Matagal na ring lumaban sa sakit na kanser…ASHLEY, nagluluksa sa pagpanaw ng kanyang butihing ina (ni: ROMMEL GONZALES)

MAY malungkot na pinagdadaanan ngayon ang Sparkle female artist na si Ashley Rivera na kilala rin bilang si Petra Mahalimuyak; pumanaw ang kanyang ina na matagal ring lumaban sa sakit na kanser.

Sa pamamagitan ng kanyang Instagram stories, kalakip ang litrato ng kanyang butihing ina ay inilahad ni Ashley ang masakit na balita…

“No more pain, Ma. 

“May your heart and soul find peace and comfort.”

“I miss you so much. I love you forever.”

Sa isa pa niyang IG story ay nag-post si Ashley ng litrato habang hawak niya ang kamay ng kanyang ina.

“I’m gonna miss holding your hand, Ma,” ang malungkot na mensahe naman ng aktres.

Nitong Abril lamang nang ibahagi ni Ashley sa publiko ang tungkol sa pagkakaroon ng sakit na kanser ng kanyang ina.

Aniya, “Dear mama bear is doing fine. She’s still fighting and we’re celebrating our small wins every single day!”

Inihayag rin niya noong mga sandaling iyon na nagpapakatatag siya para sa kanyang ina sa kabila ng sakit at kalungkutang nadarama.

Ang aming pakikiramay kay Ashley at sa kanyang buong pamilya…

***

PINABULAANAN ni Vandolph Quizon ang mga fake news na hindi nila tinutulungan si Cita Astals na co-star nila sa sitcom na ‘Home Along Da Riles’ at sa bagong pelikulang ‘Home Along Da Riles: Da Reunion.’

“Huwag ganun,” bulalas ni Vandolph.

“Huwag nating hatakin ang tao pababa. Dapat lahat tayo dito sa nangyayaring sitwasyon ngayon, magtulungan pataas.

“Lahat tayo nagtutulungan at hatakan pataas. Lahat tayo may mga pinagdadaanan.

“But ito lang tatandaan ninyo na ang Home Along Da Riles family ay hindi namin pinababayaan ang bawat isa. Yun lang.”

Iniwang legacy rin daw sa kanila ng ama nilang Comedy King na si Mang Dolphy ang tumulong sa kapwa.

“Of course. Yun ang gagawin ng tatay ko kung nububuhay siya. Hindi namin kaya maging Dolphy mag-isa kaya sama-sama kami, di ba? That’s his legacy.”

Palabas na sa mga sinehan ngayon ang “Home Along Da Riles: Da Reunion” tampok sina Vandolph, Cita, at sina Claudine Barretto, Smokey Manaloto, Gio Alvarez, Jenny Quizon, Celyn David, Pepe Herrera, at Ms. Nova Villa, sa direksyon ni Boy 2 Quizon na artist rin sa pelikula.

Mula ito sa Riles Productions at Rebisco.