Presyo ng bilihin nakaapekto sa approval ni Pangulong Marcos – Win

NANINIWALA si Senate President Win Gatcha­lian na ang mababang approval ratings ni Pa­ngulong Ferdinand Marcos Jr. ay dahil sa patuloy na pagtaas ng presyo ng mga pangunahing bilihin sa bansa.

Sinabi ni Gatchalian na malaki ang epekto ng pagtaas ng presyo ng mga bilihin, lalo na ng langis at kuryente, sa pananaw ng publiko sa Pangulo. Ito ay dahil direktang tumatama ito sa sikmura ng mga tao at mas mahalaga sa kanila ang may maipakain sa kanilang pamilya kaysa sa pulitika. Kaya ito aniya ang dapat pagtuunan ng pansin ng Pangulo.

Ayon din kay Gatcha­lian, na dating namuno sa Senate Committee on Finance, isa sa mga dahilan ng paghina ng ekonomiya nitong nakaraang taon ay ang pagbawas ng paggastos ng pamahalaan sa mga proyektong pang-imprastraktura bunsod ng mga kontrobersiya sa flood control projects.

Dagdag pa niya, isa sa mga paraan upang muling pasiglahin ang ekonomiya ay ang pabilisin ang pagpapatupad ng mga proyektong pang-imprastraktura. Gayunman, dapat itong samahan ng mahigpit na reporma upang hindi na maulit ang umano’y mga anomalya sa mga proyektong flood control. (DARIS JOSE)