ISANG mambabatas ang nanawagan nang mas mahigpit na parusa sa sinumang pabaya sa pangangalaga ng armas.

Ginawa ni Bukidnon Rep. Audrey Kay T. Zubiri ang panawagan bunsod ng magkasunod na insidente ng pamamaril sa eskwelahan sa Tacloban at Zamboanga City kung saan apat na estudyante ang napatay at ikinasugat ng iba pa.

Nasangkot ang isang policewoman at Customs official sa insidente matapos matukoy na sila ang may responsibilidad sa pangangalaga ng armas na ginamit sa krimen.

“While I understand the importance of having a gun at home, I cannot understand how it can be so easily accessed by children, especially minors. Hindi ko ma-imagine mawala ‘yung anak ko na minahal at inalagaan ko ng ilang taon dahil sa kapabayaan ng isang gun-owner,” sinabi ni Zubiri. 

Ayon kay Zubiri, ang mga nasabing insidente ay nagpapakita ng kapabayaan sa parte ng gun owner.

“At this moment, I think the burden lies on the parents and not only what the children consume from media anymore. These firearms are becoming more accessible even to children,” ani Zubiri.

Tinukoy ni Zubiri ang Republic Act No. 10591, o Comprehensive Firearms and Ammunition Regulation Act, na nagaatas sa mga firearm license holders na gumamit ng anumang locked container sa pagtatago ng armas, subalit walang kaparusahan kung naging pabaya ang gun owner at nakuha sa kanya ang baril na ginamit sa krimen.

“I call on my fellow legislators to act on this matter—not only to punish wrongdoing, but to prevent tragedies and protect our children before this becomes a trend,” sabi ni Zubiri.

(VINA de GUZMAN)

MATAGUMPAY na isinagawa ng National Housing Authority (NHA) ang ika-51 People’s Caravan nito na napakinabangan ng higit sa 3,000 residente ng Pagadian City.

Sa ilalim ng patnubay ni NHA General Manager Joeben A. Tai, pinangunahan nina Region IX Manager Engr. Al-Khwarizmi U. Indanan at Zamboanga del Sur/Zamboanga del Norte/BARMM A District Manager Engr. Jessa M. Consuegra ang inisyatiba sa Asenso Covered Court, Plaza Luz, noong Agosto 20, 2026.

Sa pagkatawan kay GM Tai, binigyang-diin ni RM Indanan ang layunin ng aktibidad na mailapit ang mga mahahalagang programa at serbisyo sa mga resettlement site ng ahensya, upang maghatid ng kaginhawaan sa mga benepisyaryo. 

Kabilang sa mga pangunahing serbisyong inalok ay ang mga oryentasyon sa pagnenegosyo, job fair na may 68 posibleng job vacancies, oportunidad sa trabaho, at pagpapahusay ng teknikal na kasanayan mula sa Cooperative Development Authority (CDA), Department of Labor and Employment (DOLE), Department of Trade and Industry (DTI), Department of Migrant Workers (DMW) Provincial Office, Public Employment Service Office (PESO) Pagadian, at Technical Education and Skills Development Authority (TESDA).

Ang Department of Agriculture at ang mga attached agencies nito – Agribusiness and Marketing Assistance Division (AMAD) at Bureau of Plant Industry (BPI) – ay nagbigay ng iba’t ibang serbisyo tulad ng KADIWA on Wheels at pagbibigay ng mga buto/punla.

Mga serbisyong medikal, pagbibigay ng mga gamot at libreng gupit, at libreng family planning at oryentasyon sa adolescent health ang handog ng Philippine Red Cross Zamboanga del Sur – Pagadian City Chapter, City Health Office, Armed Forces of the Philippines (AFP) – 53rd IB, 1st Infantry (TABAK) Division, Provincial Department of Health Office (PDOHO), Philippine Pharmacists’ Association Zamboanga del Sur – Pagadian City Chapter, at Commission on Population and Development (CPD).

Naghandog din ng serbisyo ukol sa civil registration at iba pang valid identification cards ang Philippine Statistics Authority (PSA), Philippine National Police (PNP) – Pagadian City, National Bureau of Investigation (NBI), Department of Foreign Affairs (DFA), Land Transportation Office (LTO), PhilHealth, Social Security System (SSS), Pag-IBIG Fund, at ang City Social Welfare Development Office (CSWDO).

Narito pa ang ilang serbisyong inalok sa caravan: pagbibigay ng mga halamang ornamental, mga punla, at aplikasyon para sa titulo ng lupa mula sa Department of Environment and Natural Resources (DENR); Sustainable Livelihood Program at iba pang kaugnay na inisyatiba mula sa Department of Social Welfare and Development (DSWD); libreng Wi-Fi connectivity at tulong sa e-GovPH mula sa Department of Information and Communications Technology (DICT); libreng legal na konsultasyon at on-the-spot na notarial service mula sa Public Attorney’s Office (PAO); at, financial literacy orientation at iba pang serbisyo mula sa Land Bank of the Philippines (LBP) at GCash.

Simula ng inilunsad noong Setyembre 2023, ang NHA People’s Caravan ay nagkaroon ng malaking epekto sa pagbuo ng mga sustenableng komunidad sa iba’t ibang lungsod at munisipalidad sa buong bansa, na mas nagpapalakas sa bisyon ng isang Bagong Pilipinas. (PAUL JOHN REYES)

UMABOT sa mahigit apat na oras na hinostage ng 47-anyos na security guard ang 13-anyos na kapitbahay at kasamahang guwardiya na kanyang ka-boardmate sa Caloocan City, Sabado ng umaga.

