SINABI ng Department of Information and Communications Technology (DICT) na hihiling ito ng P18 billion na pondo sa ilalim ng panukalang P7.2-trillion national budget para sa 2027.

“We’re ready for the congressional deliberations, and we don’t expect any trouble getting this budget executed next year,” ayon kay DICT Secretary Henry Aguda.

Sa ilalim ng budget request nito, maglalaan ang DICT ng P2.7-billion para sa e-government (eGov) program nito sa national spending plan para sa susunod na taon.

Sa oras na maaprubahan, sinabi ni Aguda na magiging sakop ng pondo ang cloud hosting, cybersecurity at system integration para sa eGovPH, isang one-stop platform kung saan ang mga filipino ay makakapag-store ng digital IDs, makapag-aplay ng trabaho at makapag-request ng medical assistance.

Sinasabing nakapagtala ang eGov app ng mahigit sa 61 million downloads at nag-proseso ng mahigit sa 900 milyong transaksyon, nakapag-ugnay ng mahigit sa 1,300 government services sa isang lugar.

Ang go signal pa rin ng Kongreso ang tanda ng pagpayag ng pagsisimula ng DICT sa pag-roll out ng eGovAI, isang AI layer para sa automated document processing, habang pinapalawak ang cloud backbone nito.

“We’re building the infrastructure behind the administration’s digital push,” ani Aguda.

Idagdag pa rito, itinutulak din ng DICT ang National Digital Connectivity Plan— isang Marcos-approved roadmap kung saan target ang universal access sa 2028 at internet costs cut ng hanggang 80% sa pamamagitan ng fiber, satellite, at submarine cable expansion.

“We’re aiming to get every public school online ahead of the 2028 deadline. We’re already past 99 percent coverage, and our engineers are working with telco partners and local communities to reach the last remote sites by satellite,” ang winika ni Aguda.

“Free, reliable internet for public schools, barangay halls, and health centers in isolated communities remains non-negotiable for us,” aniya pa rin.

Samantala, sinabi pa ni Aguda na isinusulong ng departamento ang National Digital Connectivity Plan maliban pa sa Broadband ng Masa and Konektadong Pinoy laws, nagbubukas ng telecommunications space sa mas maraming kompetisyon.

 (DARIS JOSE)

NAGLABAS si Pangulong Ferdinand R. Marcos Jr. ng Administrative Order (AO) No. 47 na nagbibigay ng kapangyarihan sa Kalihim ng Department of the Interior and Local Government (DILG) na italaga sa mga awtorisadong kinatawan ang pag-apruba ng mga kahilingan para sa foreign travel ng mga lokal na opisyal ng pamahalaan.

Sa bisa ng kapangyarihan ng Pangulo, nilagdaan ni Executive Secretary Ralph Recto ang Administrative Order (AO) No. 47 na nag-amyenda sa AO No. 267 (1992) upang mapabilis ang pagproseso ng dumaraming aplikasyon para sa foreign travel ng mga lokal na opisyal.

“Dahil sa dami ng mga kahilingan para sa paglalakbay at sa patuloy na lumalaking pangangailangan sa koordinasyon sa mga rehiyon, kinakailangang pagbutihin ang proseso ng pag-apruba upang matiyak ang mas mabilis na pagtugon sa kasalukuyang kalagayan ng pamahalaan, mapalakas ang mga sistema ng gobyerno, mapahusay ang episyensya ng burukrasya, at kasabay nito ay mapanatili ang sapat na pangangasiwa at superbisyon sa mga lokal na pamahalaan,” nakasaad sa kautusan.

Sa ilalim ng Republic Act (RA) No. 7160 o Local Government Code, kinakailangang humingi ng pahintulot sa Office of the President ang mga opisyal ng lokal na pamahalaan na maglalakbay sa ibang bansa kung ang biyahe ay lalampas sa tatlong buwan, isasagawa sa panahon ng state of emergency o krisis, o kung gagamit ng pondo ng pamahalaan.

Binanggit din sa kautusan ang mga tuntunin para sa opisyal na local at foreign travel ng mga kawani ng pamahalaan sa ilalim ng Executive Order No. 77 (2019), na nagbibigay-diin sa layuning gawing mas episyente at mas mabilis ang mga sistema ng pamahalaan habang pinananatili ang pananagutan at sapat na pangangasiwa sa mga local government unit.

