PINANGUNAHAN ni Pangulong Ferdinand R. Marcos Jr. ang pag-inspkesyon sa state-of-the-art National Academy of Sports (NAS) facilities sa New Clark City Sports Complex, Capas, Tarlac.

Tanda ito ng mahalagang yugto para sa Philippine sports development.

Kasama ng Pangulo si Education Secretary Sonny Angara sa pag-inspeksyon, kung saan binigyang diin ng mga pasilidad ang commitment ng administrasyon na suportahan ang mga kabataang Filipino student-athletes sa pamamagitan ng world-class training venues at cutting-edge academic infrastructure.

Nakasalamuha naman ng Pangulo ang mga kabataang atleta mula sa iba’t ibang isport sa kanyang pag-inspeksyo sa mga pasilidad.

“We are immensely proud to see how this institution has grown into a premier hub that bridges elite athletic training and quality academic education for our youth. Under the leadership of President Marcos, we will continue to enhance these spaces to produce champions who will proudly represent the Philippines on the global stage,” ang sinabi ni Angara.

“It is a big honor and privilege for our student learners to have a chance to meet His Excellency, President Ferdinand Marcos. Batid namin kung gaano kalaki ang pagpapahalaga at suporta na binibigay ni Pangulong Marcos para sa ating mga pambansang atleta at mga kabataang nasa larangan ng sports,” ang sinabi naman ni Associate Professor Francis Carlos Diaz, NAS Executive Director.

Sa kabilang dako, itinatag ang National Academy of Sports (NAS) sa ilalim ng Republic Act No. 11470 para i- institutionalize ang isang pangunahing pang-edukasyon at athletic pathway para sa mga ‘gifted young Filipino.’

“The visit highlights the administration’s aggressive push to modernize grassroots sports infrastructure and showcases how the academy’s holistic support system is already producing champion-caliber results,” ayon sa DepEd.

Makikita sa data na nagbigay ng subsidiya ang pasilidad sa isang learner population na 246 elite student-athletes para sa School Year 2026–2027, na may core disciplines na espesyalita sa pagsasanay sa pitong foundational sports gaya ng aquatics, athletics, badminton, gymnastics, judo, table tennis, at taekwondo.

Sa pag-iikot, ininspeksyon ng mga opisyal ang ganap na operational na Phase 1 buildings, kung saan matatagpuan ang Academic and Administration Building at isang highly equipped na Multi-Sports Gymnasium.

Nirepaso rin ng mga ito ang Phase 2 developments, kasalukuyang nasa 98%, nagtatampok sa modernong Gymnastics Hall, isang Sports Performance Building, at komprehensibong staff at student residences.

Para sa 2026–2027 School Year, nakahanda ang akademya na suportahan ang 246 student-athletes na maging dalubhasa sa foundational sports gaya ng aquatics, athletics, badminton, gymnastics, judo, table tennis, at taekwondo.

Ang NAS program offers ay nag-aalok ng holistic support system, nagbibigay sa mga mag-aaral ng 24/7 care, dormitory housing, full daily meals at snacks, strength at conditioning support, at monthly personal allowance na P3,000.

“To maintain this intensive environment, the NAS workforce includes 174 dedicated personnel, including full-time faculty, program heads, and specialized coaches. This investment has already yielded results, with NAS athletes securing 1,029 medals in national and international competitions in 2025, ayon sa ulat.

“Most recently, the academy hauled in 26 medals—including 10 gold, 5 silver, and 11 bronze—during the 2026 Palarong Pambansa, demonstrating the rapid growth and elite standard of its sports program,” ayon pa rin sa ulat.

Samantala, kapwa naman matatag ang Department of Education at NAS sa kanilang shared mission na pag-develop sa world-class student-athletes habang pinangangalagaan ang future leaders ng bansa. ( DARIS JOSE)

TULOY-TULOY pa rin ang pagrepaso sa panukalang pambansang budget para sa 2027 matapos itong himayin ng buong Gabinete noong nakaraang Biyernes, Hulyo 10, 

Ito ang tiniyak ni Executive Secretary Ralph Recto upang masiguro na ang budget ay ayon sa utos ni Pangulong Ferdinand Marcos Jr. na pawang mga programa lang na pakikinabangan ng mamamayan ang paglalaanan ng pondo.

Ipinaalala rin ni Recto sa mga ahensya ang tagubilin ng Pangulo na tanging mga proyekto lamang na siguradong mabilis at walang sagabal sa implementasyon ang bibigyan ng prayoridad.

