TINATAYANG aabot sa 85 pamilya ang nawalan ng tirahan matapos tupukin ng apoy ang mga kabahayan sa sunog na sumiklab sa hindi pa batid na dahilan sa Valenzuela City.

Sa ulat ni City Fire Marshal F/Supt. Ma. Theresa Alqueza kay Valenzuela City Mayor Wes Gatchalina, nagsimula ang apoy na itinaas sa unang alarma dakong ala-1:54 ng madaling araw sa Sitio Kabatuhan, Barangay Gen. T. de Leon, na umabot sa ikatlong alarma alas-2:12 sanhi ng mabilis na pagkalat ng apoy sa mga dikit-dikit na kabahayan na pawang gawa sa light materials.

Idineklarang undercontrol ang susnog dakong alas-4:44 ng madaling araw hanggang tuluyang maapula ng alas-6:05 ng umaga.

Ayon kay Alqueza, kabilang sa mga nasunugan ang rumespondeng fire volunteer na si Jeckster Quiamco, na walang naisalbang gamit dahil sa mabilis na pagkalat ng apoy bagamat ligtas naman ang kanyang pamilya.

Pansamantala ngayong nanunuluyan sa San Roque Chapel at sa covered court ng Brgy, Gen. T. De Leon ang mga apektadong pamila kung saan sila pinadalhan ni Mayor Gatchalian ng mainit na pagkain at kanilang mga pangunahing pangangailangan.

Patuloy ang ginagawang imbestigasyon ng mga arson investigator upang matukoy ang sanhi ng sunog at kung magkano ang halaga ng mga ari-arian na natupok ng apoy. (Richard Mesa)

IPINANUKALA ni 4Ps Partylist Representative JC M. Abalos na taasan ang mandatory annual Service Incentive Leave (SIL) para sa kuwalipikadong Filipino workers mula sa limang (5) araw sa sampung (10) araw.

“Our Constitution recognizes labor as a primary socio-economic force and mandates the State to protect the rights and promote the welfare of Filipino workers. Under the Labor Code, employees who have rendered at least one (1) year of service are currently entitled to five (5) days of Service Incentive Leave with pay. For more than 50 years, this minimum entitlement has remained unchanged. Should HB 10753 be enacted into law, it will entitle workers to at least 10 days service incentive leave with pay,” ani Abalos.

Sinabi ni Abalos na kinikilala sa House Bill (HB) No. 10753 ang pangangailangan ng mga manggagawa na makapagpahinga, mapangalagaan ang kalusugan at personal needs, at mapunan ang kanilang responsibilidad sa kanilang pamilya.

“Ang mga manggagawa ay hindi lamang bahagi ng ating workforce. Tao sila na nangangailangan din ng sapat na panahon para makapagpahinga, magpagaling kapag may sakit, asikasuhin ang kanilang personal na pangangailangan, at gampanan ang kanilang responsibilidad sa pamilya. Mahigit 50 taon nang limang araw ang minimum Service Incentive Leave. Panahon na para dagdagan ito,” pahayag ni Abalos.

Sinabi nito na ang Pilipinas ang may pinakamababang statutory minimum leave entitlement kumpara sa ibang bansa sa rehiyon.

“Medyo napapag-iwanan na rin tayo sa usapin na ito. Ang mga kapitbahay natin sa Southeast Asia tulad ng Singapore at Malaysia ay may statutory annual leave entitlements na mas mataas kaysa sa kasalukuyang limang (5) araw na Service Incentive Leave sa Pilipinas. Sa Singapore, ang annual leave ay nagsisimula sa pitong (7) araw at umaabot sa labing-apat (14) na araw depende sa haba ng serbisyo. Sa Malaysia naman, ang annual leave ay nasa walo (8), labindalawa (12), o labing-anim (16) na araw, depende rin sa haba ng serbisyo,” pagdidiin ni Abalos.

“Kung madadagdagan natin sa sampung araw ang annual Service Incentive Leave, mabibigyan natin ang ating mga manggagawa ng karagdagang panahon para makapagpahinga, makauwi sa kanilang pamilya, at maasikaso ang mahahalagang pangangailangan nang hindi isinasakripisyo ang kanilang sweldo,” aniya.

Para kay Abalos, kinikilala ng panukala ang diginidad ng mga manggagawang Pilipino at mabigyan sila ng supisyenteng panahon para pangalagaan ang kanilang sarili at kanilang pamilya.

