INANUNSYO ng Malakanyang na ang Philippine Charity Sweepstakes Office (PCSO) Chorale ang kakanta ng Lupang hinirang sa pang-5 State of the Nation Address (SONA) ni Pangulong Ferdinand Marcos Jr., sa Hulyo 27, 2026.

Ang chorale group ng PCSO ang tinanghal na Grand Prix champion sa Korea International Choir Competition 2026, kung saan tinalo nila ang 47 iba pang grupo.

Sinabi ni Presidential Communications Office (PCO) Undersecretary at Palace Press Officer Claire Castro na walang celebrity na magpapaningning sa nasabing event dahil nais ng Pangulo na simple at marangal ang kanyang SONA.

Ang In-House o RTVM aniya ang magdi-direct ng SONA ng Pangulo.

“Ang magho-host po kasi ng SONA ay ang House of Representatives. Pero naka-align po ang ehekutibo, ang Office of the President dahil ang panawagan po dito ay simple lamang po, simpleng okasyon,” ang nauna ng sinabi ni Castro,

“Iyan po talaga ang plano at iyan din po ang gusto ng Pangulo,” ang sinabi pa rin ni Castro.

Nangako naman si Castro na kaagad na ibabahagi sa Malacanang Press Corps (MPC) ang iba pang detalye sa SONA ng Pangulo. 

 ( DARIS JOSE)

MATAPOS katigan ng Senate impeachment court ang kanilang hiling na kunin at buksan ang mga bank at financial records ni Bise Presidente Sara Duterte, nagpahayag ng kumpiyansa ang House prosecution panel na tuluyan nang uusad ang impeachment process.

Ito rin ang pahayag ni House prosecutor Akbayan Party-list Rep. Jose Manuel “Chel” Diokno matapos siyang tanungin sa posibilidad na iaakyat nila ang isyu ng subpoena ng mga bank at financial records sa Supreme Court.

“Una-una, syempre, that is within the options available to the defense. But at the same time, we hope that there will be no obstacles to the continuation of the trial,” sinabi ni Diokno sa press briefing nitong Martes. 

Sinabi ni Diokno na umuusad na ang impeachment trial gaya ng inaasahan, natapos ang pre-trial at naumpisahan na ng prosecution na iprisinta ang kanilang mga testigo. 

“Nagsimula na po ‘yung paglilitis natin, tapos na tayo sa pre-trial, nakapagpresenta na ang prosecution ng dalawang testigo, at dapat tuloy-tuloy na itong prosesong ito,” sabi ng Diokno.

At sa posibilidad na hamunin ng defense panel ang subpoena sa Korte Suprema, sinabi ni Diokno na magiging oportunidad din ito na klaruhin ang saklaw ng kapangyarihan ng judiciary at ng Senate impeachment court. 

“Makikita din natin kung sakasakaling aakyat ’yan, kung ano ang gagawin ng ating Supreme Court, especially when it comes to the issue of, ano ba talaga ‘yung ibig sabihin ng sole power to try and decide an impeachment case,” tugon ni Diokno. 

Aniya, marami nang kasong may kaugnayan sa impeachment ang nadesisyunan na ng Supreme Court tulad ng Francisco vs. House of Representatives, Gutierrez vs. House of Representatives at Duterte vs. House of Representatives.

 “But I do hope that it will become very clear for the future, na maging klarong-klaro at malinaw sa lahat, ‘yung kapangyarihan ng Senate impeachment court on the one hand, at ‘yung kapangyarihan ng Supreme Court on the other,” pahayag ni Diokno. 

(Vina de Guzman)

NAGPAHAYAG ng taos pusong pasasalamat si Mayor Dale Gonzalo “Along” Malapitan sa Commission on Audit (COA) kasunod ng ibinigay nitong pagkilala sa Pamahalaang Lungsod ng Caloocan.

Kamakailan, nasungkit ng Pamahalaang Lungsod ng Caloocan ang na Unmodified Opinion mula sa COA para sa kanilang 2025 financial statements na nagpapatunay sa patas na pagtatanghal ng posisyon sa pananalapi ng lungsod at pagsunod sa accounting at ethical standards.

Ang Unmodified Opinion ay ang pinakamataas na opinyon sa pag-audit na maaaring ilabas ng COA, na nagpapahiwatig na ang financial statements ay iniharap alinsunod sa naaangkop na mga pamantayan sa accounting ng pamahalaan.

Itinatampok ng pagkilala ang pangako ng pamahalaang lungsod sa transparency at accountability sa pamumuno ni Mayor Along Malapitan.

“Ang pagkilalang ito ay patunay ng ating patuloy na pagsusumikap na mapanatili ang maayos at responsableng paggamit ng pondo ng lungsod,” pahayag ni Mayor Along.

Binigyang-diin ng pamahalaang lungsod na ang pagkilala ay sumasalamin sa patuloy nitong pagsisikap na itaguyod ang transparency sa pamamahala, at tiyakin na ang mga pampublikong mapagkukunan ay epektibong ginagamit para sa mga programa at serbisyong nakikinabang sa mga residente.

Muling pinagtibay ni Mayor Along ang pangako ng kanyang administrasyon sa pagpapanatili ng maayos na mga kasanayan at paghahatid ng pamamahalang nakasentro sa mga tao.

“Patuloy nating pagtitibayin ang isang pamahalaang may integridad at malasakit sa bawat mamamayan,” sabi ng local chief executive. (Richard Mesa)