NAGPATAWAG ng emergency meeting ang Commission on Elections (Comelec) sa kanilang field officials para paghandaan ang inaasahang special elections sa unang distrito ng Batanes.

Kasunod ito ng pagpanaw kahapon ni Batanes lone district Representative Ciriaco Gato Jr.

Ayon kay COMELEC Chairman George Garcia, kailangang idaos ang special election hindi mas maaga sa 60 araw at hindi lalampas sa 90 araw mula nang mabakante ang puwesto.

Posible rin aniyang isabay ito sa Barangay at Sangguniang Kabataan Elections kung matutuloy ang BSKE sa November 2.

Pero ayon kay Garcia, kailangang ikonsidera ang itinakdang minimum na 60 araw bago maisagawa ang special election.

Si Gato, na chairman ng House Committee on Health, ay pumanaw nitong Lunes. Gene Adsuara

Tinapos ng House of Representatives sa plenaryo ang deliberasyon sa proposed 2027 budget ng ilang ahensiya ng gobyerno.

Partikular na tinapos ng mga mambabatas ang mga budget ng sangay ng gobyerno na may kaugnayan sa anti-money laundering, intelligence, national security operations, kabilang ang peace and amnesty programs. 

Ilan sa mga ahensiya na naaprubahan ang kanilang mga budget ay ang Anti-Money Laundering Council (AMLC), National Intelligence Coordinating Agency (NICA), National Security Council (NSC), National Amnesty Commission (NAC), at ang Office of the Presidential Adviser on Peace, Reconciliation and Unity (OPAPRU).

Batay sa House Bill No. 10858, o proposed 2027 General Appropriations Bill, ang AMLC ay may alokasyon na ₱144.87 million. 

Ayon kay AMLC budget sponsor Negros Oriental Rep. Maria Isabel Sagarbarria, malaking bahagi ng pondo ay ilalaan sa information and communications technology initiatives ng ahensya, kabilang ang development ng in-house artificial intelligence capability at blockchain analytics platform para matunton ang money laundering na gumamit ng crypto currency.

Samantala, ang OPAPRU ay may nakalaan na ₱9.30 billion na budget, ayon kay Butuan Rep. Jose Aquino II, budget sponsor ng nasabing ahensiya.

Inisponsor din ni Aquino ang proposed ₱266.68-million budget ng National Amnesty Commission bilang suporta sa amnesty program ng gobyerno.

Natapos na rin ang deliberasyon sa ₱2.86-billion budget ng NICA at ₱1.12-billion sa NSC na dinipensahan nila House Committee on Appropriations Vice Chairperson at Sultan Kudarat Rep. Bella Vanessa Suansing. (VINA de GUZMAN)

SA ginanap na 2nd Valenzuela International Progress Summit 2026, kinilala ng Pamahalaang Lungsod ng Valenzuela sa pamumuno ni Mayor Wes Gatchalian ang Top Taxpayers, Job Providers, at Industry Partners nito bilang pasasalamat sa kanilang ambag sa lokal na ekonomiya at sa paglikha ng trabaho para sa mga Valenzuelano. Naging sentro din ng talakayan ang innovation, investment, business partnerships, at digital transformation bilang bahagi ng paghahanda ng Valenzuela sa mga bagong oportunidad at hamon sa negosyo. (Richard Mesa)

NANAWAGAN si House Speaker Faustino Dy III sa mga barangay officials ng Quezon City na ipagpatuloy ang kanilang matapat na paglilingkod sa kanilang komunidad.

Sa kanyang talumpati sa 31st Quezon City Barangay Day Celebration na ginanap sa Grand Ballroom ng Novotel Manila Araneta City, sinabi ni Dy na “ang matatag na barangay ay tagumpay ng Quezon City.” 

“Mahirap po ang trabaho ng mga punong barangay—ang ating mga barangay officials. Alam ko sa bawat mga barangay, sa 142 barangay na nandito ngayon, may kaniya-kaniya pong kwento,” sinabi ni Dy. 

Aniya, ano mang oras ang kailanganin ay kakatukin ka. “Kinakalampag tayo kahit anong oras. Nandyan po ang ating mga punong barangay, ang ating mga barangay officials—humaharap kahit ano man pong pagsubok, ano man pong paghamon.” 

