PINULONG ng Kamara ang mga key government agencies at Philippine diplomatic posts nitong Miyerkules upang suriin ang kakayanan ng gobyerno na tugunan ang problema ng mga Overseas Filipino Workers (OFWs) na naipit sa lumalalang kaguluhan sa Middle East.
“Ang Kapulungan ng mga Kinatawan po ay patuloy na ginagampanan ang mandato nitong pangalagaan ang kapakanan ng sambayanang Pilipino. Kasama po ng aking kapwa-mambabatas at ng iba’t ibang komite, kami po ay walang humpay na magsusulong ng mga priority bills at mga hakbang na makakatulong upang mapagaan ang epekto ng mga pandaigdigang krisis sa ating mga kababayan,” sinabi ni Speaker Faustino “Bojie” G. Dy III ng Isabela.
Ang pagpupulong ay isinagawa ng House Committee on Foreign Affairs sa panguguna ni Pangasinan Rep. Maria Rachel Arenas at Committee on Overseas Workers Affairs ni Agimat Party-list Rep. Bryan Revilla. Nakatuon ang diskusyon sa mga hakbang ng gobyerno kung sakaling lumala ang sitwasyon sa rehiyon.
Ang diskusyon ay nilahukan ng mga opisyales ng Department of Foreign Affairs (DFA), Department of Migrant Workers (DMW), Overseas Workers Welfare Administration (OWWA), Department of National Defense (DND), at Department of Budget and Management (DBM).
Ilang mga opisyales ng mga Philippine embassies at representations sa Middle East ay lumahok sa pamamagitan ng video conference. Sinabi ni Arenas na ang joint hearing isinagawa sa gitna ng lumalalang kaguluhan sa rehiyon.
“For the Philippines, these hostilities are not mere peripheral events or secondary concerns. They constitute a protracted humanitarian emergency that poses a clear and present danger to our nationals. With 2,500,000 Filipinos in the region, we are not just observers of this war. We are a nation with a deep human stake in its resolution,” pahayag ni Arenas.
Idinagdag ni Arenas ang sinabi ni Pangulong Ferdinand R. Marcos Jr. : “We are victims of a war that is not of our choosing, but we control how we will protect the Filipino.”
Ipinaliwanag ni Arenas ang ginawang briefing ay upang malaman ang kakayanan ng mga ahensiya ng gobyerno na tugunan ang sitwasyon ng mga OFWs sa rehiyon, kabilang ang posibilidad na gamitin ang P2 billion action fund ng gobyerno, contingency evacuation corridors sa dagat o lupa kahit may airspace restrictions, at welfare support sa mga Filipino na piniling manatili muna habang naghihintay ng katiyakan sa repatriation.
“Sa mga sandaling ito, hindi sapat ang milagro—kailangan ang mabilis, malinaw, at kongkretong aksyon mula sa ating pamahalaan,” pahayag naman ni Revilla.
“Caught in the midst of artillery crossfire and drone warfare, it is our heroes who now need rescuing/ Our duty to our OFWs is not only paramount—it is urgent, immediate, and non-negotiable. This meeting must not end with merely warm words or comforting assurances. It must conclude with the beginning of accountability and decisive action,” dagdag ni Revilla.
(Vina de Guzman)

NAMAHAGI ang Pamahalaang Lungsod ng Caloocan ng 100 bisikleta sa mga tauhan ng Public Safety and Traffic Management Department (PSTMD) at Caloocan City Police Station (CCPS) bilang alternatibong paraan ng transportasyon alinsunod sa mga panawagan para sa mahigpit na pagpapatupad ng mga hakbang sa pagtitipid ng enerhiya sa pamahalaan.

Sa ilalim ng Executive Order 007-26, na pinagtibay mula sa Presidential Memorandum Circular No. 114 na inilabas ng Malacañang, ang hakbang ng pamahalaang lungsod ay naglalayon na asahan ang posibleng pagtaas ng presyo ng petrolyo at kakulangan na dulot ng kasalukuyang kalagayan ng pandaigdigang gawain sa pamamagitan ng pagbawas sa konsumo sa mahigit labinlimang porsyento ng kasalukuyang paggamit.

Hinikayat ni Mayor Dale Gonzalo “Along” Malapitan ang iba pang tauhan ng pamahalaang lungsod na mahigpit na sumunod sa komprehensibong mga hakbang sa pagtitipid ng enerhiya na nakasaad sa Executive Order at subukan din ang mga alternatibong paraan ng paglalakbay papunta at pabalik sa city hall hangga’t maaari.

“Bilang mga public servant, may mandato po tayo na maging ehemplo para sa ating mga mamamayan sa wastong paggamit ng kuryente at enerhiya upang maibsan ang mga posibleng epekto ng digmaan sa Middle East,” ani Mayor Along.

“Panawagan ko po sa lahat, huwag tayong mag-aksaya ng kuryente at gasolina at kung maaari, subukan natin ang iba pang paraan ng transportasyon papunta sa ating mga paroroonan,” dagdag niya. (Richard Mesa)

PINANGUNAHAN ni Mayor John Rey Tiangco ang ceremonial turnover ng hard hats para sa mga mag-aaral sa Navotas City bilang bahagi ng mas pinaigting na paghahanda nito sa mga sakuna tulad ng lindol.

Ani alkalde, naniniwala siya na ang kahandaan ay nagsisimula sa kaalaman at tamang kagamitan. Sa pamamagitan aniya ng mga ganitong hakbang, mas natutulungan maging handa at manatiling ligtas ang mga kabataan sa oras ng emergency.

Dagdag niya, patuloy ang lokal na pamahalaan ng Navotas sa pagpapatupad ng mga programa at hakbang upang matiyak na ang bawat sektor ng komunidad, mga bata, pamilya, at buong pamayanan ay handa at protektado sa panahon ng sakuna.

Layunin aniya ng programa: NavReady — Handang Pamilya, Matatag na Lungsod. (Richard Mesa)