SUPORTADO ng Senior Citizens Party-list ang panukala ni Ombudsman Jesus Crispin Remulla na masaklaw ng civil service laws at rules ang lahat ng barangay officials.

Ayon kay Senior Citizens Party List Rep. Rodolfo Ordanes, Senior Vice Chair ng Committee on Senior Citizens at Vice Chair at Committee on Appropriations, sa ngayon ay walang educational qualifications para maging barangay kapitan at kagawad.

Hindi aniya ito makatarungan para sa mga mamamayan na umaasang may competence ang mga halal na kapitan at kagawad, hindi lang basta can read and write.

“Kasi hahawak sila ng responsibilidad, public funds, at mangangasiwa ng mga programa at proyekto.

Sa aming pananaw, kasama rin dapat sa saklaw ng civil service laws at rules ang lahat ng elected at appointed officials sa barangay. Kailangan ito para tumaas naman ang kalidad ng serbisyo sa barangay,” anang mambabatas.

Kailangan din aniyang maamyendahan ang Local Government Code of 1991 upang ma-upgrade ang kuwalipikasyon ng elected barangay officials.

Ang barangay chairpersons, councilors, at lahat ng regular barangay staff members ay dapat na high school graduates at nakapasa sa Civil Service Subprofessional Examination.

Kung ang barangay staff member ay college graduate, nakumpleto ang ilang college education, o katumbas na kuwalipikasyon base sa work experience at equivalency test results, ang salary grade ay dapat na aayon sa staff member’s qualifications, mula Salary Grade 10 hanggang SG 12.

Dapat ding magkaroon ng isang komprehensibong barangay civil service system para sa mga barangay secretary, treasurer, budget officer, administrator, clerks, administrative assistants, at DRRMO officer.

Ang mga barangay tanods, drivers, at utility personnel ay maaaring maging SG-1 dahil sa minimum educational qualifications na elementary graduate at nakapasa sa equivalency assessment.

 (VINA de GUZMAN)

NAILIGTAS ng Bureau of Immigration (BI) ang isang Filipina na itinuturing na posibleng biktima ng human trafficking na may kaugnayan sa isang pinaghihinalaang surrogacy scheme sa Ninoy Aquino International Airport (NAIA) Terminal.

Sa isinumiteng ulat  kay BI Commissioner Joel Anthony M. Viado ni Jerica Ann Arsola, hepe ng Immigration Protection and Border Enforcement Section (I-PROBES) ng BI sa NAIA Terminal 3, na ang pasahero ay  pupunta siya sa Thailand para sa pitong araw na bakasyon pero dahil sa hindi pagkakatugma ng kanyang mga pahayag, ini-refer siya ng primary immigration officer sa I-PROBES para sa karagdagang beripikasyon.

Sa isinagawang secondary inspection, isiniwalat ng babae na  ang tunay niyang destinasyon ay  Georgia, kung saan makikipagkita siya sa isang Chinese national na kinilalang “Luca,” na nakilala lamang niya sa pamamagitan ng WhatsApp. Ayon sa biktima , ipinakilala sa kanya si Luca ng isang Filipina na tinukoy bilang “Aubrey.”

Isiniwalat din ni pasahero  na inalok siya ng surrogacy arrangement  na umano’y magbibigay sa kanya ng  US$400 kada buwan habang nagbubuntis, bukod pa sa karagdagang  US$600 matapos manganak.

Narekober din ng mga tauhan ng I-PROBES ang isang  Georgia e-visa  at itinerary na nagpapakitang mula Bangkok ay tutuloy ang pasahero sa Georgia sa pamamagitan ng  Shanghai, China. Nagdulot ito ng karagdagang pagdududa sa tunay na layunin ng kanyang paglalakbay.

Dahil dito, ini-refer at kalaunan ay itinurn-over ang pasahero sa  Inter-Agency Council Against Trafficking (IACAT) para sa karagdagang pagsusuri, imbestigasyon, at kaukulang aksyon.

Pinuri ni Commissioner Viado ang pagiging mapagmatyag ng mga immigration personnel sa NAIA na nakapansin sa mga hindi magkakatugmang pahayag ng pasahero at agad na nagsagawa ng kaukulang referral. Gene Adsuara

IPINAALALA ni Manila Vice Mayor Chi Atienza sa mga rallyista na nagsasagawa ng aktibidad sa Lungsod kasabay ng paggunita ng ika-54 anibersaryo ng deklarasyon ng Martial Law ang pagrespeto sa ipinapatupad na patakaran sa Lungsod.

