay ng apat na katao, ito matapos daw niyang “makipagbarilan” sa composite police team.

Ayon sa mga ulat galing kina Police Brig. Gen. John Guyguyon, Regional Director ng Police Regional Office, Bangsamoro Autonomous Region, naglunsad kasi ng hot pursuit operations ang kapulisan ng Maguing Municipal Police Station mula ika-17 hanggang ika-19 ng Pebrero — bagay na nauwi raw sa engkwentro sa suspek na kilala lang sa alyas na “Otin.”

Si alyas “Otin” ay sinasabing anak ni alyas “Fighter,” na isa sa limang suspek na pinaghahahanap pa rin.

Nakumpiska sa pangangalaga ni alyas “Otin” ang Colt MK IV caliber 45 pistol na siyang kargado pa ng anim na bala. Sinasabing forensic investigations ng Scene of the Crime Operation ang nagsagawa ng crime scene processing para makuha ang ebidensya.

“I commend the bravery and dedication of our police officers who risked their lives to bring the perpetrators of this heinous crime to justice,” wika ni Philippine National Police chief General Rodolfo Azurin Jr., Martes.

“The successful pursuit operation shows that the PNP will not tolerate lawlessness and will do everything in our power to ensure the safety and security of our people.”

Patuloy pang mino-monitor at nakikipag-ugnayan ang PNP investigators sa mga biktima ng pamilya upang makuha ang kanilang pahayag pagdating sa insidente para sa pormal na paghahain ng criminal complaints.

Biyernes lang nang tambangan ng mga hindi pa kilalang suspek, na siyang pinaghihinalaang terorista, sina Adiong na siyang ikinamatay ng apat niyang escort sa bayan ng Maguing.

“We condemn this senseless act of violence against our public servants. We assure the public that the PNP will exhaust all efforts to bring the perpetrators to justice,” sabi pa ni Azurin.

“We stand in solidarity with the families of the victims, and we will not rest until those responsible are held accountable for their actions.” (Daris Jose)

26 Chinese militia vessels namataan sa Ayungin Shoal

Posted on: February 24th, 2023 by @peoplesbalita No Comments

IBINUNYAG ng Philippine Coast Guard na mayroong nasa 26 na mga suspected Chinese maritime militia ang muling nakita malapit sa Ayungin Shoal sa West Philippine Sea.

Sa inilabas na larawan ng coastguard mula sa Maritime Domain Awareness flight na kinukumpirma ang pagkakaroon ng 26 na suspected Chinese maritime militia at Chinese Coast Guard.

Pinayuhan nila ang China Coast Guard 5304 na umalis sa lugar sa pamamagitan ng Chinese at English radio challenge.

Hindi naman malinaw kung nagsasagawa ba ng pangingisda ang nasabing mga barko ng China.

Sinabi naman ng National Task Force for the West Philippine Sea (NTF-WPS) na lumipad ang Cessna Caravan 2081 ng Coast Guard sa Ayungin at Sabina Shoals para magsagawa ng radio challenges sa Chinese coast guard vessels.

Magugunitang makailang beses ng naghain ng diplomatic protest ang Department of Foreign Affairs ng bansa dahil sa mga insidente sa West Philippine Sea. (Daris Jose)

Kampanya ng pamahalaan laban sa smuggling , pinuri ni Speaker Martin Romualdez

Posted on: February 24th, 2023 by @peoplesbalita No Comments

PINURI ni Speaker Martin Romualdez ang pinaigting at walang humpay na kampanya ng pamahalaan laban sa smuggling habang pinasalamatan naman nito ang law enforcement agencies dahil sa dininig ng nila ang kanyang panawagan na i-raid ang mga warehouses na pinaghihinalaang nasa likod ng pagho-hoard ng sibuyas at bawang.

“Kinausap natin ang ating law enforcement agencies para i-raid ang warehouses na hinihinalang nasa likod ng hoarding ng sibuyas at bawang. Ito ang nagpapahirap sa taong-bayan na dahilan ng inflation at pagtaas sa presyo ng mga bilihin,” ani Romualdez.

