LAGLAG sa selda ang dalawang hinihinalang drug personalities matapos mahuli sa akto na gumagamit umano ng shabu sa magkahiwalay na lugar sa Valenzuela City.

Sa ulat ni SDEU Police Investigator PSSg Christopher Quiao kay Valenzuela Police Chief P/Col. Joseph Talento, nagsasagawa ang mga tauhan ng Police Sub-Station 8 ng ‘Oplan Galugad’ sa Bagong Nayon, Brgy., Bagbaguin nang maaktuhan nila si alyas “Jess”, 30, sumisinghot umano ng shabu sa loob ng isang bahay dakong alas-4 ng Miyerkules ng madaling araw.

Kaagad siyang nilapitan at inaresto nina PSSg Al Sanchez at Pat Don Philip Barroga at nakumpiska sa kanya ang isang nakabukas na plastic sachet na may laman ng bahid ng hinihinalang shabu at ilang drug paraphernalias.

Nauna rito, naaresto naman nina Pat Blairwayne Jason Teniola at Pat John Michael Macalla, kapwa ng Police Sub-Station 6 ang 28-anyos na construction worker na si alyas “Josh” nang maaktuhang gumagamit umano ng shabu sa loob ng isang abandonadong bahay sa Daang Bakal St., Brgy., Dalandanan alas-:25 ng Lunes ng gabi.

Nasamsam sa kanya ang isang nakabukas na plastic sachet na naglalaman ng bahid ng umano’y shabu at ilang drug paraphernalias.

Sinabi ni P/MSgt. Carlito Nerit Jr., mahaharap ang mga suspek sa kasong palabag sa Sections 12 at 15 ng R.A 9165 o ang Comptrehensive Dangerous Drug Act of 2002. (Richard Mesa)

ARESTADO ang 36-anyos na demolition worker na sangkot umano sa pagbebenta ng ilegal na droga nang kumagat sa ikinasang buy bust operation ng pulisya sa Caloocan City.

Kinilala ni Caloocan Police Chief P/Col. Joey Goforth ang suspek na si alyas “Tol”, 36, na nahaharap sa kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002.

Sa kanyang ulat kay Northern Police District (NPD) Director P/BGen. Benliner Capili, sinabi ni Col. Goforth na alas-9 ng gabi nang maaresto ng mga operatiba ng Station Drug Enforcement Unit (SDEU) sa pangunguna ni P/Lt. Restie Mables ang suspek sa loob mismo ng kanyang bahay sa Romblon St., Brgy., 69.

Ikinasa ng mga operatiba ng SDEU ang buy bust operation sa koordinasyon sa PDEA kasunod ng natanggap na impormasyon hinggil sa umano’y illegal drug activities ng suspek.

Isa sa mga operatiba ng SDEU ang nagawang makipagtransaksyon sa suspek at nang tanggapin umano nito ang marked money mula sa pulis kapalit ng isang plastic sachet ng shabu ay agad siyang dinamba ng mga tauhan ni Lt. Mables.

Nakumpiska sa suspek ang humigi’t kumulang 10.98 grams ng hinihinalang shabu na nagkakahalaga ng P74,664.00 at buy bust money na isang tunay na P1,000 bill.

 (Richard Mesa)

HINARANG ng Bureau of Immigration (BI) ang apat na Pilipinong pasahero na itinuturing na biktima ng human trafficking sa dalawang magkahiwalay na insidente sa Ninoy Aquino International Airport (NAIA) Terminal 1 noong Setyembre 18 at 19.

Ayon sa Immigration Protection and Border Enforcement Section (I-PROBES) ng BI, lahat ng apat na pasahero ay ini-refer ng mga primary immigration officer para sa karagdagang beripikasyon sa kanilang idineklarang layunin ng paglalakbay.

Tatlong lalaking pasahero na kinilalang Aldo 30; Nery, 41; at Baby, 38 , ang magkakasamang bumiyahe patungong Thailand.

Sa isinagawang secondary inspection, sinabi umano ni Aldo na Russia ang kanyang tunay na destinasyon at na-recruit siya sa pamamagitan ng isang Facebook post para magtrabaho bilang security personnel , kapalit ng ipinangakong suweldo na P70,000 kada buwan habang si Nery ay na-recruit umano siya ng isang hindi nakilalang indibidwal sa Bangkok, habang sinabi ni Baby na ang kanyang biyahe ay umano’y sponsored ng isang nagngangalang Alexander.