Aniya, pairalin sana ng mga nagkikilos protesta ang kaayusan at paggalang sa lungsod kung saan pinayagan nila ang mga ito na magsagawa ng aktibidad pero dapat maayos ang lahat pagkatapos.

Sinabi ng bise alkalde na kinikilala ng Manila LGU ang karapatan ng bawat isa na magtipon at magpahayag, ngunit hiniling na panatilihing maayos ang mga aktibidad at tiyaking malinis at ligtas ang paligid.

Tiniyak ng Pamahalaang Lungsod ng Maynila na nakahanda naman ang mga kinakailangang kagamitan at tauhan sakaling dumami ang mga magsasagawa ng rally sa lungsod.

Nagpaalala rin si Vice Mayor Chi hinggil sa Anti-Baclavа Ordinance na ipinatutupad sa lungsod. Muling paalala ng Manila LGU, patuloy nilamg pinapayagan ang pagsasagawa ng mga rally at iba pang pagtitipon, basta’t gagawin ang mga ito nang maayos at naaayon sa batas. 

“Bilang OIC ng ating Alkalde, isa lamang po ang hinihingi namin sa mga rallyista. Maaari po kayong pumasok sa aming siyudad, ngunit sana pag labas ninyo, maging maayos rin po kayo,” pahayag pa ni VM Chi.  

(Gene Adsuara)

MATAGUMPAY na natapos ni City Administrator Dr. Alexander T. Rosete ang kanyang Master’s in Business Administration (Global) sa University of Western Australia (UWA), na minarkahan ang isa pang makabuluhang milestone sa patuloy nitong paghahangad ng propesyonal na paglago at kahusayan sa pampublikong administrasyon.

Nakumpleto ni Dr. Rosete ang dalawang taong graduate program na nagpapatibay sa kanyang akademikong pundasyon sa strategic management, leadership, organizational development, at global business practices. Natapos niya ang kanyang unang taon sa Asian Institute of Management (AIM), kung saan nakuha niya ang kanyang Post Graduate Diploma in Management, bago natapos niya ngayon ang Global MBA sa UWA.

Ang kanyang academic journey mula sa AIM sa Pilipinas hanggang sa UWA sa Australia ay nagbigay sa kanya ng mga pagkakataon upang palalimin ang kanyang pang-unawa sa pamamahala habang nagkakaroon ng pagkakalantad sa mga internasyonal na pananaw at kasanayan na maaaring ilapat sa complex organizational at public-sector environments.

“Education is not simply about earning another credential. In public service, learning must translate into better decisions, more efficient systems, and services that respond to the needs of our people. Every lesson in leadership and management carries a responsibility. The real measure of what we learn is how we use that knowledge to improve government operations and create meaningful results for the people we serve,” aniya.

Ang MBA (Global) program at UWA ay nagpapaunlad ng mga kakayahan sa negosyo at pamumuno habang binibigyan ang mga mag-aaral ng mas malawak na pang-unawa sa pamamahala at mga organisasyon sa isang pandaigdigang kapaligiran ng negosyo. Sinasaklaw nito ang mga lugar tulad ng estratehikong pamamahala, pag-uugali ng organisasyon, pamumuno, paggawa ng desisyon, at pandaigdigang negosyo.

Sinabi ni Dr. Rosete na ang kanyang pagkakalantad sa mga pandaigdigang gawi ay nagpatibay sa kahalagahan ng pagbabago at kakayahang umangkop sa pamahalaan at magbibigay sa kanya ng kaalaman na maaaring suportahan ang kanyang trabaho sa pamamahala, estratehikong pagpaplano, at pagpapabuti ng serbisyo sa pampublikong sektor.

“Local governments operate in a changing environment. We need to remain open to new ideas, learn from effective practices, and adapt them to the realities and needs of our own communities. Innovation in government should always have one purpose: to make public service more accessible, efficient, and responsive,” ani Dr. Rosete. 

Dagdag niya, ang mahusay na administrasyon ay dapat na sa huli ay manatiling nakasentro sa mga tao, na may mga sistema, patakaran, at teknolohiya na nagsisilbi sa interes ng publiko at tumutulong na gawing mas mahusay ang gobyerno para sa bawat Malabueño.

Binigyang-diin din niya na ang pag-aaral ay dapat magpatuloy sa kabila ng pagkakaroon ng diploma, dahil ang bawat bagong kaalaman ay nagdudulot ng mas malaking responsibilidad na maglingkod, pagbutihin, at humanap ng mas mabuting paraan ng paggawa ng mga bagay para sa komunidad. (Richard Mesa)