MARIING tinutulan ng isang mambabatas ang panukalang taasan ang Motor Vehicle User’s Charge (MVUC) na dagdag pondo ng gobyerno para sa repair ng mga pangunahing kalsada sa bansa.

Ayon kay Marikina Rep. Miro Quimbo, hindi na kailangan taasan ang MVUC kung dagdag pahirap sa mga motorista.

“Naiintindihan natin ang pangangailangan para sa mas malaking pondo para sa maintenance ng ating mga kalsada. Pero hindi ibig sabihin na ang pinakamadaling paraan ay agad na ipasa ang dagdag na gastusin sa ordinaryong motorista,” sinabi ni Quimbo.

Batay sa proposed adjustment ng Department of Finance (DOF), ang kasalukuyang MVUC collections ay hindi sapat na pondohan ang mga maintenance ng mga kalsada dahil sa inflation. 

Sabi ni Quimbo, kung kailangan ng dagdag na revenue, tingnan muna kung saan mas may kakayahang mag-ambag. 

“Hindi dapat automatic na ang ordinaryong taxpayer at motorista ang sasalo ng dagdag na pasanin,” ani Quimbo.

Aniya, ang road maintenance ay responsibilidad ng gobyerno. “At dapat hanapan ng paraan na hindi dagdag-pasanin para sa mga ordinaryong Pilipino ang magiging default na solusyon,” dagdag ng kongresista.

(VINA de GUZMAN)

SA GINANAP na Saturday News Forum noong September 26, 2026, tinalakay ni Kalihim ng Tanggulang Pambansa Gilberto “Gibo” Teodoro ang lumalalang ugnayan ng Pilipinas at Tsina, kabilang dito ang seryosong banggaan noong Setyembre 18 sa pagitan ng barko ng China Coast Guard at ng BRP Datu Magat Salamat ng BFAR , na naganap sa loob ng sariling eksklusibong sonang pang-ekonomiya ng Pilipinas.

Ibinahagi rin niya ang mas malalawak na hakbang para sa kaligtasan ng bansa, ang patuloy na pagpapatibay at modernisasyon ng Sandatahang Lakas, at ang pagpapatupad ng Komprehensibong Konsepto ng Tanggulang Kapuluan , upang pangalagaan ang soberanya at karapatan ng Pilipinas sa sarili nitong karagatan. ( SER MORALES Sr.)

HINDI maaaring manilbihan si Sara Duterte bilang Bise Presidente habang direktor ng isang pribadong kumpanya, ayon kay House prosecution spokesperson Lanao del Sur Rep. Zia Alonto Adiong.

Sa isang kapihan sa Quezon City nitong Sabado, binanggit ni Adiong ang nakasaad sa Saligang Batas, Article VII, Section 13, na ipinagbabawal ang Presidente, Bise Presidente at mga miyembro ng Gabinete na humawak ng anumang posisyon o interes sa pribadong kumpanya.

Ayon kay Adiong, nakalista pa rin si Duterte bilang corporate director ng isang kumpanya kahit na nahalal na siya bilang Bise Presidente.

Batay sa records ng Securities and Exchange Commission (SEC), nakalista si Duterte bilang stockholder at miyembro ng board of directors ng Metro City Chow Foods Corp. mula 2022 hanggang 2025. 

“Even without getting into details, that alone is a violation of the Constitution, her being the second highest official in the land,” sinabi ni Adiong sa Saturday News Forum. 

Idinagdag ni Adiong na nakadeklara ito sa Statement of Assets, Liabilities and Net Worth (SALN) ni Duterte.

“Hindi lang siya passive shareholder. She is also one of the directors of one of the companies that she declared in her SALN,” tinukoy ni Adiong. 

“On that basis alone, I think she has already betrayed [public trust]. But then again, we don’t want to preempt,” dagdag ng kongresista.

Aniya, ang Senate impeachment court pa rin ang may desisyon kung may paglabag ba o wala. “So without preempting the court, whether or not she’s guilty, that’s entirely up to the court.” (VINA de GUZMAN)

LAGLAG sa selda ang 32-anyos na tambay nang tutukan ng baril at binantaang papatayin ang stainless fabricator na nag ‘Marites’ umano sa kanya na tulak sya ng droga sa Valenzuela City, kamakalawa ng hapon. 

