PINANGUNAHAN ni Speaker Faustino “Bojie” G. Dy III, Huwebes ang delegasyon ng Kamara sa General Santos City at Sarangani Province para i-assess ang naging impact ng naganap na lindol nitong Lunes, makipagpulong sa mga lokal na opisyal at pinuno ng mga government agencies at tukuyin ang agaran at long-term na tugon para matulungan ang mga apektadong komunidad.

Sa ginawang pagbisita, inihayag ni Dy na sasagutin ng kamara ang medical expenses ng lahat ng nasugatang indibidwal dahil sa lindol, maging ito ay tumanggap ng treatment sa government o private hospitals.

Siniguro din ng Speaker na bibigyan ng karagdagang tulong ang apektadong pamilya upang mabilis na ma-recover ang komunidad mula sa kalamidad.

“Sa ngalan po ng House of Representatives, amin pong taos-pusong ipinaaabot ang amin pong pakikiramay. Nandito kami para matiyak na katulad ng sabi po namin, sa lahat ng ospital na kakailanganin na related po sa earthquake ay titiyakin natin na zero balance yung ating mga kababayan na nasa loob ng mga ospital,” ani Speaker. “At dapat madagdagan pa ng mga pondo para meron tayong kasiguraduhan at matiyak na malalampasan natin itong paghamon na tumama dito po satin, sa mga kababayan natin dito sa rehiyon na ‘to..“

Sinabi pa ni Dy na nagsagawa ang mga miyermbro ng House delegation ng on-site assessment ng nasirang imprastraktura at public facilities upang madetermina ang kinakailangan reconstruction requirements at masiguro na ang kinakailangang pondo ay maisasama sa panukalang 2027 national budget.

“Importante rin ma-assess mabuti yung mga building katulad ng ating mga airport na nakita kanina at para sa gayon matiyak natin na wala tayong magiging problema. Kaya ganoon din ang ating support, pagtutulungan namin para sa gayon ma-rehab natin nang mabilis na panahon itong mga ospital, sapagkat ito yung unang-unang mga pangaingailangan natin dito sa inyong lugar,” dagdag nito.

“May mga reports na dumating sa mga damages sa inyo pong area. At siyempre tamang-tama po yan, ang ating mga kinatawan ng inyong rehiyon ay pagtutulungan namin para matiyak na nandun siya sa loob ng ating proposed budget for next year para masiguro natin magawa yung mga dapat na magawa na mga kalsada, tulay, at ano pang mga facilities para pakinabangan ang ating mga kababayan.”

Ayon kay Dy, ang makakalap na impormasyon mula sa inspeksyon ay makakatulong sa kamara para matukoy ang mga priority funding requirements para sa reconstruction at rehabilitation efforts sa apektadong komunidad. (Vina de Guzman)

IREREKOMENDA ng Department of Agriculture (DA) ang ekstensyon ng P50-per-kilo maximum suggested retail price (MSRP) para sa bigas, na nakatakdang mag- expire o mapaso sa Hunyo 30.

Sa nasabing press briefing, sinabi ni Presidential Communications Office (PCO) Undersecretary at Palace Press Officer Claire Castro na pinag-aaralang mabuti ng DA ang posibilidad na palawigin ang hakbamg upang panatilihin ang presyo ng bigas na abot-kaya para sa mga consumers.

“Ang sabi po mismo ng DA ay magrerekomenda pa rin po sila ng extension of the price cap, at ito naman po ay titingnan po natin kung sasang-ayunan pa rin po ng National Price Coordinating Council at kung aaprubahan ng Pangulo. Pero magrerekomenda po sila ng extension for the price cap,” ang sinabi ni Castro.

Gayunman, sinabi ni Castro na wala pang nagagawang pinal na desisyon, ang panukala ay kailangan na sumailalim sa masusing ebalwasyon ng National Price Coordinating Council bago pa isumite sa pag-apruba ng Pangulo.

At nang tanungin kung maaaprubahan ba ang ekstensyon bago mag- June 30, sinabi ni Castro na nananatili itong layunin ng DA.

“Iyon po ang inaaral ng DA at iyan po ang nais nila,” aniya pa rin.

