BALIK-SELDA ang isang tulak ng droga na itinuturing bilang High-Value Individual (HVI) nang muling naaresto ng pulisya sa ikinasang buy bust operation sa Valenzuela City, Sabado ng madaling araw.

Sa kanyang ulat kay Northern Police District (NPD) Director P/BGen. Benliner Capili, kinilala ni Valenzuela Police Chief P/Col. Joseph Talento ang suspek na si alyas “Odek”, 45, residente ng Brgy. Balangkas.

Isinagawa ng mga operatiba ng Station Drug Enforcement Unit (SDEU) ng Valenzuela CPS sa pangunguna ni P/Lt. Sherwin Dascil ang buy bust operation sa koordinasyon sa PDEA, kasunod ng natanggap na impormasyon hinggil sa patuloy umanong illegal drug activities ni alyas Odek.

Ang signal mula sa kanyang kasama na nagpanggap na poseur buyer na positibo na ang transaksyon ang naging hudyat para agad lumapit at dambahin ng back-up na operatiba ang suspek dakong alas-2:25 ng madaling araw sa kanto ng Sebastian at Deato Sts., Brgy., Balangkas.

Umabot 25 grams ng hinihinalang shabu na nagkakahalaga ng P170,000.00 ang nasamsam sa suspek, kasama ang buy bust money na isang tunay na P500 bill at pitong P1,000 boodle money, at P100 cash.

Sa record ng SDEU, ilang beses nang naaresto ang suspek dahil sa pagbebenta ng ilegal na droga.

Ayon kay SDEU investigator PMSg Ana Liza Antonio, sasampahan nila ang suspek ng kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002 sa Valenzuela City Prosecutor’s Office. (Richard Mesa)

DAHIL sa kasong Unjust Vexation, dinakip ng pulisya ang 44-ayos na babaing negosyante na nanlait at pumuna sa ipinatupad na truck ban ni Valenzuela City Mayor Wes Gatchalian nang matunton sa Baliwag, Bulacan, Sabado ng madaling araw.

Sa bisa ng warrant of arrest na inilabas ng Caloocan City Metropolitan Trial Court Branch 49, inaresto ng mga tauhan ni Valenzuela Police Chief P/Col. Joseph Talento si alyas “Cathy”, sa kasong Unjust Vexation na isinampa laban sa kanya ng isang pribadong complainant ala-1:00 ng madaling araw sa kanyang tirahan sa Brgy., Sabang, Baliwag, Bulacan.

Magugunita na nag-post sa kanyang Facebook page si ‘Cathy’ noong Setyembre 26, 2026 na pumupuna sa ipinatupad na truck ban sa Valenzuela na aniya ay nakasisira sa negosyo at umani ng halos apat na milyong views at 80,000 reaction makaraang laitin at sinabihan pa ng hindi magandang pananalita ang alkalde.

Ipinatupad ng alkalde ang truck ban mula alas-6 ng umaga hanggang alas-10 ng gabi upang matapos agad ang pagkukumpuni at rehabilitasyon sa pangunahing lansangan sa lungsod habang binigyang ng exemption ang lehitimong mga negosyante.

Pansamantalang naka-detine si alyas Cathy sa Valenzuela Police Sub-Station-6 sa 3S Dalandanan habang hinihintay pa ang utos ng korte para sa paglilipat sa kanya sa Valenzuela City Jail o pagpapalaya sa kanya sa oras na makapaglagak ng piyansang P2,000.00. (Richard Mesa)

PANSAMANTALA munang sinuspinde ni Valenzuela City Mayor Wes Gatchalian ang nakatakdang pagpapatupad ng Metropolitan Manila Development Authority (MMDA) sa No Contact Apprehension Policy o NCAP sa lungsod sa Lunes, October 5.

Ayon kay Mayor Wes, nauunawaan niya ang layunin ng NCAP bagamat sa sitwasyon aniya ngayon ng lungsod ay hindi pa ito tamang panahon dahil sa sunod-sunod na road construction, rehabilitasyon, at pagkukumpuni ng mga pangunahin nilang lansangan.

“Araw-araw po ay nagbabago ang daloy ng trapiko sa ating lungsod, ayaw nating dagdagan ang pasanin ng ating mga motorista sa panahong hindi pa normal ang kondisyon ng ating mga kalsada,” pahayag ng alkalde.

Dagdag pa ni Mayor Gatchalina, uunahin muna nila ang maayos at ligtas na daloy ng trapiko para sa mga Valenzuelano at tsaka na nila ito ipatutupad hanggang sa susunod na paglalabas nila ng abiso. (Richard Mesa)