TITIYAKIN ng gobyerno na hindi madedehado ang Pilipinas at ang mga Filipino sa transaksyon para sa inisyatiba sa Pax Silica.

Sinabi ni Presidential Communications Office (PCO) Undersecretary at Palace Press Officer Claire Castro, matatag ang paninindigan ng Pangulo na ang investments para sa Pax Silica ay dapat na kapaki-pakinabang sa bansa nang hindi makokompromiso ang kapakanan at karapatan ng mga mamamayang Filipino.

“Nagsalita din po ang Pangulo. Hindi maaaring gumawa ng anumang transaksyon na ang Pilipinas o mga Pilipino ang siyang madedehado,” ani Castro.

“Kailangan po nating magkaroon ng mga investments pero hindi nangangahulugan na ang ating mga kapwa Pilipino ang magdurusa,” aniya pa rin.

Ang pahayag na ito ni Castro ay matapos na magpatupad ang Estados Unidos ng 50 percent na taripa sa halos $20 bilyon na halaga ng mga produkto ng Canada. 

Kasunod sa bigong trade negotiations sa dalawang bansa

At nang tinanong naman si Castro ukol sa nakakasang pangangalaga para sa Pilipinas sa ilalim ng US-led Pax Silica initiative, iginiit ni Castro na hindi kukunsintihin ng gobyerno ang anumang aksyon na maaaring lumabag sa batas ng Pilipinas o karapatan ng mga Filipino.

“So, maliwanag po iyan. Hindi po natin pababayaan kung ano ang itinatalaga ng ating batas, hindi po natin iba-violate ang karapatan ng ating mga kapwa nating Pilipino,” aniya pa rin.

Nauna rito, inilarawan ni Pangulong Marcos ang Pax Silica initiative bilang isang “good deal” dahil makalilikha ito ng mas maraming job opportunities at mapasisigla ang paglago ng ekonomiya sa bansa.

Welcome rin sa Pangulo ang posibleng kolaborasyon kasama ang US, European countries, China, Japan, South Korea, Canada, at Australia, binigyang diin na prayoridad ng administrayson na tiyakin na ang investments ay mapakikinabangan ng mga Filipino sa pamamagitan ng ‘job creation, skills development, technology transfer, at training.’

Ang Pax Silica ay isang internasyonal na inisyatiba na pinamumunuan ng Estados Unidos at nakatuon sa pagsiguro ng mga kadena ng suplay para sa mga masulong na teknolohiya tulad ng mga semikonduktor, artipisyal na katalinuhan (AI), at mga bihirang elemento sa lupa. Hindi tuwirang layunin ng inisyatiba na bawasan ang pag-asa sa Tsina at kontrahin ang pangingibabaw nito sa mga larangang ito. ( DARIS JOSE)

KINATIGAN ng mga mambabatas ang panukalang palawakin ang termino ng mga barangay at Sangguniang Kabataan officials nang hanggang limang taon.

Ayon kay Aklan Rep. Florencio Miraflores, chairman ng House Committee on Local Government, pabor ang mga miyembro ng nasabing komite na itakda ang termino ng mga barangay officials sa limang taon.

Aniya, mas mabibigyan panahon ang mga barangay officials na sustentuhan at ipagpatuloy ang kanilang mga programa at proyekto sa mas mahabang pagkakataon.

“Our task, therefore, is to find the right balance and establish a term that will ultimately strengthen, rather than weaken, grassroots governance,” sabi ni Miraflores.

Sinabi ni Sorsogon Rep. Marie Bernadette Escudero, may akda ng House Bill 10656, ang panukala na five-year term sa mga barangay officials ay tutugma sa five-year comprehensive development plan, na magbibigay pagkakataon na isakatuparan ang kanilang mga programa.

“This is particularly important for barangays with very limited resources, where the time and capacity to implement development programs can be a significant challenge,” sinabi ni Escudero.

Pinaliwanag ni Liga ng mga Barangay sa Pilipinas (LnB) National President Maria Katrina Jessica Dy na mahigit 70 porsiyento ng mga barangay ay annual budget na P5 million o mas mababa. Dito kadalasan ay maiksi lamang ang ipinapatupad na programa dahil sa kakulangan ng budget. 

Kung mas mahaba ang termino ng mga barangay official, mas mahaba ang panahon at pagkakataon na ipatupad ang kanilang programa.

Tinukoy ni Dy ang ginagampanang papel ng mga barangay officials, particular sa mga kalamidad at emergencies, kung saan kinakailan ang matatag na barangay governance.