Kinabukasan, isa pang pasahero na kinilalang King, 34, ang hinarang ng I-PROBES. Bumiyahe siya sakay ng Philippine Airlines at nagdeklara na Vietnam ang kanyang destinasyon.

Sa karagdagang beripikasyon, sinabi umano ni King na Russia ang kanyang tunay na final destination at na-recruit siya para sa military service doon. at inalok ng P150,000 buwanang suweldo, pagiging mamamayan ng Russia makalipas ang isang taon, at karagdagang mga bonus kapag natapos ang isang special mission.

Nagpakita rin umano si King ng isang Russian visa, at sinabi na wala siyang inilabas na pera para sa kanyang mga gastusin sa paglalakbay.

Matapos ang assessment, itinuring ang apat na pasahero bilang potensyal na biktima ng human trafficking at itinurn-over sa Inter-Agency Council Against Trafficking (IACAT) para sa karagdagang pagsusuri, imbestigasyon, at kaukulang tulong.

Hinimok naman ni BI Commissioner Joel Anthony M. Viado ang mga Pilipinong naghahanap ng trabaho sa ibang bansa na beripikahin ang mga job offer sa pamamagitan ng Department of Migrant Workers (DMW) at mga lisensiyadong recruitment agency nito.

Pinaalalahanan din niya ang mga nagnanais magtrabaho sa ibang bansa na tiyaking lehitimo ang recruitment agency at job order sa pamamagitan ng opisyal na mga channel ng DMW bago tumanggap ng anumang alok na trabaho o bumiyahe palabas ng bansa.

Bilang miyembro ng IACAT, hinimok din ng BI ang publiko na i-report ang mga pinaghihinalaang kaso ng human trafficking at illegal recruitment sa hotline nitong (+632) 8-465-2400 , o sa mga opisyal na email address na xinfo@immigration.gov.ph at immigPH@immigration.gov.ph

Maaari ring magsumite ng ulat sa alinmang kinauukulang ahensya ng pamahalaan.

Ayon sa BI, makikita rin ang mga contact detail na ito sa opisyal nitong website.  

(Gene Adsuara)

Sa ulat ni Valenzuela Fire Marshal F/Supt. Ma. Theresa Alqueza, dakong ala-1:55 ng madaling araw nang sumiklab ang sunog sa Pacheco Flea Market sa Tongco St. Brgy. Maysan sa hindi pa batid na dahilan.

Mabilis na kumalat ang apoy kaya kaagad itinaas sa ikalawang alarma ang sunog na nakontrol ng mga rumespondeng bumbero ng alas-2:39 hanggang tuluyang maapula ng alas-3:15 ng madaling araw.

Inaalam pa ng mga arson investigators ang sanhi ng sunog habang nagsasagawa pa ng imbentaryo sa tinatayang halaga ng mga paninda at ari-arian na natupok ng apoy.

Walang natira sa mga paninda ng mga matatagal ng may puwesto sa nasabing palengke kaya umaapela sila kay Valenzuela City Mayor Wes Gatchalian na tulungan silang makahanap ng puwestong pagtitindahan upang maipagpatuloy ang paghahanapbuhay at mabayaran ang inutang lamang nilang puhunan. (Richard Mesa)

NAKATAKDANG bumisita sa Pilipinas ang itinuturing na Pickleball World No. 1 na si Anna Leigh Waters sa darating na Oktubre para sa gaganaping Franklin Asia Pickleball Showcase.

Ang Pilipinas ang napiling kauna-unahang destinasyon ng naturang pandaigdigang showcase bago ito itaguyod sa iba pang bansa sa Asya tulad ng Malaysia, Hong Kong, at Vietnam.

Inihayag ng organizers na ang bansa ang kasalukuyang nagtatala ng pinakamabilis na paglago sa larangan ng pickleball sa buong mundo matapos makapagrehistro ng impresibong 1,213% year-over-year growth rate.

Dahil sa mabilis na pagdami ng mga naglalaro at nagkakagusto sa naturang palakasan, inilagay nila ang Pilipinas sa tuktok ng mga prayoridad nito para sa kanilang global expansion.

Inaasahang magbibigay ng malaking inspirasyon sa mga lokal na atletang Pilipino ang pagbisita at pagtatanghal ng world number one player sa darating na buwan.