IPINAGTANGGOL ni Executive Secretary Ralph Recto ang naging pagbisita ni Pangulong Ferdinand Marcos Jr. sa Davao Region, isang araw matapos ang kanyang State of the Nation Address (SONA).

Sumasalamin aniya ito sa maayos na pamamahala na “fair and without favoritism.”

Nauna rito, binisita ni Pangulong Marcos ang Davao de Oro para pangunahan ang distribusyon ng halos P133 milyong halaga ng agricultural machinery, farm inputs, at fisheries assistance; ininspeksyon ang upgraded facilities ng Davao de Oro Provincial Hospital–Montevista; at pag-turn over sa P113 million na Socio-Civic Projects Fund (SCPF) assistance para sa 565 barangay sa iba’t ibang tatlong Davao provinces.

Bumiyahe rin ang Pangulo sa Davao City—hometown ng ally-turned-critic nito na si Vice President Sara Duterte—para inspeksyunin ang government housing project.

Binasura ni Recto ang ulat na ang kamakailan lamang na out-of-town engagements ni Pangulong Marcos ay naglalayon na palakasin ang kanyang ika-5 SONA, inilarawan ang mga ito bilang “another opposition fake news.”

“Walang pinipiling lugar, walang pinapaboran. Kung saan kailangan ang tulong, pinupuntahan niya,” ang sinabi ni Recto.

“The President’s engagements are driven by what the people want, and his popularity in the places he visits is never a factor in his scheduling,” aniya pa rin.

Idinagdag pa ni Recto na nakatuon si Pangulong Marcos sa pamamahala kaysa sa paghahanda para sa reelection.

“After all, he is not running for reelection. He is running a country,” ang tinuran ni Recto.

“He does not wake up at dawn and fly an hour in bad weather for content. He’s been crisscrossing the archipelago since Day One,” anito pa rin. ( DARIS JOSE)

MATAPOS ang panawagan ni Pangulong Ferdinand R. Marcos Jr. na tanggalin ang “systems loss” charges, sinegundahan naman ito ng isang mambabatas at kanyang inulit ang kanyang naunang panukala sa hangarin na mapababa ang singil sa kuryente.

“Noong 2016, hindi ito (House Bill No. 942) umusad. Ngayon, malinaw na kinikilala na mismo ng Pangulo na dapat nang itigil ang pagpapasa ng systems loss sa mga konsyumer.

Umaasa ako na sa kongresong ito ay magkakaroon na tayo ng sapat na political will upang maisabatas ang repormang ito,” pahayag ni Navotas Rep. Toby Tiangco.

Maluwag na tinanggap ni Tiangco ang panawagan ng Pangulo sa kanyang State of the Nation Address nitong Lunes. Aniya, ang Pangulo ang gumawa ng oportunidad na ilunsad muli ang nabinbin na reporma na direktang magpapababa ng kuryente.

“Natutuwa ako na ang panukalang ito ay malinaw nang bahagi ng legislative agenda ng Pangulo. Matagal na nating sinasabi na hindi makatarungan na ang ordinaryong konsyumer ang pinagbabayad sa mga pagkalugi at inefficiencies na wala naman silang kinalaman,” sinabi ni Yamsuan.

Sa kasalukuyang sistema, ang mga electric utilities company ay pinapayagan na ma-recover ang system losses sa mga consumers. Sa panukala ni Tiangco, pagbabawalan na lahat, kahit private distribution utilities o electric cooperatives singilin sa kanilang mga customer ang system losses.

“Kung seryoso tayo sa pagpapababa ng singil sa kuryente, dapat alisin ang mga bayaring hindi naman kasalanan ng mamamayan. Ito ay konkretong hakbang na mararamdaman agad ng bawat pamilyang Pilipino sa kanilang buwanang bayarin,” sinabi ni Tiangco. 

(VINA de GUZMAN)

INIHAIN nina House Majority Leader Ferdinand Alexander “Sandro” Marcos at Speaker Faustino “Bojie” Dy III nitong Martes ang House Bill (HB) No. 10345, sang-ayon sa panukalang tax relief ni Presidente Bongbong Marcos sa kanyang ika-limang State of the Nation Address (SONA).