Unang hinostage ni alyas Ernie ang menor-de-edad na kapitbahay na si alyas MRT habang armado ng patalim dakong alas-7:50 ng umaga sa loob ng isang bahay sa Block 78 Lot 3 Purok 1 Kawal St., Brgy., 28 at hiniling na mabigyan siya ng P9,500 pasahe pabalik sa Iloilo at makausap ang kanyang pamangkin na si alyas “Makmak”.

Nang lapitan at tangkaing kausapin ng kanyang kapuwa sekyu at ka-boardmate na si alyas Ervin ang suspek, pati siya ay pinigilang makalabas at hinostage na rin ng suspek hanggang sa makapagresponde ang mga tauhan ni Northern Police District (NPD) Director P/BGen. Benliner Capili.

Sa pangunguna ni Caloocan police chief P/Col. Joey Goforth, matiyaga silang nakipag-negosasayon sa suspek hanggang tuluyang makumbinsing sumuko alas-12:00 ng tanghali matapos maibigay ang hinihinging salapi at isuko ang ginamit na patalim..

Ligtas namang nasagip ng pulisya si alyas Ervin at ang menor-de-edad na biktima na nagtamo ng kaunting sugat sa gitnang daliri at daliri sa paa.

Ayon sa kapatid na babae ng suspek, apat na araw na tuloy-tuloy na duty ang suspek na walang tulog at kulang sa pagkain kaya’t nakaranas ng depresyon.

Hindi rin umano pinasahod ng dating security agency ang suspek kaya’t hindi makauwi ng kanilang lalawigan sa Iloilo.

Ayon kay Col. Goforth, mahaharap ang suspek sa kasong paglabag sa Article 267 ng Revised Penal Code o Kidnapping and Serious Illegal Detention. (Richard Mesa)

REHAS na bakal ang kinasadlakan ng 20-anyos na lalaking sangkot sa ilegal na droga nang inguso sa pulisya na may bitbit na baril habang pagala-gala sa Caloocan City.

Sa ulat ng tanggapan ni Northern Police District (NPD) Acting Director P/BGen. Benliner Capili, nirespondehan ng mga tauhan ni Caloocan Police Chief P/Col. Joey Goforth ang natanggap na ulat hinggil sa isang lalaki na may bitbit na baril habang pagala-gala sa Brgy. 132 dakong alas-11:30 ng gabi.

Gayunman, nang mapansin ng suspek ang presensya ng kapulisan ay nagtangka itong tumakas na naging dahilan upang habulin siya ng mga pulis hanggang sa makorner!at maaresto.

Nakumpiska sa suspek na si alyas “Eliyas”, ang isang kalibre .38 revolver na kargado ng apat na bala at isang plastic sachet na naglalaman ng nasa 8.1 grams ng hinihinalang shabu na nagkakahalaga ng P55,080.

Nang hanapan siya ng mga tauhan ng Bagong Barrio Police Sub-Station (SS-5) ng kaukulang mga dokumento hinggil sa ligaledad ng nasabing baril ay walang naipakita ang suspek.

Sinampahan ng pulisya ang suspek ng kasong paglabag sa R.A 10591 (Comprehensive Firearms and Ammunition Regulation Act) at R.A 9165 (Comprehensive Dangerous Drug Act of 2002) sa Caloocan City Prosecutor’s Office. (Richard Mesa)

QUEZON CITY—Tinalakay ni Metropolitan Manila Development Authority (MMDA) General Manager Nicolas Torre III ang mga pangunahing suliraning kinakaharap ng rehiyon, kabilang ang paulit-ulit na pagbaha, pagtatambak ng basura, matinding pagsisikip ng trapiko, at ang kalagayan ng kapayapaan at kaayusan.

Sa isang panayam, ibinahagi ni Torre ang mga kongkretong hakbang at pananaw ng ahensya upang matugunan ang mga matagal nang hinaing ng publiko hinggil sa daloy ng trapiko at kaayusan sa mga kalsada. Binigyang-diin din niya ang pangangailangan ng mas masusing disiplina sa tamang pagtatapon ng basura upang maiwasan ang pagbaba ng kapasidad ng mga drainage system at pumping station sa Metro Manila.

Inaasahang makikipagtulungan ang bagong pamunuan ng MMDA sa mga lokal na pamahalaan (LGUs) upang mapabilis ang clearing operations at maipatupad ang mga pangmatagalang solusyon sa imprastraktura ng kalakhan. 

( Boy Morales Sr.)

ARESTADO ang tatlong individuals kabilang ang 28-anyos na bebot na sangkot umano sa ilegal na droga nang maaktuhan nagsusugal sa Valenzuela City.

Mahaharap sa kasong paglabag PD 1602 (Illegal Gambling Law) at R.A 9165 (Comprehensive Dangerous Drug Act of 2002) ang suspek na si alyas “Lyn”, ng Brgy. Dalandanan.

Sa ulat ni SDEU investigator P/MSg Carlito Nerit Jr kay Valenzuela Police Chief P/Col. Joseph Talento, nagsasagawa ng ‘Oplan Galugad’ operation ang mga tauhan ng Police Sub-Station 6 nang maaktuhan ang suspek, kasama ang 35-anyos na kelot at 38-anyos na bebot na nagsusugal umano ng ‘Lucky 9’ sa loob ng isang bahay sa Esteban St., Tiwala, Brgy., Dalandanan dakong alas-6:45 ng gabi.

Nilapitan sila nina PCpl Renz Marion Manalad at PSSg Andrei Flavin sabay nagpakilala bilang mga pulis bago inaresto ang mga ito.

Nasamsam sa kanila ang P300 bet money, playing cards at isang plastic sachet na naglalaman ng hinihinalang shabu na nakumpiska umano kay ‘Lyn”. 

(Richard Mesa)