HINIKAYAT ni Pangulong Ferdinand Marcos Jr. ang mga pinoy na maghanda para sa pagpapatuloy ng face-to-face classes sa huling buwan ng Agosto.

Sa kanyang lingguhang  vlog, sinabi ng Pangulo na  dapat ay may sapat na proteksyon ang publiko laban COVID-19 bago pa ang inaasahang pagdagsa ng mga estudyante sa mga eskuwelahan.

“Una riyan ‘yung panigurong nakapag-booster shot na ang lahat lalong lalo na ang ating mga kabataan para siguradong handa ang pangangatawan nila sa pagbabalik eskuwela,” ayon kay Pangulong Marcos.

“Hindi man ito magiging ganun kasimple, pero kapag tama ang paghahanda ay siguradong magiging matagumpay ito,”aniya pa rin .

Hindi naman nilinaw ng Pangulo kung ang pagbabakuna laban sa COVID-19 ay  requirement para sa mga estudyante subalit sinabi naman ng Department of Education na hindi idi-discriminate ang mga mag-aaral na hanggang sa ngayon ay hindi pa rin nagpapabakuna laban sa coronavirus.

“So far only 15.9 million Filipinos have availed of their first booster shots, while 1.2 million others have already been jabbed with COVID-19 boosters twice,” ayon sa Pangulo.

“Hindi pa ito magandang numero kumpara sa target natin na 100 percent kaya tayo magsasawa na pakiusapan ang ating mga LGU na mahing mas agresibo dito sa kampanyang ito,” aniya pa rin .

Tinatayang may 15.2 milyong estudyante ang nage-enroll para sa pagsisimula ng school year.

Ani Pangulong Marcos, maraming tao ang makikinabang sa pagbabalik ng physical classes matapos ang 2 taon ng  virtual learning.

“Kailangan din ng mga estudyante ng mga school supplies at materyales. Isama mo na ‘yung pagkain kaya’t ang ating retail industry ay may karagdagang influx din ng salapi,” ani Pangulong Marcos.

Marami ring mga magulang ang mas magkakaroon ng oras makapag-hanapbuhay kapag nasa eskuwelahan na ang kanilang mga anak kaya madadagdagan ang ating workforce at mas marami rin silang magiging option sa pagpili ng trabaho dahil hindi na sila limitado sa online,” aniya pa rin.

“Kapag ito ay naging matagumpay, hindi lang ito balik eskuwela, kung di balik negosyo? Balik hanapbuhay at balik kaunlaran,”pahayag ng Punong Ehekutibo.

Pinaalalahanan naman nito ang public transportation na tiyakin na maipatutupad ang minimum health at safety protocols sa kani-kanilang sasakyan.

“Ito’y masasabi ring malaking tulong sa malawakang kilusan natin nang pagbubukas ng ekonomiya,” ayon kay Pangulong Marcos.

“Maraming industriya ang magiging bahagi at makikinabang sa hakbang na ito kung kaya’t dapat siguruhin natin na ang lahat ay handang handa,” anito .

Tinapos naman ni Pangulong Marcos ang kanyang vlog sa pagbibigay pagpapaalala sa publiko hinggil sa pagdiriwang ng  Buwan ng Wika o National Language Month. (BISHOP JESUS “JEMBA” M. BASCO)

LUNGSOD NG MALOLOS – Bilang isa sa People’s Agenda 10 ni Gobernador Daniel R. Fernando, naging episyente at epektibo ang pagpapatupad ng universal health care o kalusugan para sa lahat kung kaya naman kinilala ang mga natatanging lokal na pamahalaan at ilang indibidwal sa larangan ng nutrisyon kasabay ng panapos na gawain para sa ika-48 na selebrasyon ng Buwan ng Nutrisyon na isinagawa sa pamamagitan ng Zoom teleconferencing noong Hulyo 29, 2022.

Ang mga nagwagi sa municipal level ay nakapagpatupad ng pinakamahusay na programa para sa kanilang mga nasasakupan dahilan ng kanilang pagkakapanalo sa kategoryang ‘Natatanging Bayan sa Nutrisyon’ kung saan kabilang ang bayan ng Guiguinto na nagwagi ng unang pwesto at nag-uwi ng P100,000; Marilao sa ikalawang pwesto na may premyong P75,000 at bayan ng Baliwag sa ikatlong pwesto na may premyong P50,000. Lahat sila ay tumanggap ng plake ng pagkilala.

Ipinamalas din ng mga komunidad o barangay sa lalawigan ang kanilang mahuhusay na programa sa nutrisyon kung saan ang mga nanalo para sa ‘Natatanging Barangay sa Nutrisyon’ na binubuo ng Brgy. San Jose, Paombong – unang pwesto at nag-uwi ng premyong P30,000; Brgy. Lias, Marilao – ikalawang pwesto na may premyong P20,000 at Brgy. San Agustin, San Rafael – ikatlong puwesto na may premyong P10,000 at plake ng pagkilala bawat isa. Tumanggap rin ang 19 na barangay ng consolation prize na nagkakahalaga ng P3,000 bawat isa.

Bukod dito, binigyan din ng parangal ang mga indibidwal na nagpakita ng mga natatanging serbisyo sa kanilang mga komunidad na may kaugnayan sa pagpapatupad ng mga programa sa nutrisyon kabilang na sina Josefina J. Joaquin mula sa Guiguinto, Bulacan na nanalo ng parangal na ‘Natatanging Municipal Nutrition Action Officer’ at Imelda Lopez mula sa Brgy. San Jose, Paombong na kinilala bilang ‘Natatanging Lingkod Lingap sa Nutrisyon’. Kapwa sila ay tumanggap ng premyong P5,000 habang 21 pang LLN ang tumanggap ng consolation prizes na nagkakahalagang P2,000 bawat isa.

Dagdag pa rito, tumanggap din sina Miguela Avendaño mula sa Brgy. Masuso, Pandi at Ofelia De Belen mula sa Brgy. Bagong Barrio, San Ildefonso ng premyonh P3,000 bawat isa bilang ‘Long Serving Lingkod Lingap sa Nayon’.

Tatlong kawani rin mula sa Pamahalaang Panlalawigan ng Bulacan na sina Reynela Mae Abayon mula sa Provincial Disaster Risk Reduction and Management Office, Mary Jane Sarboda mula sa Bulacan Environment and Natural Resources Office at Maria Cronica De Jesus mula sa Provincial Public Affairs Office ang tumanggap ng pagkilala bilang ‘Long Serving Technical Working Group’ na may perang papremyo na nagkakahalaga ng P5,000 bawat isa.

Samantala, binigyang-diin ni Fernando, tagapangulo ng Provincial Nutrition Council, ang kahalagahan ng nutrisyon at hinikayat ang lahat na lumahok at tumulong sa pagsusulong ng mga programa sa nutrisyon na ipinatutupad ng Pamahalaang Panlalawigan ng Bulacan sa pamamagitan ng Provincial Social Welfare and Development Office.

“Ang nutrisyon ay isa sa pangunahing prayoridad ng Pamahalaang Panlalawigan; hindi ito dapat ipagsawalang bahala subalit sakop nito hindi lamang ang ating pisikal kundi maging ang ating mental na kalusugan na maituturing nating yaman ng ating pagkatao. Sa pagtutulungan nating lahat, kasama na pati ang ibang mga sektor, nanawagan ako na isulong natin ang adbokasiya ng mabuting nutrisyon hindi lamang tuwing Buwan ng Nutrisyon,” anang gobernador. (BISHOP JESUS “JEMBA” M. BASCO)