NANINIWALA si Senate President Win Gatcha­lian na ang mababang approval ratings ni Pa­ngulong Ferdinand Marcos Jr. ay dahil sa patuloy na pagtaas ng presyo ng mga pangunahing bilihin sa bansa.

Sinabi ni Gatchalian na malaki ang epekto ng pagtaas ng presyo ng mga bilihin, lalo na ng langis at kuryente, sa pananaw ng publiko sa Pangulo. Ito ay dahil direktang tumatama ito sa sikmura ng mga tao at mas mahalaga sa kanila ang may maipakain sa kanilang pamilya kaysa sa pulitika. Kaya ito aniya ang dapat pagtuunan ng pansin ng Pangulo.

Ayon din kay Gatcha­lian, na dating namuno sa Senate Committee on Finance, isa sa mga dahilan ng paghina ng ekonomiya nitong nakaraang taon ay ang pagbawas ng paggastos ng pamahalaan sa mga proyektong pang-imprastraktura bunsod ng mga kontrobersiya sa flood control projects.

Dagdag pa niya, isa sa mga paraan upang muling pasiglahin ang ekonomiya ay ang pabilisin ang pagpapatupad ng mga proyektong pang-imprastraktura. Gayunman, dapat itong samahan ng mahigpit na reporma upang hindi na maulit ang umano’y mga anomalya sa mga proyektong flood control. (DARIS JOSE)

SUSPENDIDO ang klase sa lahat ng antas sa mga pampubliko at pribadong paaralan sa Quezon City sa darating na Hulyo 27, 2026 upang hikayatin ang publiko na makinig sa State of the Nation Address (SONA) ni Pangulong Bongbong Marcos at maiwasan ang matinding trapiko sa lungsod.Mga Gabay sa Lungsod at Lokal

Kasabay nito, ipatutupad ang liquor ban mula alas-12:01 a.m. hanggang alas-6:00 p.m. upang matiyak ang seguridad at kapayapaan sa paligid ng Batasang Pambansa.

Inaasahan ang pagdaraos ng iba’t ibang kilos-protesta sa Quezon City, kabilang ang mga pro at anti-Marcos rally.

Tiniyak ng Philippine National Police (PNP) na magpapatupad sila ng maximum tolerance sa mga demonstrador.

 (Vina de Guzman)

IGINIGIIT ni Senator Joel Villanueva na dapat maglatag ang ikalimang State of the Nation Address (SONA) ni Pangulong Ferdinand Marcos Jr. ng pangmatagalang programa para sa trabaho, edukasyon at paglaban sa gutom, sa halip na mga pangakong walang konkretong direksyon.

Ayon kay Villanueva, inaasahan ng mga Pilipino na matugunan ng administrasyon ang mga pangunahing suliranin tulad ng kawalan ng trabaho, pagtaas ng presyo ng mga bilihin, kahirapan at mga hamon sa sektor ng edukasyon.

Binigyang-diin ng senador na ang pinakamahusay na programa laban sa kahirapan ay ang pagkakaroon ng disenteng trabaho, habang ang pinakamabisang paraan upang malabanan ang gutom ay ang paglikha ng sapat na oportunidad sa hanapbuhay para sa mga nais magtrabaho.

Iginiit din ng senador na patuloy niyang isusulong ang mga panukalang batas na magpapalakas sa edukasyon at paglikha ng trabaho, at susuportahan ang mga prayoridad na panukala ng Legislative-Executive Development Advisory Council (LEDAC). 

Para kay Villanueva, ang sukatan ng tagumpay ng SONA ay kung makapagbibigay ito ng mas maraming trabaho, makatutulong na maibsan ang gutom, at makapagbibigay ng mas magandang kinabukasan para sa bawat batang Pilipino.

( DARIS JOSE)

TINATAYANG ₱61 milyong halaga ng hinihinalang ipinuslit na sigarilyo ang nasabat sa Purok 5, Barangay Busaon, Tagum City, Davao del Norte sa isinagawang operasyon at nagresulta sa pagkakaaresto ng apat na suspek.

