SINABI ng Malakanyang na hindi pa naitatakda ang miting ni Pangulong Ferdinand Marcos Jr. sa mga stakeholders para pag-usapan ang online gambling.

Ito ang naging pahayag ni Presidential Communications Office (PCO) Undersecretary at Palace Press Officer Claire Castro nang tanungin kung kailan maaasahan ng publiko ang pinal na desisyon hinggil sa polisiya ukol sa online gambling upang ang anumang mga pagbabago ay maisasaalang-alang sa plano ng paggasta para sa susunod na taon.

”Actually, nakausap po natin ang DBM [Department of Budget and Management] at ngayon po kasi sila magsusumite ng budget o ng NEP, at ang panukala naman ng Pangulo na makausap ang mga stakeholders kasama na po ang representative mula sa mga simbahan ay hindi pa po ito nai-schedule as of the moment,” ang sinabi ni Castro.

”Ito pa lamang po ay kasasabi ng ating Pangulo lalong-lalo na doon sa MPC [Malacañang Press Corps] sa India. So, mag-i-schedule pa lamang po ang Pangulo para po makausap ang lahat ng maaaring mga concerned parties para maisagawa ang sapat na pag-aaral patungkol sa online gaming,” aniya pa rin.

Nauna rito, sinabi ni Pangulong Marcos na plano niyang bumuo ng polisiya sa online gambling at isama ang simbahan sa konsultasyon.

Winika ng Chief Executive na hindi ang online gambling ang problema kundi ang social effects sa mga kabataan at sa mga taong adik sa sugal.

Nauna nang iginiit ng ilang mambabatas ang pangangailangan ng agarang pagbabawal sa online gambling, dahil sa epekto nito sa lipunan.

Maging ang ilang digital finance companies ay nananawagan din ng regulasyon o total ban para mas maprotektahan ang mga konsyumer at mapababa ang mga panganib na kaakibat ng e-gambling.

Pinag-aaralan na rin ng pamahalaan ang mga panawagang ipagbawal ang online gambling at ang posibleng epekto nito sa ekonomiya at mamamayan ng bansa.

Samantala, hindi naman sapat para kay Sen. Win Gatchalian ang mga kasalukuyang restriksyon ng GCash laban sa mga e-gambling ads.

Ayon sa senador, sa dami ng Filipinong umaasa sa e-wallets gaya ng GCash, Maya, at Coins.ph, iginiit niya na mas malaki ang kanilang obligasyon na protektahan ang publiko—lalo na ang mga kabataan—laban sa mapanlinlang at mapanirang bisyo ng sugal.

Hinimok din ni Gatchalian ang mga kinauukulang ahensya ng gobyerno na higpitan ang regulasyon sa mga digital financial platforms upang hindi ito magamit bilang kasangkapan sa pagsusugal. ( Daris Jose)

PINANINDIGAN ni Vice President Sara Duterte ang kanyang tiwala at kumpiyansa kay Atty. Nicholas Kaufman sa paghawak sa kaso ng kanyang ama na si dating Pangulong Rodrigo Duterte na nakahain sa International Criminal Court (ICC).

Ipinahayag ito ni VP Sara habang papalapit na ang pagdinig sa ‘confirmation of charges’ ng kanyang ama sa ICC — na nakatakda sa Sept. 23.

“Of course, yes. Because she was the lawyer chosen by former president Duterte, so we simply follow the client’s choice,” ang sinabi ni VP Sara sa isang panayam nang tanungin ukol sa kanyang tiwala at kumpiyansa kay Kaufman.

“So as long as the former President Duterte says, `he is my lawyer,’ we will follow and cooperate with whatever the legal team needs,”dagdag na pahayag nito.

Kasalukuyang nasa kustodiya ng ICC ang dating Pangulong Duterte matapos siyang arestuhin at ipadala sa The Hague, Netherlands, para sa crimes against humanity na di umano’y kanyang nagawa sa panahon ng kanyang ‘war against drugs.’

Ang war on drugs ng dating Pangulo ay nagresulta sa pagkasawi ng 6,000 katao habang ang ulat naman ng human rights groups ay umabot ito ng 20,000.

(Daris Jose)

UPANG mailigtas ang libu-libong sanggol sa pamamagitan ng tamang pangangalaga pagkatapos ng panganganak, naghain si Cavite  Rep. Lani Mercado-Revilla ng House Bill No. 2335 o ang “Unang Yakap Act of 2025.”