Sa parte naman ng Commission on Elections (COMELEC), nakahanda na ang lahat sa gagawing Barangay and Sangguniang Kabataan Election (BSKE) na gaganapin sa November 2, 2026.

“Sa katunayan po ready na, meron na tayong final list of voters, nakapag-print na rin tayo ng mga balota, nakapag-procure na rin po tayo ng mga ballot boxes, mga forms and other supplies na gagamitin,” sinabi ni COMELEC Deputy Executive Director for Operations Rafael Olaño. 

Aniya, nakahanda rin tanggapin ng COMELEC kung ano man ang maging desisyon ng Kongreso kung ipagpapaliban ang BSKE at palalawakin ang termino ng mga barangay at SK officials. (VINA de GUZMAN)

SA GITNA ng mga insidente ng karahasan na kinasasangkutan ng mga kabataan at patuloy na banta ng exploitation at trafficking online, isinusulong ni Nueva Vizcaya Lone District Representative Atty. Timothy Joseph “Tim” Cayton ang mas matibay na proteksyon para sa mga menor de edad sa social media.

Inihain ni Cayton ang House Bill No. 10760 o “Social Media Safety for Children Act,” na naglalayong obligahin ang social media platforms na gawing prayoridad ang kaligtasan, privacy at kapakanan ng mga batang gumagamit ng kanilang serbisyo.

Naging mas matindi ang usapin sa child safety kasunod ng mga trahedyang kinasasangkutan ng mga estudyante. Noong Hunyo, tatlong estudyante ang nasawi sa pamamaril sa San Jose National High School sa Tacloban City. Nitong Agosto naman, isang estudyante ang napatay ng kapwa mag-aaral sa Ateneo de Zamboanga University Junior High School, bago nasawi rin ang huli. Naiulat ding ini-livestream sa social media ang insidente.

Kasabay nito, nananatiling banta ang online sexual abuse and exploitation of children (OSAEC), trafficking at iba pang uri ng exploitation, kung saan maaaring magamit ang digital platforms upang makontak at mapagsamantalahan ang mga menor de edad.

Sa ilalim ng HB 10760, kailangang gamitin ang pinakamataas na available privacy at safety settings bilang default para sa minors, higpitan ang unsolicited contact mula sa mga adult account, at limitahan ang exposure sa content tungkol sa sexual exploitation, suicide, self-harm at matinding karahasan.

Itinatakda rin ng panukala ang 16 taong gulang bilang minimum age para magkaroon ng sariling social media account nang walang parental consent, habang ang edad 13 hanggang 15 ay mangangailangan ng verifiable consent ng magulang o guardian.

Kasama rin sa panukala ang paghihigpit sa targeted advertising sa mga bata at pag-disable bilang default ng mga feature tulad ng autoplay, infinite scroll at streak mechanisms.

Sa pamamagitan ng Social Media Safety for Children Act, isinusulong ng mambabatas ang mas ligtas at responsableng digital environment para sa bawat batang Pilipino. (VINA de GUZMAN)

TINATAYANG P12.34 billion halaga na illegal drugs o shabu ang sinunog ng Philippine Drug Enforcement Agency (PDEA) sa Integrated Waste Management Inc. (IWMI) sa Brgy Aguado, Trece Martires City Huwebes ng umaga.

May kabuuan na 2,224,679.9705 gramo ng solid illegal drugs, at 106,386.0500 milliliters na liquid illegal drugs ang sinunog sa pamamagitan ng thermal decomposition o thermolysis, isang proseso kung saan sinusunog ang mga ito na may 1,000 degress centigrade na init nito. .

Kabilang sa mga sinunog ay 1,1774,023.9425 gramo ng Methamphetamine Hydrochloride, o Shabu na may kabuuang halaga na P12.06 billion kung saan ilang bahagi noto ay galing sa mga anti illegal drugs operation kabilang ang 876,000 gramo ng shabu mula sa MIMAROPA, isa sa pinakamalaking interdictions sa rehiyon. Dagdag dito ang 906,406.40 gramo mula sa Valenzuela.

Kasama rin sa sinunog ang 433,336.9546 gramo ng Marijuana; 21.2214 gramo ng MDMA o Ecstasy; 9.0571 gramo ng MDMA +Meth; 51 gramo ng Diazepam; 2.7076 gramo ng Ketamine; 22.1000 gramo ng Nitrazepam; 4.2500 gramo ng Psilocybin; 1,797 milliliters na liquid marijuana; 104,589.0500 milliliters na liquid Methaphetamine Hydrochloride at 15,000 gramo ng assorted expired medicines.

