PATULOY na tinutugis ng mga awtoridad ang dalawang suspek sa pamamaril sa 29-anyos na mister at dalawa niyang paslit na anak sa loob ng isang pampasaherong jeep sa Malabon City.

Pawang nasa mabuti ng kalagayan ang biktimang si alyas “Kime”, pati ang 3-anyos niyang anak na lalaki at 10-buwang sanggol na lalaki matapos magamot sa Tondo Medical Center sanhi ng tinamong tama ng bala sa kanang hita, kaliwang hita at kanang paa.

Lumabas sa imbestigasyon ng Malabon City Police Station, sumakay ang mag-aama sa isang pampublikong jeepney sa Hulong Duhat dakong alas-4:40 noong Biyernes ng hapon at habang tinatahak ang kahabaan ng C. Arellano St. hinarang sila ng kulay maroon na Toyota Vios na walang plaka.

Bumaba ang dalawang sakay na ang isa ay nakasuot ng itim na jacket, maong na pantalon, puting cap at facemask habang berdeng t-shirt, jersey na short at facemask ang suot ng isa bago pinagbabaril ang biktima na dahilan para madamay din ang dalawa niyang anak.

Matapos ang insidente, mabilis na tumakas ang mga suspek sa hindi matukoy na direksyon habang isinugod naman ang mag-aama sa Ospital ng Malabon bago inilipat sa TMC.

Iniutos na ni Northern Police District (NPD) Director P/BGen. Benliner Capili kay Malabon Police Chief P/Col. Kenneth Mission ang pagsasagawa ng follow-up operation para matukoy ang pagkakilanlan ng mga suspek at maaresto ang mga ito habang inaalam pa ang motibo sa pamamaril. (Richard Mesa)

LAGLAG sa selda ang isang rider na tulak umano ng droga nang maaktuhan ng pulis na nagbebenta ng shabu sa kanyang parokyano sa Valenzuela City.

Sa kanyang ulat kay Valenzuela Police Chief P/Col. Joseph Talento, kinilala ni Station Drug Enforcement Unit (SDEU) chief P/Lt. Sherwin Dascil ang suspek bilang si alyas “Nick”, 36, residente ng Brgy. Parada.

Ayon kay Lt. Dascil, nakatanggap sila ng SMS complaint mula sa isang concerned citizen hinggil sa nagaganap umanong illegal drug activities sa M. Gregorio Street Barangay Canumay West kaya kaagad niyang inatasan ang kanyang mga tauhan na magsagawa ng validation at monitoring sa lugar.

Bandang alas-12:30 ng hating gabi nang maaktuhan ng mga tauhan ni Lt. Dascil ang suspek na may iniabot umanong shabu sa isang hindi kilalang lalaki kaya kaagad nila itong nilapitan sabay nagpakilala bilang mga pulis at inaresto si ‘Nick’ habang nagawang makatakas ng kanyang parokyano.

Nakumpiska kay alyas Nick ang limang plastic sachets na naglalaman ng nasa 3.48 ng hinihinalang shabu na nagkakahalaga ng P26,112, itim na coin purse, isang P500 bill, P200 recovered money, driver’s license at isang motorsiklo na gamit umano nito sa iligal gawain.

Ani SDEU investigator P/MSg Ana Liza Antonio, kasong paglabag sa Sections 5 at 11 under Article II ng RA 9165 (Comprehensive Dangeroud Drug Act of 2002 ang isasampa nila laban sa suspek sa Valenzuela City Prosecutor’s Office. 

(Richard Mesa)

MAGPAPATUPAD ng libreng sakay ang ­Metro Rail Transit Line 3 (MRT-3) tuwing araw ng Miyerkules sa loob ng buwan ng Agosto, sa seleb­rasyon ng pagsasabatas ng Republic Act 11055 o (Philippine Identification System Act) sa mga magpiprisinta ng balidong national ID.

Ayon sa advisory ng Department of Transportation (DOTr) nitong Biyernes, hindi na magbabayad ang mga mananakay sa mga petsang Agosto 5, 12, 19, at 26, simula alas-7 ng ­umaga hanggang alas-9 ng ­umaga, at alas-5 ng hapon hanggang alas-7 ng gabi.