Layon nitong maipatupad ang Essential Intrapartum and Newborn Care (EINC) protocol ng Department of Health (DOH) sa lahat ng pasilidad pangkalusugan sa buong bansa.

Batay sa datos ng UNICEF, 22 sa bawat 1,000 na mga sanggol na ipinapanganak nang buhay sa Pilipinas ay hindi nakakaligtas.

Ipinapakita ng nakababahalang bilang na ito ang pangangailangang ipatupad ang Unang Yakap protocol.

Inilunsad ng DOH noong 2009 at suportado ng World Health Organization at UNICEF, ang Unang Yakap protocol ay simple at mabisang mga hakbang na napatunayang nakakapagligtas ng buhay ng mga bagong silang na sanggol.

Kasama sa protocol ang immediate drying ng sanggol, skin-to-skin contact, tamang oras ng cord clamping, at pagsisimula ng breastfeeding sa loob ng unang oras.

Bukod sa proteksiyon laban sa impeksiyon, nakatutulong din ito sa pagpapanatili ng tamang temperatura ng katawan at pagtatag ng matagumpay na breastfeeding.

Sa kabila ng mga napatunayang benepisyo, nananatiling optional ang pagpapatupad ng Unang Yakap protocol sa ating mga health facilities dahil sa kakulangan ng institutionalized support at mechanisms for compliance.

Tinutuunan ng panukalang batas ang mga puwang na ito sa pamamagitan ng pagbibigay ng regular na pagsasanay para sa mga health worker, pagpapalawak ng coverage ng PhilHealth, at pagsasagawa ng national awareness campaign.

Dagdag ng mambabatas,  ang Unang Yakap protocol ay kaugnay sa Republic Act 11148 o ang “Kalusugan at Nutrisyon ng Mag-Nanay Act,” na nagbibigay ng integrated strategy upang matugunan ang kalusugan ng ina, kalusugan ng bata, at nutrisyon sa unang 1,000 araw ng buhay ng isang bata. (Vina de Guzman)

NAHATULANG  guilty sa grave misconduct ang isang Fire Inspector na naaresto ng National Bureau of Investigation -Central Visayas Regional Office dahil sa robbery/extortion.

Nag-ugat ang operasyon kasunod ng reklamong inihain ng aplikante ng BFP laban kay Roy Sangueza Mat. Castro sa umano’y pangingikil sa isang aplikante.

Ayon sa NBI, hiningan ni Castro ang aplikante ng malaking halaga kapalit ang ‘approval’ ng kanyang aplikasyon.

Giit ng complainant, naisumite na ang lahat ng kanyang requirements at kwalipikado naman para sa posisyong inaaplayan.

Hinala niya na ang aplikasyon niya’y hindi naaprubahan o ‘denied’ dahil sa kawalan aniya ng ‘backer’.

Dito naibahagi ng complainant na hiningan umano siya ni Castro ng P400,000 bilang ‘thanksgiving money’ sa pagkakapasok nito sa final roster ng mga kandidato para Fire Safety Officers.

Ito ang dahilan kaya agad na ikinasa ng NBI ang ‘entrapment operation’ sa Cebu City na nagresulta naman sa pagkakaaresto sa naturang opisyal ng BFP.

Kasong paglabag sa Section 3 ng R.A. No. 3019 o ang Anti-Graft and Corrupt Practices Act, Direct Bribery, at Grave Misconduct sa office of the Ombudsman ang kinakaharap ng opisyal.

Sa resolusyong inilabas naman ng Ombudsman, napatunayang ‘liable’ si Roy Sangueza Castro, opisyal ng BFP sa paglabag ng Section 7 (d) ng R.A. No. 613 at Grave Misconduct.

Bukod dito, natanggal din mula sa serbisyo ang naturang opisyal at naparusahan pa ng ‘perpetual disqualification’ na makaupong muli sa anumang posisyon sa gobyerno, kasama ang ‘forfeiture’ ng retirement benefits at kanselasyon ng Ciivil Service Eligibility nito. (Gene Adsuara)

MULING inaresto ng pulisya sa loob ng selda ang isang lalaki na unang nadakip sa anti-illegal gambling operation nang mabistong wanted sa labing-isang bilang ng panggagahasa sa Malabon City.

