- September 20, 2026
Ang Diyaryong Pinagkakatiwalaan
Archive for November, 2020
DTI: Walang paggalaw sa presyo ng bilihin sa mga nasa State of Calamity
SINABI ni Trade and Industry Secretary Ramon Lopez na awtomatiko ang price freeze sa mga lugar na nasa ilalim ng state of calamity dahil sa Bagyong Rolly.
“Unang-una, the Typhoon Quinta last week, so may mga state of calamity, so automatic price freeze doon sa mga calamity areas—Albay, Batangas, Oriental Mindoro, Marinduque,” saad ni Lopez sa isang panayam ng Dobol B.
“Tapos, yesterday, nag-declare na rin ang Cavite, o price freeze na rin tayo diyan,” dagdag nito.
Sakop nito ang mga pangunahing bilihin tulad ng mga de latang ulam, instant noodles, kape, at gatas.
Ang mahuhuling lumabag ay pagmumultahin ng aabot sa P2 milyon.
Dagdag nito na kahit walang tigil-galaw sa presyo ng mga bilihin, maigting na pinatutupad ang suggested retail price sa mga ito. (Ara Romero)
5 sabungero arestado sa tupada
LIMANG indibidwal ang arestado matapos maaktuhan ng pulisya na nagsasabong sa isang ilegal na tupada sa Valenzuela city, kamakalawa ng hapon.
Ayon kay Valenzuela police chief P/Col. Fernando Ortega, nakatanggap ang mga operatiba ng Station Intelligence Branch (SIB) ng isang text message mula sa National Capital Region Police Office (NCRPO) tactical operation command hinggil sa nagaganap na tupada sa Tercias Compound, Brgy. Karuhatan.
Dakong alas-3:20 ng hapon nang salakayin ng mga operatiba ng ng SIB sa pangunguna ni P/Capt. Marissa Arellano ang naturang compound na nagresulta sa pagkakaaresto kay Alejandro Dela Cruz, 63, Jeffrey Solambao, 39, Jhun Bugarin, 45, Robertson Mallare, 26 at Joseph Sabaniano, 36, habang nakatakas naman ang iba pa.
Nakumpiska ng raiding team ang dalawang panabong na manok na may nakakabit pang tari sa mga paa ng mga ito at P3,300 bet money.
Sinabi ni Col. Ortega, ang mga naarestong suspek ay iprinisinta sa Valenzuela City Prosecutor’s Office sa pamamagitan ng electronic inquest proceedings para sa kasong paglabag sa PD 1602 o illegal gambling at inisyuhan din sila ng Ordinance Violation Receipt (OVR) sa paglabag sa So- cial Distancing. (Richard Mesa)
Maingay na videoke, karaoke, tv at radio, bawal
MAKARAANG ipasa ng Local na Pamahalaan ng Navotas ang City Ordinance No. 2020-41, pormal nang ipinagbawal sa lungsod ang paggamit ng videoke at karaoke machines na anumang makalilikha ng labis at nakapangbubulahaw na ingay sa mga araw na may online classes ang mga estudyante.
Ang pagamit ng radyo, telebisyon, instrumentong pangmusika at iba pa na nakagagagawa ng nakapang- aabalang ingay ay bawal na rin.
“We have received a number of complaints regarding neighbors who use videoke and other machines that produce loud sounds during school hours. This makes it difficult for our students to listen to their teachers and concentrate on their studies,” ani Mayor Toby Tiangco.
Ang paggamit ng videoke, karaoke at mga katulad na gamit ay pinapayagan kapag holiday at kung araw ng Linggo, 1:00 pm hanggang 10:00 pm.
Sa ilalim ng ordinansa, ang mga lalabag sa unang pagkakataon ay pagmumultahin ng P250 habang P500 naman ang multa sa ikalawang paglabag. Ang ikatlo at kasunod pang paglabag ay may multang P1,500.
Ipawawalang-bisa ang nasabing ban sa sandaling magbalik na ang face-to-face classes. (Richard Mesa)
PDu30, gustong imbestigahan ang quarrying operations sa Guinobatan, Albay
GUSTO ni Pangulong Rodrigo Roa Duterte na imbestigahan ang di umano’y quarrying operations sa Guinobatan, Albay na ginagawa habang nananalasa ang bagyong Rolly.
“Papa-imbestigahan ng Pangulo ang quarrying sa Guinobatan. Nagreklamo ang mga residente,” ayon kay Senador Bong Go.
Iyon nga lamang, nananatili aniyang hindi malinaw kung ano ang tunay na reklamo ng mga residente kaugnay sa di umano’y quarrying activities.
Nauna rito, binisita ni Pangulong Duterte ang Guinobatan at nakipagkita sa mga residente nang magsagawa ng aerial inspection ng nasabing bayan isang araw matapos bayuhin ng Super Typhoon Rolly.
Maliban sa Guinobatan, nagsagawa rin ng aerial inspection si Pangulong Duterte sa Catanduanes, unang lalawigan na tinamaan ng bagyong Rolly.
