HUMANDUSAY ang duguang katawan ng isang driver ng transport network vehicle service (TNVS) matapos pagbabarilin ng kanyang pasahero na nagpahatid sa kanya sa Caloocan City.

Dead-on-the-sopt sanhi ng tinamong mga tama ng bala sa iba’t ibang bahagi ng katawan ang 37-anyos na biktimang residente ng Merry Land Homes Subdivision, Brgy. 172, Caloocan City.

Nakapiit naman at nahaharap sa kasong Murder ang 43-anyos na suspek matapos maaresto sa follow-up operation ng mga tauhan ni Caloocan City Police Chief P/Col. Joey Goforth sa kanyang tirahan sa Brgy. Muzon, San Jose Del Monte City sa Bulacan.

Sa ulat ng tanggapan ni Northern Police District (NPD) Director P/BGen. Benliner Capili, naganap ang insidente ng pamamaril sa biktima sa Phase 4B Pkg 8, B81, L11, Brgy. 176, Bagong Silang.

Lumabas sa imbestigasyon ng pulisya na bago nangyari ang pamamaril, noong Linggo ng alas-3:15 ng madaling araw, dinala ng mga tauhan ng Barangay 188 ang suspek sa Tala Police Sub-Station 14 dahil nawawala umano ang lalaki at hindi alam kung papaano makakauwi.

Para matulungan, nagpa-book ng Grab ride ang pulisya na tinugunan ng biktima subalit, pagsapit sa nasabing lugar ay pinagbabaril ng suspek ang biktima sa hindi nabatid na dahilan.

Wala namang ibinigay na pahayag ang suspek sa pulisya kung ano ang motibo niya sa ginawang pamamaslang sa biktima. 

(Richard Mesa)

SA GITNA ng mga bintang at kuwentong ang bawat maleta ay puno ng suhol, ipinakita ni Rep. Terry Ridon ang ibang katotohanan. Ang hinog na mangga sa loob ng kanyang bagahe ito ay sagot sa mga paninira, umano patunay na hindi lahat ay nabibili, at paalala na ang tunay na yaman ay nasa katotohanan at paglilingkod na walang halong dumi. Hindi lahat ng nakatago ay masama, ngunit ito ang pinakamalakas na sagot sa lahat ng haka-haka. Na sa panahong maraming naghahanap ng dumi at katiwalian, may mga taong nananatiling daladala ang katapatan at ang tunay na lasa ng pagiging tapat sa bayan. (By SER MORALES Sr.)

BALIK-SELDA ang isang bebot matapos makuhanan ng droga nang maaresto ng pulisya habang naglalaro umano ng illegal na sugal kasama ng isang lalaki sa Valenzuela City.

Nahaharap sa kasong paglabag sa PD 1602 (Anti-illegal Gambling Law) at R.A 9165 (Comprehensive Dangerous Drug Act of 2002 ang suspek na si alyas “Maricris”, 31, factory worker at residente ng Brgy. Bignay.

Sa ulat ni Valenzuela Police Chief P/Col. Joseph Talento kay Northern Police District (NPD) Acting District P/BGen. Benliner Capili, dakong alas-11:20 ng gabi, nagsasagawa ng anti-criminality operation ‘Oplan Galugad’ ang mga tauhan ng Police Sub-Station 7 sa Casarival 4,6, Northville 1, Brgy., Bignay nang maaktuhan nila ang suspek kasama ang isang lalaki na naglalaro umano ng sugal na ‘lucky 9’.

Nilapitan sila ng mga pulis saka inaresto at nasamsam sa kanila ang bet money, baraha at isang plastic sachet na naglalaman ng hinihinalang shabu na nakuha umano kay ‘Maricris’.

Ayon sa pulisya, dati ng nakulong si alyas Maricris dahil sa pagkakasangkot umano sa pagtutulak ng illegal na droga. 

(Richard Mesa)