          Batay sa ulat, nakapiit sa custodial facility unit ng Malabon Police ang 39-anyos na lalaki na residente ng Brgy. Catmon matapos maaresto ng mga tauhan ni Malabon Police Acting chief P/Col. Allan Umipig sa anti-gambling operation nang mahuli sa aktong nasusugal ng ‘cara y cruz’.

          Nang tignan ang kanyang record, nadiskubre ng pulisya na wanted ang suspek sa 11 counts of Rape under Article 266-A of the Revised Penal Code, as amended by R.A. 8353 kaya agad inatasan ni Col. Umipig ang kanyang mga tauhan na arestuhin ang akusado.

          Dakong alas-10:55 ng umaga nang isilbi ng mga tauhan ng Warrant and Subpoena Section (WSS) sa akusado sa loob ng selda ang warrant of arrest na inisyu ng Regional Trial Court (RTC) Branch 170, Malabon City, noong August 6, 2025 para sa 11 counts of Rape na walang inirekomendang piyansa.

          Pinuri naman ni P/BGen. Jerry Protacio, Acting District Director ng Northern Police District, ang pagsisikap at dedikasyon ng arresting team, na nagbibigay-diin na ang naturang operasyon ay sumasalamin sa hindi natitinag na pangako ng PNP sa pagdadala ng mga pugante sa hustisya. (Richard Mesa)

KALABOSO ang isang mister na wanted sa kaso ng pangmomolestiya sa isang menor-de-edad matapos madakma ng pulisya sa manhunt operation sa Valenzuela City.

Sa ulat, ikinasa ng mga tauhan ni P/Lt. Col. Emmanuel Gomez, OIC chief ng Special Operations Unit (DSOU) ng Northern Police District (NPD) ang pagtugis sa 52-anyos na lalaking akusado na residente ng lungsod.

Ayon kay Lt. Col. Gomez, ang akusado ay wanted sa kasong Acts of Lasciviousness in relation to Republic Act 7610 (Special Protection of Children Against Abuse, Exploitation, and Discrimination Act) at paglabag sa Section 4(A) of Republic Act 9995 (Anti-Photo and Voyeurism Act of 2009).

Dakong alas-8:00 ng umaga nang tuluyan masukol ng tumutugus na mga operatiba ng DSOU sa Brgy. Gen T D Leon ang akusado na kabilang sa talaan ng mga Most Wanted Person ng Valenzuela police.

Hindi naman umano pumalag ang askusado nang isilbi sa kanya ng pulisya ang warrant of arrest na inisyu ng Valenzuela City Regional Trial Court, Family Court, Branch 16, noong August 8, 2025 n may inirekomendang piyansa na P180,000.00 at P42,000.00, respectively.

Pansamantalang nakapiit ang akusado sa Custodial Facility Unit ng NPD habang hinihintay ang utos mula sa korte para sa paglilipat sa kanya sa Valenzuel City Jail.

Pinapurihan naman ni P/BGen. Jerry Protacio, Acting District Director ng NPD, ang dedikasyon at pagsisikap ng arresting units, na nagbibigay-diin na ang naturang operasyon ay sumasalamin sa hindi natitinag na pangako ng PNP sa pagdadala ng mga pugante sa hustisya. (Richard Mesa)

IBINAHAGI ni Navotas Mayor John Rey Tiangco ang lumalagong tungkulin ng lungsod bilang pambansang hub para sa smart cold chain logistics at Blue Economy sa 2025 Metro Manila Business Conference na ginanap noong Huwebes sa Quezon City.

Sa pagsasalita niya sa harap ng mga lider ng negosyo, mga grupo ng kalakalan, at mga opisyal ng gobyerno, sinabi ni Tiangco na ang Navotas ay hindi lamang nakikilahok sa industriya ng cold chain ngunit “shaping it,” idinagdag na ang imprastraktura at sektoral na pamunuan ng lungsod ay pumuwesto dito bilang Cold Chain Capital ng Rehiyon.

“Cold storage is more than just a facility — it is a foundation,” ani Tiangco. “It protects our food, supports our workers, and builds a stronger economy.”

Binanggit ni Tiangco na mahigit 70 porsiyento ng lokal na ekonomiya ng Navotas ay direktang nakatali sa pangingisda at mga kaugnay na serbisyo, kabilang ang pagpoproseso ng seafood, produksyon ng yelo, at transportasyon.

Nagbabala siya na ang pambansang pagkalugi pagkatapos ng ani sa mga pangisdaan ay nananatiling mataas, na umaabot ng hanggang 40 porsiyento, higit sa lahat dahil sa hindi sapat na cold storage at hindi mahusay na paghawak.