Matapos ang inspection at pakikipagpulong sa mga residente, makikipagkita naman ang Chief Executive sa mga concerned officials para sa situation briefing para pag-usapan ang gagawing pagtugon ng pamahalaan sa mga apektado ng kalamidad. (Daris Jose)
Baguhan na sina Kiko at Jovani, bibida sa BL series na ‘Happentance’
MGA baguhan sa showbiz ang mga bida sa Happenstance, ang bagong BL series na ididirek ni Adolf Alix, Jr. para sa GagaOOLala channel.
Si Kiko Ipapo, 21, ay isang social media personality at influencer. Naging print model muna siya before he decided na subukan ang acting. Ang Happenstance very first acting project niya.
Si Jovani Manansala, 23, ay nagsimula rin sa entertain- ment industry via doing commercial ads. Tapos noon ay lumabas na siya sa iba’t- ibang TV shows tulad ng Ipaglaban Mo at Maalaala MoKaya? Nakalabas na rin siya sa indie movies na Mamu, And a Mother Too and Jolly Spirit Squad.
Kiko and Jovani play Wade and Jose Manuel, ang dalawang tao na magically nagkita kahit na sila ay nakatira sa magkaibang panahon – one in 1974 and in 2020.
Grounded si Jose Manuel matapos malaman ng kanyang amang sundalo na may relasyon siya sa isang aktibista. Si Wade naman is nursing a broken heart matapos makipaghiwalay kay Eric at habang nagbabakasyon ay naipit sa quarantine dulot ng Covid 19. Matapos ang super moon, parang may nagbukas na portal kung saan nakakapag- usap ang dalawa at ang nagkaroon ng connection.
Mula sa script ni Jerry Gracio, ang GagaOOlala Original series na ito ay malapit nang mapanood sa streaming platform. Kasama rin sa cast sina Bembol Roco, Rossana Roces, Alan Paule, Angeli Bayani, Erlinda Villalobos, Ken Anderson at Shu Calleja.
“Atin Lang,” ang theme song Happenstance ay kinompos at inawit ni Mikoy Morales. Magkakaroon din ito ng music video soon.
*****
INTERESTING ang bagong offering sa iWant featuring Erich Gonzales titled La Vida Lena.
Kasama sa powerhouse cast sina Carlo Aquino, JC De Vera, Kit Thompson, Janice de Belen, Agot Isidro, Raymond Bagatsing, Pen Medina, Ruby Ruiz, Soliman Cruz, Christian Vasquez, Malou Crisologo, Josh Ivan Morales, Hasna Cabral at Sofia Andres.
Introducing sa show sina Renshi de Guzman at Danica Ontengco.
Ito ay mula sa direksiyon nina Jerry Lopez Sineneng at Jojo Saguin.
Maganda ang teaser trailer ng La Vida Lenana inilabas ni Direk Jerry sa kanyang Facebook account. Matindi ang drama at tagisan ng acting. (RICKY CALDERON)
Zamboanga City, kampeon sa Chooks-to-Go Pilipinas 3×3 Presidents Cup
NAKUHA ng Zamboanga City ang kampeonato sa 2020 Chooks-to-Go Pilipinas 3×3 President’s Cup.
Ito ay matapos talunin nila ang Nueva Ecija Rice Vanguards sa score na 22-19.
Bumida sa panalo ng Zamboanga sina Joshua Munzon at Alvin Pasaol na kapwa nagtala ng tig-7 points.
Bukod sa tituloy ay nag-uwi ang koponan ng P1-million na premyo sa torneo.
Magugunitang naging professional league ang Chooks-to-Go Pilipinas noong Hulyo.
Superliga beach volleyball, kinansela
TULUYAN nang kinansela ng Philippine Superliga ang kanilang Beach Volleyball Cup dahil sa pananalasa at matinding epekto sa bansa ng super bagyong Rolly.
Sinabi ng PSL na nagkasundo na lamang sila na ituloy sa Pebrero 2021 ang kompetisyon.
Ayon sa ulat, target sanang isagawa ng beach volleyball nitong Nobyembre 26-29 sa Subic Bay na binubuo ng 16 koponan pero dahil sa epekto ng bagyo ay napagdesiyunan nilang kanselahin na muna ito.
Dagdag pa ng PSL, matinding deliberasyon sa pulong ang kanilang ginawa upang talakayin ang isyu na naghatid sa kanila sa nasabing desisyon.
Magugunitang tanging ang PSL lamang na non-professional sports at women’s league ang siyang inaprubahan ng IATF para sa pagsasanay at kompetisyon.
Huwag nang hintayin pa ang ‘last minute’
UMAPELA ang pamahalaan sa mga motorista na huwag nang hintayin pa ang “last minute” para makakuha ng radio frequency identification (RFID) stickers at maipakabit sa kanilang sasakyan.
Bahagi ito ng paghahanda para sa cashless scheme sa mga major toll roads simula sa Disyembre.
