INAPRUBAHAN ng House of Representatives sa final reading ang panukalang Anti-Political Dynasty Act na naglalayong huwag pahintulutan ang magkakamag-anak na tumakbo sa halalan.

Sa botong 267-20 at pitong abstentions, pinasa ng mga mambabatas ang House Bill No. 8389, o Anti-Political Dynasty Act, na pagbawalan ang mga magkakamag-anak na tumakbo sa halalan upang bigyan ng pagkakataon at oportunidad ang nakararaming Pilipino na magsilbi sa gobyerno.

Ang panukala ay iniakda nila Speaker Faustino “Bojie” Dy III at House Majority Leader Ferdinand Alexander “Sandro” A. Marcos ng Ilocos Norte, kasama ang 173 iba pang mambabatas bilang co-authors. Ang nasabing panukala ay isa sa mga priority measures ng Legislative-Executive Development Advisory Council (LEDAC) at inendorso ni President Ferdinand R. Marcos Jr.

Ayon kay Dy, ang HB 8389 ay tugon sa matagal na pangangailangan sa Saligang Batas na gumawa ng Anti-political dynasty law para sa mas masigasig na demokrasya

“Sa loob ng halos apat na dekada, naghihintay ang ating Saligang Batas na maisakatuparan ang pagbabawal sa political dynasties. Ngayon, kumilos ang Kamara. Isang mahalagang yugto ito sa ating demokrasya sapagkat ang isang pangakong konstitusyonal ay nagsisimula nang maging isang konkretong reporma,” ani Dy.

“This measure does not intend to target families or restrict legitimate political participation. It seeks to ensure that public office remains open to all Filipinos and that leadership is determined by the people’s trust, not by the concentration of power in a few clans.”

Nakasaad sa Article II, Section 26 ng 1987 Constitution na nag-aatas sa Estado na magbalangkas ng batas na ipagbawal ang political dynasties.

Sa ilalim HB 8389, ang depenisyon ng political dynasty ay kontrol, konsentrasyon at pagiging dominante ng isang pamilya at kanilang mga kamag anak sa loob ng second degree of consanguinity o affinity sa larangan ng politika.

Dito pinagbabawal ang mga magkakamag anak at kapamilya na humawak ng elective position sa isang lugar tulad ng national, provincial, city, municipal o maging sa barangay. Kabilang sa ipinagbabawal ang tumakbo ang magkakamag anak sa parehong congressional district para sa House of Representatives. 

Lahat ng kandidato ay kailangan mag submit ng sworn declarations sa Commission on Elections (Comelec) na ang kanilang kandidatura ay hindi saklaw ng anti-political dynasty relationship.

“This vote is bigger than any political party, family or administration. It is about giving future generations a more open and competitive democracy where public service is accessible to all who are willing and qualified to serve,” sinabi ni Dy. 

“The House has done its part. We hope this reform continues to move forward so that a constitutional promise made nearly 40 years ago can finally become a reality for the Filipino people.” (Vina de Guzman)

KULUNGAN ang kinasadlakan ng dalawang hinihinalang drug personalities nang mahuli sa akto ng pulisya na sumisinghot umano ng shabu sa magkahiwalay na lugar sa Valenzuela City.

Sa kanyang ulat kay Valenzuela Police Chief P/Col. Joseph Talento, sinabi ni Police Investigator P/MSgt. Ana Liza Antonio na nakatanggap ng SMS complaint mula sa isang concerned citizen ang mga operatiba ng Station Drug Enforcement Unit (SDEU) hinggil sa umano’y ilegal drug activities ni alyas “Renz”, 33, pedicab driver, ng J. Santiago St., Libo 1, Brgy., Malanday.

Kaagad namang inatasan ni SDEU chief P/Lt. Sherwin Dascil ang kanyang mga tauhan na puntahan ang nasabing lugar para alamin kung may katutuhanan ang naturang report.

Pagdating sa lugar, naaktuhan nina PSSg Marlon Saquing at PSSg Ed Shalom Abiertas ang suspek na abala umano sa pagsinghot ng shabu sa loob ng kanyang bahay na nagresulta sa pagkakaaresto sa kanya pasado alas-3:40 ng hapon.

