HUMIGIT-KUMULANG sa kalahating milyong halaga ng shabu at pinatuyong dahon ng marijuana ang nasamsam kabilang ang dalawang baril at bala matapos naaresto ang apat na hinihinalang tulak at nasa listahan ng Street Level Individual (SLI) sa isinagawang buy bust operation sa General Trias City, Cavite Miyerkules ng umaga.

Kasong paglabag sa RA 9165 (Comprehensive Dangerous Drugs Act Law of 2022 at RA 10591 (Comprehensive Firearms and Ammunition Regulation Act) ang kinakaharap na kaso ng mga naarestong suspek na sina alyas Christian, alyas Kevin, alyas Ryan at alyas Pricess.

Sa ulat, bandang alas-5:45 ng umaga nang nagsagawa ng buy bust operation ang mga operatiba ng Drug Enforcement Unit ng Gen Trias Componet City sa BR3 Lancaster, Brgy Pasong Camachille 1, Gen Trias City Cavite na nagresulta sa pagkakaaresto sa mga suspek at nasamsam ang 40 gramo ng hinihinalang shabu na may Standard Drug Price na P272,000.00, 7 sachet ng pinatuyong dahon ng marijuana kush na may Standard Drug Price na P60,000.00 o kabuuan na P332,000.00

Bukod sa shabu at marijuana, nakuha rin sa mga suspek ay isang kalibre 45 Armscor na baril, isang magazine ng kalibre 45, 7 bala ng kalibre 45, isang kalibre 9mm sub-machine gun mula kaya alyas Kevin, iang magazine ng 9mm, limang bala ng kalibre 9mm, isang backback at isang itim na sling bag. 

(Gene Adsuara)

SIYAM na wanted persons kabilang ang dalawang top most wanted persons sa kasong rape at carnapping ang naaresto ng pulisya sa magkahiwalay na manhunt operation sa CaMaNaVa area.

Sa ulat ng tanggapan ni Northern Police District (NPD) Acting Director P/BGen. Benliner Capili, isinagawa ang operation ng NPD units at police stations na nagresulta sa pagkakaaresto sa 23-anyos na kelot sa Fishpond Alley 3, Barangay 35, Caloocan city.

Inaresto ang akusado sa bisa ng warrant of arrest para sa kasong statutory rape under Article 266-A of the Revised Penal Code as amended by RA 8353 na inisyu ng Regional Trial Court (RTC), Branch 106, Quezon City, noong June 2, 2026.

Nabatid na walang inirekomendang piyansa ang hukuman para sa pansamatalang paglaya ng akusado.

Samantala, isinilbi naman ang isang arrest warrant ng mga tauhan ng Malabon City Police Station sa 23-anyos na lalaki na kasalukuyang nakakulong sa loob Bureau of Jail Management and Penology (BJMP) facility sa Sanciangco Street, Barangay Catmon. Malabon City.

Ang nasabing warrant ay para sa paglabag sa RA 10883 o ang New Anti-Carnapping Act of 2016 na inisyu ng Regional Trial Court (RTC), Branch 290, Malabon City, noong June 9, 2026, na may inirekomendang piyansa na P300,000. (Richard Mesa)

INATASAN ni Manila Mayor Francisco “Isko Moreno” Domagoso” ang lahat ng pampublikong elementarya at high school—kasama ang mga city university na Pamantasan ng Lungsod ng Maynila o PLM at Universidad de Manila o UdM—na magsagawa ng earthquake simulation exercises isang beses kada buwan sa loob ng school year.

Iminungkahi ni Domagoso ang resolusyon na ipinasa ng Manila City Risk Reductin and Management Council o MCDRRMC na kanyang pinamumunuan sa pagpupulong ng konseho Miyerkules ng hapon, June 10, dahil sa banta ng “The Big One” sa Metro Manila at sa pangangailangan na mabuo ang muscle memory ng mga estudyante, lalo na ng mga mas bata.

“There’s still a threat in Metro Manila with regard to ‘The Big One,'” sabi ng Mayor. “If we create some level of muscle memory for our students, especially yung mga bagong mag-aaral—Grade 1, Kinder—kailangan lang maging pamilyar sila na merong ganung activity every month,” dagdag niya.

Hindi kailangang sabay-sabay isagawa ang drills sa lahat ng 104 na paaralan—maaaring pumili ang bawat paaralan ng sarili nitong petsa sa loob ng buwan, basta’t isagawa ang exercise sa oras ng klase.

Inuutusan ng resolusyon ang Schools Division Superintendent ng Maynila na si Dr. Sheryll T. Gayola na bigyan ng kopya para sa tamang gabay at implementasyon.

Nanawagan din si Domagoso sa mga national agency partners ng konseho na tumulong sa pagsasagawa ng simulation exercises, kabilang ang pag-test ng bagong kagamitan tulad ng heat-seeking drone ng lungsod.

Bukod dito, sinabi ng alkalde na nagsimula na noong Lunes ang inspeksyon sa mga lumang school building at government structures, at ang mga ulat ay isusumite kay Manila CDRRM Department chief Arnel Angeles para sa evaluation. Nananatili namang naka-standby ang Maynila sakaling kailanganin ng tulong ng mga apektadong ahensya sa Mindanao. (Gene Adsuara)

SINABI ni Pangulong Ferdinand Marcos Jr., na ang napapanahong paghahatid ng hustisya ay kabilang sa itinuturing na ‘most essential services’ na maibibigay ng gobyerno.

Inihayag ito ng Pangulo matapos pangunahan ang oath-taking ng mga bagong elected prosecutors ng National Prosecution Service (NPS) sa Palasyo ng Malakanyang.

Sa isang social media post, sinabi ni Pangulong Marcos na patuloy na pinalalakas ang ‘prosecution system’ ng bansa at pinalalawak ang access sa hustisya sa mga komunidad sa buong bansa.

Kinilala naman ng Pangulo ang mga hamon na kinahaharap ngayon ng maraming fililipino na naghahanap ng legal na remedyo.

“For too many Filipinos, justice can feel distant, slow and out of reach,” ang sinabi ng Pangulo.

Aniya, nagtatrabaho ang gobyerno para tugunan ang hinaing ng mga ito sa pamamagitan ng pagpapalakas sa NPS at pagde-deploy ng mas maraming mga tagausig sa buong bansa.

“That is why we continue to strengthen the National Prosecution Service and bring more prosecutors into communities across the country,” aniya pa rin.

Winika ng Pangulo na ang isang epektibong gobyerno ay nasusukat hindi lamang sa polisiya kundi maging sa kakayahan na maghatid ng serbisyo na direktang nakakaapekto sa buhay ng mga tao.

“A government that works is one that delivers results people can feel. And justice delivered on time is one of the most important services government can provide,” aniya pa rin.

Ang NPS, sa ilalim ng Department of Justice, ay may atas na magsagawa ng preliminary investigations at pag-uusig sa mga kriminal sa ngalan ng gobyerno. (DARIS JOSE)