SI Zoren Legaspi ang sinalang ni Carmina Villarroel sa segment ng ‘Sarap, Di’ Ba?’ last Saturday na Hot Seat.

Tinanong si Zoren na kung may gagawing movie si Mina at siya ang direktor, sino ang kukunin niyang aktor bilang leading man na dating na-link kay Mina?

Habang binabasa nga ni Carmina ang tanong, pabirong pinipikot nito ang tenga ni Zoren para maging maingat sa pagsagot.

“Na-link sa ‘yo?,” tanong ni Zoren na tila nag-isip kung sino ang babanggiting aktor.

Lalong kinabahan si Carmina nang sabihin ni Zoren na gusto niyang tatlo ang magiging leading man ng kanyang asawa sa naiisip niyang pelikula.

“Naalala n’yo yung ‘3 Men and A Baby’? Ito 3 Men and A Sweetheart.’ Ikaw, yung sweetheart,” sabi ni Zoren kay Carmina.

Kasunod nito ay tinukoy na ni Zoren ang mga magiging leading man ni Carmina: sina Smokey Manaloto, Keempee de Leon, at Piolo Pascual.

“Si Smokey sa comedy, si Keempee parang college-college, yung romance si Piolo,” sabi pa ni Zoren na ikinatuwa naman ni Mina.

Biro ni Carmina sa mister: “Humanda ka sa akin mamaya sa bahay. Pa-action-action star ang image, patay ka sa ‘kin.”

Sa isang episode noon ng ‘Sarap, ‘Di Ba?’, naungkat ang tungkol sa isang aktor na muntik nang makatuluyan ni Carmina na nasa “kabilang” network. Si Zoren pa mismo ang nagpaalala kay Mina tungkol sa aktor na iyon.

***

MATUTUPAD na ang isa sa mga matagal na pangarap ni Alden Richards na magkaroon ng pelikula kung saan siya rin ang producer, aktor at direktor.

“This is my first directorial job. May script na kami, may cast na kami, and excited ako for this. This is happening before Christmas,” masayang balita ni Alden.

Thankful naman si Alden sa narating ng pelikula nila ni Julia Montes na ‘Five Breakups and a Romance’. Umabot ng mahigit sa P60 million in gross sales ang pelikula at patunay lang na nagbabalik na ang audience sa mga sinehan.

“Sobrang worth it kasi lahat ng pagod namin, all of the producers, GMA, Cornerstone, and Myriad Entertainment, this is the fruit of it. This is the reward of it, and this goes to show talaga na ‘pag you work hand-in-hand with your partners; whatever your project is, or kung ano mang meron kayo na pinagtatrabahuhan, all together will prosper,” sey ni Alden na mapapanood kasama si Sharon Cuneta sa Metro Manila Film Fest entry na ‘Family of Two (A Mother and Son Story)’.

(RUEL J. MENDOZA)

NAKATAKDANG i-launch ng ABS-CBN ang tentpole co-production ng ‘The Bagman’ sa Asia TV Forum & Market (ATF) sa Singapore, kasama ang bida ng serye na si Cong. Arjo Atayde, na dadalo rin sa naturang event.

Sisimulan ang produksyon nito sa Enero 2024, ang eight-part action drama series na kung muling gagampan Arjo ang karakter na si Benjo Malaya na mula sa original digital series na ‘Bagman 1’ at ‘Bagman 2’, na ibinenta at naipalabas sa Netflix Philippines.

Ang spin-off ng mini series ay pinagbibidahan din nina John Arcilla, na nanalong Best Actor sa Venice film festival para sa ‘On The Job 2: The Missing 8’ ni Erik Matti, at Judy Ann Santos-Agoncillo, na nanalo namang Best Actress sa Cairo International Film Festival para sa ‘Mindanao’ ni Brillante Mendoza.

Kaabang-abang nga ang pagsasanib-puwersa nina Arjo at Judy Ann, kasama pa si John, siguradong bawat eksena nila ay tatatak sa manonood.

Ang bagong serye ay co-produced ng ABS-CBN International Productions, Nathan Studios, Rein Entertainment at Dreamscape Entertainment.

Makikita ang aktor sa booth ng ABS-CBN sa Disyembre 7 para i-promote ang ‘The Bagman’.

Ayon naman sa naging pahayag ni Ruel S. Bayani, ABS-CBN Head, International Productions, “As we continue to advocate for Filipino representation, we are thrilled to also be announcing the award-winning talent of Arjo, John, and Judy Ann who are now part of The Bagman.

“Filipino programming is continuing to grow and expand, and we are honored to be at the forefront in offering diverse new projects to meet the growing demands of the industry.”

Matatandaang naging bida rin ang Congressman ng QC sa hit crime thriller series ng ABS-CBN na ‘Cattleya Killer’ at mga pelikula kasama ang ‘BuyBust’ ni Matti at ‘Topakk (Trigger)’ ni Richard Somes, na nakapag-ikot na sa iba’t-ibang panig ng mundo. Kaya hindi pa ito naipalalabas sa bansa.