Samantala, kinumpirma naman ni Castro na may ilang rice retailers ang sumasailalim ngayon sa mbestigasyon ukol sa di umano’y bigong pagsunod o hindi pagsunod sa government-imposed price cap.

Ani Castro, sinimulan na ng DA ang pagpapalabas ng notices sa mga establisimyento na pinaghihinalaang lumabag sa polisiya habang nagpapatuloy ang imbestigasyon.

“So, sa ngayon po ay iniimbestigahan po ito kaya po hinihikayat natin ang mga kababayan po natin, sa mga nakikita ninyo pong umaabuso patungkol sa presyo ng bigas, ipagbigay-alam lamang po ninyo sa …kahit po sa amin dito at sa Department of Agriculture para po ito ay maimbestigahan at mapanagot na ang dapat na mapanagot,” ang dagdag na pahayag ni Castro.

Samantala, hinikayat naman ng Malakanyang ang publiko na tumulong sa pagmomonitor ng pagsunod sa rice price cap sa pamamagitan ng pagre-report ng anumang pinaghihinalaang paglabag sa tamang awtoridad.

Tinuran ni Castro na hindi pa makapagbibigay ang DA ng eksaktong numero ng rice retailers na kasalukuyang iniimbestigahan subalit kumpirmadong nabigyan na ng notices ang ilang establisimyento para sa posibleng paglabag.

( DARIS JOSE)

MAY SAPAT na pondo ang Commission on Elections (Comelec) para magdaos ng special election sa Cavite.

Sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang na ipinaalam ng Department of Budget and Management (DBM) sa Malakanyang na maaaring gamitin ng poll body ang ‘existing funds’ nito para sa electoral exercise.

Nauna rito, sinabi ni Comelec chairperson George Erwin Garcia na ang poll body ay mangangailangan ng P200 milyon para sa pagdaraos ng eleksyon.

“Kinausap po natin ang DBM. According to DBM, mayroon pa pong pondo na nasa Comelec at maaari naman po nilang gamitin po iyon. Sapat po ang pondo,” ani Castro.

Nauna rito, humihingi ng karagdagang pondo ang COMELEC sa Malacañang para maisagawa ang special election sa nag-iisang distrito ng Dasmariñas, Cavite na gaganapin sa Agosto.

Ayon kay COMELEC Chairman George Garcia, umabot sa ₱191 milyon ang kanilang tinatayang kakailanganing pondo para sa special election na sasaklaw sa mahigit apat na raan at limangpung libong (450,000) rehistradong botante sa distrito.

Nabakante ksi ang posisyon ng kinatawan ng 4th District ng Cavite matapos tanggalin ng Kamara sa pwesto si Congressman Kiko Barzaga dahil sa anilay “disorderly behavior” at “conduct unbecoming” bilang isang mambabatas.

Sinabi ni Garcia na nakipag-ugnayan na sila sa Pangulo upang makahingi ng tulong-pinansyal, kabilang ang posibilidad na gamitin ang contingency fund ng pamahalaan.

Samantala, tinuran ni Castro na maaaring gamitin ng Comelec ang ‘available fund’ nito para sa eleksyon. ( DARIS JOSE)

BAGSAK sa selda ang limang katao kabilang ang dalawang hinihinalang drug personalities matapos mahuli sa aktong naglalaro umano ng ilegal na sugal sa magkahiwalay na lugar sa Valenzuela City.

Sa ulat ni Valenzuela Police Chief P/Col. Joseph Talento kay Northern Police District (NPD) Acting Director P/BGen. Benliner Capili, alas-12 ng Miyerkules ng tanghali, nagsasagawa ng Anti-Criminality Operation ‘Oplan Galugad’ ang mga tauhan ng Police Sub-Station 8 sa Babina St., Brgy., Ugong, nang maaktuhan nila ang tatlong indibidwal na nagsusugal umano ng ‘cara y cruz’.

Nilapitan nila ang mga ito saka inaresto at nakumpiska sa kanila ang bet money, pangara at isang plastic sachet na naglalaman ng hinihinalang shabu na nakuha kay alyas “John”, 32.

