Eala, Venus todo kayod na sa ensayo

DESIDO sina Alex Eala at tennis legend Venus Williams na makapagbigay ng magandang laban sa doubles event ng WTA 500 Mubadala D.C. Open na magsisimula sa Lunes sa Washington D.C.

Pulpukan na sa ensayo sina Eala at Williams upang magkaroon ng magandang chemistry bago magsimula ang bakbakan.

Sa post ng mga organi­zers sa kanilang official social media accounts, nakitang nagsasanay sina Eala at Wiliams kung saan may ka -tuneup ang dalawa.

Kita na nage-enjoy ang dalawa habang nasa trai­ning ang mga ito.

Gumagawa na rin ang dalawa ng estratehiya para sa kanilang laban.

Ito ang ikalawang pagtatambal nina Eala at Williams sa WTA Tour.

Una na sa Bad Homburg Open sa Germany kung saan umabot sa quarterfinals ang dalawa.

Sa kanilang unang pag­sasama, sinabi ni Williams na hindi sila nakapag ensayo bago ang torneo.

Kaya naman sa pagkakataong ito, siniguro nina Eala at Williams na makakapag-ensayo sila para masigurong solido ang kanilang galaw sa loob ng court.

Hanga si Williams sa husay at determinasyon ni Eala sa loob at labas ng court. Para naman sa Pinay netter, malaking karangalan ang makapares ang isang tennis icon na tulad ni Williams.

Magkakaalaman na ngayong araw kung sino ang unang makakalaban ni Eala sa singles at sa doubles base sa idaraos na draw ceremony.