Tinukoy ni Adiong ang testimonya ni Philippine Statistics Authority (PSA) Assistant National Statistician Marizza Grande kung saan sinabi nito sa pagdinig ng impeachment court sa Senado nitong Lunes na 1,685 sa 2,669 na pangalan ng mga nakatanggap ng confidential funds mula sa Office of the Vice President (OVP) at Department of Education (DepEd) ay walang record ng kapanganakan, kasal o pagkamatay.

“Iisa lang naman ’yung punto dito, eh—talagang mayroong misuse,” sabi ni Adiong. “So it’s purely, obviously, pambubudol at ’yung paggamit—ano ba sa Tagalog ’yan? Pag-abuse ng pera, paglulustay ng pera ng taong-bayan.” 

Ayon kay Grande, 1,287 sa 1,992 na pangalan sa listahan ng OVP list at 398 sa 677 na pangalan sa listahan ng DepEd ay walang record sa tatlong kategorya ng PSA Civil Registry System. 

Aniya, nagsagawa ang PSA ng “reverification” kung saan lumitaw na 37 ay patay na at may official death certificates — 32 mula sa listahan ng OVP list at lima sa DepEd. 

Idinagdag ni Grande na 25 na pangalan ay mga menor de edad — 20 mula sa listahan ng OVP list at lima sa DepEd. 

Base sa findings ng PSA, lumalabas na kaduda-duda ang mga acknowledgment receipts (ARs) sa paggamit ng confidential funds. 

“Kasi unang-una, paano ka pa naman kukuha ng isang impormasyon sa matagal nang patay? Pangalawa, paano ka kukuha ng isang impormasyon sa isang bata?” sinabi ni Adiong.

Partikular na tinukoy ni Grande ang isang Fortunato Salig na namatay noong June 29, 2011, batay sa kanyang death certificate. Mayroon din isang Emilio Sagan na may death certificate dated July 28, 2015, at isang Rodolfo P. Traya na may death certificate na nagpapakita na namatay ito noong May 4, 2021. 

Binanggit din ni Grande ang isang Marlin Sunga na napag alaman ng PSA na namatay dalawang buwan gulang pa lamang noong Nov. 2, 1965. Dalawang menor de edad, Beatrice Cuenca, mula sa listahan ng OVP na nakatanggap ng confidential fund ay pinanganak noong Jan. 7, 2022. Isang Mikay de los Reyes, ipinanganak noong Jan. 13, 2020, ay nakatanggap din umano ng confidential fund.

Sa kanyang testimonya, nabanggit ni Grande ang ilang pangalan na personal niyang sinaliksik na tulad nila Arthur Baon, Ralph Josh Bacon, Beverly Claire Pampano, Matthew N. Keso, Maxine Callos, Charles Sampalok Jr., Xiaome Ocho, Dan Rick Ocho, Tomas Panda, Timon Angelo Pusa, Tina Maching at Mary Grace Piattos.

Pinanindigan ni Grande na lahat ng nabanggit na pangalan ay walang birth certificate, marriage certificate o death certificate, batay sa records ng PSA.

(VINA de GUZMAN) 

NASUNGKIT ng Valenzuela City Police Station (VCPS) ang dalawang natatanging pagkilala mula sa Northern Police District (NPD) sa isinagawang Flag Raising and Awarding Ceremonies na ginanap sa NPD Headquarters, Caloocan City, Lunes ng umaga.

Kinilala ang Valenzuela City Police Station, sa ilalim ng pamumuno ni PCOL Joseph Talento, Chief of Police, bilang Best in Enhanced Managing Police Operations (EMPO) para sa buwan ng Hulyo 2026, bilang pagkilala sa huwarang pagganap ng operasyon ng istasyon, epektibong pamamahala ng pulisya, at pangako sa pagbibigay ng tumutugon at mahusay na serbisyo ng pulisya. Ang parangal ay tinanggap ni PCOL Talento sa ngalan ng istasyon.

