HANGARIN ni Pangulong Ferdinand R. Marcos Jr. ang paglalatag ng digital infrastructure sa buong bansa para makapaghatid ng mga serbisyong kapaki-pakinabang at mas maginhawang buhay para sa bawat Pilipino.

Ito ang mensahe ni Speaker Faustino “Bojie” G. Dy III nang pinasinayaan niya ang paglulunsad ng GovNet Ilagan sa Ilagan, Isabela nitong Martes.

Binigyan diin ni Dy ang kahalagahan ng digital transformation na tulad ng GovNet initiatives ng Department of Information and Communications Technology (DICT) na mas mabilis na paraan para maserbisyuhan ang publiko.

“Ang paglulunsad ng GovNet Ilagan ay hindi lamang po tungkol sa pagkakaroon ng internet o fiber optic cables. Ito po ay daan tungo sa mas mahusay na pamamahala—dahil kapag konektado ang ating mga ahensya, mas mabilis ang koordinasyon, mas epektibo ang serbisyo, at mas gumagaan ang buhay ng ating mga kababayan. Ito po ang tunay na layunin ng digital transformation,” sinabi ni Dy.

Ayon kay Dy, ang mga inisyatibo tulad ng GovNet ay pundasyon para sa isang tunay na Digital Pilipinas. 

“We are laying the groundwork for a digitally empowered nation,” sabi ni Dy.

Idinagdag ni Dy ang papel ng ginagampanan ng House of Representatives na suportahan ang digital transformation ng bansa sa pamamagitan ng pagbabalangkas ng mga batas tulad ng eBayad Bill, isa sa priority measures ng Legislative-Executive Development Advisory Council (LEDAC). 

“Our goal is to help build the foundations of a truly modern government—one where Bagong Pilipinas evolves into a Digital Pilipinas, where government services are faster, more transparent, and more accessible to every Filipino,” sabi ni Dy. 

“Sapagkat ang digital transformation ay hindi lamang nagdadala ng innovation. Ito rin po ay mahalagang instrumento para sa accountability, responsibility, at public trust,” dagdag ng kongresista. 

(Vina de Guzman)

SA temang “Nutrisyon sa Kalikasan, Ating Pangalagaan!”, sinimulan ng Pamahalaang Lungsod ng Valenzuela sa ilalim ng pamumuno ni Mayor Wes Gatchalian ang mga aktibidad para sa ika-52nd Nutrition Month Celebration bilang suporta sa kampanya nito sa National Nutrition Council.

Ang paglulunsad ng iba’t ibang aktibidad ay ginanap sa Valenzuela City People’s Park Amphitheater sa pangunguna ng City Health Office (CHO) at Nutrition Unit upang itaguyod ang mabuting nutrisyon sa komunidad habang tinitiyak ang environmental sustainability sa food production.

Sinimulan ang pagdiriwang sa pamamagitan ng parada na pinamagatang “Nutri-Walk: Alaga sa Kalikasan, Kalusugan ng Mamamayan”, kasama ang Valenzuela City Jail Male Dormitory, Bureau of Fire Protection, tatlong carehouse: Bahay Pag-asa, Bahay Kalinga, Bahay Kanlungan, at mga batang Valenzuelano at kanilang mga magulang.

Binibigyang-diin ng pagdiriwang ng Nutrition Month ngayong taon ang kahalagahan ng koneksyon sa pagitan ng nutrisyon at pangangalaga sa kapaligiran na nakatuon sa pagkilos sa klima.

Ang kampanyang ito ay nagtutulak sa pakikipagtulungan ng mga ahensya ng gobyerno, LGU, NGA, at mga organisasyon upang isulong ang environmentally sustainable food production, reduce food waste, at strengthen climate-resilient food systems in the community. 

Ang pamahalaang lungsod ay may ilang mga aktibidad sa pipeline ngayong buwan, kabilang ang mga nagtataguyod para sa natural food production, tulad ng paghahalaman ng gulay —Nutri Fest, Kusinerong Valenzuelano Cook-Off: Mula sa Taniman hanggang Hapag-Kainan, Usapang Nutrisyon sa Barangay, Gulayan sa Tahanan, Nutri-Corner: Nutri-Kalikasan Nook, at Pabasa sa Nutrition: Junior Barangay Nutrition Scholar.

Bilang isa sa mga haligi ng mabuting pamamahala, patuloy na pinalalakas ng Pamahalaang Lungsod ang mga programa at inisyatiba na nagpoprotekta hindi lamang sa kalusugan at nutrisyon ng mga Valenzuelano, kundi pati na rin sa kapaligiran na nagpapanatili sa kanila. (Richard Mesa)

PINABULAANAN ni Cabinet Secretary Benhur Abalos Jr., ang tsismis na nagbitiw sa kanyang puwesto si Health Secretary Ted Herbosa dahil sa mga reklamong may kaugnayan sa umano’y iregularidad sa P1.8 bilyong mobile clinic procurement program, mga isyu sa mga expired medicine, at paggamit umano ng Medical Assistance for Indigent and Financially Incapacitated Patients (MAIFIP) program para sa layuning pampulitika.

