NILAGDAAN ng Pilipinas at Nicaragua ang bilateral agreement ukol sa pagtatatag ng political consultations, pagbibigay ng mas malalim na dimensyon sa ugnayan ng dalawang bansa simula nang maitatag ang kanilang diplomatic relations limang dekada na ang nakalilipas.

Pinirmahan ni Philippine Ambassador to Nicaragua Arvin de Leon ang kasunduan kasama ang kanyang Nicaraguan counterpart sa Mexico, Ambassador Juan Carlos Gutiérrez Madrigal, sa Mexico City.

Sa kabilang dako, sinabi ng Department of Foreign Affairs (DFA) na nilagdaan ang memorandum of understanding nito lamang Philippine Independence Day, Hunyo 12, tanda ng kauna-unahang kasunduan na napagkayarian sa pagitan ng dalawang bansa simula ng pormal na relasyon ng mga ito na itinatag noong Agosto 10, 1973.

Inaasahan na ang kasunduan ay magsisilbi bilang balangkas tungo sa pagtatatag ng isang platform na maaaring pag-usapan ng dalawang bansa at galugarin ang posibilidad na kooperasyon sa mga larangan ng kapwa interes.

“After the signing, both sides agreed to work more closely in the soonest implementation of the agreement which would open the door towards a more constructive and results-oriented engagement between the Philippines and Nicaragua,” ayon sa DFA.

Samantala, naging aktibo ang administrasyong Marcos sa pakikipag-ugnay sa non-traditional partners para paghusayin ang bilateral cooperation at kalakalan. ( DARIS JOSE)

INARESTO ng ng Bureau of Immigration (BI) ang apat na Taiwanese nationals dahil sa ilegal na pagpasok sa Pilipinas. Dalawa sa kanila ay pinaghahanap sa Taiwan dahil sa mga kasong may kaugnayan sa ilegal na droga.

Isinagawa ang operasyon ng mga operatiba ng BI Intelligence Division sa bisa ng mission order na inilabas ni BI Commissioner Joel Anthony Viado.

Dahil dito, nagsagawa ng enforcement operation ang mga operatiba ng BI Intelligence Division, katuwang ang mga tauhan ng PCG, sa isang yate na nakadaong sa Island A, Reclamation Area, Pasay City. Dito naaresto ang mga Taiwanese nationals na sina Hung Pin Sheng, 39; Weng Pai Chen, 21; Chen Chin Chih, 22; at Liang Chia Hua, 35.

Ayon sa mga rekord, sina Hung Pin Sheng at Liang Chia Hua ay may mga naunang kasong kriminal sa Taiwan. Samantala, sina Weng Pai Chen at Chen Chin Chih ay kumpirmadong pinaghahanap ng Taiwan Kaohsiung District Court at Taiwan District Prosecutors Office kaugnay ng mga kasong may kinalaman sa ilegal na droga, kaya’t itinuturing silang mga pugante ng batas.

Kasalukuyan ding iniimbestigahan ang mga suspek dahil sa paglabag sa mga batas sa imigrasyon ng Pilipinas kaugnay ng ilegal na pagpasok sa bansa, gayundin sa pagiging mga pugante at posibleng pagkakasangkot sa pagtatago o pagtulong sa mga iligal na dayuhan.

Muling iginiit ni Viado ang matatag na paninindigan ng Bureau na pigilan ang paggamit sa Pilipinas bilang kanlungan ng mga dayuhang pugante at mga sangkot sa transnational crimes. Gene Adsuara

Sent from my iPhone

NASAWI ang 11-anyos na batang lalaki habang dalawa pa niyang kalaro ang nagpapagaling pa sa pagamutan nang malunod habang naliligo isang palaisdaan sa Malabon City.

Batay sa ulat na inilabas ng Malabon Disaster Risk Reduction and Management Office (MDRRMO), nirespondehan nila ang natanggap na tawag kaugnay sa tatlong menor-de-edad na nalunod habang naliligo sa palaisdaan sa Damzon St. Brgy. Muzon noong araw ng Linggo.

Pagdating sa lugar, kaagad isinugod ng mga tauhan ng MDRRMO sa Ospital ng Malabon ang tatlo habang tuloy-tuloy na pagsasagawa ng resuscitation sa batang si alyas “Gabriel” na hindi pinagbabalikan ng malay.

Gayunman, idineklarang wala ng buhay ang biktima pagsapit sa emergency room ng naturang pagamutan habang nabigyan kaagad ng lunas ang dalawa pa niyang kasama na nagpapagaling na.

Nagpaabot naman ng lubos na pakikiramay ang Pamahalaang Lungsod ng Malabon sa pamilya ng nasawing biktima kasabay ng paglilinaw na hindi sa pampublikong pasilidad na pinamamahalaan ng pamahalaang lungsod kundi sa isang pribadong palaisdaan naganap ang insidente.

