HINDI papayag si Pangulong Ferdinand Marcos Jr., na mawala sa PIlipinas ang kontrol sa Bajo de Masinloc sa gitna ng mga alalahanin ukol sa pagpapadala ng Tsina ng floating structures sa pinagtatalunang bahura.

“Hindi po hahayaan ng Pangulo na mangyari po iyan,” ang sinabi ni Presidential Communications Office (PCO) Undersecretary at Palace Press Officer Claire Castro nang hingan ng komento ukol sa pangamba ng publiko sa posibilidad na mabura o mawala sa Pilipinas ang kontrol sa Bajo de Masinloc o mas kilala rin bilang Scarborough Shoal, 

“Alam po natin ano ang totoong stance ng Pangulo pagdating sa interes ng mga Pilipino at interes natin dito sa ating West Philippine Sea,” aniya pa rin.

Aniya pa, batid naman ng Pangulo ang mga nangyayari, at nananatili aniyang malinaw ang paninindigan ng Pangulo na unahin ang paggamit ng diplomatiko at legal na hakbang sa pagharap sa ganitong klaseng sitwasyon.

Sinabi pa rin ni Castro na nakapaghain na ang Department of Foreign Affairs (DFA) ng diplomatic protest laban sa floating movable platforms na ipinadala ng Tsina sa Bajo de Masinloc.

“So, tuloy pa rin po ang ating paninindigan kung ano ang ating karapatan at ano ang dapat nating ipaglaban,” ang winika nito.

Nauna rito, naghain ng Pilipinas ng diplomatic protest laban sa China dahil sa nakitang floating platform sa Bajo de Masinloc sa West Philippine Sea.

Ayon sa Deparment of Foreign Affairs (DFA), na kanilang ginawa lamang ang nararapat sa pamamagitan ng paghahain ng diplomatic protest.

Hindi na ibinahagi pa ng DFA ang ilang mga detalye sa pagiging confidential ng mga ito.

Sinabi naman ni Philippine Coast Guard (PCG) spokesperson for WPS Rear Admiral Jay Tarriela, na ang mga floating platform ay unang nadiskubre sa pamamagitan ng satellite imagery and maritime domain awareness operations na kanilang isinagawa noong Mayo.

Dagdag pa nito na mayroong nasa 30 square meters ang deck area at tinatayang mayroong laki ito ng lima hanggang pitong metro ang haba ng mga ito.

Nakita umano ang ilang mga Chinese sa platform noong Mayo 30.

Noong Mayo 31 din ang nasabing platform ay mas lumalim pa sa Bajo de Masinloc na ito ay tinutulungan umano ng barko ng China. 

(Daris Jose)

ISINUSULONG ng isang mambabatas ang paglikha ng isang bagong departamento ng gobyerno na eksklusibong tututok sa kapakanan, karapatan, at pag-unlad ng mga Indigenous Peoples sa bansa.

Sa ilalim ng House Bill No. 9808 o ang panukalang “Department of Indigenous Cultural Communities and Indigenous Peoples Act,” layunin ni Nueva Vizcaya Rep. Timothy Joseph “Tim” Cayton na gawing isang ganap na departamento ang National Commission on Indigenous Peoples (NCIP) upang magkaroon ng mas malakas na kapangyarihan, mas malaking pondo, at direktang representasyon sa pambansang pamahalaan.

Nakapaloob sa panukala na sa kabila ng halos tatlong dekada mula nang maisabatas ang Indigenous Peoples’ Rights Act (IPRA), marami pa ring hamon ang kinakaharap ng mga katutubo kabilang ang mabagal na pagproseso ng mga usapin sa lupang ninuno, kakulangan sa serbisyo, at limitadong representasyon sa paggawa ng mga polisiya.

Sa ilalim ng kagawarang ito, magkakaroon ng mas maayos na koordinasyon ng mga programa para sa mga IP, mas matibay na proteksyon sa kanilang mga karapatan, at mas mabilis na pagresolba sa mga usaping may kaugnayan sa kanilang mga komunidad at ancestral domains.

