NAGWAKAS na ang maligayang araw ng isang lalaking nanghuhuli at kumakatay ng mga aso para ibenta sa iba’t-ibang lugar matapos maaresto ng pulisya sa Navotas City.

Hindi na nakapalag ang akusado na si alyas “Ogag”, nasa hustong gulang nang posasan ng mga tauhan ni Navotas Police Chief P/Col. Renante Pinuela makaraang makorner sa kahabaan ng C-4 Road, Brgy. Bagumbayan South.

Sa kanyang ulat kay NPD Director P/BGen. Benliner Capili, sinabi Col. Pinuela na inaresto nila si ‘Ogag’ sa bisa ng warrant of arrest na inilabas ng Navotas Regional Trial Court (RTC) dahil sa mga kasong Theft at paglabag Section 9 ng Animal Welfare Act of 1998 na inamiyendahan ng RA 10631 na may kaugnayan din sa ginagawa niyang pagbebenta ng karne ng aso.

Nakuhanan ng CCTV ang akusado noong buwan ng Pebrero ng kasalukuyang taon, kasama ang kanyang asawa habang sinisilo ang isang aso sabay pukpukin sa ulo bago isilid sa sako.

Kasalukuyang nakapiit sa custodial facility ng Navotas Police Station ang akusado habang hinihintay pa ang utos ng korte para sa paglilipat sa kanya sa Navotas City Jail. (Richard Mesa)

LAGLAG sa selda ang isang drug suspect na itinuturing bilang High-Value Individual (HVI) nang makuhanan ng mahigit P.3 milyong halaga ng shabu makaraang maaresto ng pulisya sa ikinasang buy bust operation sa Valenzuela City, Sabado ng umaga.

Kinilala ni Valenzuela Police Chief P/Col. Joseph Talento ang suspek bilang si alyas “Michael”, 35, ng Brgy., Punturin na mahaharap sa kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002.

Sa imbestigasyon ni Police Investigator P/MSg Ana Liza Antonio, isa sa mga operatiba ng Station Drug Enforcement Unit (SDEU) ang nagawang makipagtransaksyon kay alyas Michael kasunod ng natanggap na impormasyon hinggil pagbebenta umano nito ng illegal na droga.

Kaagad namang bumuo ng team si SDEU Chief P/Lt. Sherwin Dascil bago ikinasa ang buy bust operation sa koordinasyon sa PDEA na nagresulta sa pagkakaaresto sa suspek dakong alas-7:25 ng umaga sa harap ng isang Junskshop sa Bignay-Punturin Bypass Road Brgy. Bignay, ng lungsod. 

Nakumpiska sa kanya ang humigi’t kumulang 55 grams ng hinihinalang shabu na may standard drug price na P374,000, buy bust money na binubuo ng isang tunay na P500 bill at pitong P1,000 boodle money, coin purse na itim at P350 cash.

Pinuri naman ni Northern Police District (NPD) Acting Director P/BGen. Benliner Capili ang operating team sa matagumpay na operation na bahagi aniya ng pinaigting na kampanya ng NPD laban sa mga indibidwal na sangkot sa pagpapakalat ng iligal na droga sa area ng CaMaNaVa. (Richard Mesa)

PANAWAGAN ni Manila Rep. Bienvenido “Benny” Abante Jr. sa Kamara sa pagbabalangkas ng panukalang P7.2-trillion national budget for 2027.

“Walang dapat na sikreto sa budget. Whether it be unprogrammed funds or automatic appropriations ‘yan, kinakailangan malaman ng taong-bayan kung saan nagmumula ‘yan, kung saan nanggagaling ‘yan, kung anong klaseng project ‘yan, kung paano i-implement ‘yan, at kung magkano na budget ang ibinigay diyan, at kung sino ang mag-i-implement,” sinabi ni Abante.

Sa lingguhang Saturday News Forum sa Quezon City, iginiit ni Abante ang karapatan ng mga taxpayers kung saan napupunta ang binabayad nilang buwis.

Ang nasabing national budget for 2027 ay mas mataas ng 6 percent mula sa P6.793-trillion national budget for 2026. Nakapaloob dito ang P111.9 billion na unprogrammed appropriations na maari lamang ipamahagi kung masusunod ang mga pamantayan sa paggastos nito.

“Nagpapasalamat ako sa leadership na ginagawa naming transparent ang deliberation. Ibig sabihin, dapat malaman ng taong-bayan kung saan napupunta ‘yung budget ng gobyerno. Sapagkat ‘yan ay pera ng mga nagbabayad ng buwis. At dapat lang nilang malaman lahat ng mga bagay na ‘yan,” sinabi ni Abante.

Sinuportahan din ni Abante ang hakbang na magkaroon ng open bicam sa pagitan ng House of Representatives at Senate upang maitugma ang kanilang mga bersiyon ng 2027 budget.

“Dapat lang. Palagay ko dapat maging transparent tayo sa bicam,” sabi ni Abante.

Aniya, dapat imbitahin ang religious groups, educators at civil society na obserbahan ang pagbabalangkas ng national budget “para makita nila na wala tayong anumang tinatago sa taumbayan.” (VINA de GUZMAN)

INISYUHAN ng Show Cause Order (SCO) ang rehistradong may-ari at itinalagang driver ng isang supercar matapos matukoy na gumagamit ito ng pekeng plaka habang bumibiyahe sa pampublikong kalsada.

Sa isinagawang beripikasyon ng LTO, natukoy na ang plate number na ginagamit ng naturang sasakyan ay may ibang alphanumeric combination kumpara sa orihinal na motor vehicle license plate number na nakatalaga rito. Kaugnay nito, inatasan ang rehistradong may-ari at itinalagang driver na humarap sa Intelligence and Investigation Division (IID) at magsumite ng beripikado o sinumpaang paliwanag kaugnay ng posibleng paglabag sa Use of Number Plates, gayundin upang ipaliwanag kung bakit hindi dapat suspendihin o bawiin ang kanilang lisensya dahil sa pagiging Improper Person to Operate a Motor Vehicle.

Samantala, isinailalim sa 90-araw na preventive suspension ang driver’s license ng itinalagang driver at inatasang isuko ito sa IID. Ang naturang supercar ay inilagay rin sa alarm status, at inatasan ang Law Enforcement Service (LES) na ipatupad ang pag-impound sa nasabing sasakyan.

“Walang VIP sa pagpapatupad ng batas. Kahit sino pa ang sangkot, kapag napatunayang lumabag, haharap sa kaukulang pananagutan. Hindi magdadalawang-isip ang LTO na kumilos laban sa sinumang lalabag sa ating mga patakaran. Walang palakasan, walang palusot, at walang exemption. Ang paggamit ng pekeng plaka at pag-iwas sa mga obligasyong dapat tuparin ay hindi pinapalampas ng LTO,” pahayag ni Asec. Lacanilao.

Patuloy na pinaaalalahanan ng LTO ang lahat ng motorista at rehistradong may-ari na tiyaking lehitimo ang kanilang mga dokumento, plaka, at rehistrasyon at tuparin ang lahat ng kaukulang obligasyon bago gamitin ang kanilang mga sasakyan sa pampublikong kalsada. Hindi magiging dahilan ang katayuan, pangalan, o halaga ng sasakyan upang makaiwas sa pagpapatupad ng mga patakaran. Tinitiyak ng LTO na mahigpit nitong susuriin at aaksyunan ang mga paglabag upang mapanatili ang integridad ng sistema ng pagpaparehistro ng mga sasakyan at mapanagot ang sinumang mapatutunayang lumabag. 

(PAUL JOHN REYES)