Nakumpiska sa kanya ang isang plastic sachet na naglalaman ng hinihinalang shabu na nagkakahalaga ng P3,876, isang nakabukas na plastic sachet na may bahid ng umano’y shabu at drug paraphernalias

Dakong alas-1:40 ng Huwebes ng madaling araw nang maaktuhan naman ng mga tauhan ng Police Sub-Station 2 na nagsasagawa ng anti-criminality operation ‘Oplan Galugad’ si alyas “Marlon”, 36, na gumagamit din umano ng droga sa isang parking area ng 6111B Lower Tibagan,, Barangay Gen T De Leon.

Nakuha sa kanya ang isang nakabukas na plastic sachet na may bahid ng umano’y ng shabu at drug paraphernalias.

Isinailalim na ang mga suspek sa inquest proceedings sa Valenzuela City Prosecutors Office kaugnay sa kasong paglabag sa R.A 9165 o ang Comprehensive Dangerous Drug Act of 2002. (Richard Mesa)

NAKAHANDA ang Northern Police District (NPD), sa ilalim ng pamumuno ni Acting District Director P/BGen. Benliner Capili sa Balik-Eskwela upang matiyak ang ligtas, at maayos na pagbubukas ng mga klase para sa School Year 2026–2027 sa Hunyo 8, 2026.

Bilang suporta sa mga paaralan, nagpakalat na ang NPD ng mga security at traffic management para sa mga aktibidad ng Brigada Eskwela mula Hunyo 1 hanggang 5, 2026, upang matiyak ang maayos na pagsasagawa ng mga hakbangin sa pagiging handa sa lahat ng paaralan sa CaMaNaVa area.

Ani Gen. Capili, nasa 1,279 police personnel ang ipapakalat sa 287 pampubliko at pribadong paaralan. Bukod pa rito, 110 Police Assistance Desks (PADs) ang itatatag sa mga estratehikong lokasyon at mga pangunahing convergence area upang magbigay ng agarang tugon sa mga insidente at pampublikong alalahanin.

Ang panukalang ito ay naglalayong palakasin ang visibility ng pulisya sa loob at paligid ng mga paaralan, mga ruta ng transportasyon, at mga kalapit na komunidad upang hadlangan ang aktibidad ng kriminal at matiyak ang kaligtasan at seguridad ng mga mag-aaral, guro, magulang, at tauhan ng paaralan.

Kaugnay nito, nahahanda na rin ang NPD sa tag-ulan upang matiyak ang kaligtasan, seguridad, at katatagan ng mga tauhan nito at ng mga pinaglilingkuran komunidad bilang pangako ng Distrito sa epektibong pagbawas at pamamahala sa panganib sa sakuna, pati na rin ang patuloy na pagpapahusay ng mga kakayahan sa pagtugon sa emerhensiya.

Sa pamamagitan ng patuloy na pagsasanay, koordinasyon sa mga katuwang na ahensya, at pinaigting na mga hakbangin sa paghahanda sa sakuna, layunin ng NPD na palakasin ang kahandaan nito sa pagtugon sa mga emerhensiya tulad ng pagbaha at iba pang kalamidad.

Binigyaang-diin ni P/BGen. Capili na nananatiling matatag ang NPD sa kanyang misyon na magbigay ng tumutugon, maaasahan, at nakatutok sa serbisyong pagpupulis, lalo na sa panahon ng krisis, bilang bahagi ng dedikasyon nito sa kaligtasan ng publiko. (Richard Mesa)

ARESTADO sa entrapment operation ng National Bureau of Investigation – Human Trafficking Division (NBI-HTRAD) ang isang indibidwal dahil sa umano’y paglabag sa Republic Act No. 9995 o Anti-Photo and Video Voyeurism Act of 2009, Republic Act No. 9262 o Anti-Violence Against Women and Their Children Act of 2004, at kasong Grave Threats at Grave Coercion, na lahat ay may kaugnayan sa Republic Act No. 10175 o Cybercrime Prevention Act of 2012.

Ang biktima, na dating kasintahan ng suspek, ay binantaan siya na ipakalat sa kanyang pamilya at mga kaibigan ang mga sensitibong bidyo niya kung hindi siya papayag na makipag-usap dito at makipagtalik.