Umaasa ang lider ng kamara na magtutuloy-tuloy ang kampanyang ito laban sa mga mapagsamantala.

Ang pahayag ni Romualdez ay kasunod na rin sa pagkakadiskubre ng BOC, sa ilalim ng pamunuan ni Commissioner Bienvenido Rubio, ng tinatayang nasa P150 milyong halaga ng imported onions at bawang sa may 24 magkakahiwalay na lokasyon, karamihan ay nasa warehouses sa Manila at Malabon.

Muling nagbabala si Romualdez sa mga mapagsamantalang businessmen at hoarder na tigilan na ang iligal nilang gawain na nagpapahirap sa ating mga kababayan.

Ipinanawagan ni Speaker ang pagsasagawa ng crackdown upang protektahan ang kapakanan, hindi lamang ng mga konsyumer kundi maging ng mga magsasaka sa pamamagitan ng pagbibigay katiyakan na mapananatili ang sapat na suplay ng local industry ng sibuyas at bawang. (Ara Romero)

‘Walang nabuhay’: 4 na pasahero ng Cessna crash sa Albay natagpuang patay

Posted on: February 24th, 2023 by @peoplesbalita No Comments

HINDI nakaligtas ang ni isa sa mga pasahero ng maliit na eroplanong bumagsak malapit sa bunganga ng Bulkang Mayon matapos silang matagpuang walang buhay, ayon sa isang local official nitong Huwebes.

Kasama sa apat na pasahero ng naturang Cessna 340 aircraft ang dalawang Australyano nang mawala ito nitong Sabado matapos lumipad mula sa Bicol International Airport patungong Maynila.

“No more search and rescue operation. Our operation is now focused on retrieval because we’re able to locate the passengers. They were lifeless,” wika ni Irwin Baldo, alkalde ng Camalig, Albay sa panayam ng TeleRadyo.

“The challenge for us now is how to bring down the remains of the passengers.”

Nangyayari ito habang nasa Alert Level 2 ang Bulkang Mayon, panahon kung kailan ipinagbabawal ang paglipad ng anumang eroplano malapit dito.

Una nang sinabi ng Phivolcs na dapat mag-ingat ang publiko sa sumusunod sa naturang bulkan:

biglaang pagputok ng steam o phreatic explosions
rockfall mula sa tuktok ng bulkan
pagdaloy ng lahar kung may matinding pag-ulan
Tinataya ng Civil Aviation Authority of the Philippines na nasa kanlurang gawi ng bulkan ang eroplano, at nasa 3,500 hanggang 4,000 feet above sea level.
Inako na ng Energy Development Corporation ang pagmamay-ari ng Cessna plane at sinabing technical consultants ang mga banyaga para sa naturang renewable energy company. (Daris Jose)

Ilang bagong opisyal, nanumpa sa harap ni Pangulong Marcos

Posted on: February 24th, 2023 by @peoplesbalita No Comments

KINUMPIRMA ng Presidential Communications Office o PCO na nanumpa na ang mga bagong opisyal na bubuo sa mga pamunuan ng National Amnesty Commission (NAC) at iba pang ahensya ng pamahalaan.

Ayon kay PCO Sec. Cheloy Garafil, nanumpa na bilang chairperson ng NAC si Atty. Leah T. Armamento, kasama ang mga commission members na sina Atty. Jamar M. Kulayan at Atty. Nasser A. Marohomsalic.

Maging si Lope B. Santos II ay nanumpa na bilang lead convenor ng National Anti-Poverty Commission (NAPC).

Matapos ang kanilang oathtaking ceremony, opisyal na ring umupo bilang chairperson ng Marawi Compensation Board (MCB) si Maisara Dandamun-Latiph, gayundin ang mga miyembro ng board na sina Romaisa L. Mamutuk, Dr. Jamaica L. Dimaporo, Sittie Aliyyah L. Adiong, Mustapha C. Dimaampao, Dalomabi Lao Bula, Mabandes Sumndad Diron Jr., Nasser M. Tabao at Atty. Mosmelem Macarambon Sr.