“President Marcos SONA placed tax relief where families will feel it, in the pay they bring home after every cutoff, and Speaker Bojie Dy has made sure the House responds with a bill rather than applause alone. Raising the tax-free ceiling to P350,000 gives workers more room for food, tuition, medicine and the bills that do not wait,” ani Marcos.

Isinusulong ng panukala na amyendahan ang Section 24 ng National Internal Revenue Code.

Sa ilalim ng TRAIN law, ang mga indibidwal na may taunang taxable income na hindi lalagpas sa P250,000 ang exempted sa income tax simula 2018.

Itataas ng HB 10345 ang exemption ng P100,000, o taunang annual taxable income na hindi lalagpas sa P350,000.

Itinakda naman sa 15% ang rate para sa taxable income na mataas sa P350,000 ngunit hindi lalagpas sa P400,000. Para naman sa income na mahigit sa P400,000, nanatili ito sa kasalukuyang base taxes.

(VINA de GUZMAN)

NIRESBAKAN ni Presidential Communications Office (PCO) Undersecretary at Palace Press Officer Atty. Claire Castro ang naging pahayag sa video na inilabas ni Sen. Imee Marcos, araw ng Martes, Hulyo 28, kung saan nabanggit na mayroon umanong “ICC” sa loob ng Malakanyang.

Sa nasabing video, nabanggit ang kahulugan ng letrang I ng tinutukoy na ICC, na inilarawan bilang impakta—at bigla na lamang itong naputol sa katagang “Clai.”

Kaya naman ang hula at komento ng mga netizens sa nabanggit na video ng senadora, tila tumutukoy daw ito sa kasalukuyang press officer na si Usec. Claire Castro.

“Yong ganoong salita, hindi ko kasi siya sinasabi, hindi ko siya nababanggit kaya kay Maricel ko na pinabanggit. Hindi ako sanay sa mga ganoong salita. Hindi ako normal na nagsasalita ng ad hominem sa kapwa ko. So, kung sila ang nakapag-describe ng ganoong salita, alam nila kung ano ang ibig sabihin nito; alam nila ang deskripsyon ng salitang impakta,” ang winika ni Castro.

“It takes one to know one, kaya kung sila ay affected sa aking mga nababanggit dahil tayo’y kumakalaban sa fake news, at iyan ang kanilang pananaw, isang impakta ang kumalaban sa fake news. Sino ngayon ang naglalarawan ng totoong impakta? ‘Yong gumawa ng video? ‘Yong kasama sa video? ‘Yong nagdirek ng video? ‘Yon ang masasabi nating naglalarawan sa salitang ‘yan,” diing pahayag pa ni Castro.

Pinawi naman ni Castro ang pangamba ng iba na baka maagaw na niya ang korona sa pagiging impakta mula kay Imee Marcos.

“Huwag silang mag-alala, ang korona ay nasa kanila—na kay Senator Imee at sa mga grupo nila; at hindi natin kayang agawin ito mula sa kanila. Wala ako sa kalingkingan ni Senator Imee para sa ganyang klaseng deskripsyon. Sila ay nasa maximum level,” pagtatapos ni Castro. ( DARIS JOSE)

ISANG mambabatas ang nanawagan sa Kongreso na ipasa ang kanyang panukala kung papaano resolbahin ang kakulangan ng mga textbooks at future-proof learning materials sa mga pampublikong paaralan.

Sa inihaing House Bill (HB) 7868 ni Parañaque Rep. Brian Yamsuan, idinetalye ng mambabatas ang plano na palakasin ang National Book Development Board (NBDB) sa preparasyon at produksyon ng mga public school textbooks at koordinasyon sa Department of Education (DepEd) para balangkasin ang National Textbook and Learning Resources Plan.

“Formulating a National Textbook and Learning Resources Plan will not only see to it that enough textbooks are available for our public school learners, it will also ensure that these and other learning materials are relevant and effective in educating future-ready Filipino learners,” sinabi ni Yamsuan.

 Aniya, ang panukala ay alinsunod sa sinabi ni Pangulong Ferdinand R. Marcos Jr. sa kanyang State of the Nation Address (SONA) na palakasin ang sektor ng edukasyon.