Samantala, si PLT Sherwin Dascil, Officer-in-Charge ng Station Drug Enforcement Unit (SDEU), VCPS, ay ginawaran ng Medalya ng Kadakilaan para sa kanyang magandang pagganap sa matagumpay na anti-illegal drug operation na isinagawa noong Hulyo 22, 2026, sa Barangay Veinte Reales, Valenzuela City.

Nahuli sa naturang operasyon ang isang high-value drug personality at narekober ang humigit-kumulang 150 gramo ng hinihinalang shabu, na may Standard Drug Price (SDP) na ₱1,020,000.00.

Binibigyang-diin ng mga tagumpay na ito ang dedikasyon, propesyonalismo, at sama-samang pagsisikap ng Team VCPS sa pagtupad sa mandato nito na pigilan at labanan ang kriminalidad at tiyakin ang kaligtasan at seguridad ng mga Valenzuelano.

Nilagdaan ni PBGEN Benliner Capili, District Director ng Northern Police District ang mga plaki ng pagkilala bilang pagkilala sa namumukod-tanging pagganap ng istasyon at sa karapat-dapat na tagumpay ng mga tauhan nito.

Sa kanyang mensahe, binigyang-diin ni PBGEN Capili na ang bawat tagumpay ay sumasalamin sa sama-samang pagsisikap ng mga tauhan ng NPD. Hinikayat niya ang lahat ng mga tauhan na patuloy na gampanan ang kanilang mga tungkulin nang may integridad, propesyonalismo, paggalang, at tunay na pagmamalasakit sa komunidad.

Hinimok din niya ang lahat ng tauhan ng NPD na manatiling nakatuon sa pagbibigay ng tumutugon at dinamikong pagpapatupad ng batas at mga serbisyo sa kaligtasan ng publiko, habang pinapalakas ang pakikipagtulungan sa komunidad at mga kapwa ahensya ng gobyerno. (Richard Mesa)

TIMBOG ang dalawang hinihinalang drug personalities nang maaktuhan nagsusugal kasama ng dalawa pang lalaki sa magkahiwalay na lugar sa Caloocan City.

Sa ulat, nagsasagawa ng anti-criminality operation ang mga tauhan ni Caloocan Police Chief P/Col. Joey Goforth nang maaktuhan nila ang dalawang indibidwal na nagsusugal umano ng ‘cara y cruz’ sa Dulo St., Brgy., 35, dakong ala-1:30 ng madaling araw.

Nilapitan sila ng mga tauhan ng Maypajo Police Sub-Station 1 saka inaresto at nasamsam sa kanila ang bet money, pangara at isang plastic sachet na naglalaman ng umano’y shabu na nakuha umano kay alyas “Raymond”.

Nauna rito, naaresto naman ng mga tauhan ng Bagong Barrio Police Sub-Station 5 ang dalawang kelot na nagsusugal din umano ng ‘cara y cruz’ sa Gen. Malvar Ext., Brgy., 142, alas-3 ng madaling araw.

Nakumpiska sa kanila ang perang taya, pangara at isang plastic sachet na naglalaman ng hinihinalang shabu na nasamsam umano kay alyas “Nino”.

Mahaharap ang mga suspek sa kasong paglabag sa PD 1602 (Anti-Gambling Law) habang karagdagan na paglabag sa R.A 9165 (Comprehensive Dangerous Drug Act of 2002) ang kakaharapin nina ‘Raymond’ at ‘Nino’. (Richard Mesa)

NASA malubhang kalagayan ang 45-anyos na ginang nang salpukin ng humaharurot na motorsiklo habang naglalakad, kasama ang kaibigan sa Caloocan City, Linggo ng madaling araw.

Ang biktima na residente ng Brgy., 12, ay isasailalim pa sa masusing pagsusuri bunga ng pagdaing ng pagkasilaw sa liwanag ng ilaw at panlalabo ng matapos magamot sa pagamutan ang mga tinamong sugat sa ulo, at iba pang parte ng katawan.

