TULUYAN nang binuksan ang bagong renovate na Emergency Room ng Ospital ng Sampaloc at pinasinayaan ni Manila Mayor Isko Moreno.

Natapos o nakumpleto ang pasilidad sa loob ng 90 araw gaya na rin ng ipinangako ng alkalde.

Sumasalamin ang proyektong ito sa “Bilis Kilos” na pamamaraan ng administrasyon ni Domagoso na nagbibigay-diin sa pangangailangan nang mabilis na aksyon at napapanahong solusyon upang mapabuti ang mga serbisyong medical emergency para sa mga Manileno.

“Sabi ko sa inyo, 90 araw, ipinangako ko ito sa mga tao ng Sampaloc. Basta bigyan n’ yo lang ako ng 90 araw. Pero masaya ako, natapos agad bago mag-90 araw,” pahayag ng alkalde.

Idinisenyo ang bagong emergency room upang tugunan ang matagal nang isyu sa kaligtasan sa mga pampublikong ospital kung saan binanggit ni Mayor Isko ang mga nakaraang kalagayan ng mga pasyente at health care personnel.

Ang pasilidad ngayon ay may malinaw na minarkahang triage at treatment areas, nurse stations, minor operationg rooms, modernong hospital beds at embedded oxygen system kasama ang mga na-upgrade na support spaces tulad ng pharmacy window at accessible restrooms.

Binigyang-diin din ni Domagoso ang kamakailang paglabas ng matagal nang na-delay na Health Emergency Allowance (HEA) payments sa mga contact tracers at medical frontliners na nakatanggap ng hanggang P72,000 matapos ang halos tatlong taong paghintay.
Kasama ng alkalde si Vice Mayor Chi Atienza at iba pang mataas na opisyal ng pamahalaang lungsod at nang naturang ospital. (Gene Adsuara)

SA evacuation center na magdiriwang ng Pasko ang may 114 na pamilyang nawalan ng tirahan sa malaking sunog na tumupok sa mahigit 80-kabahayan sa Navotas City, Linggo ng gabi.
Batay sa ulat, sumiklab ang sunog alas-11:15 ng gabi sa Tambak 2 Street, Brgy Tanza 2 na mabilis na kumalat ang apoy sa magkakadikit na kabahayan na karamihan ay gawa sa light materials kaya’t itinaas kaagad sa ika-apat na alarma dakong alas-11:58.
Mabilis namang rumesponde sa lugar ang mga tauhan ng Bureau of Fire Protection (BFP) at Fire Volunteers na nagtulung-tulong sa pag-apula ng
sunog na ideklarang kontrolado alas-12:53 ng hating gabi.
Labis ang paghihinagpis ng maraming residente dahil wala silang naisalbang gamit bunga ng mabilis na pagkalat ng apoy na hinihinalang sanhi ng hindi maayos na koneksiyon ng kuryente.

Nagtungo naman sa lugar si Mayor John Rey Tiangco at inatasan ang mga opisyal ng kaukulang departamento na tulungang ilikas ang mga nasunugan sa Tanza National High School upang doon makatanggap kaagad ng kaukulang tulong.
Personal din na binisita ni Congressman Toby Tiangco para kamustahin ang kalagayan ng mga nasunugan na kasalukuyang nasa evacuation center sa Tanza National High School.
Dakong ala-1:33 ng Lunes ng madaling araw nang tuluyang naapula ang apoy habang wala namang iniulat na nasawi sa naturang sunog at inaalam pa ang halaga ng natupok na mga ari-arian.
Paalala ni Mayor Tiangco, habang abala aniya tayo sa mga pagdiriwang, mag-iingat din po tayo para maiwasan ang mga sakunang tulad nito.
(Richard Mesa)

AGAD na pagkalap o pagkuha ng listahan at pagpapalabas sa publiko ito ang panawagan ni Deputy Minority Leader at ACT Teachers Party-list Representative Antonio Tinio.
Kaugnay ito sa listahan ng mga project proponents na nabuo umano ng yumaong si Undersecretary Maria Catalina Cabral sa buong mga taon ng kanyang panunungkulan sa DPWH.
Kabilang na rito ang detalyado umanong 2025 listahan ng mga proponents.
“Such lists could be crucial in establishing the circumstances surrounding Usec. Cabral’s death and identifying all individuals involved in the systematic plunder of DPWH funds,” ani Tinio.
Kailangan aniyang mai-secure ang nasabing mga dokumento bago umano ito maitago, mawala o masira at ilabas agad ito sa publiko upang masiguro na mayroong accountability at transparency sa isinasagawang imbestigasyon.
“It is true that Usec. Cabral was a key player in the massive and systematic plunder of DPWH funds. For sure, she knew a lot, could name a lot of names, and the dead tell no tales,” pahayag pa ni Tinio.
(Vina de Guzman)

MAY posibilidad na maaresto ang business tycoon na si Atong Ang kaugnay sa isyu o kasong kinakaharap niya sa mga nawawalang mga sabungeros.
Sa kumpirmasyon ni DOJ Spokesperson Atty. Polo Martinez, pormal nang naisampa ang kaso laban kay Ang at 20 iba pang indibidwal sa ilang mga regional trial courts kaugnayan sa 10 counts of Kidnapping with Homicide at 16 counts of Kidnapping with Serious Illegal Detencion.

Ayon kay Atty. Martinez, naihain ang kaso noong Biyernes sa Lipa City, Batangas, Sta.Cruz, Laguna at San Pablo, Laguna

Ipinaliwanag ng DOJ na batay sa Revised Rules of Criminal Procedure, ang mga hukuman kung saan inihain ang mga kaso ang siyang magsusuri kung may umiiral na probable cause, batay sa mga ebidensiyang isinumite at sa resolusyon ng panel of prosecutors.

Maglalabas naman ng kaukulang warrant of arrest ang DOJ laban sa mga akusado kapag natukoy ng korte na may sapat na batayan.

Idinawit ng whistleblower na si Julie “Dondon” Patidongan si Atong Ang sa pagkawala ng mga sabungeros.

Sa resolusyon nito, natuklasan ng mga prosecutor na ang sinumpaang pag-amin ni Patidongan at kanyang kapatid na si Ellakim ay nagpatunay na si Ang ay umano’y nagsagawa ng command responsibility at aktibong panghihikayat sa mga oeprasyon ng kidnapping.
(Gene Adsuara)