“Maleta boys,” ginamit lang sa smear campaign vs. top officials, House prosecutors

INIHAYAG ni House Prosecution Panel adviser at spokesperson Ace Barbers na ang desisyon ng apat na dating marines o kilala bilang “maleta boys” na bawiin ang dati nilang alegasyon kaugnay sa multi-bilyong pisong flood control project kickbacks ay nagpapakita na nagamit lamang ang mga ito. Sa pagtatangka na idiskredito ang ilang matataas na government officials at miyembro ng House prosecution panel na humahawak sa impeachment case laban kay Vice President Sara Duterte.

Ayon kay Barbers, ang pagbawi ay posibleng dahil sa konsensiya at kabiguan sa bahagi ng nag-recruit sa kanila na mapunan ang umano’y pangako ng seguridad at kaukulang financial rewards.

“Their recantations clearly show that someone prepared a script and used them to spread false allegations against senior government officials and members of the House prosecution panel,” pahayag nito.

Nang taungin kung napalakas ng naturang pagbawi ang kredibilidad ng prosekusyon, sinabi ni Barbers na “Oo, pinapalakas nito ang kredibilidad ng prosekusyon. Ang pagbawi ay nagpapakita na may nagdikta at nag-udyok sa kanila na mag-sinungaling, at ito ay isang sadyang pag-atake para siraan ang impeachment process.”

“Malamang konsensya at napakong pangako ang dahilan ng pagbawi nila,” dagdag ni Barbers.

Sa bagong ginawang notarized affidavits, opisyal na binawi ng apat na dating marines ang lahat ng kanilang statements na nagsasangkot kina President Ferdinand Marcos Jr., dating Speaker Martin Romualdez, dating Ako Bicol Party-list Rep. Zaldy Co, at iba pang personalidad sa alegasyon ng bribery at cash deliveries.

(VINA de GUZMAN)