Sa tinanggap na ulat ni Northern Police District (NPD) Director P/BGen. Benliner Capili, naglalakad ang biktima at kaibigan sa Dagat-dagatan, Brgy. 8, alas-4 ng madaling araw para bumili ng kape sa malapit na fast food chain.

Pagsapit sa kanto ng Lapu-Lapu St., sinalpok ang biktima ng humaharurot na motorsiklo na naging dahilan upang tumilapon ang ginang at bumagok ang ulo sa bangketa habang nagtamo lamang rin ng sugat sa kamay ang kanyang kasama.

Sa halip na tulungan ang mga biktima, mabilis na tumakas ang rider habang isinugod naman ng nagrespondeng mga tauhan ng Caloocan Medical Team ang ginang sa pinakamalapit na pagamutan.

Iniutos na ni BGen. Capili kay Caloocan police chief P/Col. Joey Goforth ang imbestigasyon para matukoy ang pagkakilanlan at maaresto ang rider na nahagip sa kuha ng CCTV sa lugar habang mabilis na tumatakas. (Richard Mesa)

PINABULAANAN ng Malakanyang at sinabing walang basehan ang pahayag ni Vice President Sara Duterte na nakatanggap siya ng impormasyon noon pang 2024 ukol sa plano ni Pangulong Ferdinand Marcos Jr., laban sa kanya.

Sinabi ni VP Sara na noong 2024 pa lamang ay nakatanggap na siya ng impormasyon tungkol sa aniya’y mga plano ni Pangulong Ferdinand Marcos Jr. laban sa kanya.

Sinabi ni VP Sara na matagal na siya sa pampublikong serbisyo at nakahanda sa anumang posibilidad na kaakibat ng kanyang trabaho.

Kabilang umano sa mga plano ang pagkakaroon ng warrant mula sa International Criminal Court (ICC) laban kay dating Pangulong Rodrigo Duterte at mga gagawin umanong pag-atake laban sa kanya.

Dahil nakaugnay umano ang kanyang seguridad sa Armed Forces of the Philippines (AFP) alinsunod sa constitutional line of succession, sinabi ni Duterte na ipinaalam niya noon kay dating AFP Chief of Staff Gen. Romeo Brawner ang kanyang mga pakiusap.

Binigyang-diin ng Bise Presidente na isang seryosong usapin ang paglapit o pagpunta sa lugar kung nasaan ang kanyang ina at mga anak, sa kabila ng umano’y pag-amin ni Interior Secretary Jonvic Remulla at ng pulisya na alam nila ang kanyang kinaroroonan dahil sa aniya’y surveillance activities laban sa kanya.

Isang malaking tanong naman para kay Castro kung bakit ngayon lang pinalutang VP Sara at isinapubliko ang nasabing alegasyon noong 2024 o binanggit ang kahalintulad na pagbabanta na natanggap noong 2023.

“Ngayon lang po ito nagsulputan,” ayon kay Castro.

Pinabulaanan ni Castro ang alegasyon na ito ni VP Sara, sabay sabing walang ebidensiya o official records ang iniharap upang patunayan ang mga ito.

“Pinapasinungalingan po natin ang pagbibintang na ito ng Bise Presidente, wala po itong anumang ebidensiya at walang anumang records na maipapakita ito,” aniya pa rin.

Pinalagan naman ni Castro ang pahayag ni VP Sara na hindi pino-protektahan ng administrasyong Marcos ang mga kabataan, tinukoy ang mga programa ng gobyerno para sa “child protection, student security, at mental health support.” (DARIS JOSE)

WALA nang kinalaman ang Commission on Elections sa kinakaharap na kasong kriminal ni Sen.Rodante Marcoleta , ayon kay Chairman George Erwin Garcia.

Paglilinaw ni Garcia , tapos na ang papel ng Comelec sa kaso ng senador sa Sandiganbayan kaugnay sa campaign contributions nito noong 2025 National Local Elections .

