NASAWI ang 55-anyos na ginang at ang dalaga niyang anak matapos barilin sila sa ulo ng jail officer ng Bureau of Jail Management and Penology (BJMP) na kalaunan ay nagbaril din sa sarili sa Valenzuela City, Miyerkules ng madaling araw.

Dead-on-the-spot ang biktimang si alyas “Lanie” at ang jail officer na si alyas “Mhel”, residente ng Calderon St. Sta Lucia, Novaliches, Quezon City habang naisugod pa sa Valenzuela City Medical Center ang 27-anyos na si alyas “Mary” subalit, namatay din habang nilalapatan ng lunas.

Sa isinumiteng ulat ina P/EMS Felix Viernes at P/SSg Regor Germedia kay Valenzuela police chief P/Col. Salvador Destura, Jr. dakong alas-2:45 ng madaling araw nang magkaroon ng mainitang pagtatalo sa pagitan ng mag-ina at ng suspek na may kaugnayan sa pagkakaroon ng relasyon ng lalaki sa isa pang anak na babae ng ginang na si alyas “Bernadette”.

Sa gitna ng kanilang pagtatalo, nagpumilit ang suspek na pumasok sa bahay ng mag-ina sa Navarrette St., Brgy. Arkong Bato subalit, pinigilan siya ng mga biktima na dahilan para sila barilin sa ulo ni “Mhel”.

Matapos ang pamamaril sa mag-ina, nagpasiya namang magbaril din sa kanyang sarili si “Mhel” na nagresulta ng agaran niyang kamatayan.

Agad namang nagresponde sa lugar ang mga tauhan ni  Polo Police Sub-Station-5 Commander P/Cpt. Robin Santos  na silang tumawag sa Valenzuela City Disaster Risk Reduction and Management Office (VCDRRMO) na nagdeklarang patay na ang ginang at ang suspek at sila ring nagdala kay “Mary” sa pagamutan. (Richard Mesa)

NASAKOTE ng pulisya ang suspek sa pagpatay sa 25-anyos na magaling sa larong bilyar habang nakikipag-inuman sa kanyang mga ka-tropa sa Malabon City.

Bukod kay alyas “Raffy”, 43, residente ng Dumpsite, Sitio 6, Brgy. Catmon, binitbit din nina P/Lt. Melanio Medel Valera III, Commander ng Malabon Police Sub-Station 4, ang kanyang kainuman na si alyas “Roque”, 31, nang pumapel at tinangkang pigilan ang mga pulis sa lehitimong operasyon.

Lumabas sa imbestigasyon nina P/SSg Bengie Nalogoc at P/SSg Michael Oben, nangyari ang insidente ng pagpatay habang naglalaro ng bilyar ang nasawing si alays ‘Kirk’ at 23-anyos na testigong si alyas “Jayson” noong Sabado ng gabi sa Pisaca Sitio 6, Brgy, Catmon.

Sa ulat, bigla na lamang sumulpot ang suspek na armado ng kalibre .45 baril at malapitang pinaputukan sa ulo ang biktima sa harap mismo ng kalaro niyang testigo. Naisugod pa ang biktima sa Ospital ng Malabon subalit, hindi rin ito umabot ng buhay.

Sa pahayag ng live-in partner ng biktima kay SSg. Nalogoc, bago nangyari ang pagpatay ay nanalo pa umano sa larong bilyar ang kanyang kinakasama pero humirit ang kalaro ng isa pa subalit, tinanggihan na ng biktima.

Dahil sa impormasyong ibinigay sa pulisya ng testigo na kalaro ng biktima, walang humpay na nagsagawa ng hot pursuit operation ang pulisya hanggang matunton ang suspek habang nakikipag-inuman sa Dumpsite Sitio 6 noong Linggo ng gabi na nagresulta sa kanyang pagkakadakip.

Araw ng Martes nang isampa na ng pulisya ang kasong murder laban sa suspek at obstruction of justice naman kay alyas Roque sa Malabon City Prosecutor’s Office habang isinailalim pa sa ballistic examination ang isang basyo ng bala ng kalibre .45 pistola na nakuha sa crime scene. (Richard Mesa)

Si Barbie ay nasa Valenzuela City! Para magbigay ng saya at inspirasyon sa mga bata, nakipagtulungan ang Lungsod ng Valenzuela sa Barbie Philippines upang ipagdiwang ang ika-65 Anibersaryo ni Barbie na may temang “Barbie Inspires”.