Samantala, nanumpa na rin sa harap ni Pang. Ferdinand Marcos Jr. ang mga bagong miyembro ng Office of the Presidential Adviser on Peace, Reconciliation, and Unity (OPAPRU) na kinabibilangan nina David B. Diciano, Presidential Assistant I; Arnulfo R. Pajarillo, Presidential Assistant I; Isidro L. Purisima, Presidential Assistant I; Andres S. Aguinaldo Jr., Executive Director IV; Susana Guadalupe H. Marcaida, Executive Director IV; Wilben M. Mayor, Executive Director IV; at Cesar D. De Mesa, Executive Director IV. (Daris Jose)

Ads February 23, 2023

Posted on: February 23rd, 2023 by @peoplesbalita No Comments

P1.5 bilyong counterfeit items, nasamsam ng BOC

Posted on: February 23rd, 2023 by @peoplesbalita No Comments

NAKUMPISKA ng mga tauhan ng Bureau of Customs (BOC), sa pamamagitan ng Customs Intelligence and Investigation Service-Intellectual Property Rights Division (CIIS-IPRD), ang iba’t ibang counterfeit goods na tinatayang nagkakahalaga ng P1.5 bilyon, sa isinagawang operasyon sa Pasay City kamakailan.

Armado ng Letters of Authority (LOA) na inisyu ni BOC Commissioner Bienvenido Rubio, ininspeksiyon ng implementing team ang storage facility sa Building 127 FB Harisson St., corner J Fernando St. sa Pasay City, sa tulong ng Philippine National Police-Criminal Investigation and Detection Group (PNP-CIDG). Tinukoy rin naman ni Commissioner Rubio ang kahalagahan ng koordinasyon ng iba’t ibang ahensiya ng pamahalaan, gayundin ang pagsusumikap ng mga opisyal ng Customs upang matiyak ang tagumpay ng bawat operasyon.

Sa kanyang panig, nangako naman si Intelligence Group Deputy Commissioner Juvymax Uy na paiigtingin ang crackdown laban sa smuggling at counterfeit items.

Nabatid na humihingi ang LOA team ng proof of payment para sa taxes at duties na binayaran para sa lahat ng imported goods at proof of authenticity para sa branded goods.

Sa inisyal na ulat, may tinatayang 70 units ng gusali ang nirerentahan at ginagamit bilang storage spaces.

Nagsasagawa na rin anila ang mga otoridad ng imbentaryo sa mga items na nadiskubre, kabilang ang mga counterfeit goods na may tatak ng mga brands na Gucci, Louis Vuitton, Nike, Adidas, Supreme, Tory Burch, Skechers, at Birkenstock, at iba pa.

Patuloy na pinamumunuan ni Commissioner Rubio ang BOC sa mahigpit na implementasyon ng Customs laws upang protektahan ang mga local consumers mula sa panganib ng smuggled goods habang tinitiyak ang pagkakaroon ng episyenteng revenue collection para sa national government. (Daris Jose)

Bentahan ng PNP uniforms, hihigpitan

Posted on: February 23rd, 2023 by @peoplesbalita No Comments

PINAHIHIGPITAN ni Philippine National Police (PNP) chief Gen. Rodolfo Azurin, Jr. ang bentahan ng mga police uniforms kasunod ng pamamaslang kay Aparri, Cagayan Vice Mayor Rommel Alameda at sa limang escorts nito ng anim na kalalakihan na nakasuot ng PNP uniform, nitong Linggo.

Ayon kay Azurin, bukod sa rehistrado ang mga outlet ng police uniforms, mas makabubuti na hingan din ng identification card ang mga mismong bibili at ire-record.