Ang mga droga at controlled precursors and essential chemicals (CPECs) ay bahagi ng mga na nakumpiska sa iba’t-ibang drug operations na isinagawa ng PDEA kasama ang kanilang counter part law enforcement at military units at hindi na kailangan na ebidensya sa korte.

Kabilang sa mga dumalo si PDEA Director General Undersecretary Isagani Nerez at iba pang mga opisysles maula sa PNP at Local Government Units (LGUs).

Sinaksihan din ito ni Dangerous Drug Board (DDB) Chairperson Secretary Oscar F Valenzuela. (Gene Adsuara)

TIKLO ang limang indibidwal kabilang ang dalawang hinihinalang sangkot sa droga nang maaresto ng pulisya sa ‘Oplan Galugad’ operation sa magkahiwalay na lugar sa Valenzuela City.

Sa ni Police Investigator PCpl Christopher Quiao kay Valenzuela Police Chief P/Col. Joseph Talento, nagsasagawa ng Anti-Criminality Operation ‘Oplan Galugad’ ang mga tauhan ng Police Sub-Station 8 sa Sapa St., Brgy., Bagbaguin nang maaktuhan nila ang dalawang kelot na nagsusugal umano ng ‘cara y cruz’ ala-1:20 ng Miyerkules ng madaling araw.

Nasamsam nina Pat Jay-R Verano at Pat Mikko Caballero sa dalawa ang P290 bet money, pangara at isang plastic sachet na naglalaman ng hinihinalang shabu na nagkakahalaga ng P3,400 na nakuha umano kay alyas “Jhayr”, 23.

Nauna rito, alas-11:50 Martes ng tanghali nang maaresto naman ng mga tauhan ng Police Sub-Station 1 ang tatlong individuals na nagsusugal umano ng ‘lucky 9’ Lord’s Candle Street, Barangay Paso De Blas.

Nakumpiska nina Pat Dan Aldrin Baladad at Pat Julius Valencia sa kanila ang P400 bet money, baraha at isang plastic sachet na naglalaman ng umano’y shabu na nagkakahalaga ng P2,584 na nasamsam umano sa 35-anyos na construction worker na si alyas “Daryl”.

Sinampahan na ng pulisya ang mga suspek ng kasong paglabag sa PD 1602 (Anti-illegal Gambling Law) habang karagdagan pa na kasong paglabag sa R.A 9165 (Comprehensive Dangerous Drug Act of 2002) ang isinampa kay ‘Daryl’ at ‘Jhayr’. (Richard Mesa)

UMABOT sa mahigit P2.7 milyong halaga ng shabu ang nasamsam sa dalawang lalaki na naaresto ng pulisya dahil sa pagpapaputok umano ng baril sa Caloocan City, Miyerkules ng umaga.

Sa kanyang ulat kay Northern Police District (NPD) Director P/BGen. Benliner Capili, sinabi ni Caloocan Police Chief P/Col. Joey Goforth na alas-7:25 ng umaga nang respondehan ng mga tauhan ni Police Sub-Station 6 Commander P/Maj. Valmark Funelas ang natanggap na reklamo hinggil sa nangyaring pagpapaputok ng baril sa Del Rey, Brgy., 163 ng lungsod.

Pagdating sa lugar, sinamahan ang mga pulis ng Ex-Officio ng nasabing barangay na siyang nag-ulat sa insidente hanggang makita nila ang dalawang lalaki na kapwa umanong may bitbit na baril.

Gayunman, nang mapansin ng dalawa ang presensya ng mga pulis ay nagtangkang tumakas ang mga ito sakay ng isang itim na Nissan Terra subalit, nagawa silang maharang at maaresto nina P/MSg Aldrine Simeon at Pat Efril Boy Hipol.

Nakumpiska kay alyas “Rolly”, 51, ang isang kalibre .9mm pistol na may limang bala sa magazine at apat knot tied transparent plastic na naglalaman ng nasa 400 grams ng hinihinalang shabu na nagkakahalaga ng P2,720.000.00 habang nakuha naman kay “Manny”, 55, driver, ang isang kalibre .45 pistol na may apat na bala sa magazine at isang basyo ng bala.

Kasama ring inaresto si alyas “May”, 41, dahil sa kasong Obstruction of Justice nang tangkain pigilan ang mga pulis sa pag-aresto sa kanyang asawang si ‘Rolly’.

Mahaharap ang dalawang lalaking suspek sa kasong Indiscriminate Discharge of Firearms, Comprehensive Firearms and Ammunition Regulation Act at Comprehensive Dangerous Drug Act of 2002. (Richard Mesa)