2026 September Archive - People's Balita

Archive for September, 2026

GUN SAFETY ADVOCACY CAMPAIGN, INILUNSAD NG PNP CSG

Posted on: September 29th, 2026 by Francis Paolo Torres No Comments

INILUNSAD ng PNP Civil Security Group (CSG) ang isang Gun Safety Advocacy Campaign upang isulong ang responsible firearm ownership, safe handling, proper storage, at prevention of unauthorized access to firearms.

Ang kampanya ay inilunsad sa gitna ng mga kamakailang insidente na may kaugnayan sa baril na kinasasangkutan ng mga menor de edad sa mga paaralan, na nagbigay ng panibagong atensyon sa kahalagahan ng pagpigil sa hindi awtorisadong pag-access sa mga baril at pagtiyak na ang mga baril na legal na pagmamay-ari ay maayos na nasusubaybayan.

Taglay ang opisyal na tagline na “OWN A GUN RESPONSIBLY. GUN SAFETY IS A CONTINUING DUTY,” binibigyang-diin ng kampanya na ang kaligtasan ng baril ay higit pa sa legal na pagmamay-ari. Hinihikayat nito ang mga may-ari ng baril na patuloy na magsagawa ng safe handling, secure storage, at accountability, lalo na sa pagtiyak na ang mga baril ay hindi maaaring ma-access ng mga hindi awtorisadong tao.

Taglay din ng kampanya ang mga hashtag na #GunSafetyStartsWithMe, #ResponsibleGunOwnershipProtectsFamily, at #SecuredGunProtectsEveryone, na humihikayat sa mga may-ari ng baril, mga pamilya, mga shooting club, mga kasosyong organisasyon, at mga komunidad na tumulong sa pagpapalakas ng mga praktikal na paalala tungkol sa kaligtasan gamit ang baril sa pamamagitan ng kani-kanilang mga aktibidad at plataporma.

“Kapag may baril, may kaakibat na responsibilidad. Hindi lang ito tungkol sa pagmamay-ari; kasama rito ang araw-araw na pag-iingat. Kung ligtas ang pagkakahawak at pagkakatago ng baril, mas napoprotektahan natin ang ating pamilya at komunidad,” sabi ni PGen Nartatez.

“Hindi natin kailangang hintayin na may mangyaring insidente bago natin seryosohin ang gun safety. Nasa simpleng pag-iingat ang malaking bahagi ng prevention—sa tamang paghawak, tamang safe keeping, at pagtiyak na hindi ito maaabot ng taong hindi dapat magkaroon nito. Sa ganitong paraan, lahat tayo may kontribusyon sa kaligtasan ng ating pamilya at komunidad,” dagdag pa ni PGen Nartatez.

Hinihikayat ng PNP ang mga may-ari ng baril, mga stakeholder, at ang publiko na tumulong sa pagpapalaganap ng mga mensahe sa kaligtasan ng kampanya sa pamamagitan ng mga angkop na aktibidad sa komunidad, at mga platform ng social media, hangad ng PNP na isulong ang “Bagong PNP para sa Bagong Pilipinas: Serbisyong Mabilis, Tapat, at Nararamdaman,” habang pinagbubuti ang isang kultura kung saan ang kaligtasan ng baril ay nananatiling isang patuloy na tungkulin. (PAUL JOHN REYES)

Pagpapaliban sa BSKE hahamunin sa SC

Posted on: September 29th, 2026 by Francis Paolo Torres No Comments

KUKUWESTIYUNIN ng National Citizens’ Movement for Free Elections (NAMFREL) sa Korte Suprema ang muling pagpapaliban sa 2026 Barangay and Sangguniang Kabataan Elections (BSKE), na anila ay ‘unconstitutional’ o labag sa Saligang Batas.

Sinabi ni Namfrel Secretary General Eric Alvia na hinihintay na lamang nila ang clearance ng council upang makapaghain ng petition for certiorari sa Supreme Court (SC).

“Humihingi lang ako ng clearance sa council namin kung maghahain kami ng Petition for Certiorari sa Supreme Court, pero sigurado na may hakbang kaming gagawin para tutulan ito dahil alam namin na ang batas na ito ay unconstitutional,” pahayag ni Alvia.

Ipinaliwanag pa niya na mahigpit ang pagtutol nila sa pagpapaliban ng naturang halalan dahil humahadlang ito sa karapatan ng mga mamamayan na bumoto at mamili ng pinuno.

Tinukoy rin niya na ito na ang pang-siyam na beses na ipinagpaliban ang naturang halalan.

Una na ring nagpahayag ng pagkadismaya ang Namfrel sa pagpapalibang muli sa BSKE.

