TINULIGSA ng dalawang lider ng Kamara ang Department of Education (DepEd) sa ilalim ni Vice President at noon ay Education Secretary Sara Z. Duterte sa paggamit ng certification para sa lehitimong Armed Forces of the Philippines (AFP) programs para bigyang katwiran ang P15.54 million na confidential funds na ginamit umano na pabuya.

“Nabudol po ang AFP,” ayon kay Lanao del Sur Rep. Zia Alonto Adiong, House prosecution spokesperson at chairperson ng House Committee on Suffrage and Electoral Reforms, sa isinagawang a press briefing.

Ang naturang assessment nina Alonto Adiong at House Committee on Higher and Technical Education Chairperson Jude Acidre matapos ihayag ng testigong si Col. Manaros Boransing II na walang natanggap ang kanyang 1st Infantry “Tabak” Division na pondo mula sa DepEd, confidential o anupaman, para sa ikawalong Youth Leadership Summits (YLS) at 53 information education communication (IEC) activities na sakop ng kanyang Jan. 1, 2024 certification.

Naniniwala si Boransing na ang certification ay kadalasang iniisyu sa government agencies at iba pang stakeholders na nagpartisipa sa military activities.

Nabatid lamang niya sa ginanap na imbestigasyon ng Kamara noong Oct. 17, 2024 na isinumite ang naturang dokumento sa Commission on Audit (COA) kaugnay sa audit observation sa confidential fund spending ng DepEd.

“So ibig sabihin po, nabudol po ’yung AFP dahil hiningan sila ng certification na ang paggamit noon ay ija-justify nila sa COA,” pahayag ni Alonto Adiong.

Tinutukoy lamang ng certification ang ginanap na military activities at mga sumali sa aktibidad at hindi kung papaano binayaran ang confidential fund rewards o kung matagumpay ang pinondohang information-gathering.

“Pero it did not prove anything as to the utilization of confidential funds. It did not prove anything that the reward was made during that event,” pahayag pa ni Alonto Adiong.

(VINA de GUZMAN)

HINIKAYAT ni Pangulong Ferdinand R. Marcos Jr. ang mga local government unit (LGU) sa buong bansa na mahigpit na ipatupad ang mga polisiya sa “no-build zone” at iba pang hakbang upang mabawasan ang pagbaha at maprotektahan ang mga komunidad laban sa epekto ng climate change.

Ayon kay Presidential Communications Office (PCO) Undersecretary at Palace Press Officer Claire Castro, kailangang pairalin ang batas at iwasan ang pamumulitika pagdating sa kaligtasan ng mga mamamayan.

“Ayon sa Pangulo, dapat ipatupad ang batas pati ang ‘no-build zone.’ Huwag nang mamulitika — ipatupad ang batas — dapat ipaliwanag sa lahat na kailangang mas maging strikto sa pag-implement ng batas para sa ating kaligtasan,” ani Castro.

Hinimok din ng Pangulo ang mga LGU na ayusin ang kanilang mga nasasakupan, linisin ang mga daluyan ng tubig at tiyaking maayos ang pangongolekta at pagtatapon ng basura.

“Sa LGUs, ipatupad ang ‘no-build zones.’ Siguruhing maayos ang nasasakupan — makipagtulungan para mawala ang mga bara sa daluyan ng tubig — siguruhing nakokolekta ang basura at nailalagay sa tamang tambakan,” pagdidiin ni Castro.

Sinabi ni Castro na kung hindi nabigyang-pansin noon ang ilang polisiya, muling paiigtingin ng administrasyong Marcos ang pagpapatupad ng mga ito, lalo na ang mga may kaugnayan sa climate change.

“Kung hindi ito nabigyang-pansin noon — si Pangulong Marcos Jr. muli ang magpapasimula para higpitan ang pagpapatupad ng mga polisiya na may kinalaman sa climate change,” ani Castro.

Binigyang-diin din ng Malacanang Official na hindi dapat maging dahilan ang “palakasan system” o katiwalian upang hindi maipatupad nang maayos ang mga batas at polisiya laban sa pagbaha at climate change.