Sinabi ni Presidential spokesman Harry Roque na iniurong ng Department of Transportation (DOTr) ang pagsisimula ng cashless toll collection mula sa dating Nobyembre 2 at ginawang Disyembre 1 para payagan ang mga motorista na makapag-comply sa mga requirement.
Sa halip na manual cash transactions, ang RFID system ay naglalayong payagan ang electronic payment sa mga tolls sa oras na dumaan na ang sasakyan sa pamamagitan ng toll plaza.
Maaaring i-load o i-top ng motorista ang kanyang RFID account sa toll booths at iba pang online payment facilities.
“Paalala ko sa ating mga kababayan, iwasan natin iyong nakasanayan na kung kailan ilang araw na lang bago ang deadline ay saka tayo dudumog sa mga installation sites ,” ayon kay Sec. Roque.
“Habang maaga pa po ay magpakabit na tayo ng RFID upang maiwasan ang last minute na transaction ,” dagdag na pahayag nito.
Tiniyak ni Sec. Roque na hindi na maaantala ng pamahalaan ang implementasyon ng cashless mode of payment sa expressways.
“Huling hirit na po ang exten- sion na ito. Simula December 1 ay mahigpit na pong ipatutupad ang full cashless transactions sa ating mga toll roads,” ang pahayag ni Sec. Roque.
Sa ulat, pinalawig ng pamunuan ng Department of Transportation (DOTr) ng hanggang Disyembre ang full implementation ng cashless toll collections sa mga toll roads sa bansa.
Tugon ito sa panawagan ng mga motorista, na hanggang ngayon ay wala pa ring RFID stickers sa kanilang sasakyan.
Ayon sa DOTr, ang naturang ekstensyon ay nangangahulugan na ang Department Order 2020- 012 na nagmamandato ng cashless mode of payment o 100% paggamit ng electronic payment systems sa mga expresways, ay magsisimulang ipatupad sa Disyembre 1, mula sa dating schedule na Nobyembre 2.
“So huwag po kayong mag- panic. Binigyan po tayo nang mas mahabang panahon para magpakabit ng RFID. Ito ay upang bigyan ng konsiderasyon ang mga kababayan natin na hindi pa rin nakakapag-install ng RFID sa kanilang mga sasakyan,” ayon kay Sec. Roque.
Paglilinaw naman ng DOTr, non-extendible na ang naturang petsa.
“With the extension, this means that the full implementation of the department order mandating only the cashless mode of payment, or the 100% use of electronic payment systems, in expressways will start on December 1. The deadline will no longer be extended beyond this date,” anang DOTr.
Ayon naman kay Toll Regulatory Board (TRB) Executive Director Abraham Sales, pinayagan ni DOTr Secretary Arthur Tugade ang ekstensiyon upang mabigyan ng mas mahabang pagkakataon ang mga motorista, para makapagpakabit ng RFID, at tumalima sa department order.
Una nang ipinag-utos ng DOTr ang implementasyon ng cashless transaction sa toll roads upang maiwasan ang hawahan ng COVID-19, gayundin ang traffic congestion sa mga toll plazas.
Ang mga motorista na mabibigong sumunod sa mandato ay huhulihin at iisyuhan ng citation ticket.
Samantala, pinaalalahanan naman ni DOTr Assistant Secretary for Road Transport and Infrastructure Mark Steven Pastor ang mga motorista na samantalahin ang extended deadline sa pagpapalagay ng RFIDs sa kanilang mga sasakyan, sa lalong madaling panahon.
“Iwasan natin ‘yung kung kailan isang linggo na lang, tsaka tayo magmamadaling magpunta sa installation sites para magpakabit ng RFID. Now, we are extending the deadline to give further consideration. Let us use the extension wisely,” ani Pastor. (Daris Jose)
‘ Wag gamitin ang sitwasyon ng pandemya sa negosyo
UMAPELA si Senador Bong Go sa mga nagsasamantala at ginagawang negosyo ang COVID- 19 na sana ay unahin na ang buhay ng kapwa Pilipino bago ang kanilang pagkita nang sobra-sobra.
Sinabi ni Go na necessary commodity na ang COVID-19 testing habang mayroon pang pandemya kaya napipilitan na ring magbayad ng mahal ang mga Pilipino para makapagpasuri kaya naman hindi na dapat samantalahin ng iba.
Binigyang diin ni Go na dapat palaging unahin ang buhay ng mga Pilipino at hindi dapat pagkakitaan lang ng mga nagsasamantala .
Kaugnay nito, iginiit ni Go na dapat mayroon nang mekanismo na nakalatag para maging mas available at affordable ang COVID-19 testing.
Ayon kay Go, tulad ng sinabi ni Pangulong Rodrigo Duterte, uunahin ang mga mahihirap at vulnerable sector kapag mayroon nang available at sure na COVID- 19 vaccine para makabalik na sa normal na pamumuhay at paghahanap-buhay. (Ara Romero)