Sakto rin ito sa pagpunta ni Arjo sa Singapore, dahil sa December 6 naman magaganap ang Asian Academy Creative Awards 2023, na kung saan nominado siya uli for Best Actor para sa series na ‘Cattleya Killer’ na nominate din for Best Drama Series and Best Cinematography.

Samantala, palabas na ngayon ang action-packed film na ‘Silent Night’. Mula ito sa legendary and acclaimed director na si John Woo (‘Mission: Impossible 2’), at producer ng ‘John Wick na si Basil Iwanyk.

Starring Joel Kinnaman, Scott Mescudi, Harold Torres, and Catalina Sandino Moreno.

Ito ang ikalawang international films na binili ng Nathan Studios at 888 Films International para ipalabas sa Pilipinas ang ‘action thriller movie na may puso’.

(ROHN ROMULO)

FABULOUS, bonggang-bonggang naitawid ni Regine Velasquez ang pagiging rakista!

Unang beses pa lang naming narinig na may major concert ang Asia’s Songbird na ‘Regine Rocks’, aminado kami, nag-dalawang-isip kami.

Na, ‘Ha?’

Na, ‘Si Regine, at fifty-three, ay magra-rock and roll sa concert niya? Kaya ba niya?’

Well, walang duda, a-agree sa amin ang lahat ng taong pumuno, yes punumpuno, sa Mall of Asia Arena nitong Sabado ng gabi, November 25, na at 53, yes, Regine truly can rock!

Hindi kami fan ng mga rock songs, pero lahat ng kinanta ni Regine that night, naintindihan, nagustuhan at naka-relate kami.

Hindi namin kilala ang karamihan sa mga rock artists na kinober ni Regine ang mga awitin noong gabing iyon, pero okay lang, kasi ang napanood namin ay hindi sila, kundi si Regine, the rock artist.

Ang husay rin naman kasi ng lola niyo sa mga rock songs, pati sa mga outfit-an niya ni Michael Leyva, sa kanyang makeup at itim na nail polish, hanggang siyempre sa headbanging, yes nag-headbang ang Songbird, hanggang sa mga pakiwal-kiwal at pahampas-hampas ng katawan niya at paglulupasay sa sahig ng stage like a true blue rockstar!

Pero kahit rock concert, naka-segue si regine ng “You Made Me Stronger” na iniba ni Raul Mitra ang areglo at isa sa most applauded songs that night.

At naman, mayanig-yanig ang Arena noong tirahin na ni Regine ang “I Don’t Wanna Miss A Thing”, nagdusa na ng todo ang eardrums namin sa tilian at palakpakan ng Reginians na lumusob sa venue kesehodang trapik (kailan ba hindi) at maulan ang gabi.

Of course hindi mawawala ang kaswal na hirit ni Regine na tuwi-tuwina ay kuwela sa mga tao, tulad ng eksenang hindi siya makatayo mula sa pagkakasalampak niya sa sahig ng stage dahil aniya’y ‘Rayuma is real!”, hanggang sa birong-totoo niya ng pagrereklamo kay Raul na pagpapakanta sa kanya ng rock songs na hataw kaya tiyak daw niya na kinabukasan ay masakit ang katawan niya at puro siya pasa dahil nga sa galawang rockstar kinarir niya sa gabing iyon.

Nga pala, napakabongga naman na bawat silya sa Arena, yes kahit ang pinakamurang tickets sa pinakatuktok ng Arena ay may libreng light sticks na may nakasulat na “Regine Rocks”.

Surreal ang pag-iiba-iba ng ilaw mula sa green, blue, white at red ng mga light sticks na kinu-kontrol ng in-charge sa sounds and lights.

Ang ganda tuloy ng buong Arena kapag sabay-sabay na ang paandar ng changing of lights… pasabog!

Kasi nga, Regine Rocks!

May portion kung saan may tila pa-tribute si Regine sa mister niyang si Ogie Alcasid na ayon sa kanya ay “We’ve been together for twenty years,” at noong ipokus si Ogie sa audience ay natiyempuhan ito ng kamera na nagpupunas ng luha.

Guest ng Songbird sina Yeng Constantino, Klarisse de Guzman, Morisette Amon at Jona na sa ganang amin ay pinakamahusay sa apat na guests.

Pero kahit na anong taas ng birit ng mga ate niyo, wala pa ring duda, si Regine pa rin ang reyna.

Kasi nga, Regine Rocks!

At siyempre, kudos sa stage directors ni Regine na sina Paolo Valenciano at ang kapatid ni Regine na si Cacai Velasquez Mitra, at kay De Roque na hindi kami binibigo tuwing may request kami sa kanya.

Kasi nga, Regine Rocks!