Inutusan ng suspek ang biktima na makipagkita sa kanya noong gabi ng Hunyo 2, 2026, at tiniyak na buburahin niya ang mga sensitibong bidyo sa kanyang cellphone matapos silang magkita at matapos maibigay ng biktima ang hinihinging sekswal na pabor.

Batay sa impormasyong natanggap, nagsagawa ang NBI-HTRAD ng isang entrapment operation sa isang hotel sa Santa Cruz, Maynila, na nagresulta sa pag-aresto sa suspek at pagkakarekober ng mga kaugnay na ebidensya.

Ang suspek ay isinailalim sa inquest proceedings kaugnay ng mga paglabag sa mga umiiral na batas. (Gene Adsuara)

NAGBIBIGAY ang Pamahalaang Lungsod ng Caloocan ng libreng chemotherapy sessions (infusion therapy) sa mga pasyente ng cancer at libreng maintenance na gamot na ibibigay buwan-buwan sa mga pasyente ng diabetes sa patuloy na pagsisikap nito na bigyang-priyoridad ang kalidad at accessible na pangangalagang pangkalusugan. 

Sa pamamagitan ng pakikipagtulungan sa Prime Treatment Group (PTG), ang mga residente sa lahat ng edad na na-diagnose na may cancer ay maaaring sumailalim sa libreng chemotherapy sessions (infusion treatment) sa PTG Caloocan Chemotherapy Center, 2nd Floor, Ziti Center Caloocan, mula Lunes hanggang Sabado, 8:00 am hanggang 5:00 pm. 

Samantala, ang mga umiinom ng gamot para sa diabetes ay maaaring makakuha ng libreng maintenance na gamot sa alinmang health center sa Lungsod ng Caloocan. Ang gamot na ibinibigay sa bawat pasyente ay mabuti sa loob ng 30 araw at maaaring ibigay buwan-buwan. Bukod dito, maaari ding magbigay ng libreng insulin sa mga pasyente kung kinakailangan.

Sinabi ni Mayor Along Malapitan na nag-aalok din ang pamahalaang lungsod ng mga libreng konsultasyon sa lahat ng mga health center nito, katuwang ang PhilHealth. (Richard Mesa)

NAGHAIN ng panukala si House Senior Deputy Minority Leader at Mamamayang Liberal (ML) Partylist Rep. Leila de Lima na humihikayat sa gobyerno ng Pilipinas na gumawa ng hakbang para makasali muli sa Rome Statute ng International Criminal Court (ICC). 

Sa House Resolution (HR) No. 1056, nanawagan ang mambabatas kay Pangulong Bongbong Marcos sa pamamagitan ng Department of Foreign Affairs (DFA), na simulan ang proseso nang pagbabalik ng membership ng Pilipinas sa ICC na naaayon sa konstitusyon at batas.

“The re-accession of the Philippines to the Rome Statute of the ICC is vital to reaffirm the country’s commitment to justice and accountability and to strengthen the protection of human rights and the rule of law, aimed at deterring the commission of grave international crimes and restoring public trust in institutions of justice,” ani De Lima. “This will also reinforce the Philippines’ standing in the international community as a State that upholds its obligations under international law and defends the dignity of every human person,” she added. 

Ang ICC ay isang permanenteng international criminal tribunal na binuo upang mag-imbestiga at maghatol sa indibidwal na responsable sa mga seryosong krimen kabilang na ang genocide, crimes against humanity, war crimes, at crime of aggression. 

Ang Pilipinas ay naging State Party sa ICC noong 2011 sa ilalim ng administration ni dating Presidente Benigno S. Aquino III, kasunod na concurrence ng senado.

Noong 2018, iniutos ni dating Presidente Rodrigo Duterte ang pag-alis ng Pilipinas mula Rome Statute.

“The Philippine must rejoin the ICC as a reaffirmation of our commitment to the rule of law, justice and accountability. Kailangan nating patatagin ang mga mekanismo ng pagpapanagot sa mga pasimuno ng mga karumal-dumal na krimen, at tiyakin na makakamit ng mga biktima at ng kanilang pamilya ang hustisya,” pahayag ni De Lima. (Vina de Guzman)