“Kaya dapat pawang nakatugma sa programa ng pamahalaan, ayon sa pambansang plano, at mataas ang pampublikong benepisyo ang maisama sa panukalang gastusin,” aniya ni Recto.

Sa nasabing pulong noong Hulyo 9, iprinisenta ni DBM Secretary Kim de Leon ang tampok na nilalaman ng 2027 National Expenditure Program (NEP) na isinumite sa Pangulo noong Biyernes.

Umaasa si Pangulong Marcos na ang NEP na binalangkas ng DBM ay masusing binusisi at pinag-aralan.

Dumalo rin sa pulong ang mga Kalihim ng mga pangunahing ahensya ng pamahalaan, kabilang sila DepEd Secretary Juan Edgardo Angara, DSWD Secretary Rexlon Gatchalian, DA Secretary Francisco Tiu Laurel, DOLE Secretary Francis Tolentino, at DOE Secretary Sharon Garin. Naroon din ang mga pangunahing opisyal ng DPWH, DOTr, at DOH. (DARIS JOSE)

ISINUSULONG ni Nueva Vizcaya Lone District Representative Atty. Timothy Joseph “Tim” Cayton ang mga panukalang nagbibigay ng tunay na proteksyon at suporta sa mga pinaka-nangangailangan. Sa ilalim ng inihain niyang House Bill No. 9885 o ang Social Pension for Persons with Disability (PWD) Act, layunin niyang mabigyan ng buwanang social pension ang lahat ng kwalipikadong Persons with Disability (PWD) upang makatulong sa kanilang pang-araw-araw na pangangailangan.

Ayon kay Cayton, bagama’t may iba’t ibang benepisyo ang mga PWD sa ilalim ng umiiral na batas, marami pa rin ang nahihirapang tustusan ang dagdag na gastusin dulot ng kanilang kondisyon kabilang ang gamot, assistive devices, rehabilitasyon, transportasyon, at iba pang pangangailangan. Aniya, hindi sapat ang mga diskwento lamang, lalo na para sa mga PWD na may mababang kita o walang pinagkakakitaan.

Sa ilalim ng panukala, ang bawat rehistradong PWD na may valid PWD ID ay makatatanggap ng hindi bababa sa P1,000 buwanang social pension. Nakasaad din sa panukala ang mahigpit na sistema ng beripikasyon upang maiwasan ang duplication at fraud, regular na pagrepaso sa halaga ng pension batay sa inflation, at malinaw na grievance mechanism upang maprotektahan ang mga benepisyaryo.

“Ang kapansanan ay hindi dapat maging dahilan upang mas lalong malugmok sa kahirapan. Tungkulin nating tiyakin na ang ating mga kababayan na may kapansanan ay may sapat na suporta upang mamuhay nang may dignidad at ganap na makilahok sa lipunan,” ani Cayton.

Sa pamamagitan ng panukalang ito, muling ipinapakita ni Cong. Tim Cayton ang kanyang paninindigan na ang bawat sektor ng lipunan, lalo na ang mga PWDs, ay nararapat bigyan ng higit na pagkilala, proteksyon, at konkretong tulong mula sa pamahalaan.

(VINA de GUZMAN)

PINAIIMBESTIGAHAN ni Gabriela Women’s Party Rep. Sarah Elago sa House Committee on Energy ang naiulat na umano’y overbilling, maling meter readings, at mataas na electricity rates na ipinapataw ng Manila Electric Company (Meralco).

Pinuna rin ng mambabatas ang Energy Regulatory Commission (ERC) sa kabiguan umano nitong protektahan ang mga consumers mula sa lumalaking bilang ng reklamo sa billing.

Ilan sa tinukoy ni Elago sa House Resolution 1189 na reklamo mula sa consumers ay ang pagdoble sa buwanang singil sa kuryente o minsan ay triple sa iba ng walang kaukulang pagtaas sa kanilang konsumo sa kuryente.

Kinuwestiyon din nito ang ginawang payo ng ERC sa consumers na i-monitor ang kanilang mga meter readings at bayaran ang singil “under protest” upang maiwasan ang disconnection. Lumilitaw na inililipat ng ahensiya ang pasanin sa tamang billing sa ordinaryong consumers.

“Tingin yata ng ERC, Spiderman ang mga konsyumer at kayang akyatin ang poste para mabasa ang metro. At paano mo sasabihing magbayad muna kahit under protest kung ang mismong dahilan ng reklamo ay wala nang kakayahang bayaran ang sobra-sobrang singil? Imbes na papanagutin ang Meralco, ipinapasa ng ERC sa mga konsyumer ang responsibilidad sa pagkakamali ng power distributor,” dagdag nito.