“Hindi na ito dapat — hindi na ito maaari — ayon kay Pangulong Marcos Jr.,” ani Castro.

Hinimok din ng Palasyo ang publiko na makiisa sa pagpapanatili ng kalinisan ng kapaligiran at tamang pagtatapon ng basura dahil maaaring bumara ang mga ito sa mga daluyan ng tubig at magpalala ng pagbaha.

“Sa bawat barangay — ipaabot natin na ang bawat residente ay may ambag para mabawasan ang malalang epekto ng climate change. Mula sa maayos na pagtatapon ng basura, paglilinis ng kapaligiran, pagtatanggal ng bara sa daluyan ng tubig — hindi ito maliit na bagay,” giit ni Castro.

“Sa atin nagsisimula ang pagpapakita ng responsibilidad,” dagdag pa ng Palace Press Officer.

Sa harap nito, sinabi ni Castro na patuloy na hinihikayat ni Pangulong Marcos ang publiko na maging handa sa epekto ng climate change, na isa sa mga dahilan ng mas matinding panahon at pagbaha.

Sa kabila ng holiday nitong Lunes, pinangunahan pa rin ng Pangulo ang pulong kasama ang mga opisyal ng Department of National Defense (DND), Department of the Interior and Local Government (DILG), Department of Social Welfare and Development (DSWD), Department of Agriculture (DA), Department of Health (DOH), Department of Public Works and Highways (DPWH), at Department of Budget and Management (DBM).

Tinalakay sa pulong ang pagbaha sa Central Luzon, health response sa Metro Manila, at mga ulat mula sa mga ahensiyang dumalo.

Sa kabilang dako, hinimok din ang Department of Education (DepEd) na maisama sa edukasyon ng mga bata ang mga aralin tungkol sa disaster preparedness at resilience upang maihanda sila sa mga epekto ng climate change.

“Sa mga estudyante, ang role ng bawat isa ay maging handa sa epekto ng climate change — mas magiging malala ang epekto nito sa mga susunod pang taon — huwag nating paabutin sa ganoong kondisyon,” giit ni Castro.

Binigyang-diin ni Castro na mahigpit na tagubilin ng Pangulo na kailangang seryosohin ang climate change at maging handa ang lahat upang mabawasan ang panganib nito.

“Ito ay para sa atin. Ito ay para sa bansang Pilipinas,” dagdag pa ni Castro. 

(DARIS JOSE)

ITINUTULAK ng House Committee on Metro Manila Development ang implementasyon ng mga batas na nagpapalawak sa kapasidad ng mga public hospitals para mas maraming maserbisyuhan na pasyente.

Ayon kay committee chairperson Caloocan City Rep. Dean Asistio, nagpulong ang mga kongresista na miyembro ng nasabing komite upang malaman kung bakit hindi pa naisasakatuparan ang mga batas

“Hanggang ngayon po, base sa nakalulungkot na karanasan ng marami nating mga kababayan, hindi pa po ito ganap na naisakatuparan. This is despite the fact that some of these laws have long been enacted during the 17th Congress. Halos mag-iisang dekada na po,” sinabi ni Asistio.

Ayon kay Asistio, nakakaalarma ang sitwasyon at ang karapatan ng bawat pasyente at ng kanilang pamilya na magkaroon ng maayos na programang pangkalusugan ay hindi maisakatuparan.

Sinabi ni Asistio na nais ng mga mambabatas na miyembro ng komite na matugunan ang problema at makatulong kung ano ang kakailanganin.

“Hindi po tayo narito para manisi ng sinuman. Hindi po tayo narito para magturuan. Ang tanging hangad po natin ay sama-sama nating hanapin ang problema para sama-sama rin nating ilatag ang mga agarang solusyon,” sabi ni Asistio. 