Nauna rito, bandang alas-8:30 ng Martes ng gabi nang maaresto naman ng mga tauhan ng Police Sub-Station 4 ang dalawang lalaki na nagsusugal din umano ng ‘cara y cruz’ sa Area 4, Pinalagad St., Brgy., Malinta.

Nasamsam sa kanila ang perang pantaya, pangara at isang plastic sachet na naglalaman ng umano’y shabu na nakumpiska sa 43-anyos na machine operator na si alyas “Ronald”.

Nahaharap ang mga naaresto sa kasong paglabag sa PD 1602 (Anti-illegal Gambling Law) at R.A 9165 (Comprehensive Dangerous Drug Act of 2002). (Richard Mesa)

News 2

Sekyu, huli sa aktong nagsa-shabu sa Valenzuela 

KALABOSO ang isang security guard nang mahuli sa akto ng mga pulis na bumabatak umano ng shabu sa Valenzuela City, Huwebes ng hapon.

Sa kanyang ulat kay Northern Police District (NPD) Acting Director P/BGen. Benliner Capili, kinilala ni Valenzuela Police Chief P/Col. Joseph Talento ang suspek na si alyas “Robert”, 45, residente ng Bocaue, Bulacan.

Ayon sa ulat, nagsasagawa ng Anti-Criminality Operation ‘Oplan Galugad’ ang mga tauhan ni Police Sub-Station 2 sa M. Delos Reyes Compound, Brgy., Gen T De Leon nang maaktuhan nila ang suspek na sumisinghot umano ng shabu dakong alas-4:10 ng hapon.

Kaagad nila itong nilapitan saka inaresto at nakumpiska sa kanya ang isang nakabukas na plastic sachet na may bahid ng hinihinalang shabu at drug paraphernalias.

Mahaharap ang suspek sa kasong paglabag sa Sections 12 at 15 ng R.A 9165 o ang Comprehensive Dangerous Drug Act of 2002. (Richard Mesa)

AGAD na nakapaghain ng piyansa matapos na maaresto si dating Ilocos Sur Governor Chavit Singson.

Inaresto ang negosyante ng Quezon City Police District (QCPD) nitong Huwebes, Hunyo 11 dahil sa kasong cyber libel.

Base sa warrant of arrest mula sa Branch 21, Regional Trial Court (RTC) ng Vigan City, ay mayroong paglabag si Singson sa Cybercrime Prevention Act of 2012.

Inaresto siya sa bahay niya sa Barangay Ugong Norte,Quezon City. (Vina de Guzman)

IPATATAWAG ni Labor Secretary Francis Tolentino si Ateneo Backetball Coach Tab Baldwin sa isyu ng pagkasawi ng dalawang basketball player ng Ateneo sa kalagitnaan ng training sa Dipaculao, Aurora.

Ayon kay Tolentino, ito ay para alamin kung may valid na alien employment permit si Baldwin sa ilalim ng labor code.

Layon din nitong suriin kung saklaw ng alien employment permit ang pagsasagawa ng mga team building activities.

Bahagi rin ito ng beripikasyon ng Kagawaran upang matiyak na sumusunod sa mga umiiral na batas-paggawa ang lahat ng dayuhang nagtatrabaho sa bansa.

Binigyang diin ni Tolentino na hindi pag-uusig ang hakbang ng DOLE kundi bahagi lamang ng pagpapatupad ng batas at pagtiyak ng pagsunod sa mga regulasyon hinggil sa pagtatrabaho ng mga dayuhan sa Pilipinas.

Maaari namang kanselahin ang alien employment permit ni Baldwin sakaling hindi ito sumipot at ire-refer din sa Bureau of Immigration sa posibleng deportation nito.

Kaugnay nito, nagpahayag din ng pakikiramay ang pamunuan ng DOLE sa pamilya na naiwan ng dalawang nasawing player na sina Rene Baterbonia at Divine Adili.

Inihayag ito ni Tolentino kasabay naman ng re-launching ng DOLE Press Corps Office kung saan kinilala ang mahalagang papel ng media sa pagpapalaganap ng tama at napapanahong impormasyon para sa mga manggagawang Pilipino. (Gene Adsuara)