HILING NG LTFRB NA I-EXEMPT SA ELECTION BAN ANG MGA PROGRAMANG SUMUSUPORTA SA MGA OPERATOR, DRIVER AT COMMUTER, INAPRUBAHAN NA NG COMELEC

NAGPASALAMAT ang Land Transportation Franchising and Regulatory Board (LTFRB), sa pamamagitan ni Department of Transportation (DOTr) Secretary Giovanni Z. “Banoy” Lopez, kay Commission on Elections (COMELEC) Chairman George Erwin M. Garcia sa pag-apruba sa kahilingan nitong i-exempt sa election ban ang mga programang nagbibigay ng suporta sa mga operator, driver at commuter.

Ayon kay Acting LTFRB Chairman Atty. Greg G. Pua, Jr., pinagbigyan ng COMELEC ang kahilingan ng ahensya para sa Service Contracting Program (SCP), kabilang ang EDSA Busway Extension at Love Bus “Libreng Sakay” Program, at Fuel Subsidy Program (FSP), kabilang ang one-time fuel subsidy at ₱12 kada litro na fuel discount.

Saklaw din ng exemption ang Public Transport Modernization Program (PTMP), kabilang ang tatlong buwang assistance para sa buwanang amortization at operational expenses ng mga operator ng public utility vehicles (PUVs).

Sa ilalim ng SCP, nakabatay ang suporta batay sa aktuwal at beripikadong serbisyong pampasahero, habang ang FSP ay naglalaan ng ayuda sa mga kwalipikadong operator at driver upang maibsan ang epekto ng mataas na presyo ng gasolina at mapanatili ang kanilang operasyon.

Samantala, ang PTMP ay isang tuloy-tuloy na pambansang programa para sa modernisasyon at pagpapabuti ng pampublikong transportasyon.

Ipinadala ng LTFRB ang liham nito sa COMELEC noong Setyembre 15, kasunod ng inilabas na guidelines kaugnay ng Barangay and Sangguniang Kabataan Elections (BSKE). Sa memorandum ng COMELEC Law Department, inirekomenda ang exemption na kalaunan ay inaprubahan ni Chairman Garcia.

“Sa ngalan ng mga PUV operator at commuter, taos-pusong nagpapasalamat ang LTFRB sa COMELEC, sa pamumuno ni Chairman Garcia, sa pag-unawa sa mga concern na aming inilahad,” ani Acting Chairman Pua.

“Pinatutunayan nito ang iisang direksiyong nais nating tahakin: ang maibigay ang lahat ng kinakailangang tulong sa mga Pilipino sa panahong higit nilang kailangan ang suporta ng pamahalaan,” dagdag niya.

Tiniyak naman ni Pua na mahigpit na susundin ng LTFRB ang mga kondisyong itinakda ng COMELEC, kabilang ang pagbabawal sa paggamit ng mga programa upang maimpluwensiyahan ang BSKE, hindi direktang paglahok ng mga kandidato sa pagpapatupad ng mga ito, at regular na pagsusumite ng written report sa mga inilabas na pondo.

“Malaking ginhawa ang pag-apruba nito para sa lahat ng benepisyaryo ng mga programa, lalo na sa panahong tunay nilang kailangan ang tulong ng pamahalaan. Nagpapasalamat kami sa COMELEC para rito,” ani Acting Chairman Pua.

“Tinitiyak namin sa COMELEC ang buong pagsunod ng LTFRB sa lahat ng kondisyong itinakda,” dagdag niya. (PAUL JOHN REYES)