(VINA de GUZMAN)

KAILANGAN na maging sensitibo ng mga opisyal ng gobyerno sa kapwa Filipino na nakararamdam ngayon ng hirap, trauma at kalungkutan matapos mabiktima ng matinding epekto ng malakas na pag-ulan at mataas pagbaha.

Napaulat na nakuha pa kasing magsuot ng branded na damit ng ilang government official sa naging pagbisita sa mga lugar na naapektuhan ng ilang linggong pagbaha.

Matatandaang, binanatan ng mga netizen si Pampanga Gov. Lilia Pineda at anak nitong si Pampanga Vice-Gov. Dennis Pineda dahil sa pagsusuot ng branded na damit nang bumisita sa mga lugar sa Pampanga na binaha dulot ng ilang linggong pag-ulan.

Nag-viral kasi ang mga larawan at mga video ng mga ito sa social media kung saan makikita si Vice Gov. Dennis na nakasuot ng Balmain black-and-white Balmain PB Labyrinthe monogram ensemble na libu-libo ang halaga. 

Habang si Gov. Lilia naman ay naka-Prada Re-Nylon hooded jacket o raincoat nang inspeksyunin ang damage sa Sto. Cristo Dam, Lubao, Pampanga.

Sinasabing, kaliwa’t kanang pambebengga at pang-nenega ang ibinato sa mag-inang pulitiko dahil sa kanilang mga branded OOTD na libu-libo ang halaga.

Sa kabilang dako, walang mensahe si Pangulong Ferdinand Marcos Jr., patungkol sa usaping ito ayon kay Presidential Communications Office (PCO) Undersecretary at Palace Press Officer Claire Castro.

Ayon kay Castro, ang pagseserbisyo ay hindi aniya nakikita sa damit dahil nakikita ito sa gawa.

“Nakikita po ito kung visible ba iyong mga leaders at nandidiyan sila para tumulong. Maybe, ang sasabihin ng iba, bakit designer clothes pa ang suot. But sabi nga natin, hindi po nakikita ang pagtulong, ang serbisyong totoo sa damit ng isang lider. Mas maganda po, mayroon pong mga iba, napakasimple ng dating, t-shirt, pants, iyong iba nagpapaulan pa, pero wala namang natutulong. So mas maganda po na tingnan ang lider sa trabaho, sa gawa, hindi po sa damit,” ang pahayag ni Castro.

Binigyang diin pa ni Castro na alam naman ng mga opisyal na ito kung ano ang dapat na ikilos at kung paano dapat makisalamuha sa mga mamamayan.

“Hindi natin alam kung ang pagsusuot ng branded na iyan ay mura na sa kanila. So, depende, depende sa kanila, baka iyan ay—kung sa atin na ordinaryong tao ay napakamahal, baka sa kanila ay mura lang iyan. dahil, iyan ang kanilang nakagawian,” ang pahayag ni Castro. ( DARIS JOSE)

ANG PAGBAWI ng salaysay nila Orly Guteza at ilan sa mga miyembro ng “Maleta Boys” ay hindi maaaring gawing dagdag ebidensiya na magpapatatag sa kaso laban kay dating Speaker Martin Romualdez, ayon sa kanyang abogado at tagapagsalita, Atty. Ade Fajardo.

Kinontra ni Fajardo ang pahayag ni Assistant Ombudsman Mico Clavano na ang original statements at recantations ay parehong gawing ebidensiya sa isinasagawang preliminary investigation ng Office of the Ombudsman hinggil sa pagkakasangkot ni Romualdez sa mga flood-control projects scam.

“Well, we respectfully disagree po,” pahayag ni Fajardo. “Mukhang nagsasabi lang ang tanggapan ng Ombudsman ng mga ganoong salita para sabihin na buhay pa ang kaso nito.”

Aniya, dapat pag-aralan ang dahilan kung bumaligtad ng salaysay ang isang testigo.

“The recantations should be examined for what they say about the credibility and reliability of the original allegations, particularly when the witnesses themselves are now disputing or withdrawing their previous statements,” sinabi ni Fajardo. 