Kasama rin sa panukala ang pagpapalakas ng proseso ng Free and Prior Informed Consent (FPIC), pagtatatag ng Indigenous Peoples’ Adjudication Board para sa mga sigalot na may kinalaman sa mga karapatan ng mga IP, at paglikha ng Indigenous Peoples’ Community Development Trust Fund upang suportahan ang mga proyekto at pangangailangan ng mga komunidad.

“Hindi lamang pagkilala sa kanilang karapatan ang kailangan. Dapat mayroon silang direktang kinatawan sa pinakamataas na antas ng gobyerno upang matiyak na naririnig at napapangalagaan ang kanilang mga interes,” ayon sa mambabatas.

Para kay Cayton, ang panukala ay isang hakbang tungo sa mas inklusibo, makatarungan, at makataong pamahalaan na tunay na kumikilala sa mahalagang papel ng mga katutubo sa kasaysayan, kultura, at kinabukasan ng bansa. (Vina de Guzman)

SAMPUNG abogado mula sa tatlong nangungunang law firms sa bansa ang magsisilbing private prosecutors sa impeachment trial ni Vice President Sara Z. Duterte.

Ang unang batch ng private prosecutors, na ipinakilala ni lead prosecutor at House Committee on Justice Chair Gerville “Jinky Bitrics” Luistro, ay mula sa PECABAR Law, Kapunan and Castillo Law Offices, at SALiGAL Law.

Kasama sa mga sasali sa prosecution ay sina Marforth Fua, managing partner ng PECABAR Law at dating assistant presidential legal counsel sa ilalim ni President Ferdinand R. Marcos Jr.; veteran litigator Lorna Kapunan, founder and senior partner ng Kapunan and Castillo Law Offices; at Amando Virgil Ligutan, managing partner ng Cebu-based SALiGAL (Sapayan Lim Alvarez & Ligutan) Law at senior lecturer sa University of the Philippines College of Law.

Kasali rin sa legal team sina PECABAR partners Erwin Matib at Justin Anne Lamarca at senior associate James Bryan Ibrahim Alih, Kapunan and Castillo senior partner Sonya Margarita Benemerito-Castillo, junior partner Deanna Melissa Lorenzo-Singian, co-managing partner Bettina Zamora, at Atty. Lino Chris Kapunan.

Sinabi ni Luistro na ang dagdag na private prosecutors ay magpapalakas sa paghahanda ng prosecution team para sa impeachment proceedings.

“We are more confident than before because of the presence of the private prosecutors,” ani Luistro.

Ang mga abogado ay may kanya-kanyang kadalubhasaan sa criminal prosecution, graft and corruption cases, white-collar crime, labor law, environmental law, family law, taxation, commercial litigation, at dispute resolution.

“Today is a very important day for the country because finally, we will be introducing the first batch of the private prosecutors who will be assisting the House prosecutors. By first batch, it means that there will be subsequent batches,” pahayag ni Luistro.

Ayon pa kay Luistro, nagboluntaryo ang mga nasabing abogado ng kanilang serbisyo o pro bono at tutulung sa pagprepara sa mga saksi, ebidensiya, pleadings at iba pang legal requirements para sa pagdinig sa Senate impeachment court.

“We solicited the help of private lawyers who are willing to be with us on this cause on a voluntary basis. Mas kilala sa tawag na pro bono, o para mas maintindihan pa ng ating mga kababayan, ibig sabihin libre, walang bayad,” paliwananag ni Luistro.

Sinabi naman ni House prosecutor at Akbayan Party-list Rep. Jose Manuel “Chel” Diokno na ang pagsali ng private lawyers ay makakatulong sa prosecution team na ma-navigate ang matinding trabaho para sa preparasyon at presentasyon ng impeachment case.

“Hindi po madali ang trabaho ng isang prosecutor. Maraming kailangang gawin in terms of witnesses, in terms of evidence, exhibits, making sure that all the evidence we present is admitted by the court. It’s not exactly simple or easy. Kaya we really appreciate the help of our private prosecutors,” added the lawyer,” ani Diokno.

Iginiit naman nina Luistro at Diokno na ang mga private prosecutors ay tutulong lamang at mananatili sa ilalim ng direksyon at supervision ng House prosecution panel.

