NAKATANGGAP ang Pamahalaang Lungsod ng Valenzuela ng 15 Mobile Material Recovery Facility (MMRF) trucks mula sa Metropolitan Manila Development Authority (MMDA), bilang pakikiisa nito sa programang “Recyclable Mo, Palit Grocery Ko”.

Pinangunahan nina Mayor Wes Gatchalian at MMDA Chairman Atty. Don Artes ang turnover ceremony bilang bahagi ng mga hakbang upang maisulong ang wastong pamamahala ng basura at pangangalaga sa kalikasan.

Sa ilalim ng Metro Manila Flood Management Project Phase 1, layunin ng programa na mabawasan ang basurang napupunta sa mga landfill at daluyan ng tubig sa pamamagitan ng pagpapalitan ng mga nakolekta at naihiwalay na recyclable materials kapalit ng mga pangunahing pangangailangan tulad ng bigas, de-lata, at instant noodles.

Sa pamamagitan ng MMRF trucks, hinihikayat ni Mayor Wes ang mga residente na makiisa sa wastong paghihiwalay at pagre-recycle ng basura upang mapanatili ang kalinisan ng komunidad, maiwasan ang pagbabara ng mga daluyan ng tubig, at makatulong sa pagbabawas ng panganib ng pagbaha. (Richard Mesa)

TINANGGAP ni Pangulong Ferdinand Marcos Jr., araw ng Martes ang credentials ng bagong itinalagang non-resident ambassadors to the Philippines mula Jordan, Chad, Fiji at Burundi.

Unang tinanggap ni Pangulong Marcos ang credentials ng kanyang Kamahalan Nasser S.H. Shraideh, ambassador ng Hashemite Kingdom of Jordan to the Philippines, na naghatid ng mainit na pagbati at best wishes mula kay King Abdullah II bin Al Hussein ng Jordan kay Pangulong Marcos.

Sinabi ng Presidential Communications Office (PCO) na binigyang diin ni Shraideh ang 50th anniversary ng diplomatic relations sa pagitan ng Pilipinas at Jordan, naka-angkla sa pagkakaibigan, mutual respect at kooperasyon.

Nangako naman ito ng mas palalakasin at pagtitibayin ang bilateral ties sa kalakalan, pamumuhunan, turismo, edukasyon at people-to-people exchanges.

Nagpahayag naman ng kumpiyansa ang Pangulo ukol sa paggalugad ng mga bagong oportunidad kasama ang Jordan.

“Our relations have been very warm, but the world is changing, and there are many new opportunities that we can explore and develop between our two countries to the benefit of both Jordan and the Philippines,” ayon kay Pangulong Marcos.

Tinanggap din ng Pangulo ang Kanyang Kamahalan Abakar Saleh Chahaimi, ambassador ng Republic of Chad to the Philippines, nagpahayag ng pag-asa na ang matagal nilang pagsasama ay makatutulong na mas palalimin pa ang ugnayan sa pagitan ng dalawang bansa.

“I look forward to the time that you will be spending with us and making that time productive and constructive to find ways to bring our countries closer, to make our relations deeper,” ang tinuran ni Pangulong Marcos.

Muli namang pinagtibay ng Kanyang Kamahalan Ratu Isoa Delamisi Tikoca, ambassador ng Fiji to the Philippines, ang ‘longstanding relationship’ nito sa Pilipinas at kinilala ang mahalagang kontribusyon ng Filipino community sa pag-unlad ng Fiji.

“I will endeavor to the best of my ability to strengthen our bilateral ties so that our cooperation grows stronger and our shared journey brings about mutual prosperity,” ani Tikoca.

Sinabi naman ni Pangulong Marcos na ang relasyon sa pagitan ng dalawang bansa ay mas lumagong malapit sa nakalipas na taon sa gitna ng karaniwang mga hamon.

“Our relationship has been one that is very, very close, that in the past few years has come closer in the face of the many common situations that we both face,” anito.

“And I look forward to building even more bridges and bringing our countries even closer in the time that you are with us,” aniya pa rin.

Samantala, winelcome rin ng Pangulo ang Kanyang Kamahalan Telesphore Irambona, ambassador ng Republic of Burundi to the Philippines, at nagpahayag ng pag-asa na ang geographical distance ay hindi magiging hadlang sa mas malapit na ugnayan at kooperasyon.

“It is a long way from your country to mine, but we will not allow physical distance to get in the way of bringing our countries closer together in the many opportunities that present themselves in this new modern world that we are facing,” ang sinabi ni Pangulong Marcos kay Irambona.

“I look forward to the work that we will do to deepen the relations between Burundi and the Philippines,” anito pa rin. ( DARIS JOSE)

SINABI ni Pangulong Ferdinand R. Marcos Jr. na ang hustisya ay hindi lamang tungkol sa pagpaparusa, kundi pati sa pagbibigay ng tunay na pagkakataon sa mga person deprived of liberty (PDL) na magbagong-buhay at makapagsimulang muli. 

