TIMBOG ang limang indibidwal kabilang ang isang Chinese national sa isinagawang raid ng pulisya sa isang cold storage facility na imbakan ng mga imported na isdang mackerel sa Caloocan City, Miyerkules ng gabi.

Armado ng search warrant na inilabas ni Caloocan Regional Trial Court (RTC) National Capital Judicial Region Acting Presiding Judge Rosalia I, Hipolito-Bunagan ng Branch 232, sinalakay ng pinagsanib na puwersa ng Northern Police District (NPD) Criminal Investigation and Detective Group (CIDG), Bureau of Fisheries and Aquatic Resources (BFAR-NCR), Department of Agriculture Inspectorate and Enforcement (DAIE), at Caloocan Police ang Ocean Fish Cold Storage Realty Corp. sa C-4 Road, Dagat-dagatan Brgy. 8 dakong alas-6:00 ng gabi.

Kinilala ang mga nadakip na si alyas “Hui”, Chinese national, compound supervisor at mga Filipinong maintenance crew na sina alyas “Eubert”, alyas “Justine”, at alyas “John Lloyd” , pati na ang driver na si alyas “Antonio”, habang wala sa naturang pasilidad ang subject ng search warrant na si alyas “Cai”, Chinese national.

Nakumpiska ng mga awtoridad sa loob ng cold storage ang kabuuang 755 na kahon ng Frozen Pacific Mackerel mula sa China na nagkakahalaga ng P1, 057,000.00 at isang wing van na ginagamit sa pagbiyahe ng puslit na frozen mackerel.

Inangkat ang naturang frozen mackerel nang walang wastong pahintulot, o maling paggamit ng mga aprubadong inangkat na kalakal na paglabag sa food safety at traceability regulations na may katapat na kaparusahan sa ilalim ng umiiral na Philippine Fisheries Law.

Sasampahan ng kaukulang kasong paglabag sa Section 18 Paragraph F at Q ng Fisheries Administrative Order No. 275 na may kaugnayan sa Section 105 ng R.A 8550 o ng The Philippine Fisheries Code of 1998 na inamiyendahan ng R.A. No. 10654.

 (Richard Mesa)

NAGSAGAWA ang Philippine Tobacco Harm Reduction Advocates (PHILTRA) ng 2nd National Summit on Nicotine and Harm Reduction, na dinaluhan ng mga medical expert, consumer group at industry representative upang talakayin ang mga polisiya sa sigarilyo, vape at iba pang nicotine products.

Tinalakay sa summit ang mga panukalang pagbabawal sa vaping at heated tobacco products at ang posibilidad na patawan ang vape products ng kapantay na buwis ng sigarilyo.

Ayon sa mga participant, dapat isaalang-alang ang antas ng panganib sa pagbuo ng tax policies at hindi awtomatikong pantayin ang buwis sa smoke-free alternatives at combustible cigarettes.

Binigyang-diin din ang harm reduction, na naglalayong hikayatin ang mga smoker na hindi kayang tuluyang tumigil sa nicotine na lumipat mula sa combustible tobacco sa mga alternatibong mas mababa ang panganib.

Ibinahagi rin ang karanasan ng Sweden, United Kingdom, New Zealand at Japan, kung saan bumaba ang smoking rates kasabay ng pagkakaroon ng alternatives.

Nagbabala naman ang mga participant na ang sobrang taas na buwis sa legal na produkto, kung walang mahigpit na laban sa illegal trade ay maaaring magtulak sa mga consumer na bumili ng mas mura at hindi nabubuwisang produkto.

Nanawagan ang summit ng mas mahigpit na pagpapatupad laban sa illicit trade at access ng kabataan, habang pinananatili ang risk-based distinction sa pagitan ng sigarilyo at smoke-free products. 

(Gene Adsuara)

REHAS na bakal ang kinasadlakan ng tatlong drug suspects matapos maaktuhang bumabatak umano ng shabu sa magkahiwalay na lugar sa Valenzuela City.

Sa ulat, nakatanggap ng tawag sa telepono ang mga tauhan ni Valenzuela Police Chief P/Col. Joseph Talento hinggil sa umano’y nagaganap na illegal drug activities sa Aka St., beside Kadiwa Market, Brgy., Malanday kaya rumesponde sa lugar ang mga tauhan ng Police Sub-Station 6.

Pagdating sa lugar, naaktuhan nina PSSg Flavin at PCpl Manalad si alyas “Toper”, 30, na sumisinghot umano ng shabu na dahilan ng kanyang pagkakaaresto dakong alas-2:30 ng Huwebes ng madaling araw.

Nauna rito, alas-4:00 ng hapon nang maaktuhan naman nina PCpl Sison at Pat Asuncion, kapwa nakatalaga sa Police Sub-Station 4 si alyas “Jonard”, na bumabatak ng droga sa labas ng isang abandonadong bahay sa Pinagpala St., Sitio Pinalagad, Brgy., Malinta.

Habang arestado din si alyas “Rey ” nang maaktuhan naman nina Pat Calagui at Pat Hernandez, kapwa nakatalaga sa Police Sub-Station 9 na nagsa-shabu umano sa ilalim ng NLEX Harbour Link sa Francisco St., Brgy , Karuhatan pasado alas-8:05 ng gabi.

Nakumpiska sa mga suspek ang tatlong plastic sachets na naglalaman ng bahid ng hinihinalang shabu at ilang drug paraphernalias.

Ayon kay SDEU investigator P/MSgt. Carlito Nerit Jr., mahaharap ang mga suspek sa kasong paglabag sa Sections 12 at 15 ng R.A 9165 o ang Comprehensive Dangerous Drug Act of 2002. (Richard Mesa)