Ayon kay Dy, nagsimula ang kanyang serbisyo publiko bilang punong barangay sa kanilang komunidad sa Isabela.

“Dito po lahat nagsimula ang aking paglilingkod sa amin pong lalawigan ng Isabela,” sinabi ni Dy na ang kanyang karanasan bilang barangay chairman ay humubog sa kanya na maglingkod sa mas mataas na tungkulin sa gobyerno.

“Sa tingin ko, kapag naging punong barangay ka, kahit ano na posisyon kaya nating gampanan dito sa ating Republika ng Pilipinas,” dagdag ng kongresista.

Iginiit ni Dy na huwag sirain ang tiwala ng komunidad sa iyong kakayahan bilang punong barangay. 

“Hindi lahat ng mahusay ay matino. Hindi lahat ng matino ay mahusay. Kailangan po matino at mahusay nang makita natin at maalagaan natin ang kaban ng bayan,” sinabi ni Dy. (VINA de GUZMAN)

SINABI ng Malakanyang na hindi kailangang maging marahas o may pananakit ang mga nakakasang kilos protesta ngayong araw, September 21.

Ito ang inihayag ni Palace Press Officer Undersecretary Claire Castro sa harap ng mga pagkilos na inaasahan.

Ani Castro, malayang makapagpapahayag ang ibat- ibang grupo ng kanilang sentimyento at hindi naman aniya sila pipigilan sa pagsasabi ng kanilang saloobin.

Sana lamang aniya ay wala ng karahasan pang mangyari lalot bukas naman ang pakinig ng pamahalaan pati na si Pangulong Ferdinand R. Marcos Jr. sa mga panawagan ng mga magsasagawa ng kilos protesta.

Sa kabilang dako, siniguro ng Malakanyang na handa ang hanay ng PNP para bantayan ang mga rally site at masiguro na magiging mapayapa ang mga inaasahang demonstrasyon ngayong araw.

 (DARIS JOSE)

NANAWAGAN si Parañaque Rep. Brian Yamsuan sa mga kapwa mambabatas na agad ipasa ang panukalang naglalayong palakasin ang masiguro ang patuloy na pondo para sa mga school safety programs ng Department of Education (DepEd).

Kasabay nito, hinikayat din ni Yamsuan ang mga local government units (LGUs) na agad gamitin ang bahagi ng kanilang Special Education Fund (SEF) para tumulong sa pagtugon sa security needs ng mga public schools sa kanilang komunidad.

Ang panawagan ay ginawa ng mambabaras makaraan ang naganap na madugong insidente sa Banga National High School sa South Cotabato, kung saan ilang estudyante ang nasawi habang may iba p a ang nasugatan. Ang trahedya ay ilang beses na insidente ng karahasan sa loob at labas ng eskuwelahan sa nakalipas na ilang buwan.

“Ipinaaabot po natin ang ating pakikiramay sa mga pamilya ng mga estudyanteng naging biktima ng karahasang ito. No child should enter a classroom in fear. We need to institutionalize a comprehensive measure now to ensure that our elementary schools, high schools and other basic education institutions are safe and remain conducive environments for learning,” ani Yamsuan.

Ipinanukala ni Yamsuan ang Comprehensive School Safety Act o House Bill (HB) 10864 na nagsusulong na magbuo, magmentina at periodically update ng National Comprehensive School Safety Framework, na magsisilbing standards sa school safety plans, kabilaing na ang kinakailangang infrastructure at security measures na kailangan para maipatupad sa lahat ng public at private educational institutions.

Nakapaloob sa panuakala ang nakatalagang standards at protocols ukol sa learner protection, mental health support, violence prevention at anti-bullying mechanisms.

Ang HB 10864 at iba pang kahalintulad na panukala ay naka-pending sa House Committee on Basic Education and Culture, habang ang Senate version ng Comprehensive School Safety Act ay nakapasa na sa ikalawang pagdinig noong nakalipas na linggo.

“We urge our colleagues in the House of Representatives to act fast in passing the proposed Comprehensive School Safety Act on our end so that we can soon put in place a system that would protect learners and school personnel from all forms of abuse and violence in and outside our schools,” pagtatapos ni Yamsuan. 

(VINA de GUZMAN)