 “Tulad nga nang sinabi ng Pangulong Bongbong Marcos sa kanyang SONA [State-of-the-Nation Address, ‘edukasyon pa rin ang pangunahing nagtataguyod ng kakayahan This is why with the opening of Congress’ Second Regular Session, we are hoping our measure could be taken up and swiftly acted upon as it will once and for all address the problem of the availability of textbooks in public schools, especially in areas outside Metro Manila and Luzon,” sabi ni Yamsuan. (VINA de GUZMAN)

NAGLABAS ang Philippine Coast Guard (PCG) ng isang abiso para sa kaligtasan sa dagat kaugnay ng nakatakdang paglulunsad ng Long March 6A rocket ng People’s Republic of China mula sa Taiyuan Satellite Launch Center sa Shanxi Province. Ang paglulunsad ay nakatakda sa pagitan ng 8:54 AM at 9:19 AM (oras ng Pilipinas) bukas, Hulyo 30, 2026.

Ayon sa Coast Guard District North Eastern Luzon (CGDNELZN), may posibilidad na ang ilang bahagi ng rocket ay bumagsak sa isang itinalagang drop zone sa loob ng Exclusive Economic Zone (EEZ) ng Pilipinas na humigit-kumulang 83 nautical miles mula sa Dalupiri Island, Cagayan; 88 nautical miles mula sa Babuyan Island; at 104 nautical miles mula sa Burgos, Ilocos Norte.

Hinihikayat ng PCG ang lahat ng operator ng mga sasakyang-pandagat at mga mangingisda na iwasan ang tinukoy na lugar sa panahon ng itinakdang oras ng paglulunsad at mag-ingat nang husto kapag naglalayag sa mga karatig na karagatan.” ayon sa CGDNELZN

Pinapayuhan din ang publiko na huwag lapitan o pulutin ang anumang pinaghihinalaang bahagi ng rocket na maaaring matagpuan. Kung may makitang kahina-hinalang bagay, agad itong iulat sa pinakamalapit na yunit ng Philippine Coast Guard.

Ang naturang abiso ay bahagi ng pagsisikap ng PCG na itaguyod ang kaligtasan sa karagatan sa ilalim ng programang iCARE (Intensified Community Assistance, Awareness, Response, and Enforcement) at ng ONE at Sea (Organized National Engagement at Sea) strategic concept, na naglalayong mapanatili ang ligtas at maayos na maritime domain ng bansa. (Gene Adsuara)

UMABOT sa 14,541.57 kilo ng expired meat at iba pang food products ang nakumpiska sa magkahiwalay na operasyon ng National Meat Inspection Service (NMIS), National Bureau of Investigation (NBI), at City Veterinary Services Office (CVSO) sa Valenzuela City.

Sa operasyon ng NMIS at NBI noong Hulyo 10, 2026, nakumpiska ang 7,600.21 kilo ng expired imported frozen meat products, kabilang ang beef, pork, at chicken, na ibinebenta online sa Barangay Arkong Bato. Nasa kustodiya na ng NMIS ang mga ito at isasailalim sa tamang disposal ng Bureau of Animal Industry.

Samantala, nasamsam din ang 6,941.36 kilo ng iba’t ibang food products noong Hulyo 11, 2026, sa isinagawang operasyon ng CVSO sa Barangay Gen. T. de Leon, kabilang ang pork, beef, chicken, french fries, assorted vegetables, duck breast, at iba’t ibang uri ng seafood.

Matapos ang masusing inspeksyon, itinuring ang mga ito na hindi ligtas para sa konsumo at isasailalim sa tamang proseso ng disposal.

Patuloy namang pinaaalalahanan ni Valenzuela City Mayor Wes Gatchalian ang publiko na bumili lamang ng karne at iba pang food products mula sa mga lehitimo at mapagkakatiwalaang tindahan.

Para sa mga katanungan, paglilinaw, o pag-uulat kaugnay ng mga kahina-hinalang produktong karne, maaaring makipag-ugnayan sa CVSO sa 8352-2000 loc. 2111. (Richard Mesa)