Sinabi ng mambabatas na layon ng imbestigasyon na madetermina kung sapat ang mga kasalukuyang mga batas at regulatory mechanisms para protektahan ang consumers at mapanagot ang mga power industry stakeholders sa pagtaas ng kanilang singgil.

“Ano pa ang silbi ng ERC kung hindi nito kayang protektahan ang mga konsumer laban sa malinaw na mga reklamo ng overbilling? Dapat alamin ng Kongreso kung bakit tila hindi napapanagot ang Meralco at kung paano mapapalakas ang mga batas upang tunay na maipagtanggol ang karapatan ng mamamayan,” ani Elago.

Muling nanawagan ang Gabriela na tuldukan ang privatization-driven model sa power sector at ibalik ang serbisyo sa suplay ng kuryente sa publiko.

“Batayang serbisyo ang kuryente at hindi dapat ginagawang negosyo. Hangga’t interes ng malalaking korporasyon ang inuuna sa halip na kapakanan ng mamamayan, magpapatuloy ang mataas na singil at kawalan ng pananagutan. Panahon nang unahin ang serbisyo publiko kaysa tubo,” pagtatapos ni Elago. (Vina de Guzman)

MANILA — Nanawagan ang consumer advocacy group na ILAW Pilipinas sa National Electrification Administration (NEA) na baguhin ang sistema nito sa pag-evaluate ng performance ng mga electric cooperative (EC), dahil umano’y hindi ito sumasalamin sa tunay na karanasan ng mga consumer.

Ayon sa ILAW, masyadong nakatuon ang kasalukuyang rating system sa mga financial at operational indicators, ngunit hindi nito nasusukat ang kalidad ng serbisyo, bilis ng pagresolba sa reklamo, pagiging maaasahan ng suplay ng kuryente, at kasiyahan ng mga consumer.

Sa pinakahuling ulat ng NEA, 81 sa 121 ECs ang nakatanggap ng Green rating, habang 26 ang Yellow, anim ang Orange, at walo ang itinuring na Red o “ailing.” Iginiit ng ILAW na dapat ding isama sa pagsusuri ang karanasan ng mga miyembro-consumer at ang presyo ng kuryente upang maging mas makabuluhan ang performance ratings.

Hinikayat din ng grupo ang mga consumer na maging mas aktibo sa pag-unawa sa sektor ng enerhiya, paggamit ng mga complaint mechanism, at pananagot sa mga electric cooperative at regulator upang mapabuti ang serbisyo sa publiko. 

(Gene Adsuara)

HUMANDUSAY ang duguang katawan ng 46-anyos na motorcycle taxi rider matapos saksakin ng kanyang pasahero bago tinangay ang kanyang motorsiklo sa Caloocan City, Martes ng madaling araw.

Dead-on-arrival sa Caloocan City Medical Center ang MC rider na si alyas “Norberto” sanhi ng tinamong tama ng saksak sa tagiliran habang nadakip naman ang suspek na si alyas “Jeffrey”, 43, matapos muling mangholdap ng grab driver sa Malabon City.

Sa nakarating na ulat kay Northern Police District (NPD) Director P/BGen. Benliner Capili, angkas ng biktima ang suspek sa kanyang motorsiklo at pagsapit ng mga ito sa Block 10, Talangka St. Brgy. 20, Caloocan City dakong alas-2:55 ng madaling ay biglang tinarakan sa tagiliran ng salarin ang rider.

Matapos ang pananaksak, mabilis na tumakas ang suspek tangay ang motorsiklo ng biktima na nagawa pang makatakbo patungong Tanigue Street kung saan siya natagpuan ng mga Tanod ng Brgy. 18, na nagsugod sa kanya sa nasabing pagamutan.

Samantala, pagsapit ng suspek sa Dulong Borromeo Proper, Brgy. Longos, Malabon City bandang alas-4:30 ng madaling araw, hinoldap naman niya ang grab driver na si alyas “Jhamel”, 21, at sapilitang kinuha ang kanyang cellphone subalit nanlaban ang biktima.

Nagsisigaw na humingi ng tulong si ‘Jhamel’ sa mga bystander sa lugar na silang humabol sa suspek hanggang sa masukol sa tinakbuhang dead-end na eskinita kung saan siya kinuyog at pinagbubugbog bago i-turn over sa mga nagrespondeng tauhan ng Malabon Police Sub-Station 5.

Nabawi sa suspek ang tinangay na cellphone kay ‘Jhamel’, pati na ang ice pick na gamit sa pananaksak at ang NMax motorcycle na tinangay niya sa nasawing biktima.

(Richard Mesa)