PARA SA CALOOCAN: Sa pagtutulungan nina Congressman Egay Erice at Mayor Along Malapitan, kasama ang mga kinatawan ng DOTr, DPWH at iba pang stakeholders, isinagawa ang isang coordination meeting upang pag-usapan ang posibleng paggamit ng mga open spaces sa ilalim ng skyway sa Lungsod ng Caloocan.

Tinalakay ang posibilidad na gawing public park at parking area ang bahagi ng mga ito, pati na rin ang mga susunod na hakbang at kinakailangang koordinasyon para maisulong ang panukala para sa kapakinabangan ng komunidad. 

(Richard Mesa)

SINABI ng Malakanyang na kung malinaw na sinagot lamang ni Vice President Sara Duterte ang alegasyon laban sa kanya ay malamang na walang impeachment trial.

“Siguro kung magaling siya mag-explain sa mga tinuturo sa kanya, baka hindi na tayo nakarating sa impeachment court, dahil kung mayroon siyang maliwanag sa ebidensya na masabing wala siyang anumang bahid ng kasalanan, wala siguro tayong impeachment na pinag-uusapan ngayon,” ang sinabi ni Presidential Communications Office (PCO) Undersecretary at Palace Press Officer Claire Castro.

Nag-ugat ang pahayag na ito ni Castro nang itinanggi ni VP Sara ang mga alegasyon ng sinibak na dating patrolman na si Rodulfo Gracioso Jr. na naghatid di umano siya ng pera sa bise presidente at sinabing may personal itong dahilan sa mga ibinunyag nito.

Magugunita na sinabi ni Gracioso na naghatid umano siya ng pera kay VP Sara, kay Davao City 1st District Rep. Paolo Duterte at kay dating Pangulong Rodrigo Duterte, na ayon sa kanya ay ipinagawa sa kanya ni dating House Speaker Lord Allan Velasco.

Bilang paglilinaw, ipinakita ni VP Sara ang screenshot ng naging pag-uusap nila ni Velasco.

Makikita umano rito na ipinadala niya sa dating speaker ang screenshot ng affidavit ni Gracioso at tinanong kung sino ito.

Sinabi umano ni Velasco na dating security niya si Gracioso na nangasiwa ng party-list sa Samar.

Ayon kay VP Sara, sinabi rin ni Velasco na binigyan si Gracioso ng pera para mangampanya para sa naturang party-list.

Humingi rin umano ito ng pera para sa gastusin sa ospital at pambili ng gamot.

Dagdag pa ng bise presidente, sinabi ni Velasco na inalok ng kanyang asawang si Rowena na sila na ang bahala sa mga pangangailangan ni Gracioso. Gayunman, tumanggi umano ang dating pulis at iginiit na padalhan na lamang siya ng pera.

Sinabi ni VP Sara na hindi siya humingi ng permiso kay Velasco bago niya i-screenshot at ilabas sa publiko ang kanilang pag-uusap.

Binigyang-diin naman ng bise presidente na hindi siya dapat idamay sa anumang personal na alitan sa pagitan nina Velasco at Gracioso.

Samantala, sinabi ni Castro na hanggang ngayon ay hindi pa rin nagbibigay ng konkretong ebidensya ang kampo ni VP Sara para kontrahin ang mga pahayag ni Gracioso

“Wala pa talagang binibigay na konkretong ebidensya na walang natanggap. So ibig sabihin nito, kung may natanggap man sila na pera, hindi ang Pangulo ang nakinabang dito, hindi ang kasalukuyang administrasyon ang nagpasa sa mga pondong hindi umano tinanggap nila,” ani Castro.

At nang hingan naman ng komento si Castro ukol sa naging pahayag ni Davao Mayor Sebastian Duterte, kapatid ni VP Sara na gusto nitong tumakbo sa national position, ang tugon ni Castro ay kailangan munang mag-pokus at unahin ang trabaho.

“Trabaho muna para sa mga kababayan natin ang unahin hindi puro pangangampanya para mai-angat ang mga sarili,” diing pahayag ni Castro.

 ( DARIS JOSE)

MATAPOS ang matagumpay na selebrasyon ng San Miguel OktoberFest sa Okada Manila noong September 26 na may temang Beer, Bites, and Beats, na sinabayan ng live performances mula sa mga pinakasikat na banda sa bansa ay tutungo naman ito sa anim pang destinasyon ngayong Oktubre.

Ang San Miguel Oktoberfest ay muling magdiriwang ng makulay at masiglang selebrasyon sa Batangas, Tuguegarao, Pampanga, Manila, Iloilo, at Agusan del Sur.

