TUMAOB ang isang cargo ship sa Bert 1 ng isang pribadong cement port sa Naga City, Cebu na nagresulta sa pagkamatay ng isang crew indibidwal.
Sa imbestigasyon ng Philippine Coast Guard-Central Visayas, nagkakarga ng cargo ang barko nang mangyari ang insidente.
Nagsimula umanong tumagilid ang barko sa kaliwang bahagi .
Nagbomba naman ng tubig palabas mula sa ballast tank ang mga crew upang maayos ang hindi pagiging balanse ng barko .
Gayunpaman, tumagilid naman ang barko sa kanang bahagi na naging sanhi ng pagtaob, ayon sa ulat.
Isang crew ang nasabit ang paa sa lubid at diektang nahulog sa tubig.
Pagdating sa hospital, idineklara ang crew na dead on arrival.
Samantala, isang crew member na na-trap sa loob ng engine room ang matagumpay na nailigtas matapos ang rescue operations at agad na dinala sa ospital para malapatan ng lunas .
Sa kasalukuyan, naglagay na ng oil spill boom upang pigilan ang posibleng pagtagas ng langis.
Ang cargo ship ay mayroong mahigit 15,500 litro ng diesel fuel at 500 litro ng lube oil.
Nagsimula rin ang pagsipsip ng natitirang fuel oil sa barko, uwebes habang nagpapatuloy ang imbestigasyon.
(Gene Adsuara)

INATASAN ni Pangulong Ferdinand Marcos Jr. si Department of Migrant Workers (DMW) Secretary Hans Leo Cacdac na bumiyahe patungong Dubai, United Arab Emirates (UAE), para personal na i-assess ang sitwasyon sa ground at pangasiwaan ang repatriation ng mga Pinoy na nais na umuwi ng bansa sa gitna ng patuloy na tensyon sa Gitnang Silangan.

“In fact, I know that Secretary Hans Cacdac is taking the flight to Dubai. Ang sabi ko, sumakay siya para makapag-report siya nang mabuti kung ano ba talaga ang sitwasyon doon,” ang sinabi ni Pangulong Marcos sa isang panayam sa kanya sa New York nang hingan ng tugon ukol sa mga apektadong Pinoy sa labanan.
Sinabi ng Pangulo na ang pagba-byahe sa mga Filipino ay mas madali ngayon kasunod ng pagbubukas ng land border crossings kasama ang UAE at Israel.
Tinuran pa ng Pangulo, isang grupo ng mga Filipino mula sa UAE ay darating sa Pilipinas, mamayang gabi, Marso 11 habang may 16 na Filipino naman mula sa Israel ang darating sa bansa, Marso 12.
“The target date of departure from Fujairah and the UAE is March 13, ETA Manila, gabi ng March 13 or early morning of the 14th,” ang sinabi ng Pangulo.
Winika pa ng Pangulo na may dalawang byahe para sa repatriation ang pinaplano kabilang na ang isa mula sa Riyadh, Saudi Arabia at ang isa naman ay mula sa Fujairah sa UAE.
“The government must rely on local authorities in the Middle East to protect and repatriate Filipinos,” ang dagdag na pahayag ng Pangulo.
Aniya pa, nakatatanggap naman ng tulong ang OFWs sa foreign countries dahil sa kanilang magandang pagganap sa tungkulin.
(Daris Jose)

NANAWAGAN si Deputy Speaker Janette “Doc Nanay” Garin ng Iloilo nitong Huwebes ng mas matatag na programa laban sa tumataas na kaso ng obesity o labis na katabaan.
“Dahil sa mga processed food, mas bumibilis ang pag-gain ng timbang natin. Mahalaga talaga ang balanced diet at proper exercise,” pahayag ni Garin.
Ang labis na katabaan o sobra sa timbang ng isang tao ay kadalasang nauuwi sa diabetes, heart disease, at chronic kidney disease.
Ang Body Mass Index (BMI) na 25 kg/m² o mas mataas pa sa isang tao ay maaaring sobra sa timbang o may katabaan.
Ayon sa pag aaral ng Epidemiological Burden and Cost of Obesity in the Philippines (EpiCOb-PH) mga 41 percent ng Filipino adults o 29.5 million katao ay sobra sa timbang o may katabaan.
Binanggit din ng EpiCOb-PH ang epekto nito sa ekonomiya. Nitong 2025, ang sobrang katabaan ng isang tao ay nakakaapekto sa ekonomiya sa halagang P2.70 trillion na gastos, dulot ng healthcare costs at productivity losses.
Ayon kay Garin, ang katabaan o sobrang timbang ay maituturing na serious public health concern na kinakailangang tugunan agad.
“Ingatan natin ang ating kalusugan. Dahil sa obesity posibleng humantong ito diabetes, sakit sa puso, at iba pang malulubhang karamdaman,” pahayag ni Garin, dating Secretary ng Department of Health (DOH).
Nanawagan si Garin sa mga government agencies, communities, schools, at mga pamilya na patuloy na itaguyod ang healthier lifestyles.
“Responsibilidad ng buong komunidad ang matiyak ang mas malusog na kinabukasan para sa ating mga kababayan,” sinabi ni Garin. (Vina de Guzman)