Ads September 29, 2026

Posted on: September 29th, 2026 by Francis Paolo Torres No Comments

Ads September 28, 2026

Posted on: September 28th, 2026 by Francis Paolo Torres No Comments

Nag-post din si KC ng sweet birthday message…SHARON, na-touch sa pag-share ni TITO SEN ng birthday song and cake kay Sen. KIKO(ni: ROHN ROMULO)

Posted on: September 28th, 2026 by Francis Paolo Torres No Comments

SA Instagram post ni Megastar Sharon Cuneta last Sunday, August 23, ibinahagi niya ang isang makahulugang birthday greeting kay Senate President Pro Tempore Vicente “Tito” Sotto III, na tinatawag din niyang “Daddy,” na nagdiriwang ng kaarawan noong Agosto 24.Makikita ang isang masayang group photo ng pamilya Sotto kasama sina Sharon at asawa na si

Senador Francis “Kiko” Pangilinan. Mensahe niya, “Happy Birthday, Daddy (Tito Sen).”

Naging espesyal nga ang advance birthday celebration para kay Sharon dahil magkasabay ang kaarawan nina Tito Sen at Sen. Kiko.

Pahayag pa ni Sharon, “So touched that you shared your birthday song and cake with Kiko. We love you so much!”

Sa dulo ng IG post ni Mega mararamdaman ang labis niyang kaligayahan, na kung saan nilagyan niya ito ng red hearts, birthday cake, balloons, folded hands, party popper at iba pang happy emojis.Marami naman ang bumati at natuwa sa naturang IG post ni Sharon, na kitang-kita talaga ang pagiging close nila bilang isang pamilya.Samantala, nag-post din si KC Concepcion ng kanyang sweet birthday kay Sen. Kiko kalakip ang ilang photos…

“Happy 63rd birthday, Dad! @kiko.pangilinan

“So grateful for nights like this~~ family close, hearts full, and you and Mom at the center of it all.”

Dagdag pa niya, “Here’s to more soul-nourishing moments and happy memories to come. Praying for the BEST of this new year ahead!!

“All my love, now and always @reallysharoncuneta”

Na sinagot naman ni Sen. Kiko ng, “AMEN and A M E N. Thank you kace.”

Philippine men’s football team bigo sa Vietnam 1-0

Posted on: September 28th, 2026 by Francis Paolo Torres No Comments

HINDI umubra ang Philippine Men’s National Football Team (PMNFT) sa Vietnam 1-0 sa pagsisimula ng FIFA ASEAN Cup 2026 na ginaganap sa Si Jalak Harupat Stadium sa Indonesia.

Sinubok ng Pilipinas ang reigning ASEAN Hyundai Cup champions subalit hindi nila napigilan ang Vietnam sa kampanya ng FIFA-organized Southeast Asian tournament.

Nanguna sa panalo ng Vietnam si Nguyen Dinh Bac sa loob ng 25 minuto ng laro.

Pinilit ng Pilipinas na maitabla ang laban subalit nananatiling mailap para sa kanilang goal.

Susubukan nilang makabawi sa araw ng Miyerkules sa paghaharap nila ng Pakistan na isa samga guest teams sa labas ng Southeast Asia.

Nesthy Petecio pasok na sa quarterfinals ng Asian GamesPASOK na sa quarterfinals ng 20th Asian Games sa Nagoya , Japan si Pinay boxer Nesthy Petecio.

Posted on: September 28th, 2026 by Francis Paolo Torres No Comments

Ito ay matapos na talunin si Mays Alreem Abukhadijah ng Jordan sa pamamagitan ng Referee stopped contest.

Ipinakita ng two-time Olympic medalist ang kaniyang lakas sa women’s 60kg. class sa Nishio Gymnasium laban sa 20-anyos na kalaban.

Nangyari ang pagpapahinto ng referee sa natitirang 1:51 na oras sa ikalawang round.

Nakontrol ng 34-anyos na si Petecio ang bawat suntok ng Jordanian boxer.

Susunod na makakaharap ni Petecio si Chengyu Yang ng China.

Makakasama ni Petecio ang ilang boksingero ng bansa na nakapasok na rin sa quarterfinals sa pamamagitan nina Carlo Paalam sa men’s 55 kg class at makakaharap nito si Jiaomao Zhang.

Habang si Junmilardo Ogayre ay makakaharap si Olympic at World gold medalist Abdumalik Khalov mula sa Uzbekistan.

Golden boy” Carlos Yulo, masayang ibinahagi ang pagkakasungkit ang dalawang gintong medalya sa 2026 Asian Games

Posted on: September 28th, 2026 by Francis Paolo Torres No Comments

MULING nagningning ang tinagurian “Golden boy” na si Carlos Yulo nang makasungkit ito ng dalawang gintong medalya sa 20th Asian Games Aichi-Nagoya 2026. Ito ay kasunod ng kanyang tagumpay sa men’s floor exercise noong Huwebesm na nagbigay rin sa Pilipinas na unang gintong medalya sa 2026 Asian Games.

