IPINANUKALA ni Parañaque 2nd District Rep. Brian Yamsuan ang mandatoryong periodic inspection at maintenance ng mga infrastructure projects na ipinatutupad ng national government upang masigurong structurally safe at mataas ang kalidad ng mga ito.

Layon ng inihain nitong House Bill (HB) 9780 na atasan ang Department of Public Works and Highways (DPWH) na magsagawa ng regular inspections kada 5-10 taon matapos makumpleto ang isang infrastructure project. 

“Kailangang matiyak na nanatiling ligtas at de-kalidad ang bawat proyekto para naman hindi masayang ang pondo ng gobyerno. The true value of an infrastructure project is not in the construction itself, but in its longevity, safety and usability,” ani Yamsuan. “While these digital portals help monitor the implementation of national government infrastructure projects, periodic physical inspections remain necessary to check on the ground whether these projects still pass engineering safety standards after years of being subjected to severe weather conditions, overloading and other factors that affect their structural integrity.”

(VINA de GUZMAN)

REHAS na bakal ang kinasadlakan ng 50-anyos na mister na wanted sa kaso ng panghahalay sa menor-de-edad na biktima matapos makorner ng pulisya sa manhunt operation sa Valenzuela City.

Sa ulat ng tanggapan ni Northern Police District (NPD) Acting Director P/BGen. Benliner Capili, ang akusado ay residente ng Brgy., Santa Lucia, Quezon City at nakatala rin bilang No. 6 sa Top Ten Most Wanted Person sa NPD.

Nang makatanggap ng impormasyon ang mga tauhan ni Valenzuela Police Chief P/Col. Joseph Talento na naispatan ang presensya ng akusado sa Valenzuela, agad ikinasa ng mga ito ang operation hanggang masukol siya sa Brgy., Lawang Bato.

Matagumpay na naisilbi ng mga operatiba ng Warrant and Subpoena Section ng Valenzuela Police sa akusado ang arrest warrant na inisyu ng Valenzuela Family Court, Branch 16 para sa Qualified Sexual Assault (2 counts) at Statutory Acts of Lasciviousness in relation to RA 7610 

(3 counts).

May kabuuang P940,000 halaga ang inirekomendang piyansa ng hukuman para sa pansamantalang paglaya ng akusado. (Richard Mesa)

SUGATAN at ginagamot ngayon habang naka-hospital arrest ang isang lalaki makaraang sumabog ang isang bagay na kanyang napulot sa isang basurahan at tinanggalan ng pin sa harapan ng palengke sa Sta Ana Manila Lunes ng gabi.

Ginagamot ngayon sa Sta. Ana Hospital ang suspek na si Dominic Garcia, 34, at nahaharap sa kasong paglabag sa RA 9516 o ang “Act Further Amending

Presidential Decree No. 1866, as Amended, o kilala sa Codifying the Laws on Illegal/Unlawful Possession, Manufacture, Dealing In, Acquisition or Disposition of Firearms, Ammunition or Explosives.”

Sa ulat, dakong alas-6:00 ng gabi nang naganap ang insidente sa harapan ng Ana Market, Barangay 879, Sta. Ana, Manila, kung saan una dito ay may napulot umanong isang bagay na nakabalot ng puti ang suspek sa isang basurahan malapit sa kanilang bahay at inuwi nito.

Habang nakaupo sa kanyang motorsiklo, tinanggal niya ang balot, kinalikot at tinanggal ang pin hanggang sa umit umano ang nasabing bagay at sumabog sa kanyang kamay.

Patuloy ang isinasagawa imbestigasyon sa nasabing insidente. (Gene Adsuara)

BINITBIT sa selda ang tatlong individuals nang maaktuhang naglalaro ng ilegal na sugal at makuhanan pa ng droga ang isa sa kanila sa Valenzuela City.

Mahaharap sa kasong paglabag sa PD 1602 (Illegal Gambling Law) at Section 11 ng R.A 9165 (Comprehensive Dangerous Drug Act of 2002) ang suspek na si alyas “Sam”, 40, construction worker.

Sa kanyang ulat kay Valenzuela Police Chief P/Col. Joseph Talento, sinabi ni Police Investigator PSSg Christopher Quiao na habang nagsasagawa ng Anti-Criminality Operation ‘Oplan Galugad’ ang mga tauhan ng Police Sub-Station 9 sa Industrial St., Brgy., Karuhatan nang maaktuhan nila ang tatlong individuals na nagsusugal umano ng ‘lucky 9’ dakong ala-1:05 ng madaling araw.

Nilapitan nila ang mga ito sabay nagpakilala bilang mga pulis bago inaresto at nakumpiska sa kanila ang bet money at gamit na baraha sa pagsusugal.

Bukod dito, nakuhanan din ng mga pulis ng isang plastic sachet na naglalaman ng hinihinalang shabu si alyas Sam.

 (Richard Mesa)

KALABOSO ang 30-anyos na wanted sa kaso ng paulit-ulit na pagmomolestiya sa menor-de-edad na biktima nang matunton sa kanyang tinutuluyan sa Malabon City.

Nadakma ng mga tauhan ni Northern Police District (NPD) District Director P/BGen. Benliner Capili ang akusado na si alyas “Topak” noong Biyernes ng gabi habang naka-tambay sa Hiwas Alley, Brgy. Longos.

Si alyas Topak ay nakatala bilang Top 3 Most Wanted Person ng National Capital Region Police Office (NCRPO) habang nasa Top 1 Most Wanted Person siya sa talaan ng NPD at Malabon City dahil sa karumal-dumal na kasong kanyang kinakaharap.

Hindi naman umano pumalag ang akusado nang isilbi ng mga operatiba ng Warrant and Subpoena Section at Woman and Children Protection Desk ang warrant of arrest na inilabas ng Malabon Family Court Branch 4 para sa 11-bilang ng Rape Through Sexual Assault at isang bilang ng Statutory Rape.

Ayon kay NPD Public Information Office (PIO) chief P/Lt. Reichel Raymundo, walang piyansang inirekomenda ang korte para sa kasong Statutory Rape habang may kabuuang piyansang ₱2,200,000.00 sa 11-bilang na kasong Rape Through Sexual Assault para sa pansamantalang paglaya. (Richard Mesa)