“Ang dagdag na limang araw ay hindi lamang dagdag na leave. Ito ay pagkilala sa dignidad ng ating mga manggagawa at sa kanilang pangangailangan na magkaroon ng sapat na panahon para sa kanilang sarili at kanilang mga mahal sa buhay,” pagtatapos nito.

(VINA de GUZMAN)

KINUWESTYON ni Ombudsman Jesus Crispin “Boying” Remulla ang kalidad ng mga proyektong itinatayo ng Department of Public Works and Highways (DPWH) para sa iba’t ibang ahensya ng gobyerno.

Sa kanyang programa, sinabi ni Remulla na maaaring mas maayos ang malalaking proyekto kung isasagawa sa pamamagitan ng public-private partnership (PPP).

Kabilang sa binanggit niya ang mahigit P9-billion UP-Philippine General Hospital Cancer Center, na wala umanong nakuhang bidder.

Kinuwestiyon din ni Remulla ang Bureau of Immigration building project na nagkakahalaga ng mahigit P8 billion, na aniya ay matagal nang ginagawa.

Iminungkahi rin niya sa National Bureau of Investigation na sa halip na magpatayo ng bagong gusali, maaari na lamang itong bumili ng existing building sa pribadong sektor.

Sumang-ayon naman si DPWH Secretary Vince Dizon sa ilang punto ni Remulla, partikular sa paggamit ng PPP para sa malalaki at komplikadong proyekto.

Inamin din ni Dizon na hindi siya nasiyahan sa kalidad ng ilang proyektong ginagawa ng DPWH, kabilang ang Bureau of Immigration building.

Sinabi rin niyang handa ang DPWH na itigil ang kasalukuyang NBI building project upang makahanap ang ahensya ng mas praktikal na opsyon para sa bagong headquarters nito. ( DARIS JOSE)

NEWS 3 

50 lugar nasa state of calamity dahil sa Luis, Maymay at habagat

Umaabot na sa 50 lugar ang isinailalim sa state of calamity dahil sa matinding epekto ng tropical cyclones Luis, Maymay at southwest monsoon o habagat, ayon sa ulat ng Office of Civil Defense (OCD) nitong Linggo, Agosto 16.

Kabilang sa mg lugar na apektado ay ang Central Luzon (Region 3) kabilang ang Pampanga – 21 siyudad at bayan; Bulacan – Calumpit, Hagonoy, Bulakan.

Sa CALABARZON (Region 4A) ay buong lalawigan ng Cavite (23 lungsod at bayan); Rizal – Montalban; Ilocos Region (Region 1) kabilang ang Dagupan City at Sta. Barbara.

Sa report ng OCD, umabot na sa 23 katao ang death toll – 15 sa Benguet, 3 sa Batangas, 1 sa Rizal, tig-isa sa La Union at Quezon).

Sa PNP tally ay 25 katao ang nasawi. Nasa 17 katao ang sugatan at 3 nawawala.

( DARIS JOSE)

NAGSASAGAWA na ng imbestigasyon ang Department of the Interior and Local Government (DILG) sa umano’y “wait lang” na 911 emergency hotline sa isang medical emergency, matapos mag-viral sa social media ang reklamo ng isang netizen na humingi ng agarang tulong para sa kanyang ama.

Ayon kay DILG Secretary Jonvic Remulla, hindi maaaring ibalewala ang viral Facebook post ng isang Basti Askri tungkol sa umano’y naging karanasan nila sa paghingi ng emergency assistance.

Sa FB post ni Askri, halos 10 minuto siyang paulit-ulit na tumawag sa 911 ngunit walang sumagot. Nang may sumagot umano, paulit-ulit lamang siyang sinabihang “wait” habang naririnig niya ang tawanan at kuwentuhan sa background. Nang dumating ang ambulansya, wala itong automated external defibrillator (AED) at iba pang mahahalagang kagamitang medikal na kinakailangan sa emergency response.

Dahil dito, napilitan umano ang pamilya na magsagawa ng cardiopulmonary resuscitation (CPR) sa kanyang ama habang hinihintay ang kinakailangang medical assistance. Kalaunan ay namatay ang pasyente

Dagdag pa ni Remulla, patuloy na inaalam ng mga awtoridad ang mga pangyayari upang matukoy kung nagkaroon ng pagkukulang sa pagtugon at emergency services. ( DARIS JOSE)