INALIS ng gobyerno ang pangamba ng mga Pinoy seafarers na baka hindi na sila tanggapin pa ng kanilang employer makaraang kapitan ng corona virus at nakarekober.

Sinabi ni Presidential Spokesperson Harry Roque, binanggit ni DOLE Secretary Silvestre Bello na hindi problema ang employment opportunity para sa mga kababayan nating seaman.

Ayon naman kay Sec.Bello, napakataas ng upskilling level at employability ng mga Filipino seafarers at hinahabol habol aniya ito ng mga employers.

“Ay, hindi po! Hindi po. Not to a least from my experience, ang ating mga OFWs, iyong mga seafarers natin kagaya ng sinabi ko, hinahabol. Hinahabol iyong ating mga seafarers just like iyong mga nurses natin, naku hinahabol. May pending request from the Germany, 15,000 nurses. Ganoon karami ang ano… how preferred our nurses and our seafarers. Don’t worry, Melo, iyong ating mga seafarers iyong kanilang employability at saka iyong kanilang upskilling level napakataas kaya hindi problema iyong kanilang employment opportunity,” lahad nito.

Giit nito, wala aniya itong pinag- iba sa mga Pinoy nurse na sa katunayan ay in demand din gaya na lamang sa Germany na ang kailangan ay nasa 15 libo.

Dahilan upang walang dapat na ipag- alala ang mga Pilipinong magdaragat gayung most preferred seafarers in the world aniya ang Pinoy seamen. (Bishop Jesus “Jemba” M. Basco)

Nanawagan ang Parish Pastoral Council for Responsible Voting (PPCRV) sa mga botanteng hindi nakaboto ng dalawang magkasunod na halalan, lumipat ng tirahan, nagpalit na ng pangalan o mga Overseas Filipino Workers na bumalik na ng bansa na muling magpatala sa kasalukuyang voters’ registration ng Commission on Elections.

Ito ang panawagan ni PPCRV Executive Director Maria Isabel Buenaobra sa may 7-milyong botante na dineactivate o inalis ng COMELEC sa listahan ng mga botante sa bansa.

Ayon kay Buenaobra, napakahalaga ng partisipasyon ng bawat Filipino sa nakatakdang halalan sa susunod na taong 2022 National and Local Election kung saan kabilang sa mga dapat ihalal ay ang magiging bagong pangulo at pangalawang pangulo ng bansa na magsisilbi sa loob ng susunod na anim na taon.

“Nananawagan po tayo na ang ating mga kababayan na na-deactivate na po, magrehistro po kayo kasi high stakes election po ang 2022 National and Local Elections po ito at kailangan po kayong, kailangan po ninyong gamitin ang karapatan ninyo para bumoto.” pahayag ni Buenaobra sa Radio Veritas. Ibinahagi naman ni Buenaobra ang pakikipag-ugnayan at pakikipagtulungan ng PPCRV sa iba’t ibang diyosesis sa bansa upang maging katuwang sa pananawagan at kampanya na himukin ang mga kabataan, mga umuwing OFW at mga na-deactivate na mga botante upang muling magpatala sa kasalukuyang voters’ registration ng COMELEC.

Paliwanag ni Buenaobra, mahalagang makabahagi ang bawat mamamayan sa nakatakdang halalan na kabilang sa karapatan at tungkulin ng bawat isa sa isang demokratikong bansa.

“Magkakaroon po tayo ng pakikipag-usap sa mga dioceses para sana po ay sumama po sila sa ganitong kampanya na himukin ang mga kabataan at yung mga deactivated, OFWs at yung mga nandito sa Pilipinas na mag-activate po uli sila para makasama uli sila sa tala, sa statistics ng mga botante.”

Dagdag pa ni Buenaobra. Tiwala naman ang PPCRV na maaabot ng COMELEC ang target nitong magkapagpatala ng 60-milyon o higit pang mga rehistradong botante na maaaring makibahagi sa nakatakdang halalan sa 2022. Ibinahagi ng kumisyon na umaabot na sa 59-na milyon ang bilang ng mga rehistradong botante sa bansa.

Batay sa opisyal na tala ng COMELEC noong 2019 elections , may 61.8-milyon ang bilang ng mga botante sa bansa ngunit kinailangang i-deactivate ng kumisyon ang mahigit sa 7-milyong botante dahil na rin sa pagkabigo na bomoto sa dalawang magkasunod na halalan.

Nanawagan ang Department of Transportation (DOTr) sa mga pasahero na sumasakay sa EDSA carousel na mag-ingat matapos na may isang tao na wala sa tamang pag-iisip ang naghurementado na may dalang patalim.

Ang pangyayari ay naganap sa Istasyon ng Ortigas Avenue ng Edsa Carousel kung saan ang isang traffic marshal ay hinabol nito.

Kung kaya’t pinag-utos ni DOTr Secretary Arthur Tugade sa mga enforcement agencies na mas paigtingin pa ang mas mahigpit na seguridad at hikayatin ang publiko na maging alisto at ipaalam agad sa mga awtoridad kung may mga kahinahinalang mga gawain na kanilang nakikita.

Giniit ni Tugade sa I-ACT at Philippine National Police–Highway Patrol Group (PNP-HPG) na paigtingin pa ang kanilang security measures upang mabigyan ng proteksyon ang mga pasahero sa araw-araw nilang paglalakbay gamit ang sistema ng pampublikong transportasyon.

“The security and safety of our commuters are of utmost importance. We, at the DOTr are not only tasked to provide the public with convenience in their everyday commute. We also want to ensure their safety and security at the stations and while onboard passenger vehicles, in coordination with law enforcement agencies,” wika ni Tugade.

Nabahala si Tugade sa nangyari noong nakaraang Lunes ng may isang marshal ng Interagency Council for Traffic (I-ACT) ang hinabol ng isang lalaki na may sakit sa pag-iisip na may dalang patalim kung saan siya ay nanghihingi ng pera sa mga pasahero at tinatakot sila.

Ang lalaki na nagngangalan “Ariel” ay hinabol at tinakot ng patalim si I-ACT marshal SN2 Julius Gibran Abundol III ng Philippine Coast Guard’s Team Barracuda subalit na nadisarmahan din nila at napatahimik ang salarin sa tulong ng elemento ng PNP-Highway Patrol Group.

Ayon sa pahayag, si Ariel ay matagal ng nakikita na pakalat-kalat sa iba pang estasyon ng EDSA carousel at nangtatakot ng mga pasahero. Napagalaman din na kanyang ginugulo ang operasyon ng mga buses sa EDSA carousel.

Hinikayat din ni Tugade na maging alisto ang riding public at aktibong makisama sa pagpapanatili ng katahimikan at kaayusan sa mga transport stations at hubs at habang nakasakay din sa mga pampublikong sasakyan.

“You are our partners in keeping our transport systems operating at its most efficient levels daily. Peace and order are major components of these systems. Report to authorities any suspicious incidents that may cause harm and disrupt the operations of our transport system. Your cooperation is important,” dagdag ni Tugade. (LASACMAR)