Nagsimula ang nationwide celebration noong Oktubre 3 sa Barangay Inosloban, Lipa City, Batangas, kung saan mahigit 4,000 katao ang dumagsa sa venue sa Lipa Bypass Road. Naging mas masaya rin ang pagdiriwang dahil sa malamig ngunit tuyong panahon.

Sa Oktubre 10, tutungo naman ang San Miguel OktoberFest sa Tabacalera Grounds sa Tuguegarao City, Cagayan at inaasahang magpapasigla ang mga bandang Maki, The Juans, Mama’s Boys, UCV Band, at Major Tom Band.

Sa Oktubre 17, lilipat ang kasiyahan sa Royce Hotel and Casino Ballroom sa Clark, Pampanga, kung saan magpapasaya sa mga bisita sina Bamboo, Itchyworms, Chew The Cud, at DJ Chelsea.

Samantala, magiging isa sa pinakamalaking araw ng San Miguel OktoberFest ang Oktubre 24, dahil tatlong malalaking beer parties ang sabay-sabay na gaganapin.

Ito ay sa Malate, Manila, sa harap ng LaVie Resort and Casino sa kahabaan ng Pedro Gil Street na siguradong magiging masigla ang gabi sa pagtatanghal ng Kamikazee, Itchyworms, The Boyfriends, at Dilaw.

Sa Passi City Esplanade sa Passi City, Iloilo, bubuksan naman ang venue para sa mga partygoer na masisiyahan sa performances ng December Avenue, The Juans, Kreonz, at Kultura.

At sa Prosperidad, Agusan del Sur, aalingawngaw ang Naliyagan Plaza Grounds sa tugtugan ng Mayonnaise, Rocksteddy, Tamad si Juan, at Agusan Marsh Band.

Kaya naman, ayain na ang barkada, mag-cheers sa malamig na San Miguel Beer, at makisaya sa selebrasyon ng San Miguel OktoberFest sa inyong mga probinsya. (Richard Mesa)

MAGTATAYO ang Metropolitan Manila Development Authority (MMDA) at lokal na pamahalaan ng Maynila ng tatlong rainwater impounding facility para maibsan ang pagbaha sa lungsod.

Itatayo ang mga pasilidad sa Remedios Circle, Rajah Sulayman Park, at sa Vito Cruz ASEAN Garden sa loob ng Cultural Center of the Philippines (CCP) Complex.

Nilagdaan nina MMDA Chairman Romando Artes at Manila Mayor Isko Moreno ang memorandum of agreement para sa pagpapatupad ng proyekto.

Tinatayang 10,000 cubic meters ang kayang imbak ng tubig sa Remedios Circle, 8,000 cubic meters sa Rajah Sulayman Park, at 9,600 cubic meters naman sa Vito Cruz ASEAN Garden.

Bahagi ang proyekto ng Metro Manila “Sponge City Program” na may P4 bilyong pondo para sa rainwater catchment facilities.

Target itong matapos bago ang tag-ulan sa susunod na taon, habang 39 pang lokasyon sa Metro Manila ang tinukoy para sa kaparehong proyekto. (Gene Adsuara)

“MARAMING kabataan ang may talino, sipag, at malinaw na pangarap, pero kinakapos ang kanilang pamilya sa gastos sa pag-aaral. Dapat mabigyan sila ng pagkakataong makatapos at magamit ang kanilang galing para sa sariling pamilya at sa bayan.” 

Ito ang binigyan diin ni House Speaker Faustino “Bojie” G. Dy III matapos ang pagpapatibay ng bicameral conference committee report sa pagtatatag ng Presidential Merit College Scholarship Programs (PMSPs) na magbibigay ng tulong at suporta sa mga estudyante patungo sa kolehiyo o technical education.

Ang PMSPs ay itatatag sa ilalim ng Commission on Higher Education at Presidential Merit Technical Scholarship Program ng Technical Education and Skills Development Authority (TESDA). 

Batay sa pinagsamang House Bill No. 8477 at Senate Bill No. 2410, ang PMSPs ay tutulong sa mga hikahos na senior high school graduates na makatunton sa kolehiyo o technical education.

“Alam nating kahit libre ang tuition, may pamasahe, pagkain, tirahan at mga gamit pa ring kailangang bayaran. Kaya mahalaga na ang tulong ay tumugon sa tunay na gastos ng estudyante para makapagpatuloy siya hanggang makatapos,” sinabi ni Dy. 

(VINA de GUZMAN)