“I want to make it clear that the lead and the one in control of the trial will still be the House prosecutors. In other words, ang mga private prosecutors po na makakasama ng House prosecutors will be assisting prosecutors. And pursuant to the rules, they will remain under the direct control and supervision of the House prosecutors,” paliwanag ni Luistro. (Vina de Guzman)

MINALIIT lang ng Malakanyang ang report na di umano’y may nakaambang na destabilization plot laban kay Pangulong Ferdinand R. Marcos Jr.

Sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang na nananatiling nagkakaisa, propesyonal at committed ang Armed Forces of the Philippines (AFP) sa constitutional mandate nito.

Ani Castro, walang natanggap ang liderato ng AFP ng anumang detalye o impomasyon kaugnay sa lumalaking kawalang-kasiyahan sa loob ng military ranks.

“Ang sabi po mismo ng pamunuan ng AFP ay wala silang nakukuhang anumang detalye o impormasyon patungkol dito,” ang sinabi ni Castro.

Kinilala naman ni Castro ang report na may umiikot na tsismis subalit naka-monitor aniya ang military officials sa situwasyon.

“May ugung-ugong, at ito naman din ay kanilang binabantayan,” aniya pa rin.

Winika pa ni Castro na tiniyak ng AFP sa gobyerno na ang mga miyembro nito ay “active, united and professional,” binigyang diin na walang dahilan para sa loyalty check sa loob ng military organization.

“Hindi po kinakailangan, according to AFP, ng loyalty check dahil alam po nila ang kanilang mandato para sa bayan na naaayon sa Konstitusyon,” aniya pa rin.

Nauna rito, nanawagan si Sen. Panfilo “Ping” M. Lacson nitong Martes ng gabi, Hunyo 9, sa lahat ng sandatahang lakas na manatiling mapagmatyag at mapanuri laban sa mga mapagsamantalang grupo na maaaring samantalahin ang kanilang hinaing at saloobin upang isulong ang destabilisasyon laban sa pamahalaan sa pamamagitan ng pagpapanggap na kanilang kaalyado.

Ani Lacson, hindi niya isinasantabi ang posibilidad na ang 18 dating sundalo na dinala sa Senado noong Lunes ay maaaring magamit bilang bahagi ng mas malawak na plano upang maghasik ng kaguluhan at magpasimula ng destabilisasyon.

Nauna nang nagbabala si Lacson na ang lumalaking frustration sa hanay ng sandatahang lakas ay maaaring magdulot ng panganib kung ito ay sasamantalahin ng mga mapagsamantala at makapangyarihang destabilizer na ginagamit ang mga pambansang usapin tulad ng mga anomalya sa flood control, implasyon, at pagtaas ng presyo ng langis.

Binanggit din ni Lacson na ang 18 dating sundalo, na unang nagsabing naghatid umano sila ng mga maleta ng salapi mula sa kickback ng mga proyekto sa flood control para sa ilang personalidad, ay nakasuot ng fatigue uniforms nang pumasok sila sa Senado noong Lunes.

Tinukoy niya ang intelligence information na ibinahagi ni National Bureau of Investigation Director Melvin Matibag na maaaring gamitin ang 18 upang makakuha ng suporta mula sa mga miyembro ng uniformed services, lalo na’t may mga anti-government protesters na araw-araw na nagsasagawa ng mga rally sa labas ng Senado.

Sa ngayon, sinabi niyang mahirap makakuha ng simpatya mula sa sandatahang lakas ang 18, lalo na mula sa Marines, dahil hindi bababa sa 12 sa kanila ang dishonorably discharged mula sa serbisyo. Aniya, halos itinakwil na rin sila ni retired Marine Col. Ariel Querubin dahil itinuturing silang kahihiyan ng kanilang hanay.

Ani Lacson, dahil sa naturang potensyal na banta, inilagay ni Senate President Pro Tempore at acting Senate President Sherwin Gatchalian sa heightened alert ang seguridad ng Senado, kabilang ang paghihigpit sa pagpasok at paglabas ng mga senador at pagbabawal muna sa mga bisita. 

 (DARIS JOSE)