Ayon kay PCG Spokesperson Commodore Noemie Cayabyab, isinagawa ang operasyon matapos makatanggap ng intelligence report na isang Jungkong-type motorbanca ang nagdadala ng mga master case ng hinihinalang smuggled na sigarilyo sa kahabaan ng Libuganon River para ipamahagi sa iba’t ibang lugar sa Davao Region.

Bagama’t nakaalis na ang motorbanca bago dumating ang mga operatiba, nagsagawa ang mga awtoridad ng verification at surveillance na humantong sa pagkakadiskubre ng mga hinihinalang kontrabando at pagkakaaresto sa apat na suspek.

Nakumpiska ng mga operatiba ang 2,038 master case ng hinihinalang smuggled na sigarilyo na may tinatayang market value na ₱61,140,000.

Sa follow-up monitoring, naharang din ng mga awtoridad ang MV Alnel sa karagatang sakop ng Maco, Davao de Oro. Natuklasang walang laman ang barko at nabigong magpakita ng mga kinakailangang dokumento ang mga tripulante. Dahil dito, isinailalim sa kustodiya ng mga awtoridad ang sasakyang-pandagat para sa kaukulang legal na proseso.

Isinagawa ang operasyon sa pakikipag-ugnayan sa Criminal Investigation and Detection Group Regional Field Unit XI, Provincial Intelligence Unit–Davao del Norte , Regional Special Operations Group 11, at Tagum City Police Station. (Gene Adsuara)

NAGLIYAB ang isang Hyundai Stargazer na ginagamit bilang TNVS sa northbound lane ng MacArthur Bridge, malapit sa FEATI University College sa Maynila, Biyernes ng madaling araw.

Ayon sa driver na si Denver, 35-anyos, may sakay siyang isang pasahero at patungo na sana sa Rizal Avenue nang biglang umusok ang sasakyan at mawalan ng andar bandang alas-4:10 ng madaling araw.

Ilang sandali pa ay sumiklab ang apoy sa bahagi ng makina kaya agad silang lumabas ng sasakyan.

Kapwa ligtas ang driver at ang kanyang pasahero at walang naitalang nasugatan sa insidente.

Mabilis namang rumesponde ang Bureau of Fire Protection, katuwang ang Quiapo Fire Volunteer Brigade, at tuluyang naapula ang sunog bandang alas-5:03 ng madaling araw.

Halos matupok ang harapang bahagi ng SUV dahil sa lakas ng apoy. Patuloy pang inaalam ng mga kinauukulan ang sanhi ng insidente.

(Gene Adsuara)

UMABOT sa 649 Valenzuelanos na naghahanap ng trabaho ang kaagad natanggap sa trabaho sa isinagawang mega job fair ng Pamahalaang Lungsod ng Valenzuela sa ilalim ng pamumuno ni Mayor Wes Gatchalian, bilang bahagi ng pagdiriwang ng ika-157 kaarawan ni Dr. Pio Valenzuela.

Ang Local at Overseas Mega Job Fair ay inorganisa ng Public Employment Service Office (PESO), katuwang ang DOLE-NCR CAMANAVA at ang tanggapan ni Senate President WIN Gatchalian, na may One-Stop-Shop Pre-Employment Services na isinagawa sa ALERT Multi-Purpose Center Hall, Barangay Malinta.

Sa 1,909 Valenzuelanong aplikante, 649 (384 babae; 265 lalaki) ang hired on the spot (HOTS) mula sa 53 local at overseas na mga sumaling kumpanya. 

Sa pamamagitan ng programang ito, muling pinagtibay ng Pamahalaang Lungsod ng Valenzuela ang patuloy nitong layunin na makapagbigay ng mas maraming oportunidad sa trabaho at mapalapit ang mga kaakibat nitong serbisyo para sa mga Valenzuelano. (Richard Mesa)