Sinabi pa ni Garcia na ang saklaw lang ng Comelec ay usapin ng donasyon, kontribusyon at SOCE. Ginawa ni Garcia ang pahayag matapos sabihin ni Marcoleta sa pagdinig na dapat Comelec ang humarap ng kaso at hindi ang Sandiganabayan.

Aniya tapos na ang tungkulin ng Comelec sa criminal aspect at wala nang pending case sa kanila . Multa na lang ang dinidinig nila ngayon . Pero babala ni Garcia puwede pa ring kasuhan ng ibang ahensya ang senador at ang mga donor kung may nilabag na ibang batas .

Nilinaw din ng poll chief na hindi ibig sabihin ay ligtas na sa kaso ang mga nag-donate kay Marcoleta . (Gene Adsuara)

TINITIYAK ni dating Speaker Martin Romualdez na haharapin ang kasong plunder na isinampa laban sa kanya ng Office of the Ombudsman sa Sandiganbayan, ayon sa Atty. Ade Fajardo, tagapagsalita at abogado ng kongresista. 

“We respect the courts and the legal process. (Leyte) Representative Ferdinand Martin G. Romualdez will face the allegations against him in accordance with law. We recognize the public interest surrounding this case,” sinabi ni Fajardo sa isang pahayag.

Ayon kay Fajardo, nakikiusap si Romualdez na huwag siyang bigyan ng special treatment kaugnay sa kinakaharap nitong kaso.

“He asks only for the same due process and fair hearing guaranteed to every Filipino. Katotohanan, ebidensya, at patas na proseso ang dapat manaig,” sabi ni Fajardo.

Ito ang ipinalabas na pahayag matapos kasuhan ng plunder si Romualdez ng Ombudsman sa Sandiganbayan nitong Lunes kaugnay sa kickback scheme sa multibillion-peso flood control projects.

Bukod kay Romualdez, kabilang sa mga kinasuhan sina former Ako Bicol Partylist Rep. Zaldy Co, Joselyn Serenio at Felicito Guevarra. (VINA de GUZMAN)

ITINUTURING nang epidemya ang pagdami ng kaso ng leptospirosis sa Lungsod ng Maynila matapos lumagpas sa epidemiologic threshold ang mga naitalang bagong kaso ng naturang sakit.

Sa ulat nito kay Manila City Mayor Francisco “Isko” Moreno Domagoso ngayong Lunes ng umaga, sinabi ni Manila OIC-City Health Officer Dr. Grace Padilla na nasa “epidemic condition” na ang pagkalat ng leptospirosis.

Batay sa datos ng Manila Health Department (MHD) na pinamumunuan ni Dr. Padilla, mula sa 1.27% attack rate noong nakaraang linggo, pumalo na ito ngayon sa 3.48%, indikasyon ng mabilis na pagtaas ng kaso sa loob ng maikling panahon.

Dagdag pa ni Dr. Padilla, nasa full capacity na ang ilang city government district hospitals, kabilang ang Ospital ng Maynila, Sta. Ana Hospital at Justice Jose Abad Santos General Hospital dahil sa patuloy na pagdami ng mga pasyente.

Sa kanyang direktiba matapos ang ulat ng MHD, inatasan ni Domagoso ang mga ahensya ng Pamahalaang Lungsod na paigtingin ang patuloy na isinasagawang kampanya kontra leptospirosis.

Kabilang dito ang agresibong public information campaign upang maipaalam na mayroong libreng doxycycline capsules sa lahat ng 44 health center at 7 district hospital sa ilalim ng Pamahalaang Lungsod.

Giit ni Domagoso, mabuti nang mismong Pamahalaang Lungsod , sa pamamagitan ng MHD at 896 barangay, ang pumunta sa taumbayan upang mamahagi ng doxycycline sa mga naapektuhan ng pagbaha sa mga nakaraang linggo.  

(Gene Adsuara)