KINALAMPAG ni Speaker Faustino “Bojie” G. Dy III ang Department of Budget and Management (DBM) sa pagkaka-delay sa pagpapalabas ng pondo kasabay nang bababala na ang mabagal na disbursement ay nangangahulugan nang mabagal na pagbibigay serbisyo sa mga Pilipino.

Sa kanyang closing speech sa adjourned ng Kamara para sa selebrasyon ng Mahal na Araw, hinikayat ni Dy ang DBM na agad kumilos at siguruhin ang agarang pagpapatupad ng mga government programs.

“Kaya naman po sa mga kaibigan natin sa DBM, ayusin ninyo naman ang inyong trabaho. Bilis-bilisan ninyo naman ang inyong mga pagkilos. Gawin ninyo naman ang inyong mga tungkulin para maging maayos at maipatupad na ang mga programang sasagot sa kasalukuyang pangangailangan ng ating mga kababayan sa iba’t ibang mga rehiyon,” anang speaker.

Nagbabala pa ang speaker na ang mga delay na ito ay nakaka-epekto sa publiko lalo na yaong naghihintay ng government assistance.

“Huwag ninyong sayangin ang oras at huwag na huwag nating paghintayin ang taumbayan. ‘Ika nga, aanhin mo pa ang damo kung patay na ang kabayo? Ang serbisyo ay may halaga at mararamdaman lamang kung ito’y naipararating sa tamang oras,” aniya.

Nagawa na aniya ng kongreso ang parte nito sa pamamagitan ng pagpasa ng mga batas at paglalaan ng alokasyon ng pondo para sa priority programs.

Iginiit naman nito na walang kabuluhan ang lehislasyon at pondo kung wala ang napapanahong implementasyon.

“Ngunit upang maging ganap na epektibo ang mga hangaring ito, kinakailangan nating tiyakin na ang mga pondong inilaan ng Kongreso ay makarating sa mga mamamayan nang maagap. Dahil ang batas na hindi naipapatupad ay nananatiling isang papel na walang halaga at ang serbisyo na hindi nakakarating sa tao ay huwad na paglilingkod,. Kahit po maganda ang naipasang budget, it will mean nothing if the resources for the people do not reach them on time,” dagdag nito.
(Vina de Guzman)

NANUMPA na para sa kanyang bagong posisyon si dating Environment Secretary Maria Antonia Yulo-Loyzaga bilang Special Envoy for Disaster Risk Reduction and Management (DRRM) sa isang seremonya sa Palasyo ng Malakanyang.
Sa oath-taking ceremony, binati ni Pangulong Marcos si Yulo-Loyzaga sa kanyang pagkakatalaga at nagpahayag ng pasasalamat sa pagtanggap nito para sa kanyang magiging bagong papel, tinukoy ang kanyang malawak na kadalubhasaan sa disaster resilience management.
Ipinaabot din ng Pangulo ang kanyang buong suporta para sa bagong special envoy dahil na rin pagsusulong nito sa agenda ng administrasyon sa climate action, renewable energy integration, at disaster risk reduction.
Nagpahayag naman ng kumpiyansa si Pangulong Marcos na mapagtatagumpayan ang environmental governance at tumulong na makapagtayo ng mas matibay na bansa.
Si Yulo-Loyzaga ay nagsilbi bilang Kalihim ng Department of Environment and Natural Resources (DENR) mula 2022 hanggang 2025. Bago pa ang kanyang appointment, nagsilbi muna siya bilang director ng United Nations International Office for Disaster Risk Reduction (UNDRR) Alliance for Disaster Resilient Societies sa loob ng dalawang taon.
Nagsilbi rin siya bilang pangulo ng National Resilience Council at naging miyembro ng UNDRR Asia Pacific Science and Technology Advisory Group.
Nagsilbi rin siya bilang executive director ng Manila Observatory mula 2007 hanggang 2016.
Nakamit ni Yulo-Loyzaga ang Bachelor of Arts in Political Science mula Ateneo de Manila University at Master of Arts in Government mula Georgetown University in Washington, D.C. (Daris Jose)

TINIYAK ni Pangulong Ferdinand Marcos Jr. na normal pa rin ang buhay ng mga filipino sa kabila ng sumirit na presyo ng langis sa nakalipas na linggo dala ng umiiral na tensyon sa Gitnang Silangan.

”Sana matapos na ang giyera, at habang may giyera pa rin, eh normal pa rin ang buhay ng ating… lalo na ‘yung mga manggagawa,” ayon kay Pangulong Marcos sa isang panayam sa Mariveles, Bataan.

Sinabi pa ni Pangulong Marcos na tinitingnan ng gobyerno ang iba pang hakbang para magbigay ng subsidies para sa mga sektor na apektado ng krisis, sabay sabing ayaw niyang mangamba ang publiko.
”So, we are trying to find different methods para makapagbigay ng subsidy, para makapagbigay ng tulong. The problem is masyadong malikot ang presyo ng langis. Hindi natin ma-anticipate. So we are still adjusting right now,” ang sinabi ni Pangulong Marcos.

”But I think so far kahit papaano, we will be able to soften the blow ika nga. Basta’t we want to keep –as much as possible huwag pong mag-alala ang tao,” dagdag na pahayag ng Chief Executive.

Nauna rito, nagsagawa ng nationwide transport strike, araw ng Huwebes ang transport group Piston at progressive alliance Bagong Alyansang Makabayan (Bayan) bilang protesta sa patuloy na pagtaas ng presyo ng langis.

Nagtipon ang mga nagprotesta sa Welcome Rotonda sa Quezon City para sa press conference bago simulan ang kilos-protesta, na inaasahang makakaapekto sa pangunahing ruta sa bansa.
Humiling ang mga grupo ng agarang aksyon mula sa gobyerno, kabilang ang pagtanggal ng VAT at excise tax sa gasolina at rollback ng presyo sa P55 kada litro.
Bukod sa presyo ng langis, nanawagan rin sila ng P5 dagdag-pasahe sa lahat ng PUV, P1,200 dagdag-sahod para sa lahat ng manggagawa, at agarang cost-of-living subsidy para sa lahat ng apektadong sektor.
Ang transport strike ay sumunod sa utos ni Pangulong Marcos na ipagpaliban ang naunang anunsiyong taas-pasahe at magbigay ng libreng sakay sa mga pasahero.
Dahil sa tensiyon sa Gitnang Silangan dulot ng digmaan ng US-Israel at Iran, na halos nagdulot ng mataas na presyo ng langis, nagpapatupad ang Pilipinas ng apat na araw na workweek para sa mga kawani ng gobyerno, pamimigay ng cash aid sa tricycle drivers, at pagsasaalang-alang ng pagbili ng langis mula sa Russia ng tanging refinery sa bansa. (Daris Jose)