Kasabay nito aniya ang malinaw na pagpapatupad ng batas laban sa lahat, anuman ang pangalan, posisyon, o koneksiyon, at tutuparin ng Philippine National Police (PNP) ang lahat ng outstanding warrant sa buong bansa.

Sa pagdiriwang ng ika-32 National Correctional Consciousness Week sa New Bilibid Prison sa Muntinlupa City, binigyang-diin din ng Pangulo ang kahalagahan ng rehabilitasyon at reporma upang maihanda ang mga PDL sa kanilang pagbabalik sa pamilya at lipunan. 

Kabilang dito ang pagpapabilis sa pagpapalaya ng mga kuwalipikadong PDL, legal assistance, at mga programang pang-edukasyon, pagsasanay sa kasanayan, at kabuhayan.

Sinasabing, mula Hulyo 2022 hanggang Oktubre 26, 2026, umabot sa 36,842 PDL ang napalaya sa iba’t ibang paraan, habang 16,179 ang nailipat sa ibang bilangguan at penal farms upang makatulong sa pagbawas ng pagsisikip. 

Bukod dito, 24,534 PDL ang nakatanggap ng mga programa sa rehabilitasyon bago lumaya, at 25,210 dating PDL ang nabigyan ng tulong at referrals para sa kabuhayan matapos ang kanilang paglaya.

Sa ilalim ng pamamaraang ito, isinusulong aniya ng pamahalaan ang makataong hustisya na nagbibigay ng pagkakataong magbago sa mga kuwalipikado, habang tinitiyak na walang sinuman ang nasa ibabaw ng batas at lahat ay mananagot sa kanilang mga obligasyon dito.

 (DARIS JOSE)

PINAIIMBESTGAHAN ng ilang mambabatas ang ginawang pagsuspinde ng Bureau of Internal Revenue (BIR) ng kanilang Registration Seal Badge requirement para sa mga online sellers, service providers, and content creators.

Naghain ng resolusyon sina Kabataan partylist Rep. Renee Co , Gabriela partylist Rep. Sarah Jane Elago at ACT Teachers partylist Rep. Antonio Tinio na nananawagan sa Kamara na imbestigahan kung bakit sinuspinde ang registration seal badge ng walang kaukulang konsultasyon.

“Biglang bawi? The BIR implemented this policy without prior consultation nor proper consideration for every Filipino engaged in online work. Kaya lalong nakakabahala na matapos ang higit 50,000 na registration, bigla itong binawi ng BIR. Hindi sapat ang bawi, dapat may imbestigasyon pa rin,” pahayag ng tatlong kongresista.

Sinuspinde ng BIR ang Oktubre 31 deadline para sa mandatoryong paglalagay ng digital registration seal badge sa online profiles ng mga online seller, freelancer at content creators kasunod ng mga pangamba sa paglabag sa data privacy at identity theft.

Sa ilalim ng BIR Memorandum Circular, inatasan ang mga nasabing taxpayer na pampublikong ipakita ang kanilang digital registration seal badge sa kanilang mga online profile.

Gayunman, kinuwestiyon ng mga content creator ang polisiya dahil bagama’t nakatago sa badge ang kanilang Taxpayer Identification Number (TIN), nakikita naman dito ang buong rehistradong pangalan ng negosyo, na para sa ilang creator at online seller ay kanilang buong legal na pangalan. (VINA de GUZMAN)

TIMBOG ang isang hinihinalang tulak ng ilegal na droga nang kumagat sa isinagawang buy bust operation ng pulisya sa Valenzuela City, kamakalawa ng gabi.

Sa kanyang ulat kay Northern Police District (NPD) Director P/BGen. Benliner Capili, kinilala ni Valenzuela Police Chief P/Col. Joseph Talento ang suspek na si alyas “Jonjie”, 45, (SLI/pusher) ng Brgy., Balangkas.

Lumabas sa imbestigasyon ni PMSg Ana Liza Antonio na isinagawa ng mga operatiba ng Station Drug Enforcement Unit (SDEU) sa pangunguna ni P/Lt. Sherwin Dascil ang buy bust operation sa koordinasyon sa PDEA kasunod ng natanggap na impormasyon hinggil sa umano’y ilegal drug activities ni alyas Jonjie.

Hindi na nakapalag ang suspek nang arestuhin ng mga tauhan ni Lt. Dascil matapos bintahan umano ng P7,500 halaga ng shabu ang isang pulis na nagpanggap na buyer dakong alas-11:50 gabi sa kanto ng Kabesang Imo at Bignay Streets, Barangay Balangkas.

Nakumpiska sa kanya ang humigi’t kumulang 10 grams ng hinihinalang shabu na nagkakahalaga ng P68,000, buy bust money na isang tunay na P1,000 bill at pitong P1,000 boodle money, cellphone , coin purse at P100 cash.

‎‎

Mahaharap ang suspek sa kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002 sa Valenzuela City Prosecutor’s Office. (Richard Mesa)