Samantala, nagpahayag naman nang pag-aalala ang kampo ni Romualdez sa pagtawag kay Romualdez na ‘mastermind’ habang nagsasagawa pa ng preliminary investigation sa usapin.

Ayon pa kay Fajardo, nagbibigay ito ng impression na mayroon ng konklusyon bago pa man makumpleto ng Office of the Ombudsman ang evaluation ng mga ebidensiya.

“Well, sa amin pong appreciation, at kami ay nangangamba na dahil sa maraming mga pampublikong posisyon ng kasalukuyang Ombudsman ay parang na-prejudge na, or parang meron nang konklusyon na nabuo, at hinahabol ang ebidensiya para lang masuportahan ‘yung…legal conclusion na sa amin namang palagay ay wala nga,” pahayag pa ni Fajardo.

“Ang naging problema namin diyan kasi nga at this stage po ng investigation, ang hinihiling po ng ating mga alituntunin at ng ating batas at mismong Saligang Batas ay fairness and impartiality.”

(VINA de GUZMAN)

MAKAKASAMA na ng 46-anyos na bebot sa loob ng selda ang kanyang live-in partner nang tangkaing magpuslit ng shabu sa loob ng city jail para sa nakapiit niyang live-in partner sa Valenzuela City, Linggo ng hapon.

Mahaharap sa kasong paglabag sa Section 11 ng R.A 9165 o ang Comprehensive Dangerous Drug Act of 2002 ang suspek na si alyas “Len”, residente ng Brgy., Dalandanan.

Sa imbestigasyon ni SDEU investigator PSSg Janine Buenaventura, pasado alas-2:15 ng hapon nang dumating ang suspek sa Valenzuela City Jail sa Maysan Road, Barangay Malinta, para dalawin ang kanyang live-in partner na nakakulong sa nasabing pasilidad.

Nang kapkapan ng babaeng tauhan ng Bureau of Jail Management and Penology (BJMP), nasamsam sa bulsa ng suspek ang isang plastic sachet na naglalaman ng hinihinalang shabu na dahilan ng kanyang pagkakaaresto.

Nang hilingin ng suspek na kunin ang kanyang cellphone sa loob ng bag niya para matawagan ang kanyang kaanak, isa pang plastic sachet na naglalaman din ng umano’y shabu ang nadiskubre pa sa loob ng bag.

Bukod sa shabu, nakumpiska din sa suspek ang isang shoulder bag, cellphone at identification card. (Richard Mesa)

UMABOT sa mahigit P.3 milyong halaga ng shabu ang nasamsam sa isang construction worker na sangkot umano sa pagtutulak ng illegal na droga matapos maaresto ng pulisya sa buy bust operation sa Valenzuela City, kamakalawa ng gabi.

Kinilala ni P/Col. Aquino Olivar, hepe ng Special Operation Unit ng National Capital Region (SOU-NCR), PNP-DEG ang suspek na si alyas “Gino”, 39, residente ng Brgy., Marulas ng lungsod.

Ayon kay Col. Olivar, ikinasa ng kanyang mga tauhan sa pangunguna ni P/Lt. Juan Carlos De Ramos ang buy bust operation sa koordinasyon sa PDEA at NPD Tactical Operation Center matapos magpositibo ang natanggap nilang impormasyon hinggil pagbebenta umano ni alyas Gino ng shabu.

Benentahan umano ng suspek ang isang pulis na nagpanggap ng isang knot tied plastic ng shabu na nagresulta sa pagkakaaresto sa kanya dakong alas-11:41 ng gabi sa F. Bautista Street, Barangay Marulas.

Nakumpiska sa suspek ang humigi’t kumulang 50 grams ng hinihinalang shabu na may estimated value na P340,000 at buy bust money na isang tunay na P1,000 bill at apat na bundle ng P1,000 boodle money.

Mahaharap ang suspek sa kasong paglabag sa Section 5 ng R.A 9165 o ang Comprehensive Dangerous Drug Act of 2002 sa Valenzuela City Prosecutor’s Office. (Richard Mesa)