Sa ulat ni Valenzuela Police Chief P/Col. Joseph Talento kay NPD Director P/BGen. Benliner Capili, naglalakad sa Encarnacion St. Brgy. Marulas si alyas “Rex”, 41, ng Brgy., Marulas dakong alas-5:30 ng hapon patungo sa bahay ng isang kaibigan nang masalubong niya ang kabarangay na si alyas “Jay”, malapit sa abandonadong pumping station sa lugar.

Nagulat na lamang ang biktima nang tutukan siya ng baril ni “Jay” at sinabihang papatayin dahil sa bintang na ipinagkakalat umano niya na drug pusher ang suspek.

Sa labis na takot ay nagtatakbo palayo si “Rex” hanggang makahingi ng tulong kina P/Cpl. John Melo De Paz at P/Cpl. Inglis Balagtas ng Valenzuela Police Sub-Station 3 na nagkataong nagpapatrulya sa lugar na nagresulta sa pagkakaaresto sa suspek.

Nasamsam sa suspek ni Cpl. De Paz ang isang kalibre .38 revolver na kargado ng limang bala sa chamber at nang hanapan siya ng kaukulang dokumento hinggil sa ligaledad ng nasabing baril ay wala siyang naipakita.

Mahaharap ang suspek sa mga kasong Grave Threat at paglabag sa R.A 10591 o ang Comprehensive Law on Firearm and Ammunition sa Valenzuela City Prosecutor’s Office. (Richard Mesa)

NAGWAKAS na ang sampung taon pagtatago ng isang lalaki na wanted sa kasong panggagahasa matapos matimbog ng tumutugis na kapulisan sa Navotas City. 

Sa ulat ng tanggapan ni Northern Police District (NPD) Director P/BGen. Benliner Capili, ang 36-anyos na akusado ay nakatala bilang No. 4 sa Top Ten Most Wanted Person sa Navotas City Police Station.

Nagtago umano ang akusado nang malaman niyang tinutugis siya ng pulisya kasunod ng arrest warrant laban sa kanya na inilabas ng Regional Trial Court (RTC), Branch 287, Navotas City, noong September 19, 2016 para sa kasong Rape.

Gayunman, nakatanggap ng impormasyon ang mga tauhan ni Navotas Police Chief P/Col. Renante Pinuela na muling naispatan ang presensya ng akusado sa kanilang lugar kaya agad ikinasa ng pulisya ang operation laban sa kanya.

Hindi na nakapalag ang akusado nang makorner siya ng mga operatiba Navotas Police Intelligence Section malapit sa kanilang bahay sa Barangay San Roque.

Inaresto siya ng pulisya sa bisa ng nasabing arrest warrant na walang inirekomendang piyansa para sa kanyang pansamantalang paglaya.

Ani BGen. Capili, patuloy na pinalalakas ng NPD ang mga pagsisikap nito sa paghahanap at paghuli sa mga wanted na indibidwal, partikular ang mga Top Most Wanted Persons, sa pamamagitan ng sustained intelligence gathering, inter-unit coordination, at focused police operations. (Richard Mesa)

UMABOT sa mahigit P.2 milyong halaga ng shabu ang nasamsam sa dalawang umano’y tulak ng illegal na droga kabilang ang isang ginang matapos maaresto sa buy bust operation sa Valenzuela City.

Sa ulat ng tanggapan ni Northern Police District (NPD) Director P/BGen. Benliner Capili, ang naarestong mga suspek ay si alyas “Ligaya”, 40, at alyas “Rene”, 23, kapwa residente ng Brgy., Karuhatan.

Isinagawa ng mga operatiba NPD District Drug Enforcement Unit (DDEU) ang buy bust operation laban sa mga suspek malapit sa VCG Tree Cutting Services, Simeon Doon Compound, Barangay Karuhatan, sa koordinasyon sa PDEA.

Dakong alas-6:57 ng umaga nang maaresto ng mga operatiba ang mga suspek matapos umanong magsabwatan na magbinta ng shabu sa isang pulis na nagpanggap na poseur buyer.

Nakumpiska sa kanila ang humigi’t kumulang 30.9 grams ng suspected shabu na may estimated standard drug price na P210,120.00 at buy bust money.

Ayon sa pulisya, na-inquest na ang mga suspek kaugnay sa kasong paglabag sa Sections 5, 11, at 26, Article II ng R.A 9165, o ang Comprehensive Dangerous Drugs Act of 2002.(Richard Mesa)