“For Navotas, cold storage and logistics are economic lifelines. Strengthening them means preserving value, dignity, and opportunity, not just for our city, but for the broader supply chain that depends on us.” aniya.

Upang matugunan ito, sinabi ni Tiangco na ang lungsod ay namuhunan nang malaki sa imprastraktura ng cold chain, na ngayon ay may 37 rehistradong cold storage facility na nagsisilbi ng mga nabubulok na kalakal, kabilang ang pagkaing-dagat, karne, manok, at prutas.

Navotas din aniya ang 27 sa 74 BFAR-accredited cold storage facility ng Metro Manila o 36 porsiyento ng kabuuan ng rehiyon. Ang mga pasilidad na ito ay nag-aambag ng higit sa 26,700 metriko tonelada o 38.26 porsiyento ng kabuuang dami ng cold storage ng rehiyon.

“Navotas is home to the country’s largest fish port and a growing network of smart cold storage systems,” sabi ni Tiangco. “This makes us a crucial link in the nation’s food value chain.”

Kabilang sa key players na tumatakbo sa Navotas ay ang Sigma Cold Storage Inc., Polaris Cold Chain Solutions, Frabelle Cold Storage, Crystal Cold Storage, at Belen & Sons Commodities Inc. Tumutulong ang mga kumpanyang ito na matiyak ang kaligtasan ng pagkain at kalidad ng produkto mula sa huli hanggang sa mamimili.

Kinilala rin ni Tiangco ang kritikal na papel ng mga seafood processor tulad ng Maunlad Canning Corporation, Kai Anya Foods International, at ATR Quality Patis sa paggawa ng sariwang marine catch sa mga shelf-stable na produkto sa pamamagitan ng canning, bottling, fermenting, at freezing.

Ipinaliwanag niya na maraming cold storage facility sa Navotas ang gumagana gamit ang mga smart feature, kabilang ang mga automated temperature controls, GPS tracking, real-time monitoring, at digital inventory system.

Ang ilan ay nag-aalok din ng dockside weighing at 24/7 na serbisyo, na ginagawang mahusay at tumutugon sa mga hinihingi sa kalakalan.

“These facilities must be inclusive and accessible to micro and small enterprises,” aniya. “Cold storage should not be seen as just infrastructure, but as a strategic pillar of food security.”. (Richard Mesa)

OPISYAL na inilunsad ni Pangulong Ferdinand Marcos Jr., ang sumbongsapangulo.phhttps://sumbongsapangulo.ph/, isang online platform na dinisenyo para magbigay sa publiko ng ‘access to information’ ukol sa flood control projects sa buong bansa habang pinapayagan ang mga mamamayan na magsumbong ng anumang iregularidad.

“(We) put it into a form that is accessible to the public, and most importantly, it is in a form that the public can use so that they can first identify the flood control projects that are within their area,” ang sinabi ni Pangulong Marcos.

“If they already have information, they can tell us about it. Kung maganda ang naging project, kung hindi naging maganda yung project, anong naging problema,” aniya pa rin.

Sinabi ng Pangulo na mahalaga ang partisipasyon ng mga mamamayan sa pagmamatyag at paghuli ng mga maanomalya at tiyakin ang transparency sa implementasyon ng P545-billion flood control program simula mid-July 2022 nang magsimula ang kanyang termino.

“Of course, we want the people who have taken advantage of the system to pay. And if there is evidence of corruption, of embezzlement, of any kind of wrongdoing, that’s when we will move,” ang winika ng Pangulo.

“We cannot do all of this without the help of the ordinary citizen,” aniya pa rin, binigyang diin ni Pangulong Marcos na mas maraming mata, mas mabuti sa pagsusuri ng mga proyekto.

Kaya nga, hinikayat ni Pangulong Marcos ang mga mamamayang Filipino na maghain ng kanilang reklamo, feedback, at obserbasyon sa pamamagitan ng website, at tiniyak nito na “ako mismo… babasahin ko bawat isa.”

Samantala, ang paglulunsad ng reporting platform ay kasunod direktiba ng Pangulo sa kanyang ika-apat na State of the Nation Address para i-audit ang flood control projects habang nangako naman ang gobyerno na paghuhusayin ang transparency at siguraduhin ang accountability sa infrastructure spending. (Daris Jose)