Inatasan na ni Azurin ang kanyang mga regional directors na alamin ang mga accredited contractor at authorized outlet ng mga uniform sa kanilang mga nasasakupan upang mamonitor ang mga bumibili ng uniporme ng mga pulis.

Maging ang mga nagbebenta ng police uniforms sa online ay binabantayan na rin ng anti-cyber crime division ng PNP.

Bukod kay Alameda, patay din sina Alexander Agustin Delos Angeles, Alvin Dela Cruz Abel, Abraham Dela Cruz Ramos, John Duane Banag Almeda, at Ismael Nanay.

Natagpuan namang sunog sa Brgy. Uddiawan, Solana ang Mistubishi Adventure na gamit ng mga suspek sa checkpoint sa Bagabag, Nueva Vizcaya nang maganap ang ambush.

Sa beripikasyon sa Land Transportation Office, ang red plate na SFN 713 na nakalagay sa Mitsubishi Adventure nang mangyari ang krimen ay pinaniniwalaang ninakaw dahil nakarehistro ang nasabing plaka sa Nueva Vizcaya State University.

Naniniwala si Azurin na nagsuot lamang ng police uniforms ang mga suspek upang magmistulang legal ang checkpoint at lituhin ang imbestigasyon.

Gayunman, inutos pa rin ni Azurin ang malalimang pagsisiyasat sa krimen. (Daris Jose)

DOTBOT INILUNSAD SA VALENZUELA

Posted on: February 23rd, 2023 by @peoplesbalita No Comments

INILUNSAD ng Pamahalaang Lungsod ng Valenzuela sa pamumuno ni Mayor WES Gatchalian ang online DotBot, isang innovation project na isinilang mula sa cooperative partnership ng Pilipinas at New Zealand sa ilalim ng GovTech Acceleration Program ng Creative HQ, New Zealand.

Ang DotBot na ipinakita sa Philippines – New Zealand Government Innovation Exchange Showcase na ginanap sa Multi-purpose Center ng ALERT Center sa Barangay Malinta, noong Setyembre 13, 2022 ay isang user-friendly chatbot sa ilalim ng Facebook Messenger application na maaaring magamit sa pag-aaplay para sa iba’t ibang social welfare services tulad ng Medical Assistance, Burial Assistance, Transportation Assistance, Social Case Study, at CSWD Certificate of Indigency bago ang personal na pagpunta sa opisina ng CSWD para sa pagsusumite.

Layunin ng Dotbot na tulungan ang CSWDO na bumuo ng isang centralized database na maglalaman ng lahat ng impormasyon ng mga kliyente na hihingi at makikinabang sa social service assistance mula sa local government.

“Isa po sa suliranin natin dito sa city hall ay ang mahabang mga pila, kaya naman po pinapakilala ko sa inyo si DotBot, ang bagong state-of-the-art project natin sa CSWD Office para maging paperless na ang CSWD Office at mabawasan ang pila dito sa munisipyo.” ani Mayor WES.

“Inaanyayahan ko po kayong gamitin ang makabagong teknolohiya para mas maging epektibo at mabilis pa ang serbisyo ng pamahaalaang lokal.” dagdag niya.

“Natutuwa ako na isa sa mga proyektong naiwan ko ay mai-lalaunch na ngayon, ang pag-automate at pag-digital ng serbisyo ng pagtulong sa ating mga mamamayan. Ang mga tanong ninyo ay hindi na kailangan pang sadyain sa city hall, maitatanong ninyo na ito online para pagpunta ninyo ng city hall ay diretso processing na ng ayuda. Ang layunin natin ay gawing mabilis at abot-kamay ang pagtulong sa mga Valenzuelano.” pahayag naman ni Department of Social Welfare and Development (DSWD) Secretary REX Gatchalian.

Para ma-access ang DotBot, i-search ang DotBot-Valenzuela sa Facebook o Messenger application o i-scan ang QR code na naka-post sa iba’t ibang promotional materials ng Pamahalaang Lungsod. (BISHOP JESUS “JEMBA” M. BASCO)