Ayon sa pamahalaang lungsod, ang trahedyang ito ay nagsisilbing paalala sa mga magulang, tagapag-alaga, may-ari ng mga pribadong lugar, at buong komunidad na patuloy na mag-ingat at magtulungan upang mapanatiling ligtas ang mga kabataan, lalo na sa mga lugar na may anyong-tubig at iba pang maaaring pagmulan ng panganib. (Richard Mesa)

BAGSAK sa kulungan ang dalawang hinihinalang drug personalities nang maaresto ng pulisya na nagsusugal at bumabatak ng droga sa magkahiwalay na lugar sa Valenzuela City.

Sa ulat ni Valenzuela Police Chief P/Col. Joseph Talento kay NPD Acting Director P/BGen. Benliner Capili, nagsasagawa ng anti-criminality operation ‘Oplan Galugad’ ang mga tauhan ng Police Sub-Station 9 nang maaktuhan nila ang dalawang lalaki na nagsusugal umano ng ‘lucky 9’ sa ilalim ng NLEX Harbor Link Segment 10, sa Brgy., Karuhatan bandang alas-9:25 ng gabi.

Kaagad nilang nalapitan ang mga ito saka inaresto at nakumpiska sa kanila ang bet money, gamit na baraha at isang plastic sachet na naglalaman ng hinihinalang shabu na nakuha umano kay alyas “Jun Jun”.

Nauna rito, dakong alas-6:35 ng gabi nang mahuli sa akto ng mga tauhan ng Police Sub-Station 2 si alyas “Joel” na sumisinghot umano ng bato sa loob ng isang abandonadong bahay sa Sitio Kabatuhan Compund 3, Brgy., Gen T De Leon.

Nasamsam sa kanya ang isang nakabukas na plastic sachet na may bahid ng umano’y shabu at drug paraphernalias.

Kasong paglabag sa PD 1602 at R.A 9165 o ang Comprehensive Dangerous Drug Act of 2002 ang isinampa ng pulisya laban sa mga suspek. (Richard Mesa)

SUGATAN ang isang rider matapos mabangga ng dambuhalang truck sa kahabaan ng Mac Arthur Highway, Brgy. Karuhatan, Valenzuela City na dahilan upang magbagal ang daloy ng trapiko sa nasabing lugar. Kaagad namang tinulungan ang biktima ng rumespondeng rescue team ng Valenzuela City DRRMO para madala sa pinakamalapit na pagamutan.

 (Richard Mesa) 

DUMATING na si Pangulong Ferdinand R. Marcos Jr. sa Kazan, Russia, araw ng Miyerkules at nagtalaga ng government caretakers habang siya ay nasa foreign trip upang masiguro na hindi mapuputol ang pamamahala at decision-making.

Ang eroplanong may lulan sa Pangulo ay lumapag sa Kazan, alas 12:53 ng tanghali. (Manila time).

Sinabi ni Presidential Communications Office (PCO) Undersecretary at Palace Press Officer Claire Castro, habang ang Pangulo ay nasa Russia,sina Executive Secretary Ralph Recto, Agrarian Reform Secretary Conrado Estrella, at Labor Secretary Francis Tolentino ang magsisilbing government caretakers.

Ang tatlong Cabinet officials ay awtorisadong umakto sa ngalan ng Pangulo sa pangangasiwa ng mga tungkuling ehekutibo habang siya ay nasa labas ng bansa maliban sa mga bagay na kinakailangan ng konstitusyon upang mapagpasyahan mismo ng Pangulo o iyong mga may kinalaman sa national security, kabilang na ang organisasyon ng military at pulis.

Ang lahat ng desisyon na gagawin ng mga ito ay “must be unanimous and any disagreements will be referred to the President for resolution.”

Samantala, ang pagbisita ng Pangulo, ang kanyang kauna-unahang pagbisita sa Russia, mula nang maupo bilang halal na Pangulo ng bansa noong 2022, naglalayon na palakasin ang ugnayan ng Pilipinas at Russia, batay sa ‘mutual respect, dialogue, at cooperation.’

Si Pangulong Marcos, chairman ng Association of Southeast Asian Nations (ASEAN) ngayong taon, ay magpapartisipa sa ASEAN-Russia Commemorative Summit, magsisilbi bilang platform para pag-usapan ang pagtutulungan sa mahahalagang larangan kabilang na ang ‘security, trade, energy, at food security.’

Nakatakda rin siyang magsagawa ng bilateral meeting kasama si Russian President Vladimir Putin para talakayin ang ‘cooperation on areas of mutual interest’ ng dalawang bansa partikular na ang ‘energy at food security.

Ang pagbisita ng Pangulo sa Russia ay kasabay ng 50th anniversary ng diplomatic relations sa pagitan ng Pilipinas at Russia.

(DARIS JOSE)