SA GITNA ng mga bintang at kuwentong ang bawat maleta ay puno ng suhol, ipinakita ni Rep. Terry Ridon ang ibang katotohanan. Ang hinog na mangga sa loob ng kanyang bagahe ito ay sagot sa mga paninira, umano patunay na hindi lahat ay nabibili, at paalala na ang tunay na yaman ay nasa katotohanan at paglilingkod na walang halong dumi. Hindi lahat ng nakatago ay masama, ngunit ito ang pinakamalakas na sagot sa lahat ng haka-haka. Na sa panahong maraming naghahanap ng dumi at katiwalian, may mga taong nananatiling daladala ang katapatan at ang tunay na lasa ng pagiging tapat sa bayan. (By SER MORALES Sr.)

BALIK-SELDA ang isang bebot matapos makuhanan ng droga nang maaresto ng pulisya habang naglalaro umano ng illegal na sugal kasama ng isang lalaki sa Valenzuela City.

Nahaharap sa kasong paglabag sa PD 1602 (Anti-illegal Gambling Law) at R.A 9165 (Comprehensive Dangerous Drug Act of 2002 ang suspek na si alyas “Maricris”, 31, factory worker at residente ng Brgy. Bignay.

Sa ulat ni Valenzuela Police Chief P/Col. Joseph Talento kay Northern Police District (NPD) Acting District P/BGen. Benliner Capili, dakong alas-11:20 ng gabi, nagsasagawa ng anti-criminality operation ‘Oplan Galugad’ ang mga tauhan ng Police Sub-Station 7 sa Casarival 4,6, Northville 1, Brgy., Bignay nang maaktuhan nila ang suspek kasama ang isang lalaki na naglalaro umano ng sugal na ‘lucky 9’.

Nilapitan sila ng mga pulis saka inaresto at nasamsam sa kanila ang bet money, baraha at isang plastic sachet na naglalaman ng hinihinalang shabu na nakuha umano kay ‘Maricris’.

Ayon sa pulisya, dati ng nakulong si alyas Maricris dahil sa pagkakasangkot umano sa pagtutulak ng illegal na droga. 

(Richard Mesa)

NAGWAKAS na ang maligayang araw ng 61-anyos na lolo na wanted sa kaso ng panggagahasa sa isang menor-de-edad na biktima matapos maaresto ng pulisya sa manhunt operation sa Caloocan City 

Ayon kay Caloocan Police Chief P/Col. Joey Goforth, ang akusado ay isang helper na residente ng Barangay 106, ng nasabing lungsod ay nakatala bilang No. 7 sa Top Ten Most Wanted Person sa Regional Level, No. 3 sa District Level, at No. 1 naman sa Station Level.

Sa kanyang ulat kay Northern Police District (NPD) Acting Director P/BGen. Benliner Capili, sinabi ni Col. Goforth na nakatanggap sila ng impormasyon na naispatan ang presensya ng akusado sa kanilang lugar.

Dahil dito, kaagad ikinasa ng pinagsamang mga operatiba ng Caloocan Police Intelligence Section, Investigation and Detective Management Section, Warrant and Subpoena Section, Women and Children Protection Desk, Regional Intelligence Division, at NDIT-RIU NCR ang manhunt operation hanggang sa masukol ang akusado malapit sa kanyang tirahan.

Hindi nakapalag ang akusado nang bitbitin ng mga pulis sa bisa ng multiple warrants of arrest na inisyu ng Regional Trial Court Branch 130, Caloocan City, para sa dalawang bilang ng Rape, Acts of Lasciviousness, at Lascivious Conduct in relation to Section 5(b) of R.A. 7610.

Pansamantalang nakapiit ang akusado sa Custodial Facility Unit ng Caloocan CPS habang hinihintay ang utos ng korte para sa paglilipat sa kanya sa Caloocan City Jail. (Richard Mesa)

UMABOT sa P272K halaga ng umano’y shabu ang nasamsam sa isa sa dalawang kelot na naaresto ng pulisya habang naglalaro ng ilegal na sugal sa Caloocan City, Sabado ng madaling araw.

Sa kanyang ulat kay Northern Police District (NPD) Acting Director P/BGen. Benliner Capili, kinilala ni Caloocan Police Chief P/Col. Joey Goforth ang mga suspek na sina alyas “Jerome”, 37, at alyas “Henry”, 44, kapwa ng PNR Compound, Brgy., 73, ng lungsod.

Ayon kay Col. Goforth, habang nagsasagawa foot patrol ang mga tauhan ng Police Sub-Station 3 sa DM Compound, Brgy., 73, nang maaktuhan nila ang isang grupo ng kalalakihan na naglalaro umano ng sugal na ‘cara y cruz’ dakong alas-12:30 ng madaling araw.

Nang kanilang lapitan, nagpulasan sa magkahiwalay na direksyon ang mga ito subalit, nagawang maaresto ng mga pulis ang dalawa sa kanila habang nakatakas naman ang isa.

Nasamsam sa dalawang naaresto ang P600 bet money at pangara habang ang isang knot-tied transparent plastic pack na naglalaman ng nasa 40 grams ng hinihinalang shabu na nagkakahalaga ng P272,000 ay nakuha kay umano kay alyas Jerome.

Mahaharap ang mga suspek sa kasong paglabag sa PD 1602 (Anti-illegal Gambling Law) at R.A 9165 (Comprehensive Dangerous Drug Act of 2002. (Richard Mesa)