Mag-aalok din ng hiwalay na libreng sakay sa Setyembre 16, 2026, bilang pagdiriwang ng Global Identity Day.

Maaaring ipakita ng mga commuter ang kanilang pisikal na National ID, Digital ID, o ePhilID sa papel na format upang ma-avail ang ­libreng serbisyo.

Ang inisyatiba ay partnership ng DOTr-MRT-3 at Philippine Statistics Authority (PSA), na nagsasagawa rin ng National ID registration sa Araneta-Cubao at Taft Avenue stations ng MRT-3.

Itinatag ng RA 11055 ang Philippine Identification System (PhilSys), ang nag-iisang national ID system ng bansa na pinangangasiwaan ng PSA. (DARIS JOSE)

NANGAKO ang mga mambabatas na ipapatupad nila ang reporma sa pagbabalangkas ng 2027 national budget at sisiguraduhin ito na walang masasayang na pera sa kaban ng bayan at mapupunta ito sa dapat tustusan, ayon kay Speaker Faustino “Bojie” G. Dy III.

Sa isang press briefing matapos ang launching ng LegisHear sa Isabela, sinabi ni Dy na ang susunod na spending program ng 2027 ay magiging “responsive, accountable, and focused on the needs of the Filipino people.”

Aniya, nakahanda na ang mga mambabatas na talakayin ang P7.2 trillion National Expenditure Program (NEP), na inaasahang ipasa sa Ehekutibo bago Agosto 14.

“Sa tingin ko, lalo pa nating bibigyan ng mahahalagang security measures upang matiyak na ang ating ipapasa na 2027 budget ay talagang maayos,” sinabi ni Dy.

Nagpatupad ang Kamara ng reporma sa proseso ng budget deliberations, kabilang ang transparency o mas malinaw na proseso sa appropriations tulad ng Budget Amendments and Review Subcommittee (BARSc) at livestreaming ng budget bicameral committee deliberations. 

(VINA de GUZMAN)

LIMANG katao, kabilang ang 11-buwang sanggol at kanyang ina ang nasawi matapos ma-trap sa nasunog na dalawang palapag na apartment sa Caloocan City, Linggo ng madaling araw.

Sa inisyal na ulat ni Caloocan City Central Fire Station arson investigator FO1 Samuel Rentillo Jr., nagsimula ang sunog sa talyer na nasa unang palapag ng apartment sa Blk 57L Lot 4 Sinilyasi st., Dagat Dagatan, Brgy. 08, na pag-aari ng isang Marina Escondo, dakong ala-1:02 ng madaling araw sa hindi pa nabatid na dahilan.

Kaagad namang nakapgresponde ang mga tauhan ng Caloocan Bureau of Fire Protection (BFP) at fire volunteers na dahilan upang agad makontrol ang sunog pasado ala-1:24 na umabot lang sa unang alarma hanggang tuluyang maapula ng alas-2:04 ng madaling araw.

Matapos ang mapping-up operation, nadiskubre ng mga bumbero ang mga bangkay na kinabibilangan ng tatlong babae at dalawang lalaki, kung saan huling nakita ang 11-buwang sanggol.

Napagalaman na kadarating lang sa trabaho ng ama ng sanggol at tinangka pang iligtas ang kanyang mag-ina subalit, hindi na siya makapasok dahil sa laki ng apoy habang labis naman ang paghihinagpis ng mister ng isa pang nasawing ginang matapos makabitaw sa kanya ang misis nang sabay silang lumabas ng nasusunog na tirahan.

Tinatayang P500,000.00 halaga ng mga ari-arian ang naabo sa sunog habang nasa anim na pamilya ang apektado na pansamantalang nanunuluyan sa barangay hall ng Barangay 8 kung saan sila pinadalhan ng mainit na pagkain at pangunahing pangangailangan ni Mayor Dale Gonzalo “Along” Malapitan. 

(Richard Mesa)