Magkakabisa ang AO No. 47 matapos itong mailathala sa Official Gazette o sa isang pahayagang may pangkalahatang sirkulasyon. ( DARIS JOSE)

MULING pinagtibay ng Department Of Agrarian Reform (DAR) kasama si DARAB-Board Member Atty. McDonald M. Galit ang mas matibay na pagtutulungan, mas mahusay na serbisyo, para sa mas maunlad na buhay ng ating mga Agrarian Reform Beneficiaries. Ang apat na araw na pagsusuri at pagpaplano ay nagpapatunay na nakatuon ang DAR sa mas epektibong paghahatid ng tulong para sa mga ARBs. ( Ser Morales Sr.)

ARESTADO ang dalawang aktibong pulis sa ikinasang buy-bust operation ng kanilang mga kabaro dahil sa pagbebenta umano ng iligal na armas sa Caloocan City, Huwebes ng umaga.

Kinilala ni Northern Police District (NPD) Director P/BGen. Benliner Capili ang mga pulis na sina alyas “Onin” na may ranggong Staff Sergeant, 32, nakatalaga sa Caloocan Police Sub-Station 2 at alyas “JayAr” na may ranggong Master Sergeant, 39, ng Caloocan Police Sub-Station 9.

Sa nakarating na ulat kay National Capital Region Police Office (NCRPO) Director P/MGen. Anthony Aberin, nagkasa ng buy-bust operation ang mga tauhan ni Caloocan Police Chief P/Col. Joey Goforth sa pangunguna ni P/Lt. Col. Rengie Deimos matapos ang ilang araw na surveillance at monitoring operation laban sa dalawa kasunod ng natanggap na impormasyon hinggil sa umano’y ilegal na gawain ng mga ito.

Isang sibilyan ang ginamit na poseur-buyer ng pulisya na nagbayad ng P2,500 marked money sa mga suspek kapalit ng hindi lisensiyadong kalibre .38 revolver na kargado ng dalawang bala na dahilan ng kanilang pagkakaaresto dakong alas-5:30 ng umaga sa Riles Compound, Brgy., 5.

Nakumpiska rin sa dalawa ang kanilang service firearm na kalibre .9mm pistol na ang isa ay kargado ng 10 bala sa magazine at 15 bala naman sa isa pa, isang 12-gauge shotgun na may apat na bala, dalawang mobile phone, dalawang motorsiklong gamit nila sa ilegal na operasyon at ang ginamit na marked money.

Maliban sa kasong administratibo, mahaharap din ang dalawa sa kasong paglabag sa Illegal Sale and Illegal Possession of Firearms at Possession/Sale of High-Powered Firearms sa ilalim ng R.A. 10591 o ang Comprehensive Firearms and Ammunition Regulation Act sa Caloocan City Prosecutor’s Office. (Richard Mesa)

SA kulungan ang bagsak ng isang umano’y tulak ng droga na itinuturing bilang High-Value Individual (HVI) matapos maaresto sa buy bust operation at makuhanan ng mahigit P171K halaga ng shabu sa Caloocan City.

Kinilala ni Caloocan Police Chief P/Col. Joey Goforth ang naarestong suspek bilang si alyas “Boss M”, 21, na mahaharap sa kasong paglabag sa Sections 5 at 11 sa ilalim ng Article II ng R.A 9165 o ang Comprehensive Dangerous Drug Act of 2002.

Sa kanyang ulat kay Northern Police District (NPD) Acting Director P/BGen. Benliner Capili, sinabi ni Col. Goforth na ikinasa ng mga operatiba ng Station Drug Enforcement Unit (SDEU) sa pangunguna ni P/Lt. Restie Mables ang buy bust operation laban sa suspek kasunod ng natanggap na impormasyon hinggil sa pagbebenta umano nito ng illegal na droga.

Isang pulis na nagpanggap na buyer ang nagawang makipagtransaksyon kay alyas Boss M, at nang tanggapin nito ang marked money mula sa pulis kapalit ng isang plastic sachet ng marijuana kush ay agad siyang dinamba ng mga operatiba dakong alas-11:25 ng umaga sa Brgy., 180.      

Nakumpiska sa kanya ang hinihinalang pinatuyong dahon ng marijuana at marijuana kush na nagkakahalaga ng P96,389 at nasa 11 grams ng suspected shabu na nagkakahalaga ng P74,800 na aabot lahat sa kabuuang halaga na P171, 189.06, at buy bust money. (Richard Mesa)