Kasabay nito ay ang anibersaryo ng jeepney caravan na nag-ikot naman sa mga lungsod sa Metro Manila saka nag-abot ng mga regalo at food packs sa mga kapus-palad na kabataan sa Barangay Marulas, katuwang ang tanggapan ni Konsehal Chiqui Carreon.

Sa araw ding iyon, isinagawa ng tanggapan ni Konsehal Chiqui ang taunang programa nitong “Chiquiting Day”, isang programa na naglalayong magbigay ng kagalakan at pampasigla sa mga bata, lalo na sa mga lugar na nalulumbay sa pamamagitan ng ilang masasayang laro at aktibidad.

May humigit-kumulang 220 na mga bata ang nagtipon sa Elysian Basketball Court at tumanggap ng mga laruan, Barbie novelty items, at food packs courtesy of Barbie Philippines at ang opisina ni Councilor Chiqui Carreon.

Sa pagdiriwang ng isang milestone sa kasaysayan nito, ginunita ng Barbie Philippines ang ika-65 anibersaryo nito sa pamamagitan ng pagbibigay kapangyarihan at pagbibigay inspirasyon sa mga bata mula sa mga mahihirap na lugar.

Aktibo namang sinusuportahan ng pamahalaang lungsod ang layuning ito at umaasang makapagbigay ng ngiti sa mga mukha ng mga bata sa kabila ng mga hamon sa ekonomiya na kanilang kinakaharap sa kasalukuyang.

Ang pamahalaang lungsod sa ilalim ng pamumuno ni Mayor Wes Gatchalian ay lubos na nagsisikap para bumalangkas at magpatupad ng mga programa at serbisyo na pakikinabangan ng mga kabataang Valenzuelano, lalo na para sa kanilang kapakanan. (Richard Mesa)

NAKIISA ang lungsod ng Navotas sa Kalinga at Inisyatiba Para sa Malinis na Bayan sa Bagong Pilipinas na inilunsad ng Department of the Interior and Local Government (DILG) at ni Pangulong Bongbong Marcos na naglalayong isulong ang bayanihan sa pagpapanatili ng kalinisan sa mga komunidad. Personal din na bumisita sa lungsod si DILG Secretary Benhur Abalos upang pangunahan ang programa, kasama si Mayor John Rey Tiangco. Nakilahok din sa programa ang mga mag-aaral at guro sa lungsod, gayundin ang mga opisyal at kawani ng pamahalaang lungsod at mga barangay, PNP, BFP, BJMP, MMDA, at mga volunteer group. (Richard Mesa)

PARA siguradihin na hindi na babahain sakaling may malakas na ulan at bagyo, nagdagdag pa ng pumping stations ang Navotas City, kasunod ng pagpapasinaya sa tatlo pa kung kaya umabot na sa 72 ang pumping station ng lungsod.

Pinangunahan nina Mayor John Rey Tiangco at Cong. Toby Tiangco ang blessing at inauguration ceremony sa tatlong pumping stations sa Judge Roldan St., Brgy., San Roque, Daanghari St., Brgy., Daanghari at Maliputo St., Brgy., NBBS Dagat-Dagatan.

“Noon, kapag nababanggit ang Navotas, bukod sa isda ay baha ang naiisip ng mga tao. Malaking perwisyo ang dulot nito dahil apektado di lang ang pang-araw-araw nating pamumuhay kundi pati ang ating kabuhayan at kalusugan. Kaya naman sinimulan ni Cong. Toby at tinuloy-tuloy natin ang pagtatayo ng mga pumping station para maiwasan ang pagbaha,” ani Mayor Tiangco.

“Pakiusap lang po na alagaan nating mabuti ang ating mga pumping station. Isipin natin na pag-aari natin ito. Kung ganyan tayo mag-isip, siguradong sisikapin nating parati itong maayos at gumagana,” dagdag niya.

Samantala, pinaalalahanan naman ni Cong. Tiangco ang mga Navoteños na maging responsable sa pagtatapon ng basura.

“Malaki po ang ambag ninyo para maiwasan natin ang pagbaha sa ating lungsod. Maayos na makakahigop ng tubig ang bombastik kung walang basurang nakabara dito. Kaya maging responsable po tayo sa pagtatapon ng basura,” sabi ni Cong. Tiangco.

Dumalo rin sa inagurasyon sina Vice Mayor Tito Sanchez, mga konsehal ng lungsod, barangay chairpersons, mga department of heads at mga tauhan ng Department of Public Works and Highways. (Richard Mesa)