Pinatunayan ng 26-year-old gymnast ang husay nito sa floor exercise at vault event sa men’s artistic gymnastics na ginanap sa Nagoya General Gymnasium. Nagtala si Yulo ng average score na 14.599, daan upang manguna sa vault. Sa unang vault, nakakuha siya ng 14.733, habang 14.466 naman ang kanyang iskor sa ikalawang vault, na may 5.2 difficulty at 9.266 ang nakuha niyang iskor para sa execution.

Samantala, nakapag-uwi rin ng bronze medal ang kanyang nakababatang kapatid na si Eldrew Yulo.

Matatandaan din na’ nakapag-uwi si Yulo ng dalawang gintong medalya sa floor exercise at vault, noong nakaraang 2024 Paris Summer Games.

Excise tax sa LPG sinuspinde ni Pangulong Marcos

Posted on: September 28th, 2026 by Francis Paolo Torres No Comments

PANSAMANTALANG sinuspinde ni Pangulong Ferdinand Marcos Jr. ang pagpapataw ng excise tax sa liquefied petroleum gas (LPG) at kerosene sa gitna ng patuloy na pagtaas ng presyo ng langis sa pandaigdigang merkado.

Sa ilalim ng Executive Order (EO) No. 125, sinuspinde ang excise tax sa naturang mga produktong petrolyo, bagama’t may mga partikular na gamit na hindi saklaw ng kautusan.

Ayon sa kautusan, sinuspinde ang excise tax sa LPG, maliban kung ito ay ginagamit bilang hilaw na materyal sa paggawa ng mga produktong petrochemical o bilang panggatong sa mga sasakyang de motor.

Suspindido rin ang excise tax sa kerosene, maliban kung ginagamit ito bilang aviation fuel o panggatong ng mga sasakyang panghimpapawid.

Inilabas ang EO matapos na sertipikahan ng Department of Energy (DOE) na ang average na presyo ng Dubai crude oil, batay sa Mean of Platts Singapore (MOPS), sa nakalipas na 30 araw ay umabot sa USD 99.41 kada bariles. ( DARIS JOSE)

Hindi pagsali sa diesel at gasolina sa panukalang ikalawang yugto ng excise tax suspension, tinuligsa ng mambabatas

Posted on: September 28th, 2026 by Francis Paolo Torres No Comments

TINULIGSA ni ACT Teachers Party-List Representative at House Deputy Minority Leader Antonio Tinio ang Department of Finance (DOF) sa muling hindi pagsali sa diesel at gasolina sa panukalang ikalawang yugto ng excise tax suspension, na sinabi ng DOF na nakatakdang aprubahan ng pangulo sa susunod na linggo.

Nanawagan si Tinio kay Finance Secretary Frederick Go na bigyang paliwanag na “will not be progressive” ang tax relief sa diesel at gasolina dahil ang makikibanag umano dito ay mayayaman lamang.

“Palagi na lang ganito ang excuse ng DOF at economic managers ng administrasyon—na mayayaman ang mas gumagamit daw ng diesel at gas—kahit napakalayo nito sa katotohanan,” ani Tinio. “Walang makukuhang kaluwagan mula sa panibagong excise suspension ang jeepney driver na kumokonsumo ng 30 litro ng diesel kada araw. Ganun din ang magsasakang gumagamit ng hand tractor, mangingisdang may pumpboat, o mga nagbibiyahe ng mga produkto sa palengke.”

Nagbabala ang mambabatas na ang pagpapatuloy sa pagpapatupad ng excise taxes sa diesel at gasolina ay magbibigay ng mas mabigat na inflation sa mga susunod na linggo.

“Kapag pumalo na ang diesel sa ₱18.31 per liter sa mga susunod na linggo, bawat piso ng excise tax—isama na natin ang VAT na ayaw ring tanggalin ng administrasyong Marcos—ay ipapasa sa commuters at consumers. Kahit di nagmamay-ari ng sasakyan ang mahihirap, binabalikat nila ang impact ng inflation sa bawat bagay at serbisyong binibili nila,” anang mambabatas.

Ibinasura ni Tinio ang pananaw ng DOF na magreresulta ang diesel at gas tax suspensions sa tinatayang P12 billion na lost revenues kada buwan.

“Apparently, the DOF’s primary concern is protecting its revenue collection while the people’s already meager incomes are being devoured by inflation,” giit ni Tinio. “Government is again holding hostage direly needed economic relief for the people, with new and heavier tax burdens as ransom.”

Kinondena pa nito ang pananatili ng 12% Value-Added Tax (VAT) sa petroleum products at hindi pagpapatupad ng price freeze sa LPG at kerosene.

“Hanggang ngayon, walang suporta ang administrasyon sa panawagang tanggalin na ang VAT sa petroleum products. Wala pa ring price freeze man lang sa LPG at kerosene samantalang automatic dapat iyon kapag state of emergency, ayon sa batas. Mukhang hanggang dito na lang talaga ang administrasyon—calculated minimalism sa pagbibigay ng kaluwagan sa mamamayan sa panahon ng krisis,” ani Tino.

(VINA de GUZMAN)