Sinabi ni Abalos na may kinalaman sa operasyon sa kanyang (Herbosa) tuhod na nauwi nga sa pagsusumite nito ng kanyang letter of resignation .

“May nabasa kasi ako kanina. wala iyon… wala iyon. He’s just a good friend. Nagkaroon siya ng operation sa kanyang tuhod. Iyon nga, nandoon iyon sa kanyang letter of resignation na kanyang isinumite. There’s no truth to the rumor na sinasabing .. ganoon siya…,” ani Abalos.

Binisita aniya niya si Herbosa sa ospital. Kinamusta niya ang dating Kalihim sabay sabing “He is a good friend.”

Nauna rito, kinumpirma ng Malakanyang na nagbitiw na sa pwesto si Herbosa.

Idinahilan ni Herbosa kay Pangulong Ferdinand Marcos Jr. ang kanyang kondisyon sa kalusugan.

“Itinalaga ni Pangulong Ferdinand R. Marcos Jr. ngayong araw bilang Kalihim ng Department of Health si Dr. Jose S. Pujalte Jr. baon ang malawak na karanasan at natatanging pamumuno bilang doktor, hospital administrator, guro at lingkod-bayan na may mahigit na tatlong dekada sa pagsusulong ng pampublikong pangkalusugan, ayon kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.

Tinanggap aniya ng Pangulo ang resignation letter ni Herbosa.

Sa kabilang dako, naging bahagi ng DOH si Dr. Pujalte Jr. taong 1991 at natapos ang kanyang orthopedic residency sa Philippine Orthopedic Center noong 1994. 

Nagtapos si Dr. Pujalte Jr. sa kursong medisina sa University of the Philippines College of Medicine at kalaunan ay nagtamo ng Master’s Degree sa Hospital Administration mula sa Ateneo Graduate School of Business. 

“Sa kanyang pagpasok sa DOH, inaasahang pangungunahan ni Dr. Pujalte Jr. ang ahensiya sa pagpapatuloy ng mga hakbang ni Pangulong Marcos Jr. upang higit na mapatatag ang healthcare system sa bansa, maisulong ang dekalidad na serbisyong pangkalusugan at maisulong ang mabuting kalusugan para sa lahat,” ang sinabi ni Castro.

Samantala, sinabi naman ni Castro na hindi nabanggit ang patungkol sa mga kaso ni Herbosa at ang isinaalang-alang ng Pangulo ay ang kalusugan ng dating Kalihim. 

(DARIS JOSE)

SINABI ng Malakanyang na titiyakin ng gobyerno na agad na makaaabot ang tulong sa mga komunidad na apektado ng malawakang pagbaha sa Bangsamoro Autonomous Region in Muslim Mindanao (BARMM).

Sinabi ng Office of the Special Assistant to the President na inatasan ni Pangulong Ferdinand Marcos Jr., ang lahat ng ahensiya ngpamahalaan na manatiling makipag-ugnayan sa BARMM government sa gitna ng disaster response at relief operations.

“The Marcos Jr. administration continues to maintain close coordination with the BARMM Government as disaster response, rescue, and relief operations remain ongoing across the region,” ayon sa tanggapan ni Special Assistant to the President Secretary Antonio Lagdameo Jr. 

Ayon kay Lagdameo, mahigit isang libong emergency responders ang dineploy para tumulong sa mga apektadong komunidad.

Kabilang sa mga dineploy ang mga team mula sa Armed Forces of the Philippines (AFP), Philippine National Police (PNP), Philippine Coast Guard (PCG), Bureau of Fire Protection (BFP), at regional responders.

“In a unified effort to protect displaced families and ensure public safety, more than a thousand emergency responders, including personnel from the Armed Forces of the Philippines, Philippine National Police, Philippine Coast Guard, Bureau of Fire Protection, and regional responders, have been fully deployed and sustained to assist affected communities, secure vital resources, and mitigate the impact of the calamity,” ang winika ni Lagdameo.

Samantala mahigit naman sa 100,000 pamilya ang naapektuhan ng pagbaha dahil sa malakas na pag-ulan na dala ni Bagyong Inday, at southwest monsoon (habagat) sa iba’t ibang lugar sa BARMM, ayon sa Bangsamoro Rapid Emergency Action on Disaster Incidence (READi). (DARIS JOSE)